(२) अतीतवारो

(क) अनुलोमपुग्गलो

२९. (क) यस्स कायसङ्खारो उप्पज्जित्थ तस्स वचीसङ्खारो उप्पज्जित्थाति? आमन्ता.

(ख) यस्स वा पन…पे…? आमन्ता.

(क) यस्स कायसङ्खारो उप्पज्जित्थ तस्स चित्तसङ्खारो उप्पज्जित्थाति? आमन्ता.

(ख) यस्स वा पन…पे…? आमन्ता.

३०. (क) यस्स वचीसङ्खारो उप्पज्जित्थ तस्स चित्तसङ्खारो उप्पज्जित्थाति? आमन्ता.

(ख) यस्स वा पन…पे…? आमन्ता.

(ख) अनुलोमओकासो

३१. यत्थ कायसङ्खारो उप्पज्जित्थ…पे…

(यत्थकम्पि सब्बत्थ एकसदिसं).

(ग) अनुलोमपुग्गलोकासा

३२. (क) यस्स यत्थ कायसङ्खारो उप्पज्जित्थ तस्स तत्थ वचीसङ्खारो उप्पज्जित्थाति?

दुतियज्झानं ततियज्झानं समापन्नानं तेसं तत्थ कायसङ्खारो उप्पज्जित्थ, नो च तेसं तत्थ वचीसङ्खारो उप्पज्जित्थ. पठमज्झानं समापन्नानं कामावचरानं तेसं तत्थ कायसङ्खारो च उप्पज्जित्थ वचीसङ्खारो च उप्पज्जित्थ.

(ख) यस्स वा पन यत्थ वचीसङ्खारो उप्पज्जित्थ तस्स तत्थ कायसङ्खारो उप्पज्जित्थाति?

रूपावचरानं अरूपावचरानं तेसं तत्थ वचीसङ्खारो उप्पज्जित्थ, नो च तेसं तत्थ कायसङ्खारो उप्पज्जित्थ. पठमज्झानं समापन्नानं कामावचरानं तेसं तत्थ वचीसङ्खारो च उप्पज्जित्थ कायसङ्खारो च उप्पज्जित्थ.

(क) यस्स यत्थ कायसङ्खारो उप्पज्जित्थ तस्स तत्थ चित्तसङ्खारो उप्पज्जित्थाति? आमन्ता.

(ख) यस्स वा पन यत्थ चित्तसङ्खारो उप्पज्जित्थ तस्स तत्थ कायसङ्खारो उप्पज्जित्थाति?

चतुत्थज्झानं समापन्नानं रूपावचरानं अरूपावचरानं तेसं तत्थ चित्तसङ्खारो उप्पज्जित्थ, नो च तेसं तत्थ कायसङ्खारो उप्पज्जित्थ. पठमज्झानं दुतियज्झानं ततियज्झानं समापन्नानं कामावचरानं तेसं तत्थ चित्तसङ्खारो च उप्पज्जित्थ कायसङ्खारो च उप्पज्जित्थ.

३३. (क) यस्स यत्थ वचीसङ्खारो उप्पज्जित्थ तस्स तत्थ चित्तसङ्खारो उप्पज्जित्थाति? आमन्ता.

(ख) यस्स वा पन यत्थ चित्तसङ्खारो उप्पज्जित्थ तस्स तत्थ वचीसङ्खारो उप्पज्जित्थाति?

दुतियज्झानं ततियज्झानं चतुत्थज्झानं समापन्नानं सुद्धावासानं दुतिये चित्ते वत्तमाने तेसं तत्थ चित्तसङ्खारो उप्पज्जित्थ, नो च तेसं तत्थ वचीसङ्खारो उप्पज्जित्थ. पठमज्झानं समापन्नानं कामावचरानं इतरेसं रूपावचरानं अरूपावचरानं तेसं तत्थ चित्तसङ्खारो च उप्पज्जित्थ वचीसङ्खारो च उप्पज्जित्थ.

