१. पुग्गलवारो

(१) उप्पादनिरोधकालसम्भेदवारो

६३. (क) यस्स चित्तं उप्पज्जति न निरुज्झति तस्स चित्तं निरुज्झिस्सति न उप्पज्जिस्सतीति?

पच्छिमचित्तस्स उप्पादक्खणे तेसं चित्तं उप्पज्जति न निरुज्झति, निरुज्झिस्सति न उप्पज्जिस्सति. इतरेसं चित्तस्स उप्पादक्खणे तेसं चित्तं उप्पज्जति न निरुज्झति, निरुज्झिस्सति चेव उप्पज्जिस्सति च.

(ख) यस्स वा पन चित्तं निरुज्झिस्सति न उप्पज्जिस्सति तस्स चित्तं उप्पज्जति न निरुज्झतीति? आमन्ता.

(क) यस्स चित्तं न उप्पज्जति निरुज्झति तस्स चित्तं न निरुज्झिस्सति उप्पज्जिस्सतीति? नो.

(ख) यस्स वा पन चित्तं न निरुज्झिस्सति उप्पज्जिस्सति तस्स चित्तं न उप्पज्जति निरुज्झतीति? नत्थि.

(२) उप्पादुप्पन्नवारो

६४. (क) यस्स चित्तं उप्पज्जति तस्स चित्तं उप्पन्नन्ति? आमन्ता.

(ख) यस्स वा पन चित्तं उप्पन्नं तस्स चित्तं उप्पज्जतीति?

चित्तस्स भङ्गक्खणे तेसं चित्तं उप्पन्नं, नो च तेसं चित्तं उप्पज्जति. चित्तस्स उप्पादक्खणे तेसं चित्तं उप्पन्नञ्चेव उप्पज्जति च.

(क) यस्स चित्तं न उप्पज्जति तस्स चित्तं न उप्पन्नन्ति?

चित्तस्स भङ्गक्खणे तेसं चित्तं न उप्पज्जति, नो च तेसं चित्तं न उप्पन्नं. निरोधसमापन्नानं असञ्ञसत्तानं तेसं चित्तं न चेव उप्पज्जति न च उप्पन्नं.

(ख) यस्स वा पन चित्तं न उप्पन्नं तस्स चित्तं न उप्पज्जतीति? आमन्ता.

(३) निरोधुप्पन्नवारो

६५. (क) यस्स चित्तं निरुज्झति तस्स चित्तं उप्पन्नन्ति? आमन्ता.

(ख) यस्स वा पन चित्तं उप्पन्नं तस्स चित्तं निरुज्झतीति?

चित्तस्स उप्पादक्खणे तेसं चित्तं उप्पन्नं, नो च तेसं चित्तं निरुज्झति. चित्तस्स भङ्गक्खणे तेसं चित्तं उप्पन्नञ्चेव निरुज्झति च.

(क) यस्स चित्तं न निरुज्झति तस्स चित्तं न उप्पन्नन्ति?

चित्तस्स उप्पादक्खणे तेसं चित्तं न निरुज्झति, नो च तेसं चित्तं न उप्पन्नं. निरोधसमापन्नानं असञ्ञसत्तानं तेसं चित्तं न चेव निरुज्झति न च उप्पन्नं.

(ख) यस्स वा पन चित्तं न उप्पन्नं तस्स चित्तं न निरुज्झतीति? आमन्ता.

(४) उप्पादवारो

६६. (क) यस्स चित्तं उप्पज्जति तस्स चित्तं उप्पज्जित्थाति? आमन्ता.

(ख) यस्स वा पन चित्तं उप्पज्जित्थ तस्स चित्तं उप्पज्जतीति?

चित्तस्स भङ्गक्खणे निरोधसमापन्नानं असञ्ञसत्तानं तेसं चित्तं उप्पज्जित्थ, नो च तेसं चित्तं उप्पज्जति. चित्तस्स उप्पादक्खणे तेसं चित्तं उप्पज्जित्थ चेव उप्पज्जति च.

(क) यस्स चित्तं न उप्पज्जति तस्स चित्तं न उप्पज्जित्थाति? उप्पज्जित्थ.

(ख) यस्स वा पन चित्तं न उप्पज्जित्थ तस्स चित्तं न उप्पज्जतीति? नत्थि.

६७. (क) यस्स चित्तं उप्पज्जति तस्स चित्तं उप्पज्जिस्सतीति?

