(१) पच्चुप्पन्नवारो

(क) अनुलोमपुग्गलो

३३. (क) यस्स कुसला धम्मा उप्पज्जन्ति तस्स अकुसला धम्मा उप्पज्जन्तीति? नो.

(ख) यस्स वा पन अकुसला धम्मा उप्पज्जन्ति तस्स कुसला धम्मा उप्पज्जन्तीति? नो.

(क) यस्स कुसला धम्मा उप्पज्जन्ति तस्स अब्याकता धम्मा उप्पज्जन्तीति?

अरूपे कुसलानं उप्पादक्खणे तेसं कुसला धम्मा उप्पज्जन्ति, नो च तेसं अब्याकता धम्मा उप्पज्जन्ति. पञ्चवोकारे कुसलानं उप्पादक्खणे तेसं कुसला च धम्मा उप्पज्जन्ति अब्याकता च धम्मा उप्पज्जन्ति.

(ख) यस्स वा पन अब्याकता धम्मा उप्पज्जन्ति तस्स कुसला धम्मा उप्पज्जन्तीति?

सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे तेसं अब्याकता धम्मा उप्पज्जन्ति, नो च तेसं कुसला धम्मा उप्पज्जन्ति. पञ्चवोकारे कुसलानं उप्पादक्खणे तेसं अब्याकता च धम्मा उप्पज्जन्ति कुसला च धम्मा उप्पज्जन्ति.

३४. (क) यस्स अकुसला धम्मा उप्पज्जन्ति तस्स अब्याकता धम्मा उप्पज्जन्तीति?

अरूपे अकुसलानं उप्पादक्खणे तेसं अकुसला धम्मा उप्पज्जन्ति, नो च तेसं अब्याकता धम्मा उप्पज्जन्ति. पञ्चवोकारे अकुसलानं उप्पादक्खणे तेसं अकुसला च धम्मा उप्पज्जन्ति अब्याकता च धम्मा उप्पज्जन्ति.

(ख) यस्स वा पन अब्याकता धम्मा उप्पज्जन्ति तस्स अकुसला धम्मा उप्पज्जन्तीति?

सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे तेसं अब्याकता धम्मा उप्पज्जन्ति, नो च तेसं अकुसला धम्मा उप्पज्जन्ति. पञ्चवोकारे अकुसलानं उप्पादक्खणे तेसं अब्याकता च धम्मा उप्पज्जन्ति अकुसला च धम्मा उप्पज्जन्ति.

(ख) अनुलोमओकासो

३५. (क) यत्थ कुसला धम्मा उप्पज्जन्ति तत्थ अकुसला धम्मा उप्पज्जन्तीति? आमन्ता.

(ख) यत्थ वा पन अकुसला धम्मा उप्पज्जन्ति तत्थ कुसला धम्मा उप्पज्जन्तीति? आमन्ता.

(क) यत्थ कुसला धम्मा उप्पज्जन्ति तत्थ अब्याकता धम्मा उप्पज्जन्तीति? आमन्ता.

(ख) यत्थ वा पन अब्याकता धम्मा उप्पज्जन्ति तत्थ कुसला धम्मा उप्पज्जन्तीति?

असञ्ञसत्ते तत्थ अब्याकता धम्मा उप्पज्जन्ति, नो च तत्थ कुसला धम्मा उप्पज्जन्ति. चतुवोकारे पञ्चवोकारे तत्थ अब्याकता च धम्मा उप्पज्जन्ति कुसला च धम्मा उप्पज्जन्ति.

३६. (क) यत्थ अकुसला धम्मा उप्पज्जन्ति तत्थ अब्याकता धम्मा उप्पज्जन्तीति? आमन्ता.

(ख) यत्थ वा पन अब्याकता धम्मा उप्पज्जन्ति तत्थ अकुसला धम्मा उप्पज्जन्तीति?

असञ्ञसत्ते तत्थ अब्याकता धम्मा उप्पज्जन्ति, नो च तत्थ अकुसला धम्मा उप्पज्जन्ति. चतुवोकारे पञ्चवोकारे तत्थ अब्याकता च धम्मा उप्पज्जन्ति अकुसला च धम्मा उप्पज्जन्ति.

(ग) अनुलोमपुग्गलोकासा

३७. (क) यस्स यत्थ कुसला धम्मा उप्पज्जन्ति तस्स तत्थ अकुसला धम्मा उप्पज्जन्तीति? नो.

(ख) यस्स वा पन यत्थ अकुसला धम्मा उप्पज्जन्ति तस्स तत्थ कुसला धम्मा उप्पज्जन्तीति? नो.

(क) यस्स यत्थ कुसला धम्मा उप्पज्जन्ति तस्स तत्थ अब्याकता धम्मा उप्पज्जन्तीति?

अरूपे कुसलानं उप्पादक्खणे तेसं तत्थ कुसला धम्मा उप्पज्जन्ति, नो च तेसं तत्थ अब्याकता धम्मा उप्पज्जन्ति. पञ्चवोकारे कुसलानं उप्पादक्खणे तेसं तत्थ कुसला च धम्मा उप्पज्जन्ति अब्याकता च धम्मा उप्पज्जन्ति.

