१-२. कामभोगीसुत्तादिवण्णना

९१-९२. पञ्चमस्स पठमे साहसेनाति साहसियकम्मेन. दुतिये भयानीति चित्तुत्रासभयानि. वेरानीति अकुसलवेरपुग्गलवेरानि. अरियो चस्स ञायोति सह विपस्सनाय मग्गो. इति इमस्मिं सति इदं होतीति एवं इमस्मिं अविज्जादिके कारणे सति इदं सङ्खारादिकं फलं होति. इमस्सुप्पादा इदं उप्पज्जतीति यो यस्स सहजातपच्चयो होति, तस्स उप्पादा इतरं उप्पज्जति नाम. इमस्मिं असतीति अविज्जादिके कारणे असति सङ्खारादिकं फलं न होति. इमस्स निरोधाति कारणस्स अप्पवत्तिया फलस्स अप्पवत्ति होति.