(९) निरुज्झमानुप्पन्नवारो

७७. (क) यस्स चित्तं निरुज्झमानं तस्स चित्तं उप्पन्नन्ति? आमन्ता.

(ख) यस्स वा पन चित्तं उप्पन्नं तस्स चित्तं निरुज्झमानन्ति?

चित्तस्स उप्पादक्खणे तेसं चित्तं उप्पन्नं, नो च तेसं चित्तं निरुज्झमानं. चित्तस्स भङ्गक्खणे तेसं चित्तं उप्पन्नञ्चेव निरुज्झमानञ्च.

(क) यस्स चित्तं न निरुज्झमानं तस्स चित्तं न उप्पन्नन्ति?

चित्तस्स उप्पादक्खणे तेसं चित्तं न निरुज्झमानं, नो च तेसं चित्तं न उप्पन्नं. निरोधसमापन्नानं असञ्ञसत्तानं तेसं चित्तं न चेव निरुज्झमानं न च उप्पन्नं.

(ख) यस्स वा पन चित्तं न उप्पन्नं तस्स चित्तं न निरुज्झमानन्ति? आमन्ता.