(ख) यस्स वा पन यत्थ अब्याकता धम्मा उप्पज्जन्ति तस्स तत्थ कुसला धम्मा उप्पज्जन्तीति?

सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे तेसं तत्थ अब्याकता धम्मा उप्पज्जन्ति, नो च तेसं तत्थ कुसला धम्मा उप्पज्जन्ति. पञ्चवोकारे कुसलानं उप्पादक्खणे तेसं तत्थ अब्याकता च धम्मा उप्पज्जन्ति कुसला च धम्मा उप्पज्जन्ति.

३८. (क) यस्स यत्थ अकुसला धम्मा उप्पज्जन्ति तस्स तत्थ अब्याकता धम्मा उप्पज्जन्तीति?

अरूपे अकुसलानं उप्पादक्खणे तेसं तत्थ अकुसला धम्मा उप्पज्जन्ति, नो च तेसं तत्थ अब्याकता धम्मा उप्पज्जन्ति. पञ्चवोकारे अकुसलानं उप्पादक्खणे तेसं तत्थ अकुसला च धम्मा उप्पज्जन्ति अब्याकता च धम्मा उप्पज्जन्ति.

(ख) यस्स वा पन यत्थ अब्याकता धम्मा उप्पज्जन्ति तस्स तत्थ अकुसला धम्मा उप्पज्जन्तीति?

सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे तेसं तत्थ अब्याकता धम्मा उप्पज्जन्ति, नो च तेसं तत्थ अकुसला धम्मा उप्पज्जन्ति. पञ्चवोकारे अकुसलानं उप्पादक्खणे तेसं तत्थ अब्याकता च धम्मा उप्पज्जन्ति अकुसला च धम्मा उप्पज्जन्ति.

(घ) पच्चनीकपुग्गलो

३९. (क) यस्स कुसला धम्मा न उप्पज्जन्ति तस्स अकुसला धम्मा न उप्पज्जन्तीति?

अकुसलानं उप्पादक्खणे तेसं कुसला धम्मा न उप्पज्जन्ति, नो च तेसं अकुसला धम्मा न उप्पज्जन्ति. सब्बेसं चित्तस्स भङ्गक्खणे कुसलविप्पयुत्तअकुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं कुसला च धम्मा न उप्पज्जन्ति अकुसला च धम्मा न उप्पज्जन्ति.

(ख) यस्स वा पन अकुसला धम्मा न उप्पज्जन्ति तस्स कुसला धम्मा न उप्पज्जन्तीति?

कुसलानं उप्पादक्खणे तेसं अकुसला धम्मा न उप्पज्जन्ति, नो च तेसं कुसला धम्मा न उप्पज्जन्ति. सब्बेसं चित्तस्स भङ्गक्खणे अकुसलविप्पयुत्तकुसलविप्पयुत्तचित्तस्स उप्पादक्खणे निरोधसमापन्नानं असञ्ञसत्तानं तेसं अकुसला च धम्मा न उप्पज्जन्ति कुसला च धम्मा न उप्पज्जन्ति.

(क) यस्स कुसला धम्मा न उप्पज्जन्ति तस्स अब्याकता धम्मा न उप्पज्जन्तीति?

सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे तेसं कुसला धम्मा न उप्पज्जन्ति, नो च तेसं अब्याकता धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे अकुसलानं उप्पादक्खणे तेसं कुसला च धम्मा न उप्पज्जन्ति अब्याकता च धम्मा न उप्पज्जन्ति.

(ख) यस्स वा पन अब्याकता धम्मा न उप्पज्जन्ति तस्स कुसला धम्मा न उप्पज्जन्तीति?

अरूपे कुसलानं उप्पादक्खणे तेसं अब्याकता धम्मा न उप्पज्जन्ति, नो च तेसं कुसला धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे अकुसलानं उप्पादक्खणे तेसं अब्याकता च धम्मा न उप्पज्जन्ति कुसला च धम्मा न उप्पज्जन्ति.

४०. (क) यस्स अकुसला धम्मा न उप्पज्जन्ति तस्स अब्याकता धम्मा न उप्पज्जन्तीति?

सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे तेसं अकुसला धम्मा न उप्पज्जन्ति, नो च तेसं अब्याकता धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे कुसलानं उप्पादक्खणे तेसं अकुसला च धम्मा न उप्पज्जन्ति अब्याकता च धम्मा न उप्पज्जन्ति.

(ख) यस्स वा पन अब्याकता धम्मा न उप्पज्जन्ति तस्स अकुसला धम्मा न उप्पज्जन्तीति?

अरूपे अकुसलानं उप्पादक्खणे तेसं अब्याकता धम्मा न उप्पज्जन्ति, नो च तेसं अकुसला धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे कुसलानं उप्पादक्खणे तेसं अब्याकता च धम्मा न उप्पज्जन्ति अकुसला च धम्मा न उप्पज्जन्ति.

