(५) पच्चुप्पन्नानागतवारो

(क) अनुलोमपुग्गलो

१०८. (क) यस्स कायसङ्खारो निरुज्झति तस्स वचीसङ्खारो निरुज्झिस्सतीति? आमन्ता.

(ख) यस्स वा पन वचीसङ्खारो निरुज्झिस्सति तस्स कायसङ्खारो निरुज्झतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे निरोधसमापन्नानं असञ्ञसत्तानं तेसं वचीसङ्खारो निरुज्झिस्सति, नो च तेसं कायसङ्खारो निरुज्झति. अस्सासपस्सासानं भङ्गक्खणे तेसं वचीसङ्खारो च निरुज्झिस्सति कायसङ्खारो च निरुज्झति.

(क) यस्स कायसङ्खारो निरुज्झति तस्स चित्तसङ्खारो निरुज्झिस्सतीति? आमन्ता.

(ख) यस्स वा पन चित्तसङ्खारो निरुज्झिस्सति तस्स कायसङ्खारो निरुज्झतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे निरोधसमापन्नानं असञ्ञसत्तानं तेसं चित्तसङ्खारो निरुज्झिस्सति, नो च तेसं कायसङ्खारो निरुज्झति. अस्सासपस्सासानं भङ्गक्खणे तेसं चित्तसङ्खारो च निरुज्झिस्सति कायसङ्खारो च निरुज्झति.

१०९. (क) यस्स वचीसङ्खारो निरुज्झति तस्स चित्तसङ्खारो निरुज्झिस्सतीति?

सवितक्कसविचारपच्छिमचित्तस्स भङ्गक्खणे तेसं वचीसङ्खारो निरुज्झति, नो च तेसं चित्तसङ्खारो निरुज्झिस्सति. इतरेसं वितक्कविचारानं भङ्गक्खणे तेसं वचीसङ्खारो च निरुज्झति चित्तसङ्खारो च निरुज्झिस्सति.

(ख) यस्स वा पन चित्तसङ्खारो निरुज्झिस्सति तस्स वचीसङ्खारो निरुज्झतीति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे निरोधसमापन्नानं असञ्ञसत्तानं तेसं चित्तसङ्खारो निरुज्झिस्सति, नो च तेसं वचीसङ्खारो निरुज्झति. वितक्कविचारानं भङ्गक्खणे तेसं चित्तसङ्खारो च निरुज्झिस्सति वचीसङ्खारो च निरुज्झति.

(ख) अनुलोमओकासो

११०. यत्थ कायसङ्खारो निरुज्झति…पे….

(ग) अनुलोमपुग्गलोकासा

१११. (क) यस्स यत्थ कायसङ्खारो निरुज्झति तस्स तत्थ वचीसङ्खारो निरुज्झिस्सतीति?

दुतियज्झानं ततियज्झानं समापन्नानं अस्सासपस्सासानं भङ्गक्खणे तेसं तत्थ कायसङ्खारो निरुज्झति, नो च तेसं तत्थ वचीसङ्खारो निरुज्झिस्सति. पठमज्झानं समापन्नानं कामावचरानं अस्सासपस्सासानं भङ्गक्खणे तेसं तत्थ कायसङ्खारो च निरुज्झति वचीसङ्खारो च निरुज्झिस्सति.

(ख) यस्स वा पन यत्थ वचीसङ्खारो निरुज्झिस्सति तस्स तत्थ कायसङ्खारो निरुज्झतीति?

पठमज्झानं समापन्नानं कामावचरानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे रूपावचरानं अरूपावचरानं तेसं तत्थ वचीसङ्खारो निरुज्झिस्सति, नो च तेसं तत्थ कायसङ्खारो निरुज्झति. पठमज्झानं समापन्नानं कामावचरानं अस्सासपस्सासानं भङ्गक्खणे तेसं तत्थ वचीसङ्खारो च निरुज्झिस्सति कायसङ्खारो च निरुज्झति.

(क) यस्स यत्थ कायसङ्खारो निरुज्झति तस्स तत्थ चित्तसङ्खारो निरुज्झिस्सतीति? आमन्ता.

(ख) यस्स वा पन यत्थ चित्तसङ्खारो निरुज्झिस्सति तस्स तत्थ कायसङ्खारो निरुज्झतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे तेसं तत्थ चित्तसङ्खारो निरुज्झिस्सति, नो च तेसं तत्थ कायसङ्खारो निरुज्झति. अस्सासपस्सासानं भङ्गक्खणे तेसं तत्थ चित्तसङ्खारो च निरुज्झिस्सति कायसङ्खारो च निरुज्झति.

११२. (क) यस्स यत्थ वचीसङ्खारो निरुज्झति तस्स तत्थ चित्तसङ्खारो निरुज्झिस्सतीति?

सवितक्कसविचारपच्छिमचित्तस्स भङ्गक्खणे तेसं तत्थ वचीसङ्खारो निरुज्झति, नो च तेसं तत्थ चित्तसङ्खारो निरुज्झिस्सति. इतरेसं वितक्कविचारानं भङ्गक्खणे तेसं तत्थ वचीसङ्खारो च निरुज्झति चित्तसङ्खारो च निरुज्झिस्सति.

(ख) यस्स वा पन यत्थ चित्तसङ्खारो निरुज्झिस्सति तस्स तत्थ वचीसङ्खारो निरुज्झतीति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे तेसं तत्थ चित्तसङ्खारो निरुज्झिस्सति, नो च तेसं तत्थ वचीसङ्खारो निरुज्झति. वितक्कविचारानं भङ्गक्खणे तेसं तत्थ चित्तसङ्खारो च निरुज्झिस्सति वचीसङ्खारो च निरुज्झति.

