३. कायसुत्तवण्णना

२३. ततिये आपन्नो होति कञ्चिदेव देसन्ति कञ्चि आपत्तिकोट्ठासं आपन्नो होति. अनुविच्चाति अनुपविसित्वा परियोगाहेत्वा. कायदुच्चरितन्ति तिविधं कायदुच्चरितं. वचीदुच्चरितन्ति चतुब्बिधं वचीदुच्चरितं. पापिका इस्साति लामिका उसूया. पञ्ञाय दिस्वाति सहविपस्सनाय मग्गपञ्ञाय पस्सित्वा पस्सित्वा पहातब्बा. इज्झतीति समिज्झति. उपवासस्साति निस्साय उपसङ्कमित्वा वसन्तस्स. अभिभुय्याति अज्झोत्थरित्वा मद्दित्वा. इरीयतीति वत्तति. इमस्मिं सुत्ते सहविपस्सनाय मग्गो कथितो.