४. पच्चुप्पन्नातीतवारो

(क) अनुलोमं

४५९. (क) यो चक्खुन्द्रियं परिजानाति सो दोमनस्सिन्द्रियं पजहित्थाति? आमन्ता.

(ख) यो वा पन दोमनस्सिन्द्रियं पजहित्थ सो चक्खुन्द्रियं परिजानातीति?

द्वे पुग्गला दोमनस्सिन्द्रियं पजहित्थ, नो च चक्खुन्द्रियं परिजानन्ति. अग्गमग्गसमङ्गी दोमनस्सिन्द्रियञ्च पजहित्थ चक्खुन्द्रियञ्च परिजानन्ति.

(क) यो चक्खुन्द्रियं परिजानाति सो अनञ्ञातञ्ञस्सामीतिन्द्रियं भावित्थाति? आमन्ता.

(ख) यो वा पन अनञ्ञातञ्ञस्सामीतिन्द्रियं भावित्थ सो चक्खुन्द्रियं परिजानातीति?

छ पुग्गला अनञ्ञातञ्ञस्सामीतिन्द्रियं भावित्थ, नो च चक्खुन्द्रियं परिजानन्ति. अग्गमग्गसमङ्गी अनञ्ञातञ्ञस्सामीतिन्द्रियञ्च भावित्थ चक्खुन्द्रियञ्च परिजानाति.

(क) यो चक्खुन्द्रियं परिजानाति सो अञ्ञिन्द्रियं भावित्थाति? नो.

(ख) यो वा पन अञ्ञिन्द्रियं भावित्थ सो चक्खुन्द्रियं परिजानातीति? नो.

(क) यो चक्खुन्द्रियं परिजानाति सो अञ्ञाताविन्द्रियं सच्छिकरित्थाति? नो.

(ख) यो वा पन अञ्ञाताविन्द्रियं सच्छिकरित्थ सो चक्खुन्द्रियं परिजानातीति? नो. (चक्खुन्द्रियमूलकं)

४६०. (क) यो दोमनस्सिन्द्रियं पजहति सो अनञ्ञातञ्ञस्सामीतिन्द्रियं भावित्थाति? आमन्ता.

(ख) यो वा पन अनञ्ञातञ्ञस्सामीतिन्द्रियं भावित्थ सो दोमनस्सिन्द्रियं पजहतीति?

छ पुग्गला अनञ्ञातञ्ञस्सामीतिन्द्रियं भावित्थ, नो च दोमनस्सिन्द्रियं पजहन्ति. अनागामिमग्गसमङ्गी अनञ्ञातञ्ञस्सामीतिन्द्रियञ्च भावित्थ दोमनस्सिन्द्रियञ्च पजहति.

(क) यो दोमनस्सिन्द्रियं पजहति सो अञ्ञिन्द्रियं भावित्थाति? नो.

(ख) यो वा पन अञ्ञिन्द्रियं भावित्थ सो दोमनस्सिन्द्रियं पजहतीति? नो.

(क) यो दोमनस्सिन्द्रियं पजहति सो अञ्ञाताविन्द्रियं सच्छिकरित्थाति? नो.

(ख) यो वा पन अञ्ञाताविन्द्रियं सच्छिकरित्थ सो दोमनस्सिन्द्रियं पजहतीति? नो. (दोमनस्सिन्द्रियमूलकं)

४६१. (क) यो अनञ्ञातञ्ञस्सामीतिन्द्रियं भावेति सो अञ्ञिन्द्रियं भावित्थाति? नो.

(ख) यो वा पन अञ्ञिन्द्रियं भावित्थ सो अनञ्ञातञ्ञस्सामीतिन्द्रियं भावेतीति? नो.

(क) यो अनञ्ञातञ्ञस्सामीतिन्द्रियं भावेति सो अञ्ञाताविन्द्रियं सच्छिकरित्थाति? नो.

(ख) यो वा पन अञ्ञाताविन्द्रियं सच्छिकरित्थ सो अनञ्ञातञ्ञस्सामीतिन्द्रियं भावेतीति? नो. (अनञ्ञातञ्ञस्सामीतिन्द्रियमूलकं)

४६२. (क) यो अञ्ञिन्द्रियं भावेति सो अञ्ञाताविन्द्रियं सच्छिकरित्थाति? नो.

(ख) यो वा पन अञ्ञाताविन्द्रियं सच्छिकरित्थ सो अञ्ञिन्द्रियं भावेतीति? नो. (अञ्ञिन्द्रियमूलकं)

(ख) पच्चनीकं

४६३. (क) यो चक्खुन्द्रियं न परिजानाति सो दोमनस्सिन्द्रियं नप्पजहित्थाति?

