१. पच्चुप्पन्नवारो

(क) अनुलोमं

४३५. (क) यो चक्खुन्द्रियं परिजानाति सो सोतिन्द्रियं परिजानातीति? आमन्ता.

(ख) यो वा पन सोतिन्द्रियं परिजानाति सो चक्खुन्द्रियं परिजानातीति? आमन्ता.

(क) यो चक्खुन्द्रियं परिजानाति सो दोमनस्सिन्द्रियं पजहतीति? नो.

(ख) यो वा पन दोमनस्सिन्द्रियं पजहति सो चक्खुन्द्रियं परिजानातीति? नो.

(क) यो चक्खुन्द्रियं परिजानाति सो अनञ्ञातञ्ञस्सामीतिन्द्रियं भावेतीति? नो.

(ख) यो वा पन अनञ्ञातञ्ञस्सामीतिन्द्रियं भावेति सो चक्खुन्द्रियं परिजानातीति? नो.

(क) यो चक्खुन्द्रियं परिजानाति सो अञ्ञिन्द्रियं भावेतीति? आमन्ता.

(ख) यो वा पन अञ्ञिन्द्रियं भावेति सो चक्खुन्द्रियं परिजानातीति?

द्वे पुग्गला अञ्ञिन्द्रियं भावेन्ति, नो च चक्खुन्द्रियं परिजानन्ति. अग्गमग्गसमङ्गी अञ्ञिन्द्रियञ्च भावेति चक्खुन्द्रियञ्च परिजानाति.

(क) यो चक्खुन्द्रियं परिजानाति सो अञ्ञाताविन्द्रियं सच्छिकरोतीति? नो.

(ख) यो वा पन अञ्ञाताविन्द्रियं सच्छिकरोति सो चक्खुन्द्रियं परिजानातीति? नो. (चक्खुन्द्रियमूलकं)

४३६. (क) यो दोमनस्सिन्द्रियं पजहति सो अनञ्ञातञ्ञस्सामीतिन्द्रियं भावेतीति? नो.

(ख) यो वा पन अनञ्ञातञ्ञस्सामीतिन्द्रियं भावेति सो दोमनस्सिन्द्रियं पजहतीति? नो.

(क) यो दोमनस्सिन्द्रियं पजहति सो अञ्ञिन्द्रियं भावेतीति? आमन्ता.

(ख) यो वा पन अञ्ञिन्द्रियं भावेति सो दोमनस्सिन्द्रियं पजहतीति?

द्वे पुग्गला अञ्ञिन्द्रियं भावेन्ति, नो च दोमनस्सिन्द्रियं पजहन्ति. अनागामिमग्गसमङ्गी अञ्ञिन्द्रियञ्च भावेति दोमनस्सिन्द्रियञ्च पजहति.

(क) यो दोमनस्सिन्द्रियं पजहति सो अञ्ञाताविन्द्रियं सच्छिकरोतीति? नो.

(ख) यो वा पन अञ्ञाताविन्द्रियं सच्छिकरोति सो दोमनस्सिन्द्रियं पजहतीति? नो. (दोमनस्सिन्द्रियमूलकं)

४३७. (क) यो अनञ्ञातञ्ञस्सामीतिन्द्रियं भावेति सो अञ्ञिन्द्रियं भावेतीति? नो.

(ख) यो वा पन अञ्ञिन्द्रियं भावेति सो अनञ्ञातञ्ञस्सामीतिन्द्रियं भावेतीति? नो.

(क) यो अनञ्ञातञ्ञस्सामीतिन्द्रियं भावेति सो अञ्ञाताविन्द्रियं सच्छिकरोतीति? नो.

(ख) यो वा पन अञ्ञाताविन्द्रियं सच्छिकरोति सो अनञ्ञातञ्ञस्सामीतिन्द्रियं भावेतीति? नो. (अनञ्ञातञ्ञस्सामीतिन्द्रियमूलकं)

४३८. (क) यो अञ्ञिन्द्रियं भावेति सो अञ्ञाताविन्द्रियं सच्छिकरोतीति? नो.

