(१४) अतिक्कन्तकालवारो

१०४. (क) यं चित्तं उप्पज्जमानं खणं खणं वीतिक्कन्तं अतिक्कन्तकालं, निरुज्झमानं खणं खणं वीतिक्कन्तं अतिक्कन्तकालं तं चित्तन्ति?

भङ्गक्खणे चित्तं उप्पादक्खणं वीतिक्कन्तं भङ्गक्खणं अवीतिक्कन्तं, अतीतं चित्तं उप्पादक्खणञ्च वीतिक्कन्तं भङ्गक्खणञ्च वीतिक्कन्तं.

(ख) यं वा पन चित्तं निरुज्झमानं खणं खणं वीतिक्कन्तं अतिक्कन्तकालं, उप्पज्जमानं खणं खणं वीतिक्कन्तं अतिक्कन्तकालं तं चित्तन्ति?

अतीतं चित्तं.

(क) यं चित्तं न उप्पज्जमानं खणं खणं वीतिक्कन्तं अतिक्कन्तकालं, न निरुज्झमानं खणं खणं वीतिक्कन्तं अतिक्कन्तकालं तं चित्तन्ति?

उप्पादक्खणे अनागतं चित्तं.

(ख) यं वा पन चित्तं न निरुज्झमानं खणं खणं वीतिक्कन्तं अतिक्कन्तकालं, न उप्पज्जमानं खणं खणं वीतिक्कन्तं अतिक्कन्तकालं तं चित्तन्ति?

भङ्गक्खणे चित्तं भङ्गक्खणं अवीतिक्कन्तं नो च उप्पादक्खणं अवीतिक्कन्तं, उप्पादक्खणे अनागतञ्च चित्तं भङ्गक्खणञ्च अवीतिक्कन्तं उप्पादक्खणञ्च अवीतिक्कन्तं.