(३) अनागतवारो

(क) अनुलोमपुग्गलो

१३७. (क) यस्स कायसङ्खारो उप्पज्जिस्सति तस्स वचीसङ्खारो निरुज्झिस्सतीति? आमन्ता.

(ख) यस्स वा पन वचीसङ्खारो निरुज्झिस्सति तस्स कायसङ्खारो उप्पज्जिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति रूपावचरे अरूपावचरे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं वचीसङ्खारो निरुज्झिस्सति, नो च तेसं कायसङ्खारो उप्पज्जिस्सति. इतरेसं तेसं वचीसङ्खारो च निरुज्झिस्सति कायसङ्खारो च उप्पज्जिस्सति.

(क) यस्स कायसङ्खारो उप्पज्जिस्सति तस्स चित्तसङ्खारो निरुज्झिस्सतीति? आमन्ता.

(ख) यस्स वा पन चित्तसङ्खारो निरुज्झिस्सति तस्स कायसङ्खारो उप्पज्जिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति रूपावचरे अरूपावचरे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं चित्तसङ्खारो निरुज्झिस्सति, नो च तेसं कायसङ्खारो उप्पज्जिस्सति. इतरेसं तेसं चित्तसङ्खारो च निरुज्झिस्सति कायसङ्खारो च उप्पज्जिस्सति.

१३८. (क) यस्स वचीसङ्खारो उप्पज्जिस्सति तस्स चित्तसङ्खारो निरुज्झिस्सतीति? आमन्ता.

(ख) यस्स वा पन चित्तसङ्खारो निरुज्झिस्सति तस्स वचीसङ्खारो उप्पज्जिस्सतीति?

पच्छिमचित्तस्स उप्पादक्खणे यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं चित्तसङ्खारो निरुज्झिस्सति, नो च तेसं वचीसङ्खारो उप्पज्जिस्सति. इतरेसं तेसं चित्तसङ्खारो च निरुज्झिस्सति वचीसङ्खारो च उप्पज्जिस्सति.

(ख) अनुलोमओकासो

१३९. यत्थ कायसङ्खारो उप्पज्जिस्सति…पे….

(ग) अनुलोमपुग्गलोकासा

१४०. (क) यस्स यत्थ कायसङ्खारो उप्पज्जिस्सति तस्स तत्थ वचीसङ्खारो निरुज्झिस्सतीति?

दुतियज्झानं ततियज्झानं समापन्नानं तेसं तत्थ कायसङ्खारो उप्पज्जिस्सति, नो च तेसं तत्थ वचीसङ्खारो निरुज्झिस्सति. पठमज्झानं समापन्नानं कामावचरानं तेसं तत्थ कायसङ्खारो च उप्पज्जिस्सति वचीसङ्खारो च निरुज्झिस्सति.

(ख) यस्स वा पन यत्थ वचीसङ्खारो निरुज्झिस्सति तस्स तत्थ कायसङ्खारो उप्पज्जिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति रूपावचरानं अरूपावचरानं तेसं तत्थ वचीसङ्खारो निरुज्झिस्सति, नो च तेसं तत्थ कायसङ्खारो उप्पज्जिस्सति. पठमज्झानं समापन्नानं इतरेसं कामावचरानं तेसं तत्थ वचीसङ्खारो च निरुज्झिस्सति कायसङ्खारो च उप्पज्जिस्सति.

(क) यस्स यत्थ कायसङ्खारो उप्पज्जिस्सति तस्स तत्थ चित्तसङ्खारो निरुज्झिस्सतीति? आमन्ता.

(ख) यस्स वा पन यत्थ चित्तसङ्खारो निरुज्झिस्सति तस्स तत्थ कायसङ्खारो उप्पज्जिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति चतुत्थज्झानं समापन्नानं रूपावचरानं अरूपावचरानं तेसं तत्थ चित्तसङ्खारो निरुज्झिस्सति, नो च तेसं तत्थ कायसङ्खारो उप्पज्जिस्सति. पठमज्झानं दुतियज्झानं ततियज्झानं समापन्नानं इतरेसं कामावचरानं तेसं तत्थ चित्तसङ्खारो च निरुज्झिस्सति कायसङ्खारो च उप्पज्जिस्सति.

१४१. (क) यस्स यत्थ वचीसङ्खारो उप्पज्जिस्सति तस्स तत्थ चित्तसङ्खारो निरुज्झिस्सतीति? आमन्ता.

(ख) यस्स वा पन यत्थ चित्तसङ्खारो निरुज्झिस्सति तस्स तत्थ वचीसङ्खारो उप्पज्जिस्सतीति?

पच्छिमचित्तस्स उप्पादक्खणे यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति दुतियज्झानं ततियज्झानं चतुत्थज्झानं समापन्नानं तेसं तत्थ चित्तसङ्खारो निरुज्झिस्सति, नो च तेसं तत्थ वचीसङ्खारो उप्पज्जिस्सति. पठमज्झानं समापन्नानं कामावचरानं इतरेसं रूपावचरानं अरूपावचरानं तेसं तत्थ चित्तसङ्खारो च निरुज्झिस्सति वचीसङ्खारो च उप्पज्जिस्सति.

