३. अनागतवारो

(क) अनुलोमं

४५१. (क) यो चक्खुन्द्रियं परिजानिस्सति सो दोमनस्सिन्द्रियं पजहिस्सतीति?

द्वे पुग्गला चक्खुन्द्रियं परिजानिस्सन्ति, नो च दोमनस्सिन्द्रियं पजहिस्सन्ति. पञ्च पुग्गला चक्खुन्द्रियञ्च परिजानिस्सन्ति दोमनस्सिन्द्रियञ्च पजहिस्सन्ति.

(ख) यो वा पन दोमनस्सिन्द्रियं पजहिस्सति सो चक्खुन्द्रियं परिजानिस्सतीति? आमन्ता.

(क) यो चक्खुन्द्रियं परिजानिस्सति सो अनञ्ञातञ्ञस्सामीतिन्द्रियं भावेस्सतीति?

छ पुग्गला चक्खुन्द्रियं परिजानिस्सन्ति, नो च अनञ्ञातञ्ञस्सामीतिन्द्रियं भावेस्सन्ति. ये पुथुज्जना मग्गं पटिलभिस्सन्ति ते चक्खुन्द्रियञ्च परिजानिस्सन्ति अनञ्ञातञ्ञस्सामीतिन्द्रियञ्च भावेस्सन्ति.

(ख) यो वा पन अनञ्ञातञ्ञस्सामीतिन्द्रियं भावेस्सति सो चक्खुन्द्रियं परिजानिस्सतीति? आमन्ता.

(क) यो चक्खुन्द्रियं परिजानिस्सति सो अञ्ञिन्द्रियं भावेस्सतीति? आमन्ता.

(ख) यो वा पन अञ्ञिन्द्रियं भावेस्सति सो चक्खुन्द्रियं परिजानिस्सतीति? आमन्ता.

(क) यो चक्खुन्द्रियं परिजानिस्सति सो अञ्ञाताविन्द्रियं सच्छिकरिस्सतीति? आमन्ता.

(ख) यो वा पन अञ्ञाताविन्द्रियं सच्छिकरिस्सति सो चक्खुन्द्रियं परिजानिस्सतीति?

अग्गमग्गसमङ्गी अञ्ञाताविन्द्रियं सच्छिकरिस्सति, नो च चक्खुन्द्रियं परिजानिस्सति. सत्त पुग्गला अञ्ञाताविन्द्रियञ्च सच्छिकरिस्सन्ति चक्खुन्द्रियञ्च परिजानिस्सन्ति. (चक्खुन्द्रियमूलकं)

४५२. (क) यो दोमनस्सिन्द्रियं पजहिस्सति सो अनञ्ञातञ्ञस्सामीतिन्द्रियं भावेस्सतीति?

चत्तारो पुग्गला दोमनस्सिन्द्रियं पजहिस्सन्ति, नो च अनञ्ञातञ्ञस्सामीतिन्द्रियं भावेस्सन्ति. ये पुथुज्जना मग्गं पटिलभिस्सन्ति ते दोमनस्सिन्द्रियञ्च पजहिस्सन्ति अनञ्ञातञ्ञस्सामीतिन्द्रियञ्च भावेस्सन्ति.

(ख) यो वा पन अनञ्ञातञ्ञस्सामीतिन्द्रियं भावेस्सति सो दोमनस्सिन्द्रियं पजहिस्सतीति? आमन्ता.

(क) यो दोमनस्सिन्द्रियं पजहिस्सति सो अञ्ञिन्द्रियं भावेस्सतीति? आमन्ता.

(ख) यो वा पन अञ्ञिन्द्रियं भावेस्सति सो दोमनस्सिन्द्रियं पजहिस्सतीति?

द्वे पुग्गला अञ्ञिन्द्रियं भावेस्सन्ति नो च दोमनस्सिन्द्रियं पजहिस्सन्ति, पञ्च पुग्गला अञ्ञिन्द्रियञ्च भविस्सन्ति दोमनस्सिन्द्रियञ्च पजहिस्सन्ति.

(क) यो दोमनस्सिन्द्रियं पजहिस्सति सो अञ्ञाताविन्द्रियं सच्छिकरिस्सतीति? आमन्ता.

(ख) यो वा पन अञ्ञाताविन्द्रियं सच्छिकरिस्सति सो दोमनस्सिन्द्रियं पजहिस्सतीति?

तयो पुग्गला अञ्ञाताविन्द्रियं सच्छिकरिस्सन्ति, नो च दोमनस्सिन्द्रियं पजहिस्सन्ति. पञ्च पुग्गला अञ्ञाताविन्द्रियञ्च सच्छिकरिस्सन्ति दोमनस्सिन्द्रियञ्च पजहिस्सन्ति. (दोमनस्सिन्द्रियमूलकं)

४५३. (क) यो अनञ्ञातञ्ञस्सामीतिन्द्रियं भावेस्सति सो अञ्ञिन्द्रियं भावेस्सतीति? आमन्ता.

