(३) अनागतवारो

(क) अनुलोमपुग्गलो

५७. (क) यस्स कुसला धम्मा उप्पज्जिस्सन्ति तस्स अकुसला धम्मा उप्पज्जिस्सन्तीति?

यस्स चित्तस्स अनन्तरा अग्गमग्गं पटिलभिस्सन्ति तेसं कुसला धम्मा उप्पज्जिस्सन्ति, नो च तेसं अकुसला धम्मा उप्पज्जिस्सन्ति. इतरेसं तेसं कुसला च धम्मा उप्पज्जिस्सन्ति अकुसला च धम्मा उप्पज्जिस्सन्ति.

(ख) यस्स वा पन अकुसला धम्मा उप्पज्जिस्सन्ति तस्स कुसला धम्मा उप्पज्जिस्सन्तीति? आमन्ता.

(क) यस्स कुसला धम्मा उप्पज्जिस्सन्ति तस्स अब्याकता धम्मा उप्पज्जिस्सन्तीति? आमन्ता.

(ख) यस्स वा पन अब्याकता धम्मा उप्पज्जिस्सन्ति तस्स कुसला धम्मा उप्पज्जिस्सन्तीति?

अग्गमग्गसमङ्गीनं अरहन्तानं तेसं अब्याकता धम्मा उप्पज्जिस्सन्ति, नो च तेसं कुसला धम्मा उप्पज्जिस्सन्ति. इतरेसं तेसं अब्याकता च धम्मा उप्पज्जिस्सन्ति कुसला च धम्मा उप्पज्जिस्सन्ति.

५८. (क) यस्स अकुसला धम्मा उप्पज्जिस्सन्ति तस्स अब्याकता धम्मा उप्पज्जिस्सन्तीति? आमन्ता.

(ख) यस्स वा पन अब्याकता धम्मा उप्पज्जिस्सन्ति तस्स अकुसला धम्मा उप्पज्जिस्सन्तीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं अब्याकता धम्मा उप्पज्जिस्सन्ति, नो च तेसं अकुसला धम्मा उप्पज्जिस्सन्ति. इतरेसं तेसं अब्याकता च धम्मा उप्पज्जिस्सन्ति अकुसला च धम्मा उप्पज्जिस्सन्ति.

(ख) अनुलोमओकासो

५९. (क) यत्थ कुसला धम्मा उप्पज्जिस्सन्ति तत्थ अकुसला धम्मा उप्पज्जिस्सन्तीति? आमन्ता.

(ख) यत्थ वा पन अकुसला धम्मा उप्पज्जिस्सन्ति तत्थ कुसला धम्मा उप्पज्जिस्सन्तीति? आमन्ता.

(क) यत्थ कुसला धम्मा उप्पज्जिस्सन्ति तत्थ अब्याकता धम्मा उप्पज्जिस्सन्तीति? आमन्ता.

(ख) यत्थ वा पन अब्याकता धम्मा उप्पज्जिस्सन्ति तत्थ कुसला धम्मा उप्पज्जिस्सन्तीति?

असञ्ञसत्ते तत्थ अब्याकता धम्मा उप्पज्जिस्सन्ति, नो च तत्थ कुसला धम्मा उप्पज्जिस्सन्ति. चतुवोकारे पञ्चवोकारे तत्थ अब्याकता च धम्मा उप्पज्जिस्सन्ति कुसला च धम्मा उप्पज्जिस्सन्ति.

६०. (क) यत्थ अकुसला धम्मा उप्पज्जिस्सन्ति तत्थ अब्याकता धम्मा उप्पज्जिस्सन्तीति? आमन्ता.

(ख) यत्थ वा पन अब्याकता धम्मा उप्पज्जिस्सन्ति तत्थ अकुसला धम्मा उप्पज्जिस्सन्तीति?

असञ्ञसत्ते तत्थ अब्याकता धम्मा उप्पज्जिस्सन्ति, नो च तत्थ अकुसला धम्मा उप्पज्जिस्सन्ति. चतुवोकारे पञ्चवोकारे तत्थ अब्याकता च धम्मा उप्पज्जिस्सन्ति अकुसला च धम्मा उप्पज्जिस्सन्ति.

(ग) अनुलोमपुग्गलोकासा

६१. (क) यस्स यत्थ कुसला धम्मा उप्पज्जिस्सन्ति तस्स तत्थ अकुसला धम्मा उप्पज्जिस्सन्तीति?