(ङ) पच्चनीकओकासो

४१. (क) यत्थ कुसला धम्मा न उप्पज्जन्ति तत्थ अकुसला धम्मा न उप्पज्जन्तीति? आमन्ता.

(ख) यत्थ वा पन अकुसला धम्मा न उप्पज्जन्ति तत्थ कुसला धम्मा न उप्पज्जन्तीति? आमन्ता.

(क) यत्थ कुसला धम्मा न उप्पज्जन्ति तत्थ अब्याकता धम्मा न उप्पज्जन्तीति? उप्पज्जन्ति.

(ख) यत्थ वा पन अब्याकता धम्मा न उप्पज्जन्ति तत्थ कुसला धम्मा न उप्पज्जन्तीति? नत्थि.

४२. (क) यत्थ अकुसला धम्मा न उप्पज्जन्ति तत्थ अब्याकता धम्मा न उप्पज्जन्तीति? उप्पज्जन्ति.

(ख) यत्थ वा पन अब्याकता धम्मा न उप्पज्जन्ति तत्थ अकुसला धम्मा न उप्पज्जन्तीति? नत्थि.

(च) पच्चनीकपुग्गलोकासा

४३. (क) यस्स यत्थ कुसला धम्मा न उप्पज्जन्ति तस्स तत्थ अकुसला धम्मा न उप्पज्जन्तीति?

अकुसलानं उप्पादक्खणे तेसं तत्थ कुसला धम्मा न उप्पज्जन्ति, नो च तेसं तत्थ अकुसला धम्मा न उप्पज्जन्ति. सब्बेसं चित्तस्स भङ्गक्खणे कुसलविप्पयुत्तअकुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ कुसला च धम्मा न उप्पज्जन्ति अकुसला च धम्मा न उप्पज्जन्ति.

(ख) यस्स वा पन यत्थ अकुसला धम्मा न उप्पज्जन्ति तस्स तत्थ कुसला धम्मा न उप्पज्जन्तीति?

कुसलानं उप्पादक्खणे तेसं तत्थ अकुसला धम्मा न उप्पज्जन्ति, नो च तेसं तत्थ कुसला धम्मा न उप्पज्जन्ति. सब्बेसं चित्तस्स भङ्गक्खणे अकुसलविप्पयुत्तकुसलविप्पयुत्तचित्तस्स उप्पादक्खणे असञ्ञसत्तानं तेसं तत्थ अकुसला च धम्मा न उप्पज्जन्ति कुसला च धम्मा न उप्पज्जन्ति.

(क) यस्स यत्थ कुसला धम्मा न उप्पज्जन्ति तस्स तत्थ अब्याकता धम्मा न उप्पज्जन्तीति?

सब्बेसं उपपज्जन्तानं पवत्ते कुसलविप्पयुत्तचित्तस्स उप्पादक्खणे तेसं तत्थ कुसला धम्मा न उप्पज्जन्ति, नो च तेसं तत्थ अब्याकता धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे अकुसलानं उप्पादक्खणे तेसं तत्थ कुसला च धम्मा न उप्पज्जन्ति अब्याकता च धम्मा न उप्पज्जन्ति.

(ख) यस्स वा पन यत्थ अब्याकता धम्मा न उप्पज्जन्ति तस्स तत्थ कुसला धम्मा न उप्पज्जन्तीति?

अरूपे कुसलानं उप्पादक्खणे तेसं तत्थ अब्याकता धम्मा न उप्पज्जन्ति, नो च तेसं तत्थ कुसला धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे अकुसलानं उप्पादक्खणे तेसं तत्थ अब्याकता च धम्मा न उप्पज्जन्ति कुसला च धम्मा न उप्पज्जन्ति.

४४. (क) यस्स यत्थ अकुसला धम्मा न उप्पज्जन्ति तस्स तत्थ अब्याकता धम्मा न उप्पज्जन्तीति?

सब्बेसं उपपज्जन्तानं पवत्ते अकुसलविप्पयुत्तचित्तस्स उप्पादक्खणे तेसं तत्थ अकुसला धम्मा न उप्पज्जन्ति, नो च तेसं तत्थ अब्याकता धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे कुसलानं उप्पादक्खणे तेसं तत्थ अकुसला च धम्मा न उप्पज्जन्ति अब्याकता च धम्मा न उप्पज्जन्ति.

(ख) यस्स वा पन यत्थ अब्याकता धम्मा न उप्पज्जन्ति तस्स तत्थ अकुसला धम्मा न उप्पज्जन्तीति?

अरूपे अकुसलानं उप्पादक्खणे तेसं तत्थ अब्याकता धम्मा न उप्पज्जन्ति, नो च तेसं तत्थ अकुसला धम्मा न उप्पज्जन्ति. सब्बेसं चवन्तानं पवत्ते चित्तस्स भङ्गक्खणे अरूपे कुसलानं उप्पादक्खणे तेसं तत्थ अब्याकता च धम्मा न उप्पज्जन्ति अकुसला च धम्मा न उप्पज्जन्ति.