(ख) यो वा पन अञ्ञिन्द्रियं भावेस्सति सो अनञ्ञातञ्ञस्सामीतिन्द्रियं भावेस्सतीति?

छ पुग्गला अञ्ञिन्द्रियं भावेस्सन्ति, नो च अनञ्ञातञ्ञस्सामीतिन्द्रियं भावेस्सन्ति. ये पुथुज्जना मग्गं पटिलभिस्सन्ति ते अञ्ञिन्द्रियञ्च भावेस्सन्ति अनञ्ञातञ्ञस्सामीतिन्द्रियञ्च भावेस्सन्ति.

(क) यो अनञ्ञातञ्ञस्सामीतिन्द्रियं भावेस्सति सो अञ्ञाताविन्द्रियं सच्छिकरिस्सतीति? आमन्ता.

(ख) यो वा पन अञ्ञाताविन्द्रियं सच्छिकरिस्सति सो अनञ्ञातञ्ञस्सामीतिन्द्रियं भावेस्सतीति?

सत्त पुग्गला अञ्ञाताविन्द्रियं सच्छिकरिस्सन्ति, नो च अनञ्ञातञ्ञस्सामीतिन्द्रियं भावेस्सन्ति. ये पुथुज्जना मग्गं पटिलभिस्सन्ति ते अञ्ञाताविन्द्रियञ्च सच्छिकरिस्सन्ति अनञ्ञातञ्ञस्सामीतिन्द्रियञ्च भावेस्सन्ति. (अनञ्ञातञ्ञस्सामीतिन्द्रियमूलकं)

४५४. (क) यो अञ्ञिन्द्रियं भावेस्सति सो अञ्ञाताविन्द्रियं सच्छिकरिस्सतीति? आमन्ता.

(ख) यो वा पन अञ्ञाताविन्द्रियं सच्छिकरिस्सति सो अञ्ञिन्द्रियं भावेस्सतीति?

अग्गमग्गसमङ्गी अञ्ञाताविन्द्रियं सच्छिकरिस्सन्ति, नो च अञ्ञिन्द्रियं भावेस्सन्ति. सत्त पुग्गला अञ्ञाताविन्द्रियञ्च सच्छिकरिस्सन्ति अञ्ञिन्द्रियञ्च भावेस्सन्ति. (अञ्ञिन्द्रियमूलकं)

(ख) पच्चनीकं

४५५. (क) यो चक्खुन्द्रियं न परिजानिस्सति सो दोमनस्सिन्द्रियं नप्पजहिस्सतीति? आमन्ता.

(ख) यो वा पन दोमनस्सिन्द्रियं नप्पजहिस्सति सो चक्खुन्द्रियं न परिजानिस्सतीति?

द्वे पुग्गला दोमनस्सिन्द्रियं नप्पजहिस्सन्ति, नो च चक्खुन्द्रियं न परिजानिस्सन्ति. तयो पुग्गला दोमनस्सिन्द्रियञ्च नप्पजहिस्सन्ति चक्खुन्द्रियञ्च न परिजानिस्सन्ति.

(क) यो चक्खुन्द्रियं न परिजानिस्सति सो अनञ्ञातञ्ञस्सामीतिन्द्रियं न भावेस्सतीति. आमन्ता.

(ख) यो वा पन अनञ्ञातञ्ञस्सामीतिन्द्रियं न भावेस्सति सो चक्खुन्द्रियं न परिजानिस्सतीति.

छ पुग्गला अनञ्ञातञ्ञस्सामीतिन्द्रियं न भावेस्सन्ति, नो च चक्खुन्द्रियं न परिजानिस्सन्ति. तयो पुग्गला अनञ्ञातञ्ञस्सामीतिन्द्रियञ्च न भावेस्सन्ति चक्खुन्द्रियञ्च न परिजानिस्सन्ति.

(क) यो चक्खुन्द्रियं न परिजानिस्सति सो अञ्ञिन्द्रियं न भावेस्सतीति? आमन्ता.

(ख) यो वा पन अञ्ञिन्द्रियं न भावेस्सति सो चक्खुन्द्रियं न परिजानिस्सतीति? आमन्ता.

(क) यो चक्खुन्द्रियं न परिजानिस्सति सो अञ्ञाताविन्द्रियं न सच्छिकरिस्सतीति?