(घ) पच्चनीकपुग्गलो

११३. (क) यस्स कायसङ्खारो न निरुज्झति तस्स वचीसङ्खारो न निरुज्झिस्सतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे निरोधसमापन्नानं असञ्ञसत्तानं तेसं कायसङ्खारो न निरुज्झति, नो च तेसं वचीसङ्खारो न निरुज्झिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं कायसङ्खारो च न निरुज्झति वचीसङ्खारो च न निरुज्झिस्सति.

(ख) यस्स वा पन वचीसङ्खारो न निरुज्झिस्सति तस्स कायसङ्खारो न निरुज्झतीति? आमन्ता.

(क) यस्स कायसङ्खारो न निरुज्झति तस्स चित्तसङ्खारो न निरुज्झिस्सतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे निरोधसमापन्नानं असञ्ञसत्तानं तेसं कायसङ्खारो न निरुज्झति, नो च तेसं चित्तसङ्खारो न निरुज्झिस्सति. पच्छिमचित्तस्स भङ्गक्खणे तेसं कायसङ्खारो च न निरुज्झति चित्तसङ्खारो च न निरुज्झिस्सति.

(ख) यस्स वा पन…पे…? आमन्ता.

११४. (क) यस्स वचीसङ्खारो न निरुज्झति तस्स चित्तसङ्खारो न निरुज्झिस्सतीति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे निरोधसमापन्नानं असञ्ञसत्तानं तेसं वचीसङ्खारो न निरुज्झति, नो च तेसं चित्तसङ्खारो न निरुज्झिस्सति. अवितक्कअविचारपच्छिमचित्तस्स भङ्गक्खणे तेसं वचीसङ्खारो च न निरुज्झति चित्तसङ्खारो च न निरुज्झिस्सति.

(ख) यस्स वा पन चित्तसङ्खारो न निरुज्झिस्सति तस्स वचीसङ्खारो न निरुज्झतीति?

सवितक्कसविचारपच्छिमचित्तस्स भङ्गक्खणे तेसं चित्तसङ्खारो न निरुज्झिस्सति, नो च तेसं वचीसङ्खारो न निरुज्झति. अवितक्कअविचारपच्छिमचित्तस्स भङ्गक्खणे तेसं चित्तसङ्खारो च न निरुज्झिस्सति वचीसङ्खारो च न निरुज्झति.

(ङ) पच्चनीकओकासो

११५. यत्थ कायसङ्खारो न निरुज्झति…पे….

(च) पच्चनीकपुग्गलोकासा

११६. (क) यस्स यत्थ कायसङ्खारो न निरुज्झति तस्स तत्थ वचीसङ्खारो न निरुज्झिस्सतीति?

पठमज्झानं समापन्नानं कामावचरानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे रूपावचरानं अरूपावचरानं तेसं तत्थ कायसङ्खारो न निरुज्झति, नो च तेसं तत्थ वचीसङ्खारो न निरुज्झिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति दुतियज्झानं ततियज्झानं समापन्नानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे चतुत्थज्झानं समापन्नानं असञ्ञसत्तानं तेसं तत्थ कायसङ्खारो च न निरुज्झति वचीसङ्खारो च न निरुज्झिस्सति.

(ख) यस्स वा पन यत्थ वचीसङ्खारो न निरुज्झिस्सति तस्स तत्थ कायसङ्खारो न निरुज्झतीति?

दुतियज्झानं ततियज्झानं समापन्नानं अस्सासपस्सासानं भङ्गक्खणे तेसं तत्थ वचीसङ्खारो न निरुज्झिस्सति, नो च तेसं तत्थ कायसङ्खारो न निरुज्झति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति दुतियज्झानं ततियज्झानं समापन्नानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे चतुत्थज्झानं समापन्नानं असञ्ञसत्तानं तेसं तत्थ वचीसङ्खारो च न निरुज्झिस्सति कायसङ्खारो च न निरुज्झति.

(क) यस्स यत्थ कायसङ्खारो न निरुज्झति तस्स तत्थ चित्तसङ्खारो न निरुज्झिस्सतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे तेसं तत्थ कायसङ्खारो न निरुज्झति, नो च तेसं तत्थ चित्तसङ्खारो न निरुज्झिस्सति. पच्छिमचित्तस्स भङ्गक्खणे असञ्ञसत्तानं तेसं तत्थ कायसङ्खारो च न निरुज्झति चित्तसङ्खारो च न निरुज्झिस्सति.

(ख) यस्स वा पन…पे…? आमन्ता.

११७. (क) यस्स यत्थ वचीसङ्खारो न निरुज्झति तस्स तत्थ चित्तसङ्खारो न निरुज्झिस्सतीति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे तेसं तत्थ वचीसङ्खारो न निरुज्झति, नो च तेसं तत्थ चित्तसङ्खारो न निरुज्झिस्सति. अवितक्कअविचारपच्छिमचित्तस्स भङ्गक्खणे असञ्ञसत्तानं तेसं तत्थ वचीसङ्खारो च न निरुज्झति चित्तसङ्खारो च न निरुज्झिस्सति.

(ख) यस्स वा पन यत्थ चित्तसङ्खारो न निरुज्झिस्सति तस्स तत्थ वचीसङ्खारो न निरुज्झतीति?

सवितक्कसविचारपच्छिमचित्तस्स भङ्गक्खणे तेसं तत्थ चित्तसङ्खारो न निरुज्झिस्सति, नो च तेसं तत्थ वचीसङ्खारो न निरुज्झति. अवितक्कअविचारपच्छिमचित्तस्स भङ्गक्खणे असञ्ञसत्तानं तेसं तत्थ चित्तसङ्खारो च न निरुज्झिस्सति वचीसङ्खारो च न निरुज्झति.