पच्छिमचित्तस्स उप्पादक्खणे तेसं चित्तं उप्पज्जति, नो च तेसं चित्तं उप्पज्जिस्सति. इतरेसं चित्तस्स उप्पादक्खणे तेसं चित्तं उप्पज्जति चेव उप्पज्जिस्सति च.

(ख) यस्स वा पन चित्तं उप्पज्जिस्सति तस्स चित्तं उप्पज्जतीति?

चित्तस्स भङ्गक्खणे निरोधसमापन्नानं असञ्ञसत्तानं तेसं चित्तं उप्पज्जिस्सति, नो च तेसं चित्तं उप्पज्जति. चित्तस्स उप्पादक्खणे तेसं चित्तं उप्पज्जिस्सति चेव उप्पज्जति च.

(क) यस्स चित्तं न उप्पज्जति तस्स चित्तं न उप्पज्जिस्सतीति?

चित्तस्स भङ्गक्खणे निरोधसमापन्नानं असञ्ञसत्तानं तेसं चित्तं न उप्पज्जति, नो च तेसं चित्तं न उप्पज्जिस्सति. पच्छिमचित्तस्स भङ्गक्खणे तेसं चित्तं न चेव उप्पज्जति न च उप्पज्जिस्सति.

(ख) यस्स वा पन चित्तं न उप्पज्जिस्सति तस्स चित्तं न उप्पज्जतीति?

पच्छिमचित्तस्स उप्पादक्खणे तेसं चित्तं न उप्पज्जिस्सति, नो च तेसं चित्तं न उप्पज्जति. पच्छिमचित्तस्स भङ्गक्खणे तेसं चित्तं न चेव उप्पज्जिस्सति न च उप्पज्जति.

६८. (क) यस्स चित्तं उप्पज्जित्थ तस्स चित्तं उप्पज्जिस्सतीति?

पच्छिमचित्तसमङ्गीनं तेसं चित्तं उप्पज्जित्थ, नो च तेसं चित्तं उप्पज्जिस्सति. इतरेसं तेसं चित्तं उप्पज्जित्थ चेव उप्पज्जिस्सति च.

(ख) यस्स वा पन चित्तं उप्पज्जिस्सति तस्स चित्तं उप्पज्जित्थाति? आमन्ता.

(क) यस्स चित्तं न उप्पज्जित्थ तस्स चित्तं न उप्पज्जिस्सतीति? नत्थि.

(ख) यस्स वा पन चित्तं न उप्पज्जिस्सति तस्स चित्तं न उप्पज्जित्थाति? उप्पज्जित्थ.

(५) निरोधवारो

६९. (क) यस्स चित्तं निरुज्झति तस्स चित्तं निरुज्झित्थाति? आमन्ता.

(ख) यस्स वा पन चित्तं निरुज्झित्थ तस्स चित्तं निरुज्झतीति?

चित्तस्स उप्पादक्खणे निरोधसमापन्नानं असञ्ञसत्तानं तेसं चित्तं निरुज्झित्थ, नो च तेसं चित्तं निरुज्झति. चित्तस्स भङ्गक्खणे तेसं चित्तं निरुज्झित्थ चेव निरुज्झति च.

(क) यस्स चित्तं न निरुज्झति तस्स चित्तं न निरुज्झित्थाति? निरुज्झित्थ.

(ख) यस्स वा पन चित्तं न निरुज्झित्थ तस्स चित्तं न निरुज्झतीति? नत्थि.

७०. (क) यस्स चित्तं निरुज्झति तस्स चित्तं निरुज्झिस्सतीति?

पच्छिमचित्तस्स भङ्गक्खणे तेसं चित्तं निरुज्झति, नो च तेसं चित्तं निरुज्झिस्सति. इतरेसं चित्तस्स भङ्गक्खणे तेसं चित्तं निरुज्झति चेव निरुज्झिस्सति च.

(ख) यस्स वा पन चित्तं निरुज्झिस्सति तस्स चित्तं निरुज्झतीति?

चित्तस्स उप्पादक्खणे निरोधसमापन्नानं असञ्ञसत्तानं तेसं चित्तं निरुज्झिस्सति, नो च तेसं चित्तं निरुज्झति. चित्तस्स भङ्गक्खणे तेसं चित्तं निरुज्झिस्सति चेव निरुज्झति च.

(क) यस्स चित्तं न निरुज्झति तस्स चित्तं न निरुज्झिस्सतीति? निरुज्झिस्सति.

(ख) यस्स वा पन चित्तं न निरुज्झिस्सति तस्स चित्तं न निरुज्झतीति? निरुज्झति.