द्वे पुग्गला चक्खुन्द्रियं न परिजानन्ति, नो च दोमनस्सिन्द्रियं नप्पजहित्थ. छ पुग्गला चक्खुन्द्रियञ्च न परिजानन्ति दोमनस्सिन्द्रियञ्च नप्पजहित्थ.

(ख) यो वा पन दोमनस्सिन्द्रियं नप्पजहित्थ सो चक्खुन्द्रियं न परिजानातीति? आमन्ता.

(क) यो चक्खुन्द्रियं न परिजानाति सो अनञ्ञातञ्ञस्सामीतिन्द्रियं न भावित्थाति?

छ पुग्गला चक्खुन्द्रियं न परिजानन्ति, नो च अनञ्ञातञ्ञस्सामीतिन्द्रियं न भावित्थ. द्वे पुग्गला चक्खुन्द्रियञ्च न परिजानन्ति अनञ्ञातञ्ञस्सामीतिन्द्रियञ्च न भावित्थ.

(ख) यो वा पन अनञ्ञातञ्ञस्सामीतिन्द्रियं न भावित्थ सो चक्खुन्द्रियं न परिजानातीति? आमन्ता.

(क) यो चक्खुन्द्रियं न परिजानाति सो अञ्ञिन्द्रियं न भावित्थाति?

अरहा चक्खुन्द्रियं न परिजानाति, नो च अञ्ञिन्द्रियं न भावित्थ. सत्त पुग्गला चक्खुन्द्रियञ्च न परिजानन्ति अञ्ञिन्द्रियञ्च न भावित्थ.

(ख) यो वा पन अञ्ञिन्द्रियं न भावित्थ सो चक्खुन्द्रियं न परिजानातीति?

अग्गमग्गसमङ्गी अञ्ञिन्द्रियं न भावित्थ, नो च चक्खुन्द्रियं न परिजानाति. सत्त पुग्गला अञ्ञिन्द्रियञ्च न भावित्थ चक्खुन्द्रियञ्च न परिजानन्ति.

(क) यो चक्खुन्द्रियं न परिजानाति सो अञ्ञाताविन्द्रियं न सच्छिकरित्थाति?

अरहा चक्खुन्द्रियं न परिजानाति, नो च अञ्ञाताविन्द्रियं न सच्छिकरित्थ. अट्ठ पुग्गला चक्खुन्द्रियञ्च न परिजानन्ति अञ्ञाताविन्द्रियञ्च न सच्छिकरित्थ.

(ख) यो वा पन अञ्ञाताविन्द्रियं न सच्छिकरित्थ सो चक्खुन्द्रियं न परिजानातीति?

अग्गमग्गसमङ्गी अञ्ञाताविन्द्रियं न सच्छिकरित्थ, नो च चक्खुन्द्रियं न परिजानाति. अट्ठ पुग्गला अञ्ञाताविन्द्रियञ्च न सच्छिकरित्थ चक्खुन्द्रियञ्च न परिजानन्ति. (चक्खुन्द्रियमूलकं)

४६४. (क) यो दोमनस्सिन्द्रियं नप्पजहति सो अनञ्ञातञ्ञस्सामीतिन्द्रियं न भावित्थाति?

छ पुग्गला दोमनस्सिन्द्रियं नप्पजहन्ति, नो च अनञ्ञातञ्ञस्सामीतिन्द्रियं न भावित्थ. द्वे पुग्गला दोमनस्सिन्द्रियञ्च नप्पजहन्ति अनञ्ञातञ्ञस्सामीतिन्द्रियञ्च न भावित्थ.

(ख) यो वा पन अनञ्ञातञ्ञस्सामीतिन्द्रियं न भावित्थ सो दोमनस्सिन्द्रियं नप्पजहतीति? आमन्ता.

(क) यो दोमनस्सिन्द्रियं नप्पजहति सो अञ्ञिन्द्रियं न भावित्थाति?

अरहा दोमनस्सिन्द्रियं नप्पजहति, नो च अञ्ञिन्द्रियं न भावित्थ. सत्त पुग्गला दोमनस्सिन्द्रियञ्च नप्पजहन्ति अञ्ञिन्द्रियञ्च न भावित्थ.

(ख) यो वा पन अञ्ञिन्द्रियं न भावित्थ सो दोमनस्सिन्द्रियं नप्पजहतीति?

अनागामिमग्गसमङ्गी अञ्ञिन्द्रियं न भावित्थ, नो च दोमनस्सिन्द्रियं नप्पजहति. सत्त पुग्गला अञ्ञिन्द्रियञ्च न भावित्थ दोमनस्सिन्द्रियञ्च नप्पजहन्ति.