यस्स चित्तस्स अनन्तरा अग्गमग्गं पटिलभिस्सन्ति तेसं तत्थ कुसला धम्मा उप्पज्जिस्सन्ति, नो च तेसं तत्थ अकुसला धम्मा उप्पज्जिस्सन्ति. इतरेसं चतुवोकारानं पञ्चवोकारानं तेसं तत्थ कुसला च धम्मा उप्पज्जिस्सन्ति अकुसला च धम्मा उप्पज्जिस्सन्ति.

(ख) यस्स वा पन यत्थ अकुसला धम्मा उप्पज्जिस्सन्ति तस्स तत्थ कुसला धम्मा उप्पज्जिस्सन्तीति? आमन्ता.

(क) यस्स यत्थ कुसला धम्मा उप्पज्जिस्सन्ति तस्स तत्थ अब्याकता धम्मा उप्पज्जिस्सन्तीति? आमन्ता.

(ख) यस्स वा पन यत्थ अब्याकता धम्मा उप्पज्जिस्सन्ति तस्स तत्थ कुसला धम्मा उप्पज्जिस्सन्तीति?

अग्गमग्गसमङ्गीनं अरहन्तानं असञ्ञसत्तानं तेसं तत्थ अब्याकता धम्मा उप्पज्जिस्सन्ति, नो च तेसं तत्थ कुसला धम्मा उप्पज्जिस्सन्ति. इतरेसं चतुवोकारानं पञ्चवोकारानं तेसं तत्थ अब्याकता च धम्मा उप्पज्जिस्सन्ति कुसला च धम्मा उप्पज्जिस्सन्ति.

६२. (क) यस्स यत्थ अकुसला धम्मा उप्पज्जिस्सन्ति तस्स तत्थ अब्याकता धम्मा उप्पज्जिस्सन्तीति? आमन्ता.

(ख) यस्स वा पन यत्थ अब्याकता धम्मा उप्पज्जिस्सन्ति तस्स तत्थ अकुसला धम्मा उप्पज्जिस्सन्तीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ अब्याकता धम्मा उप्पज्जिस्सन्ति, नो च तेसं तत्थ अकुसला धम्मा उप्पज्जिस्सन्ति. इतरेसं चतुवोकारानं पञ्चवोकारानं तेसं तत्थ अब्याकता च धम्मा उप्पज्जिस्सन्ति अकुसला च धम्मा उप्पज्जिस्सन्ति.

(घ) पच्चनीकपुग्गलो

६३. (क) यस्स कुसला धम्मा न उप्पज्जिस्सन्ति तस्स अकुसला धम्मा न उप्पज्जिस्सन्तीति? आमन्ता.

(ख) यस्स वा पन अकुसला धम्मा न उप्पज्जिस्सन्ति तस्स कुसला धम्मा न उप्पज्जिस्सन्तीति?

यस्स चित्तस्स अनन्तरा अग्गमग्गं पटिलभिस्सन्ति तेसं अकुसला धम्मा न उप्पज्जिस्सन्ति, नो च तेसं कुसला धम्मा न उप्पज्जिस्सन्ति. अग्गमग्गसमङ्गीनं अरहन्तानं तेसं अकुसला च धम्मा न उप्पज्जिस्सन्ति कुसला च धम्मा न उप्पज्जिस्सन्ति.

(क) यस्स कुसला धम्मा न उप्पज्जिस्सन्ति तस्स अब्याकता धम्मा न उप्पज्जिस्सन्तीति?

अग्गमग्गसमङ्गीनं अरहन्तानं तेसं कुसला धम्मा न उप्पज्जिस्सन्ति, नो च तेसं अब्याकता धम्मा न उप्पज्जिस्सन्ति. पच्छिमचित्तसमङ्गीनं तेसं कुसला च धम्मा न उप्पज्जिस्सन्ति अब्याकता च धम्मा न उप्पज्जिस्सन्ति.

(ख) यस्स वा पन अब्याकता धम्मा न उप्पज्जिस्सन्ति तस्स कुसला धम्मा न उप्पज्जिस्सन्तीति? आमन्ता.

६४. (क) यस्स अकुसला धम्मा न उप्पज्जिस्सन्ति तस्स अब्याकता धम्मा न उप्पज्जिस्सन्तीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं अकुसला धम्मा न उप्पज्जिस्सन्ति, नो च तेसं अब्याकता धम्मा न उप्पज्जिस्सन्ति. पच्छिमचित्तसमङ्गीनं तेसं अकुसला च धम्मा न उप्पज्जिस्सन्ति अब्याकता च धम्मा न उप्पज्जिस्सन्ति.