(घ) पच्चनीकपुग्गलो

१४२. (क) यस्स कायसङ्खारो नुप्पज्जिस्सति तस्स वचीसङ्खारो न निरुज्झिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति रूपावचरे अरूपावचरे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं कायसङ्खारो नुप्पज्जिस्सति, नो च तेसं वचीसङ्खारो न निरुज्झिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं कायसङ्खारो च नुप्पज्जिस्सति वचीसङ्खारो च न निरुज्झिस्सति.

(ख) यस्स वा पन…पे…? आमन्ता.

(क) यस्स कायसङ्खारो नुप्पज्जिस्सति तस्स चित्तसङ्खारो न निरुज्झिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति रूपावचरे अरूपावचरे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं कायसङ्खारो नुप्पज्जिस्सति, नो च तेसं चित्तसङ्खारो न निरुज्झिस्सति. पच्छिमचित्तस्स भङ्गक्खणे तेसं कायसङ्खारो च नुप्पज्जिस्सति चित्तसङ्खारो च न निरुज्झिस्सति.

(ख) यस्स वा पन…पे…? आमन्ता.

१४३. (क) यस्स वचीसङ्खारो नुप्पज्जिस्सति तस्स चित्तसङ्खारो न निरुज्झिस्सतीति?

पच्छिमचित्तस्स उप्पादक्खणे यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं वचीसङ्खारो नुप्पज्जिस्सति, नो च तेसं चित्तसङ्खारो न निरुज्झिस्सति. पच्छिमचित्तस्स भङ्गक्खणे तेसं वचीसङ्खारो च नुप्पज्जिस्सति चित्तसङ्खारो च न निरुज्झिस्सति.

(ख) यस्स वा पन…पे…? आमन्ता.

(ङ) पच्चनीकओकासो

१४४. यत्थ कायसङ्खारो नुप्पज्जिस्सति…पे….

(च) पच्चनीकपुग्गलोकासा

१४५. (क) यस्स यत्थ कायसङ्खारो नुप्पज्जिस्सति तस्स तत्थ वचीसङ्खारो न निरुज्झिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति रूपावचरानं अरूपावचरानं तेसं तत्थ कायसङ्खारो नुप्पज्जिस्सति, नो च तेसं तत्थ वचीसङ्खारो न निरुज्झिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति चतुत्थज्झानं समापन्नानं असञ्ञसत्तानं तेसं तत्थ कायसङ्खारो च नुप्पज्जिस्सति वचीसङ्खारो च न निरुज्झिस्सति.

(ख) यस्स वा पन यत्थ वचीसङ्खारो न निरुज्झिस्सति तस्स तत्थ कायसङ्खारो नुप्पज्जिस्सतीति?

दुतियज्झानं ततियज्झानं समापन्नानं तेसं तत्थ वचीसङ्खारो न निरुज्झिस्सति, नो च तेसं तत्थ कायसङ्खारो नुप्पज्जिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति चतुत्थज्झानं समापन्नानं असञ्ञसत्तानं तेसं तत्थ वचीसङ्खारो च न निरुज्झिस्सति कायसङ्खारो च नुप्पज्जिस्सति.

(क) यस्स यत्थ कायसङ्खारो नुप्पज्जिस्सति तस्स तत्थ चित्तसङ्खारो न निरुज्झिस्सतीति?

कामावचरानं पच्छिमचित्तस्स उप्पादक्खणे यस्स चित्तस्स अनन्तरा कामावचरानं पच्छिमचित्तं उप्पज्जिस्सति चतुत्थज्झानं समापन्नानं रूपावचरानं अरूपावचरानं तेसं तत्थ कायसङ्खारो नुप्पज्जिस्सति, नो च तेसं तत्थ चित्तसङ्खारो न निरुज्झिस्सति. पच्छिमचित्तस्स भङ्गक्खणे असञ्ञसत्तानं तेसं तत्थ कायसङ्खारो च नुप्पज्जिस्सति चित्तसङ्खारो च न निरुज्झिस्सति.

(ख) यस्स वा पन यत्थ…पे…? आमन्ता.

१४६. (क) यस्स यत्थ वचीसङ्खारो नुप्पज्जिस्सति तस्स तत्थ चित्तसङ्खारो न निरुज्झिस्सतीति?

पच्छिमचित्तस्स उप्पादक्खणे यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति दुतियज्झानं ततियज्झानं चतुत्थज्झानं समापन्नानं तेसं तत्थ वचीसङ्खारो नुप्पज्जिस्सति, नो च तेसं तत्थ चित्तसङ्खारो न निरुज्झिस्सति. पच्छिमचित्तस्स भङ्गक्खणे असञ्ञसत्तानं तेसं तत्थ वचीसङ्खारो च नुप्पज्जिस्सति चित्तसङ्खारो च न निरुज्झिस्सति.

(ख) यस्स वा पन यत्थ…पे…? आमन्ता.