(१) पच्चुप्पन्नवारो

(क) अनुलोमपुग्गलो

१९. (क) यस्स कायसङ्खारो उप्पज्जति तस्स वचीसङ्खारो उप्पज्जतीति?

विना वितक्कविचारेहि अस्सासपस्सासानं उप्पादक्खणे तेसं कायसङ्खारो उप्पज्जति, नो च तेसं वचीसङ्खारो उप्पज्जति. पठमज्झानं समापन्नानं कामावचरानं अस्सासपस्सासानं उप्पादक्खणे तेसं कायसङ्खारो च उप्पज्जति वचीसङ्खारो च उप्पज्जति.

(ख) यस्स वा पन वचीसङ्खारो उप्पज्जति तस्स कायसङ्खारो उप्पज्जतीति?

विना अस्सासपस्सासेहि वितक्कविचारानं उप्पादक्खणे तेसं वचीसङ्खारो उप्पज्जति, नो च तेसं कायसङ्खारो उप्पज्जति. पठमज्झानं समापन्नानं कामावचरानं अस्सासपस्सासानं उप्पादक्खणे तेसं वचीसङ्खारो च उप्पज्जति कायसङ्खारो च उप्पज्जति.

(क) यस्स कायसङ्खारो उप्पज्जति तस्स चित्तसङ्खारो उप्पज्जतीति? आमन्ता.

(ख) यस्स वा पन चित्तसङ्खारो उप्पज्जति तस्स कायसङ्खारो उप्पज्जतीति?

विना अस्सासपस्सासेहि चित्तस्स उप्पादक्खणे तेसं चित्तसङ्खारो उप्पज्जति, नो च तेसं कायसङ्खारो उप्पज्जति. अस्सासपस्सासानं उप्पादक्खणे तेसं चित्तसङ्खारो च उप्पज्जति कायसङ्खारो च उप्पज्जति.

२०. (क) यस्स वचीसङ्खारो उप्पज्जति तस्स चित्तसङ्खारो उप्पज्जतीति? आमन्ता.

(ख) यस्स वा पन चित्तसङ्खारो उप्पज्जति तस्स वचीसङ्खारो उप्पज्जतीति?

विना वितक्कविचारेहि चित्तस्स उप्पादक्खणे तेसं चित्तसङ्खारो उप्पज्जति, नो च तेसं वचीसङ्खारो उप्पज्जति. वितक्कविचारानं उप्पादक्खणे तेसं चित्तसङ्खारो च उप्पज्जति वचीसङ्खारो च उप्पज्जति.

(ख) अनुलोमओकासो

२१. (क) यत्थ कायसङ्खारो उप्पज्जति तत्थ वचीसङ्खारो उप्पज्जतीति?

दुतियज्झाने ततियज्झाने तत्थ कायसङ्खारो उप्पज्जति, नो च तत्थ वचीसङ्खारो उप्पज्जति. पठमज्झाने कामावचरे तत्थ कायसङ्खारो च उप्पज्जति वचीसङ्खारो च उप्पज्जति.

(ख) यत्थ वा पन वचीसङ्खारो उप्पज्जति तत्थ कायसङ्खारो उप्पज्जतीति?

रूपावचरे अरूपावचरे तत्थ वचीसङ्खारो उप्पज्जति, नो च तत्थ कायसङ्खारो उप्पज्जति. पठमज्झाने कामावचरे तत्थ वचीसङ्खारो च उप्पज्जति कायसङ्खारो च उप्पज्जति.

(क) यत्थ कायसङ्खारो उप्पज्जति तत्थ चित्तसङ्खारो उप्पज्जतीति? आमन्ता.

(ख) यत्थ वा पन चित्तसङ्खारो उप्पज्जति तत्थ कायसङ्खारो उप्पज्जतीति?

चतुत्थज्झाने रूपावचरे अरूपावचरे तत्थ चित्तसङ्खारो उप्पज्जति, नो च तत्थ कायसङ्खारो उप्पज्जति. पठमज्झाने दुतियज्झाने ततियज्झाने कामावचरे तत्थ चित्तसङ्खारो च उप्पज्जति कायसङ्खारो च उप्पज्जति.

२२. (क) यत्थ वचीसङ्खारो उप्पज्जति तत्थ चित्तसङ्खारो उप्पज्जतीति? आमन्ता.

(ख) यत्थ वा पन चित्तसङ्खारो उप्पज्जति तत्थ वचीसङ्खारो उप्पज्जतीति?

दुतियज्झाने ततियज्झाने चतुत्थज्झाने तत्थ चित्तसङ्खारो उप्पज्जति, नो च तत्थ वचीसङ्खारो उप्पज्जति. पठमज्झाने कामावचरे रूपावचरे अरूपावचरे तत्थ चित्तसङ्खारो च उप्पज्जति वचीसङ्खारो च उप्पज्जति.

(ग) अनुलोमपुग्गलोकासा

२३. यस्स यत्थ कायसङ्खारो उप्पज्जति…पे….

(यस्सकम्पि यस्सयत्थकम्पि सदिसं.)

(घ) पच्चनीकपुग्गलो

२४. (क) यस्स कायसङ्खारो नुप्पज्जति तस्स वचीसङ्खारो नुप्पज्जतीति?

विना अस्सासपस्सासेहि वितक्कविचारानं उप्पादक्खणे तेसं कायसङ्खारो नुप्पज्जति, नो च तेसं वचीसङ्खारो नुप्पज्जति. सब्बेसं चित्तस्स भङ्गक्खणे विना अस्सासपस्सासेहि अवितक्कअविचारचित्तस्स उप्पादक्खणे निरोधसमापन्नानं असञ्ञसत्तानं तेसं कायसङ्खारो च नुप्पज्जति वचीसङ्खारो च नुप्पज्जति.