(ख) यस्स वा पन अब्याकता धम्मा न उप्पज्जिस्सन्ति तस्स अकुसला धम्मा न उप्पज्जिस्सन्तीति? आमन्ता.

(ङ) पच्चनीकओकासो

६५. (क) यत्थ कुसला धम्मा न उप्पज्जिस्सन्ति तत्थ अकुसला धम्मा न उप्पज्जिस्सन्तीति? आमन्ता.

(ख) यत्थ वा पन अकुसला धम्मा न उप्पज्जिस्सन्ति तत्थ कुसला धम्मा न उप्पज्जिस्सन्तीति? आमन्ता.

(क) यत्थ कुसला धम्मा न उप्पज्जिस्सन्ति तत्थ अब्याकता धम्मा न उप्पज्जिस्सन्तीति? उप्पज्जिस्सन्ति.

(ख) यत्थ वा पन अब्याकता धम्मा न उप्पज्जिस्सन्ति तत्थ कुसला धम्मा न उप्पज्जिस्सन्तीति? नत्थि.

६६. (क) यत्थ अकुसला धम्मा न उप्पज्जिस्सन्ति तत्थ अब्याकता धम्मा न उप्पज्जिस्सन्तीति? उप्पज्जिस्सन्ति.

(ख) यत्थ वा पन अब्याकता धम्मा न उप्पज्जिस्सन्ति तत्थ अकुसला धम्मा न उप्पज्जिस्सन्तीति? नत्थि.

(च) पच्चनीकपुग्गलोकासा

६७. (क) यस्स यत्थ कुसला धम्मा न उप्पज्जिस्सन्ति तस्स तत्थ अकुसला धम्मा न उप्पज्जिस्सन्तीति? आमन्ता.

(ख) यस्स वा पन यत्थ अकुसला धम्मा न उप्पज्जिस्सन्ति तस्स तत्थ कुसला धम्मा न उप्पज्जिस्सन्तीति?

यस्स चित्तस्स अनन्तरा अग्गमग्गं पटिलभिस्सन्ति तेसं तत्थ अकुसला धम्मा न उप्पज्जिस्सन्ति, नो च तेसं तत्थ कुसला धम्मा न उप्पज्जिस्सन्ति. अग्गमग्गसमङ्गीनं अरहन्तानं असञ्ञसत्तानं तेसं तत्थ अकुसला च धम्मा न उप्पज्जिस्सन्ति कुसला च धम्मा न उप्पज्जिस्सन्ति.

(क) यस्स यत्थ कुसला धम्मा न उप्पज्जिस्सन्ति तस्स तत्थ अब्याकता धम्मा न उप्पज्जिस्सन्तीति?

अग्गमग्गसमङ्गीनं अरहन्तानं असञ्ञसत्तानं तेसं तत्थ कुसला धम्मा न उप्पज्जिस्सन्ति, नो च तेसं तत्थ अब्याकता धम्मा न उप्पज्जिस्सन्ति. पच्छिमचित्तसमङ्गीनं तेसं तत्थ कुसला च धम्मा न उप्पज्जिस्सन्ति अब्याकता च धम्मा न उप्पज्जिस्सन्ति.

(ख) यस्स वा पन यत्थ अब्याकता धम्मा न उप्पज्जिस्सन्ति तस्स तत्थ कुसला धम्मा न उप्पज्जिस्सन्तीति? आमन्ता.

६८. (क) यस्स यत्थ अकुसला धम्मा न उप्पज्जिस्सन्ति तस्स तत्थ अब्याकता धम्मा न उप्पज्जिस्सन्तीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ अकुसला धम्मा न उप्पज्जिस्सन्ति, नो च तेसं तत्थ अब्याकता धम्मा न उप्पज्जिस्सन्ति. पच्छिमचित्तसमङ्गीनं तेसं तत्थ अकुसला च धम्मा न उप्पज्जिस्सन्ति अब्याकता च धम्मा न उप्पज्जिस्सन्ति.

(ख) यस्स वा पन यत्थ अब्याकता धम्मा न उप्पज्जिस्सन्ति तस्स तत्थ अकुसला धम्मा न उप्पज्जिस्सन्तीति? आमन्ता.