१. पदसोधनवारो

(क) अनुलोमं

८. (क) कायो कायसङ्खारोति? नो.

(ख) कायसङ्खारो कायोति? नो.

(क) वची वचीसङ्खारोति? नो.

(ख) वचीसङ्खारो वचीति? नो.

(क) चित्तं चित्तसङ्खारोति? नो.

(ख) चित्तसङ्खारो चित्तन्ति? नो.

(ख) पच्चनीकं

९. (क) न कायो न कायसङ्खारोति?

कायसङ्खारो न कायो, कायसङ्खारो. कायञ्च कायसङ्खारञ्च ठपेत्वा अवसेसा न चेव कायो न च कायसङ्खारो.

(ख) न कायसङ्खारो न कायोति?

कायो न कायसङ्खारो, कायो. कायञ्च कायसङ्खारञ्च ठपेत्वा अवसेसा न चेव कायो न च कायसङ्खारो.

(क) न वची न वचीसङ्खारोति?

वचीसङ्खारो न वची, वचीसङ्खारो. वचिञ्च वचीसङ्खारञ्च ठपेत्वा अवसेसा न चेव वची न च वचीसङ्खारो.

(ख) न वचीसङ्खारो न वचीति?

वची न वचीसङ्खारो, वची. वचिञ्च वचीसङ्खारञ्च ठपेत्वा अवसेसा न चेव वची न च वचीसङ्खारो.

(क) न चित्तं न चित्तसङ्खारोति?

चित्तसङ्खारो न चित्तं, चित्तसङ्खारो. चित्तञ्च चित्तसङ्खारञ्च ठपेत्वा अवसेसा न चेव चित्तं न च चित्तसङ्खारो.

(ख) न चित्तसङ्खारो न चित्तन्ति?

चित्तं न चित्तसङ्खारो, चित्तं. चित्तञ्च चित्तसङ्खारञ्च ठपेत्वा अवसेसा न चेव चित्तं न च चित्तसङ्खारो.