७१. (क) यस्स चित्तं निरुज्झित्थ तस्स चित्तं निरुज्झिस्सतीति?

पच्छिमचित्तस्स भङ्गक्खणे तेसं चित्तं निरुज्झित्थ, नो च तेसं चित्तं निरुज्झिस्सति. इतरेसं तेसं चित्तं निरुज्झित्थ चेव निरुज्झिस्सति च.

(ख) यस्स वा पन चित्तं निरुज्झिस्सति तस्स चित्तं निरुज्झित्थाति? आमन्ता.

(क) यस्स चित्तं न निरुज्झित्थ तस्स चित्तं न निरुज्झिस्सतीति? नत्थि.

(ख) यस्स वा पन चित्तं न निरुज्झिस्सति तस्स चित्तं न निरुज्झित्थाति? निरुज्झित्थ.

(६) उप्पादनिरोधवारो

७२. (क) यस्स चित्तं उप्पज्जति तस्स चित्तं निरुज्झित्थाति? आमन्ता.

(ख) यस्स वा पन चित्तं निरुज्झित्थ तस्स चित्तं उप्पज्जतीति?

चित्तस्स भङ्गक्खणे निरोधसमापन्नानं असञ्ञसत्तानं तेसं चित्तं निरुज्झित्थ, नो च तेसं चित्तं उप्पज्जति. चित्तस्स उप्पादक्खणे तेसं चित्तं निरुज्झित्थ चेव उप्पज्जति च.

(क) यस्स चित्तं न उप्पज्जति तस्स चित्तं न निरुज्झित्थाति? निरुज्झित्थ.

(ख) यस्स वा पन चित्तं न निरुज्झित्थ तस्स चित्तं न उप्पज्जतीति? नत्थि.

७३. (क) यस्स चित्तं उप्पज्जति तस्स चित्तं निरुज्झिस्सतीति? आमन्ता.

(ख) यस्स वा पन चित्तं निरुज्झिस्सति तस्स चित्तं उप्पज्जतीति?

चित्तस्स भङ्गक्खणे निरोधसमापन्नानं असञ्ञसत्तानं तेसं चित्तं निरुज्झिस्सति, नो च तेसं चित्तं उप्पज्जति. चित्तस्स उप्पादक्खणे तेसं चित्तं निरुज्झिस्सति चेव उप्पज्जति च.

(क) यस्स चित्तं न उप्पज्जति तस्स चित्तं न निरुज्झिस्सतीति?

चित्तस्स भङ्गक्खणे निरोधसमापन्नानं असञ्ञसत्तानं तेसं चित्तं न उप्पज्जति, नो च तेसं चित्तं न निरुज्झिस्सति. पच्छिमचित्तस्स भङ्गक्खणे तेसं चित्तं न चेव उप्पज्जति न च निरुज्झिस्सति.

(ख) यस्स वा पन चित्तं न निरुज्झिस्सति तस्स चित्तं न उप्पज्जतीति? आमन्ता.

७४. (क) यस्स चित्तं उप्पज्जित्थ तस्स चित्तं निरुज्झिस्सतीति?

पच्छिमचित्तस्स भङ्गक्खणे तेसं चित्तं उप्पज्जित्थ, नो च तेसं चित्तं निरुज्झिस्सति. इतरेसं तेसं चित्तं उप्पज्जित्थ चेव निरुज्झिस्सति च.

(ख) यस्स वा पन चित्तं निरुज्झिस्सति तस्स चित्तं उप्पज्जित्थाति? आमन्ता.

(क) यस्स चित्तं न उप्पज्जित्थ तस्स चित्तं न निरुज्झिस्सतीति? नत्थि.

(ख) यस्स वा पन चित्तं न निरुज्झिस्सति तस्स चित्तं न उप्पज्जित्थाति? उप्पज्जित्थ.

(७) उप्पज्जमानननिरोधवारो

७५. (क) यस्स चित्तं उप्पज्जति तस्स चित्तं न निरुज्झतीति? आमन्ता.

(ख) यस्स वा पन चित्तं न निरुज्झति तस्स चित्तं उप्पज्जतीति?

निरोधसमापन्नानं असञ्ञसत्तानं तेसं चित्तं न निरुज्झति, नो च तेसं चित्तं उप्पज्जति. चित्तस्स उप्पादक्खणे तेसं चित्तं न निरुज्झति चेव उप्पज्जति च.

(क) यस्स चित्तं न उप्पज्जति तस्स चित्तं निरुज्झतीति?