(घ) पच्चनीकपुग्गलो

३४. (क) यस्स कायसङ्खारो नुप्पज्जित्थ तस्स वचीसङ्खारो नुप्पज्जित्थाति? नत्थि.

(ख) यस्स वा पन वचीसङ्खारो नुप्पज्जित्थ तस्स कायसङ्खारो नुप्पज्जित्थाति? नत्थि.

(क) यस्स कायसङ्खारो नुप्पज्जित्थ तस्स चित्तसङ्खारो नुप्पज्जित्थाति? नत्थि.

(ख) यस्स वा पन…पे…? नत्थि.

३५. (क) यस्स वचीसङ्खारो नुप्पज्जित्थ तस्स चित्तसङ्खारो नुप्पज्जित्थाति? नत्थि.

(ख) यस्स वा पन…पे…? नत्थि.

(ङ) पच्चनीकओकासो

३६. यत्थ कायसङ्खारो नुप्पज्जित्थ…पे….

(च) पच्चनीकपुग्गलोकासा

३७. (क) यस्स यत्थ कायसङ्खारो नुप्पज्जित्थ तस्स तत्थ वचीसङ्खारो नुप्पज्जित्थाति?

रूपावचरानं अरूपावचरानं तेसं तत्थ कायसङ्खारो नुप्पज्जित्थ, नो च तेसं तत्थ वचीसङ्खारो नुप्पज्जित्थ. चतुत्थज्झानं समापन्नानं सुद्धावासानं दुतिये चित्ते वत्तमाने असञ्ञसत्तानं तेसं तत्थ कायसङ्खारो च नुप्पज्जित्थ वचीसङ्खारो च नुप्पज्जित्थ.

(ख) यस्स वा पन यत्थ वचीसङ्खारो नुप्पज्जित्थ तस्स तत्थ कायसङ्खारो नुप्पज्जित्थाति?

दुतियज्झानं ततियज्झानं समापन्नानं तेसं तत्थ वचीसङ्खारो नुप्पज्जित्थ, नो च तेसं तत्थ कायसङ्खारो नुप्पज्जित्थ. चतुत्थज्झानं समापन्नानं सुद्धावासानं दुतिये चित्ते वत्तमाने असञ्ञसत्तानं तेसं तत्थ वचीसङ्खारो च नुप्पज्जित्थ कायसङ्खारो च नुप्पज्जित्थ.

(क) यस्स यत्थ कायसङ्खारो नुप्पज्जित्थ तस्स तत्थ चित्तसङ्खारो नुप्पज्जित्थाति?

चतुत्थज्झानं समापन्नानं रूपावचरानं अरूपावचरानं तेसं तत्थ कायसङ्खारो नुप्पज्जित्थ, नो च तेसं तत्थ चित्तसङ्खारो नुप्पज्जित्थ. सुद्धावासं उपपज्जन्तानं असञ्ञसत्तानं तेसं तत्थ कायसङ्खारो च नुप्पज्जित्थ चित्तसङ्खारो च नुप्पज्जित्थ.

(ख) यस्स वा पन यत्थ…पे…? आमन्ता.

३८. (क) यस्स यत्थ वचीसङ्खारो नुप्पज्जित्थ तस्स तत्थ चित्तसङ्खारो नुप्पज्जित्थाति?

दुतियज्झानं ततियज्झानं चतुत्थज्झानं समापन्नानं सुद्धावासानं दुतिये चित्ते वत्तमाने तेसं तत्थ वचीसङ्खारो नुप्पज्जित्थ, नो च तेसं तत्थ चित्तसङ्खारो नुप्पज्जित्थ. सुद्धावासं उपपज्जन्तानं असञ्ञसत्तानं तेसं तत्थ वचीसङ्खारो च नुप्पज्जित्थ चित्तसङ्खारो च नुप्पज्जित्थ.

(ख) यस्स वा पन यत्थ…पे…? आमन्ता.