(२) अतीतवारो

(क) अनुलोमपुग्गलो

४५. (क) यस्स कुसला धम्मा उप्पज्जित्थ तस्स अकुसला धम्मा उप्पज्जित्थाति? आमन्ता.

(ख) यस्स वा पन अकुसला धम्मा उप्पज्जित्थ तस्स कुसला धम्मा उप्पज्जित्थाति? आमन्ता.

(क) यस्स कुसला धम्मा उप्पज्जित्थ तस्स अब्याकता धम्मा उप्पज्जित्थाति? आमन्ता.

(ख) यस्स वा पन अब्याकता धम्मा उप्पज्जित्थ तस्स कुसला धम्मा उप्पज्जित्थाति? आमन्ता.

४६. (क) यस्स अकुसला धम्मा उप्पज्जित्थ तस्स अब्याकता धम्मा उप्पज्जित्थाति? आमन्ता.

(ख) यस्स वा पन अब्याकता धम्मा उप्पज्जित्थ तस्स अकुसला धम्मा उप्पज्जित्थाति? आमन्ता.

(ख) अनुलोमओकासो

४७. (क) यत्थ कुसला धम्मा उप्पज्जित्थ तत्थ अकुसला धम्मा उप्पज्जित्थाति? आमन्ता.

(ख) यत्थ वा पन अकुसला धम्मा उप्पज्जित्थ तत्थ कुसला धम्मा उप्पज्जित्थाति? आमन्ता.

(क) यत्थ कुसला धम्मा उप्पज्जित्थ तत्थ अब्याकता धम्मा उप्पज्जित्थाति? आमन्ता.

(ख) यत्थ वा पन अब्याकता धम्मा उप्पज्जित्थ तत्थ कुसला धम्मा उप्पज्जित्थाति?

असञ्ञसत्ते तत्थ अब्याकता धम्मा उप्पज्जित्थ, नो च तत्थ कुसला धम्मा उप्पज्जित्थ. चतुवोकारे पञ्चवोकारे तत्थ अब्याकता च धम्मा उप्पज्जित्थ कुसला च धम्मा उप्पज्जित्थ.

४८. (क) यत्थ अकुसला धम्मा उप्पज्जित्थ तत्थ अब्याकता धम्मा उप्पज्जित्थाति? आमन्ता.

(ख) यत्थ वा पन अब्याकता धम्मा उप्पज्जित्थ तत्थ अकुसला धम्मा उप्पज्जित्थाति?

असञ्ञसत्ते तत्थ अब्याकता धम्मा उप्पज्जित्थ, नो च तत्थ अकुसला धम्मा उप्पज्जित्थ. चतुवोकारे पञ्चवोकारे तत्थ अब्याकता च धम्मा उप्पज्जित्थ अकुसला च धम्मा उप्पज्जित्थ.

(ग) अनुलोमपुग्गलोकासा

४९. (क) यस्स यत्थ कुसला धम्मा उप्पज्जित्थ तस्स तत्थ अकुसला धम्मा उप्पज्जित्थाति? आमन्ता.

(ख) यस्स वा पन यत्थ अकुसला धम्मा उप्पज्जित्थ तस्स तत्थ कुसला धम्मा उप्पज्जित्थाति?

सुद्धावासानं दुतिये अकुसले चित्ते वत्तमाने तेसं तत्थ अकुसला धम्मा उप्पज्जित्थ, नो च तेसं तत्थ कुसला धम्मा उप्पज्जित्थ. इतरेसं चतुवोकारानं पञ्चवोकारानं तेसं तत्थ अकुसला च धम्मा उप्पज्जित्थ कुसला च धम्मा उप्पज्जित्थ.

(क) यस्स यत्थ कुसला धम्मा उप्पज्जित्थ तस्स तत्थ अब्याकता धम्मा उप्पज्जित्थाति? आमन्ता.

(ख) यस्स वा पन यत्थ अब्याकता धम्मा उप्पज्जित्थ तस्स तत्थ कुसला धम्मा उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ अब्याकता धम्मा उप्पज्जित्थ, नो च तेसं तत्थ कुसला धम्मा उप्पज्जित्थ. इतरेसं चतुवोकारानं पञ्चवोकारानं तेसं तत्थ अब्याकता च धम्मा उप्पज्जित्थ कुसला च धम्मा उप्पज्जित्थ.

५०. (क) यस्स यत्थ अकुसला धम्मा उप्पज्जित्थ तस्स तत्थ अब्याकता धम्मा उप्पज्जित्थाति? आमन्ता.