निरोधसमापन्नानं असञ्ञसत्तानं तेसं चित्तं न उप्पज्जति, नो च तेसं चित्तं निरुज्झति. चित्तस्स भङ्गक्खणे तेसं चित्तं न उप्पज्जति चेव निरुज्झति च.

(ख) यस्स वा पन चित्तं निरुज्झति तस्स चित्तं न उप्पज्जतीति? आमन्ता.

(८) उप्पज्जमानुप्पन्नवारो

७६. (क) यस्स चित्तं उप्पज्जमानं तस्स चित्तं उप्पन्नन्ति? आमन्ता.

(ख) यस्स वा पन चित्तं उप्पन्नं तस्स चित्तं उप्पज्जमानन्ति?

चित्तस्स भङ्गक्खणे तेसं चित्तं उप्पन्नं, नो च तेसं चित्तं उप्पज्जमानं. चित्तस्स उप्पादक्खणे तेसं चित्तं उप्पन्नञ्चेव उप्पज्जमानञ्च.

(क) यस्स चित्तं न उप्पज्जमानं तस्स चित्तं न उप्पन्नन्ति?

चित्तस्स भङ्गक्खणे तेसं चित्तं न उप्पज्जमानं, नो च तेसं चित्तं न उप्पन्नं. निरोधसमापन्नानं असञ्ञसत्तानं तेसं चित्तं न चेव उप्पज्जमानं न च उप्पन्नं.

(ख) यस्स वा पन चित्तं न उप्पन्नं तस्स चित्तं न उप्पज्जमानन्ति? आमन्ता.

(९) निरुज्झमानुप्पन्नवारो

७७. (क) यस्स चित्तं निरुज्झमानं तस्स चित्तं उप्पन्नन्ति? आमन्ता.

(ख) यस्स वा पन चित्तं उप्पन्नं तस्स चित्तं निरुज्झमानन्ति?

चित्तस्स उप्पादक्खणे तेसं चित्तं उप्पन्नं, नो च तेसं चित्तं निरुज्झमानं. चित्तस्स भङ्गक्खणे तेसं चित्तं उप्पन्नञ्चेव निरुज्झमानञ्च.

(क) यस्स चित्तं न निरुज्झमानं तस्स चित्तं न उप्पन्नन्ति?

चित्तस्स उप्पादक्खणे तेसं चित्तं न निरुज्झमानं, नो च तेसं चित्तं न उप्पन्नं. निरोधसमापन्नानं असञ्ञसत्तानं तेसं चित्तं न चेव निरुज्झमानं न च उप्पन्नं.

(ख) यस्स वा पन चित्तं न उप्पन्नं तस्स चित्तं न निरुज्झमानन्ति? आमन्ता.

(१०) उप्पन्नुप्पादवारो

७८. (क) यस्स चित्तं उप्पन्नं तस्स चित्तं उप्पज्जित्थाति? आमन्ता.

(ख) यस्स वा पन चित्तं उप्पज्जित्थ तस्स चित्तं उप्पन्नन्ति?

निरोधसमापन्नानं असञ्ञसत्तानं तेसं चित्तं उप्पज्जित्थ, नो च तेसं चित्तं उप्पन्नं. चित्तसमङ्गीनं तेसं चित्तं उप्पज्जित्थ चेव उप्पन्नञ्च.

(क) यस्स चित्तं न उप्पन्नं तस्स चित्तं न उप्पज्जित्थाति? उप्पज्जित्थ.

(ख) यस्स वा पन चित्तं न उप्पज्जित्थ तस्स चित्तं न उप्पन्नन्ति? नत्थि.

७९. (क) यस्स चित्तं उप्पन्नं तस्स चित्तं उप्पज्जिस्सतीति?

पच्छिमचित्तसमङ्गीनं तेसं चित्तं उप्पन्नं, नो च तेसं चित्तं उप्पज्जिस्सति. इतरेसं चित्तसमङ्गीनं तेसं चित्तं उप्पन्नञ्चेव उप्पज्जिस्सति च.

(ख) यस्स वा पन चित्तं उप्पज्जिस्सति तस्स चित्तं उप्पन्नन्ति?

निरोधसमापन्नानं असञ्ञसत्तानं तेसं चित्तं उप्पज्जिस्सति, नो च तेसं चित्तं उप्पन्नं. चित्तसमङ्गीनं तेसं चित्तं उप्पज्जिस्सति चेव उप्पन्नञ्च.

