२. पदसोधनमूलचक्कवारो

(क) अनुलोमं

१०. (क) कायो कायसङ्खारोति? नो.

(ख) सङ्खारा वचीसङ्खारोति?

वचीसङ्खारो सङ्खारो चेव वचीसङ्खारो च. अवसेसा सङ्खारा [अवसेसा सङ्खारा सङ्खारा (सी. स्या. कं.)] न वचीसङ्खारो.

(क) कायो कायसङ्खारोति? नो.

(ख) सङ्खारा चित्तसङ्खारोति?

चित्तसङ्खारो सङ्खारो चेव चित्तसङ्खारो च. अवसेसा सङ्खारा न चित्तसङ्खारो.

११. (क) वची वचीसङ्खारोति? नो.

(ख) सङ्खारा कायसङ्खारोति?

कायसङ्खारो सङ्खारो चेव कायसङ्खारो च. अवसेसा सङ्खारा न कायसङ्खारो.

(क) वची वचीसङ्खारोति? नो.

(ख) सङ्खारा चित्तसङ्खारोति?

चित्तसङ्खारो सङ्खारो चेव चित्तसङ्खारो च. अवसेसा सङ्खारा न चित्तसङ्खारो.

१२. (क) चित्तं चित्तसङ्खारोति? नो.

(ख) सङ्खारा कायसङ्खारोति?

कायसङ्खारो सङ्खारो चेव कायसङ्खारो च. अवसेसा सङ्खारा न कायसङ्खारो.

(क) चित्तं चित्तसङ्खारोति? नो.

(ख) सङ्खारा वचीसङ्खारोति?

वचीसङ्खारो सङ्खारो चेव वचीसङ्खारो च. अवसेसा सङ्खारा न वचीसङ्खारो.

(ख) पच्चनीकं

१३. (क) न कायो न कायसङ्खारोति?

कायसङ्खारो न कायो, कायसङ्खारो. कायञ्च कायसङ्खारञ्च ठपेत्वा अवसेसा न चेव कायो न च कायसङ्खारो.

(ख) न सङ्खारा न वचीसङ्खारोति? आमन्ता.

(क) न कायो न कायसङ्खारोति?

कायसङ्खारो न कायो, कायसङ्खारो. कायञ्च कायसङ्खारञ्च ठपेत्वा अवसेसा न चेव कायो न च कायसङ्खारो.

(ख) न सङ्खारा न चित्तसङ्खारोति? आमन्ता.

१४. (क) न वची न वचीसङ्खारोति?

वचीसङ्खारो न वची, वचीसङ्खारो. वचिञ्च वचीसङ्खारञ्च ठपेत्वा अवसेसा न चेव वची न च वचीसङ्खारो.

(ख) न सङ्खारा न कायसङ्खारोति? आमन्ता.

(क) न वची न वचीसङ्खारोति?

वचीसङ्खारो न वची, वचीसङ्खारो. वचिञ्च वचीसङ्खारञ्च ठपेत्वा अवसेसा न चेव वची न च वचीसङ्खारो.

(ख) न सङ्खारा न चित्तसङ्खारोति? आमन्ता.

१५. (क) न चित्तं न चित्तसङ्खारोति?

चित्तसङ्खारो न चित्तं, चित्तसङ्खारो. चित्तञ्च चित्तसङ्खारञ्च ठपेत्वा अवसेसा न चेव चित्तं न च चित्तसङ्खारो.

(ख) न सङ्खारा न कायसङ्खारोति? आमन्ता.

(क) न चित्तं न चित्तसङ्खारोति?

चित्तसङ्खारो न चित्तं, चित्तसङ्खारो. चित्तञ्च चित्तसङ्खारञ्च ठपेत्वा अवसेसा न चेव चित्तं न च चित्तसङ्खारो.

(ख) न सङ्खारा न वचीसङ्खारोति? आमन्ता.