(ख) यस्स वा पन वचीसङ्खारो नुप्पज्जति तस्स कायसङ्खारो नुप्पज्जतीति?

विना वितक्कविचारेहि अस्सासपस्सासानं उप्पादक्खणे तेसं वचीसङ्खारो नुप्पज्जति, नो च तेसं कायसङ्खारो नुप्पज्जति. सब्बेसं चित्तस्स भङ्गक्खणे विना अस्सासपस्सासेहि अवितक्कअविचारचित्तस्स उप्पादक्खणे निरोधसमापन्नानं असञ्ञसत्तानं तेसं वचीसङ्खारो च नुप्पज्जति कायसङ्खारो च नुप्पज्जति.

(क) यस्स कायसङ्खारो नुप्पज्जति तस्स चित्तसङ्खारो नुप्पज्जतीति?

विना अस्सासपस्सासेहि चित्तस्स उप्पादक्खणे तेसं कायसङ्खारो नुप्पज्जति, नो च तेसं चित्तसङ्खारो नुप्पज्जति. सब्बेसं चित्तस्स भङ्गक्खणे निरोधसमापन्नानं असञ्ञसत्तानं तेसं कायसङ्खारो च नुप्पज्जति चित्तसङ्खारो च नुप्पज्जति.

(ख) यस्स वा पन चित्तसङ्खारो नुप्पज्जति तस्स कायसङ्खारो नुप्पज्जतीति? आमन्ता.

२५. (क) यस्स वचीसङ्खारो नुप्पज्जति तस्स चित्तसङ्खारो नुप्पज्जतीति?

विना वितक्कविचारेहि चित्तस्स उप्पादक्खणे तेसं वचीसङ्खारो नुप्पज्जति, नो च तेसं चित्तसङ्खारो नुप्पज्जति. सब्बेसं चित्तस्स भङ्गक्खणे निरोधसमापन्नानं असञ्ञसत्तानं तेसं वचीसङ्खारो च नुप्पज्जति चित्तसङ्खारो च नुप्पज्जति.

(ख) यस्स वा पन चित्तसङ्खारो नुप्पज्जति तस्स वचीसङ्खारो नुप्पज्जतीति? आमन्ता.

(ङ) पच्चनीकओकासो

२६. (क) यत्थ कायसङ्खारो नुप्पज्जति तत्थ वचीसङ्खारो नुप्पज्जतीति?

रूपावचरे अरूपावचरे तत्थ कायसङ्खारो नुप्पज्जति, नो च तत्थ वचीसङ्खारो नुप्पज्जति. चतुत्थज्झाने असञ्ञसत्ते तत्थ कायसङ्खारो च नुप्पज्जति वचीसङ्खारो च नुप्पज्जति.

(ख) यत्थ वा पन वचीसङ्खारो नुप्पज्जति तत्थ कायसङ्खारो नुप्पज्जतीति?

दुतियज्झाने ततियज्झाने तत्थ वचीसङ्खारो नुप्पज्जति, नो च तत्थ कायसङ्खारो नुप्पज्जति. चतुत्थज्झाने असञ्ञसत्ते तत्थ वचीसङ्खारो च नुप्पज्जति कायसङ्खारो च नुप्पज्जति.

(क) यत्थ कायसङ्खारो नुप्पज्जति तत्थ चित्तसङ्खारो नुप्पज्जतीति?

चतुत्थज्झाने रूपावचरे अरूपावचरे तत्थ कायसङ्खारो नुप्पज्जति, नो च तत्थ चित्तसङ्खारो नुप्पज्जति. असञ्ञसत्ते तत्थ कायसङ्खारो च नुप्पज्जति चित्तसङ्खारो च नुप्पज्जति.

(ख) यत्थ वा पन…पे…? आमन्ता.

२७. (क) यत्थ वचीसङ्खारो नुप्पज्जति तत्थ चित्तसङ्खारो नुप्पज्जतीति?

दुतियज्झाने ततियज्झाने चतुत्थज्झाने तत्थ वचीसङ्खारो नुप्पज्जति, नो च तत्थ चित्तसङ्खारो नुप्पज्जति. असञ्ञसत्ते तत्थ वचीसङ्खारो च नुप्पज्जति चित्तसङ्खारो च नुप्पज्जति.

(ख) यत्थ वा पन…पे…? आमन्ता.

(च) पच्चनीकपुग्गलोकासा

२८. (क) यस्स यत्थ कायसङ्खारो नुप्पज्जति तस्स तत्थ वचीसङ्खारो नुप्पज्जतीति?

विना अस्सासपस्सासेहि वितक्कविचारानं उप्पादक्खणे तेसं तत्थ कायसङ्खारो नुप्पज्जति, नो च तेसं तत्थ वचीसङ्खारो नुप्पज्जति. सब्बेसं चित्तस्स भङ्गक्खणे विना अस्सासपस्सासेहि अवितक्कअविचारचित्तस्स उप्पादक्खणे असञ्ञसत्तानं तेसं तत्थ कायसङ्खारो च नुप्पज्जति वचीसङ्खारो च नुप्पज्जति.

(ख) यस्स वा पन यत्थ…पे…? आमन्ता.

(यस्सकम्पि यस्सयत्थकम्पि सदिसं वित्थारेतब्बं, यस्सयत्थके निरोधसमापन्नानन्ति न लब्भति.)