(ख) यस्स वा पन यत्थ अब्याकता धम्मा उप्पज्जित्थ तस्स तत्थ अकुसला धम्मा उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ अब्याकता धम्मा उप्पज्जित्थ, नो च तेसं तत्थ अकुसला धम्मा उप्पज्जित्थ. इतरेसं चतुवोकारानं पञ्चवोकारानं तेसं तत्थ अब्याकता च धम्मा उप्पज्जित्थ अकुसला च धम्मा उप्पज्जित्थ.

(घ) पच्चनीकपुग्गलो

५१. (क) यस्स कुसला धम्मा न उप्पज्जित्थ तस्स अकुसला धम्मा न उप्पज्जित्थाति? नत्थि.

(ख) यस्स वा पन अकुसला धम्मा न उप्पज्जित्थ तस्स कुसला धम्मा न उप्पज्जित्थाति? नत्थि.

(क) यस्स कुसला धम्मा न उप्पज्जित्थ तस्स अब्याकता धम्मा न उप्पज्जित्थाति? नत्थि.

(ख) यस्स वा पन अब्याकता धम्मा न उप्पज्जित्थ तस्स कुसला धम्मा न उप्पज्जित्थाति? नत्थि.

५२. (क) यस्स अकुसला धम्मा न उप्पज्जित्थ तस्स अब्याकता धम्मा न उप्पज्जित्थाति? नत्थि.

(ख) यस्स वा पन अब्याकता धम्मा न उप्पज्जित्थ तस्स अकुसला धम्मा न उप्पज्जित्थाति? नत्थि.

(ङ) पच्चनीकओकासो

५३. (क) यत्थ कुसला धम्मा न उप्पज्जित्थ तत्थ अकुसला धम्मा न उप्पज्जित्थाति? आमन्ता.

(ख) यत्थ वा पन अकुसला धम्मा न उप्पज्जित्थ तत्थ कुसला धम्मा न उप्पज्जित्थाति? आमन्ता.

(क) यत्थ कुसला धम्मा न उप्पज्जित्थ तत्थ अब्याकता धम्मा न उप्पज्जित्थाति? उप्पज्जित्थ.

(ख) यत्थ वा पन अब्याकता धम्मा न उप्पज्जित्थ तत्थ कुसला धम्मा न उप्पज्जित्थाति? नत्थि.

५४. (क) यत्थ अकुसला धम्मा न उप्पज्जित्थ तत्थ अब्याकता धम्मा न उप्पज्जित्थाति? उप्पज्जित्थ.

(ख) यत्थ वा पन अब्याकता धम्मा न उप्पज्जित्थ तत्थ अकुसला धम्मा न उप्पज्जित्थाति? नत्थि.

(च) पच्चनीकपुग्गलोकासा

५५. (क) यस्स यत्थ कुसला धम्मा न उप्पज्जित्थ तस्स तत्थ अकुसला धम्मा न उप्पज्जित्थाति?

सुद्धावासानं दुतिये अकुसले चित्ते वत्तमाने तेसं तत्थ कुसला धम्मा न उप्पज्जित्थ, नो च तेसं तत्थ अकुसला धम्मा न उप्पज्जित्थ. सुद्धावासानं दुतिये चित्ते वत्तमाने असञ्ञसत्तानं तेसं तत्थ कुसला च धम्मा न उप्पज्जित्थ अकुसला च धम्मा न उप्पज्जित्थ.

(ख) यस्स वा पन यत्थ अकुसला धम्मा न उप्पज्जित्थ तस्स तत्थ कुसला धम्मा न उप्पज्जित्थाति? आमन्ता.

(क) यस्स यत्थ कुसला धम्मा न उप्पज्जित्थ तस्स तत्थ अब्याकता धम्मा न उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ कुसला धम्मा न उप्पज्जित्थ, नो च तेसं तत्थ अब्याकता धम्मा न उप्पज्जित्थ. सुद्धावासं उपपज्जन्तानं तेसं तत्थ कुसला च धम्मा न उप्पज्जित्थ अब्याकता च धम्मा न उप्पज्जित्थ.

(ख) यस्स वा पन यत्थ अब्याकता धम्मा न उप्पज्जित्थ तस्स तत्थ कुसला धम्मा न उप्पज्जित्थाति? आमन्ता.

५६. (क) यस्स यत्थ अकुसला धम्मा न उप्पज्जित्थ तस्स तत्थ अब्याकता धम्मा न उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ अकुसला धम्मा न उप्पज्जित्थ, नो च तेसं तत्थ अब्याकता धम्मा न उप्पज्जित्थ. सुद्धावासं उपपज्जन्तानं तेसं तत्थ अकुसला च धम्मा न उप्पज्जित्थ अब्याकता च धम्मा न उप्पज्जित्थ.

(ख) यस्स वा पन यत्थ अब्याकता धम्मा न उप्पज्जित्थ तस्स तत्थ अकुसला धम्मा न उप्पज्जित्थाति? आमन्ता.