(ख) यो वा पन अञ्ञाताविन्द्रियं सच्छिकरोति सो अञ्ञिन्द्रियं भावेतीति? नो. (अञ्ञिन्द्रियमूलकं)

(ख) पच्चनीकं

४३९. (क) यो चक्खुन्द्रियं न परिजानाति सो दोमनस्सिन्द्रियं नप्पजहतीति?

अनागामिमग्गसमङ्गी चक्खुन्द्रियं न परिजानाति, नो च दोमनस्सिन्द्रियं नप्पजहति. द्वे मग्गसमङ्गिनो ठपेत्वा अवसेसा पुग्गला चक्खुन्द्रियञ्च न परिजानन्ति दोमनस्सिन्द्रियञ्च नप्पजहन्ति.

(ख) यो वा पन दोमनस्सिन्द्रियं नप्पजहति सो चक्खुन्द्रियं न परिजानातीति?

अग्गमग्गसमङ्गी दोमनस्सिन्द्रियं नप्पजहति, नो च चक्खुन्द्रियं न परिजानाति. द्वे मग्गसमङ्गिनो ठपेत्वा अवसेसा पुग्गला दोमनस्सिन्द्रियञ्च नप्पजहन्ति चक्खुन्द्रियञ्च न परिजानन्ति.

(क) यो चक्खुन्द्रियं न परिजानाति सो अनञ्ञातञ्ञस्सामीतिन्द्रियं न भावेतीति?

अट्ठमको चक्खुन्द्रियं न परिजानाति, नो च अनञ्ञातञ्ञस्सामीतिन्द्रियं न भावेति. द्वे मग्गसमङ्गिनो ठपेत्वा अवसेसा पुग्गला चक्खुन्द्रियञ्च न परिजानन्ति अनञ्ञातञ्ञस्सामीतिन्द्रियञ्च न भावेन्ति.

(ख) यो वा पन अनञ्ञातञ्ञस्सामीतिन्द्रियं न भावेति सो चक्खुन्द्रियं न परिजानातीति?

अग्गमग्गसमङ्गी अनञ्ञातञ्ञस्सामीतिन्द्रियं न भावेति, नो च चक्खुन्द्रियं न परिजानाति. द्वे मग्गसमङ्गिनो ठपेत्वा अवसेसा पुग्गला अनञ्ञातञ्ञस्सामीतिन्द्रियञ्च न भावेन्ति चक्खुन्द्रियञ्च न परिजानन्ति.

(क) यो चक्खुन्द्रियं न परिजानाति सो अञ्ञिन्द्रियं न भावेतीति?

द्वे पुग्गला चक्खुन्द्रियं न परिजानन्ति, नो च अञ्ञिन्द्रियं न भावेन्ति. तयो मग्गसमङ्गिनो ठपेत्वा अवसेसा पुग्गला चक्खुन्द्रियञ्च न परिजानन्ति अञ्ञिन्द्रियञ्च न भावेन्ति.

(ख) यो वा पन अञ्ञिन्द्रियं न भावेति सो चक्खुन्द्रियं न परिजानातीति? आमन्ता.

(क) यो चक्खुन्द्रियं न परिजानाति सो अञ्ञाताविन्द्रियं न सच्छिकरोतीति?

यो अग्गफलं सच्छिकरोति सो चक्खुन्द्रियं न परिजानाति, नो च अञ्ञाताविन्द्रियं न सच्छिकरोति. अग्गमग्गसमङ्गिञ्च अरहन्तञ्च ठपेत्वा अवसेसा पुग्गला चक्खुन्द्रियञ्च न परिजानन्ति अञ्ञाताविन्द्रियञ्च न सच्छिकरोन्ति.