(क) यस्स चित्तं न उप्पन्नं तस्स चित्तं न उप्पज्जिस्सतीति? उप्पज्जिस्सति.

(ख) यस्स वा पन चित्तं न उप्पज्जिस्सति तस्स चित्तं न उप्पन्नन्ति? उप्पन्नं.

(११) अतीतानागतवारो

८०. (क) यस्स चित्तं उप्पज्जित्थ नो च तस्स चित्तं उप्पन्नं, तस्स चित्तं उप्पज्जिस्सतीति? आमन्ता.

(ख) यस्स वा पन चित्तं उप्पज्जिस्सति नो च तस्स चित्तं उप्पन्नं, तस्स चित्तं उप्पज्जित्थाति? आमन्ता.

(क) यस्स चित्तं न उप्पज्जित्थ नो च तस्स चित्तं न उप्पन्नं, तस्स चित्तं न उप्पज्जिस्सतीति? नत्थि.

(ख) यस्स वा पन चित्तं न उप्पज्जिस्सति नो च तस्स चित्तं न उप्पन्नं, तस्स चित्तं न उप्पज्जित्थाति? उप्पज्जित्थ.

(१२) उप्पन्नुप्पज्जमानवारो

८१. (क) उप्पन्नं उप्पज्जमानन्ति?

भङ्गक्खणे उप्पन्नं, नो च उप्पज्जमानं. उप्पादक्खणे उप्पन्नञ्चेव उप्पज्जमानञ्च.

(ख) उप्पज्जमानं उप्पन्नन्ति? आमन्ता.

(क) न उप्पन्नं न उप्पज्जमानन्ति? आमन्ता.

(ख) न उप्पज्जमानं न उप्पन्नन्ति?

भङ्गक्खणे न उप्पज्जमानं, नो च न उप्पन्नं. अतीतानागतं चित्तं न चेव उप्पज्जमानं न च उप्पन्नं.

(१३) निरुद्धनिरुज्झमानवारो

८२. (क) निरुद्धं निरुज्झमानन्ति? नो.

(ख) निरुज्झमानं निरुद्धन्ति? नो.

(क) न निरुद्धं न निरुज्झमानन्ति?

भङ्गक्खणे न निरुद्धं, नो च न निरुज्झमानं. उप्पादक्खणे अनागतञ्च चित्तं न चेव निरुद्धं न च निरुज्झमानं.

(ख) न निरुज्झमानं न निरुद्धन्ति?

अतीतं चित्तं न निरुज्झमानं, नो च न निरुद्धं. उप्पादक्खणे अनागतञ्च चित्तं न चेव निरुज्झमानं न च निरुद्धं.

(१४) अतिक्कन्तकालवारो

८३. (क) यस्स चित्तं उप्पज्जमानं खणं खणं वीतिक्कन्तं अतिक्कन्तकालं, निरुज्झमानं खणं खणं वीतिक्कन्तं अतिक्कन्तकालं तस्स चित्तन्ति?

भङ्गक्खणे चित्तं उप्पादक्खणं वीतक्कन्तं भङ्गक्खणं अवीतिक्कन्तं, अतीतं चित्तं उप्पादक्खणञ्च वीतिक्कन्तं भङ्गक्खणञ्च वीतिक्कन्तं.

(ख) यस्स वा पन चित्तं निरुज्झमानं खणं खणं वीतिक्कन्तं अतिक्कन्तकालं, उप्पज्जमानं खणं खणं वीतिक्कन्तं अतिक्कन्तकालं तस्स चित्तन्ति?

अतीतं चित्तं.

(क) यस्स चित्तं न उप्पज्जमानं खणं खणं वीतिक्कन्तं अतिक्कन्तकालं, न निरुज्झमानं खणं खणं वीतिक्कन्तं अतिक्कन्तकालं तस्स चित्तन्ति?

उप्पादक्खणे अनागतं चित्तं.

(ख) यस्स वा पन चित्तं न निरुज्झमानं खणं खणं वीतिक्कन्तं अतिक्कन्तकालं, न उप्पज्जमानं खणं खणं वीतिक्कन्तं अतिक्कन्तकालं तस्स चित्तन्ति?

भङ्गक्खणे चित्तं भङ्गक्खणं अवीतिक्कन्तं नो च उप्पादक्खणं अवीतिक्कन्तं, उप्पादक्खणे अनागतञ्च चित्तं भङ्गक्खणञ्च अवीतिक्कन्तं उप्पादक्खणञ्च अवीतिक्कन्तं.