(क) यो दोमनस्सिन्द्रियं नप्पजहति सो अञ्ञाताविन्द्रियं न सच्छिकरित्थाति?

अरहा दोमनस्सिन्द्रियं नप्पजहति, नो च अञ्ञाताविन्द्रियं न सच्छिकरित्थ. अट्ठ पुग्गला दोमनस्सिन्द्रियञ्च नप्पजहन्ति अञ्ञाताविन्द्रियञ्च न सच्छिकरित्थ.

(ख) यो वा पन अञ्ञाताविन्द्रियं न सच्छिकरित्थ सो दोमनस्सिन्द्रियं नप्पजहतीति?

अनागामिमग्गसमङ्गी अञ्ञाताविन्द्रियं न सच्छिकरित्थ, नो च दोमनस्सिन्द्रियं नप्पजहति. अट्ठ पुग्गला अञ्ञाताविन्द्रियञ्च न सच्छिकरित्थ दोमनस्सिन्द्रियञ्च नप्पजहन्ति. (दोमनस्सिन्द्रियमूलकं)

४६५. (क) यो अनञ्ञातञ्ञस्सामीतिन्द्रियं न भावेति सो अञ्ञिन्द्रियं न भावित्थाति?

अरहा अनञ्ञातञ्ञस्सामीतिन्द्रियं न भावेति, नो च अञ्ञिन्द्रियं न भावित्थ. सत्त पुग्गला अनञ्ञातञ्ञस्सामीतिन्द्रियञ्च न भावेन्ति अञ्ञिन्द्रियञ्च न भावित्थ.

(ख) यो वा पन अञ्ञिन्द्रियं न भावित्थ सो अनञ्ञातञ्ञस्सामीतिन्द्रियं न भावेतीति?

अट्ठमको अञ्ञिन्द्रियं न भावित्थ, नो च अनञ्ञातञ्ञस्सामीतिन्द्रियं न भावेति. सत्त पुग्गला अञ्ञिन्द्रियञ्च न भावित्थ अनञ्ञातञ्ञस्सामीतिन्द्रियञ्च न भावेन्ति.

(क) यो अनञ्ञातञ्ञस्सामीतिन्द्रियं न भावेति सो अञ्ञाताविन्द्रियं न सच्छिकरित्थाति?

अरहा अनञ्ञातञ्ञस्सामीतिन्द्रियं न भावेति, नो च अञ्ञाताविन्द्रियं न सच्छिकरित्थ. अट्ठ [सत्त (सी. स्या. क.)] पुग्गला अनञ्ञातञ्ञस्सामीतिन्द्रियञ्च न भावेन्ति अञ्ञाताविन्द्रियञ्च न सच्छिकरित्थ.

(ख) यो वा पन अञ्ञाताविन्द्रियं न सच्छिकरित्थ सो अनञ्ञातञ्ञस्सामीतिन्द्रियं न भावेतीति?

अट्ठमको अञ्ञाताविन्द्रियं न सच्छिकरित्थ, नो च अनञ्ञातञ्ञस्सामीतिन्द्रियं न भावेति. अट्ठ पुग्गला अञ्ञाताविन्द्रियञ्च न सच्छिकरित्थ अनञ्ञातञ्ञस्सामीतिन्द्रियञ्च न भावेन्ति. (अनञ्ञातञ्ञस्सामीतिन्द्रियमूलकं)

४६६. (क) यो अञ्ञिन्द्रियं न भावेति सो अञ्ञाताविन्द्रियं न सच्छिकरित्थाति?

अरहा अञ्ञिन्द्रियं न भावेति, नो च अञ्ञाताविन्द्रियं न सच्छिकरित्थ. छ [पञ्च (सी. स्या. क.)] पुग्गला अञ्ञिन्द्रियञ्च न भावेन्ति अञ्ञाताविन्द्रियञ्च न सच्छिकरित्थ.

(ख) यो वा पन अञ्ञाताविन्द्रियं न सच्छिकरित्थ सो अञ्ञिन्द्रियं न भावेतीति?

तयो मग्गसमङ्गिनो अञ्ञाताविन्द्रियं न सच्छिकरित्थ, नो च अञ्ञिन्द्रियं न भावेन्ति. छ [पञ्च (सी. स्या. क.)] पुग्गला अञ्ञाताविन्द्रियञ्च न सच्छिकरित्थ अञ्ञिन्द्रियञ्च न भावेन्ति. (अञ्ञिन्द्रियमूलकं)