(ख) यो वा पन अञ्ञाताविन्द्रियं न सच्छिकरोति सो चक्खुन्द्रियं न परिजानातीति?

अग्गमग्गसमङ्गी अञ्ञाताविन्द्रियं न सच्छिकरोति, नो च चक्खुन्द्रियं न परिजानाति. अग्गमग्गसमङ्गिञ्च अरहन्तञ्च ठपेत्वा अवसेसा पुग्गला अञ्ञाताविन्द्रियञ्च न सच्छिकरोन्ति चक्खुन्द्रियञ्च न परिजानन्ति. (चक्खुन्द्रियमूलकं)

४४०. (क) यो दोमनस्सिन्द्रियं नप्पजहति सो अनञ्ञातञ्ञस्सामीतिन्द्रियं न भावेतीति?

अट्ठमको दोमनस्सिन्द्रियं नप्पजहति, नो च अनञ्ञातञ्ञस्सामीतिन्द्रियं न भावेति. द्वे मग्गसमङ्गिनो ठपेत्वा अवसेसा पुग्गला दोमनस्सिन्द्रियञ्च नप्पजहन्ति अनञ्ञातञ्ञस्सामीतिन्द्रियञ्च न भावेन्ति.

(ख) यो वा पन अनञ्ञातञ्ञस्सामीतिन्द्रियं न भावेति सो दोमनस्सिन्द्रियं नप्पजहतीति?

अनागामिमग्गसमङ्गी अनञ्ञातञ्ञस्सामीतिन्द्रियं न भावेति, नो च दोमनस्सिन्द्रियं नप्पजहति. द्वे मग्गसमङ्गिनो ठपेत्वा अवसेसा पुग्गला अनञ्ञातञ्ञस्सामीतिन्द्रियञ्च न भावेन्ति दोमनस्सिन्द्रियञ्च नप्पजहन्ति.

(क) यो दोमनस्सिन्द्रियं नप्पजहति सो अञ्ञिन्द्रियं न भावेतीति?

द्वे पुग्गला दोमनस्सिन्द्रियं नप्पजहन्ति, नो च अञ्ञिन्द्रियं न भावेन्ति. तयो मग्गसमङ्गिनो ठपेत्वा अवसेसा पुग्गला दोमनस्सिन्द्रियञ्च नप्पजहन्ति अञ्ञिन्द्रियञ्च न भावेन्ति.

(ख) यो वा पन अञ्ञिन्द्रियं न भावेति सो दोमनस्सिन्द्रियं नप्पजहतीति? आमन्ता.

(क) यो दोमनस्सिन्द्रियं नप्पजहति सो अञ्ञाताविन्द्रियं न सच्छिकरोतीति?

यो अग्गफलं सच्छिकरोति सो दोमनस्सिन्द्रियं नप्पजहति, नो च अञ्ञाताविन्द्रियं न सच्छिकरोति. अनागामिमग्गसमङ्गिञ्च अरहन्तञ्च ठपेत्वा अवसेसा पुग्गला दोमनस्सिन्द्रियञ्च नप्पजहन्ति अञ्ञाताविन्द्रियञ्च न सच्छिकरोन्ति.

(ख) यो वा पन अञ्ञाताविन्द्रियं न सच्छिकरोति सो दोमनस्सिन्द्रियं नप्पजहतीति?

अनागामिमग्गसमङ्गी अञ्ञाताविन्द्रियं न सच्छिकरोति, नो च दोमनस्सिन्द्रियं नप्पजहति. अनागामिमग्गसमङ्गिञ्च अरहन्तञ्च ठपेत्वा अवसेसा पुग्गला अञ्ञाताविन्द्रियञ्च न सच्छिकरोन्ति दोमनस्सिन्द्रियञ्च नप्पजहन्ति. (दोमनस्सिन्द्रियमूलकं)

४४१. (क) यो अनञ्ञातञ्ञस्सामीतिन्द्रियं न भावेति सो अञ्ञिन्द्रियं न भावेतीति?