अग्गमग्गसमङ्गी चक्खुन्द्रियं न परिजानिस्सति, नो च अञ्ञाताविन्द्रियं न सच्छिकरिस्सति. द्वे पुग्गला चक्खुन्द्रियञ्च न परिजानिस्सन्ति अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो चक्खुन्द्रियं न परिजानिस्सतीति? आमन्ता. (चक्खुन्द्रियमूलकं)

४५६. (क) यो दोमनस्सिन्द्रियं नप्पजहिस्सति सो अनञ्ञातञ्ञस्सामीतिन्द्रियं न भावेस्सतीति? आमन्ता.

(ख) यो वा पन अनञ्ञातञ्ञस्सामीतिन्द्रियं न भावेस्सति सो दोमनस्सिन्द्रियं नप्पजहिस्सतीति?

चत्तारो पुग्गला अनञ्ञातञ्ञस्सामीतिन्द्रियं न भावेस्सन्ति, नो च दोमनस्सिन्द्रियं नप्पजहिस्सन्ति. पञ्च पुग्गला अनञ्ञातञ्ञस्सामीतिन्द्रियञ्च न भावेस्सन्ति दोमनस्सिन्द्रियञ्च नप्पजहिस्सन्ति.

(क) यो दोमनस्सिन्द्रियं नप्पजहिस्सति सो अञ्ञिन्द्रियं न भावेस्सतीति?

द्वे पुग्गला दोमनस्सिन्द्रियं नप्पजहिस्सन्ति, नो च अञ्ञिन्द्रियं न भावेस्सन्ति. तयो पुग्गला दोमनस्सिन्द्रियञ्च नप्पजहिस्सन्ति अञ्ञिन्द्रियञ्च न भावेस्सन्ति.

(ख) यो वा पन अञ्ञिन्द्रियं न भावेस्सति सो दोमनस्सिन्द्रियं नप्पजहिस्सतीति? आमन्ता.

(क) यो दोमनस्सिन्द्रियं नप्पजहिस्सति सो अञ्ञाताविन्द्रियं न सच्छिकरिस्सतीति?

तयो पुग्गला दोमनस्सिन्द्रियं नप्पजहिस्सन्ति, नो च अञ्ञाताविन्द्रियं न सच्छिकरिस्सन्ति. द्वे पुग्गला दोमनस्सिन्द्रियञ्च नप्पजहिस्सन्ति अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो दोमनस्सिन्द्रियं नप्पजहिस्सतीति? आमन्ता. (दोमनस्सिन्द्रियमूलकं)

४५७. (क) यो अनञ्ञातञ्ञस्सामीतिन्द्रियं न भावेस्सति सो अञ्ञिन्द्रियं न भावेस्सतीति?

छ पुग्गला अनञ्ञातञ्ञस्सामीतिन्द्रियं न भावेस्सन्ति, नो च अञ्ञिन्द्रियं न भावेस्सन्ति. तयो पुग्गला अनञ्ञातञ्ञस्सामीतिन्द्रियञ्च न भावेस्सन्ति अञ्ञिन्द्रियञ्च न भावेस्सन्ति.

(ख) यो वा पन अञ्ञिन्द्रियं न भावेस्सति सो अनञ्ञातञ्ञस्सामीतिन्द्रियं न भावेस्सतीति? आमन्ता.

(क) यो अनञ्ञातञ्ञस्सामीतिन्द्रियं न भावेस्सति सो अञ्ञाताविन्द्रियं न सच्छिकरिस्सतीति?

सत्त पुग्गला अनञ्ञातञ्ञस्सामीतिन्द्रियं न भावेस्सन्ति, नो च अञ्ञाताविन्द्रियं न सच्छिकरिस्सन्ति. द्वे पुग्गला अनञ्ञातञ्ञस्सामीतिन्द्रियञ्च न भावेस्सन्ति अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो अनञ्ञातञ्ञस्सामीतिन्द्रियं न भावेस्सतीति? आमन्ता. (अनञ्ञातञ्ञस्सामीतिन्द्रियमूलकं)

४५८. (क) यो अञ्ञिन्द्रियं न भावेस्सति सो अञ्ञाताविन्द्रियं न सच्छिकरिस्सतीति?

अग्गमग्गसमङ्गी अञ्ञिन्द्रियं न भावेस्सति, नो च अञ्ञाताविन्द्रियं न सच्छिकरिस्सति. द्वे पुग्गला अञ्ञिन्द्रियञ्च न भावेस्सन्ति अञ्ञाताविन्द्रियञ्च न सच्छिकरिस्सन्ति.

(ख) यो वा पन अञ्ञाताविन्द्रियं न सच्छिकरिस्सति सो अञ्ञिन्द्रियं न भावेस्सतीति? आमन्ता. (अञ्ञिन्द्रियमूलकं)