तयो मग्गसमङ्गिनो [तयो पुग्गला (पी.)] अनञ्ञातञ्ञस्सामीतिन्द्रियं न भावेन्ति, नो च अञ्ञिन्द्रियं न भावेन्ति. चत्तारो मग्गसमङ्गिनो [अट्ठमकञ्च तयो मग्गसमङ्गिनो च (पी.)] ठपेत्वा अवसेसा पुग्गला अनञ्ञातञ्ञस्सामीतिन्द्रियञ्च न भावेन्ति अञ्ञिन्द्रियञ्च न भावेन्ति.

(ख) यो वा पन अञ्ञिन्द्रियं न भावेति सो अनञ्ञातञ्ञस्सामीतिन्द्रियं न भावेतीति?

अट्ठमको अञ्ञिन्द्रियं न भावेति, नो च अनञ्ञातञ्ञस्सामीतिन्द्रियं न भावेति. चत्तारो मग्गसमङ्गिनो ठपेत्वा अवसेसा पुग्गला अञ्ञिन्द्रियञ्च न भावेन्ति अनञ्ञातञ्ञस्सामीतिन्द्रियञ्च न भावेन्ति.

(क) यो अनञ्ञातञ्ञस्सामीतिन्द्रियं न भावेति सो अञ्ञाताविन्द्रियं न सच्छिकरोतीति?

यो अग्गफलं सच्छिकरोति सो अनञ्ञातञ्ञस्सामीतिन्द्रियं न भावेति, नो च अञ्ञाताविन्द्रियं न सच्छिकरोति. अट्ठमकञ्च अरहन्तञ्च ठपेत्वा अवसेसा पुग्गला अनञ्ञातञ्ञस्सामीतिन्द्रियञ्च न भावेन्ति अञ्ञाताविन्द्रियञ्च न सच्छिकरोन्ति.

(ख) यो वा पन अञ्ञाताविन्द्रियं न सच्छिकरोति सो अनञ्ञातञ्ञस्सामीतिन्द्रियं न भावेतीति?

अट्ठमको अञ्ञाताविन्द्रियं न सच्छिकरोति, नो च अनञ्ञातञ्ञस्सामीतिन्द्रियं न भावेति. अट्ठमकञ्च अरहन्तञ्च ठपेत्वा अवसेसा पुग्गला अञ्ञाताविन्द्रियञ्च न सच्छिकरोन्ति अनञ्ञातञ्ञस्सामीतिन्द्रियञ्च न भावेन्ति. (अनञ्ञातञ्ञस्सामीतिन्द्रियमूलकं)

४४२. (क) यो अञ्ञिन्द्रियं न भावेति सो अञ्ञाताविन्द्रियं न सच्छिकरोतीति?

यो अग्गफलं सच्छिकरोति सो अञ्ञिन्द्रियं न भावेति, नो च अञ्ञाताविन्द्रियं न सच्छिकरोति. तयो मग्गसमङ्गिनो च अरहन्तञ्च ठपेत्वा अवसेसा पुग्गला अञ्ञिन्द्रियञ्च न भावेन्ति अञ्ञाताविन्द्रियञ्च न सच्छिकरोन्ति.

(ख) यो वा पन अञ्ञाताविन्द्रियं न सच्छिकरोति सो अञ्ञिन्द्रियं न भावेतीति?

तयो मग्गसमङ्गिनो अञ्ञाताविन्द्रियं न सच्छिकरोन्ति, नो च अञ्ञिन्द्रियं न भावेन्ति. तयो मग्गसमङ्गिनो च अरहन्तञ्च ठपेत्वा अवसेसा पुग्गला अञ्ञाताविन्द्रियञ्च न सच्छिकरोन्ति अञ्ञिन्द्रियञ्च न भावेन्ति. (अञ्ञिन्द्रियमूलकं)