(६) अतीतानागतवारो

(क) अनुलोमपुग्गलो

११८. (क) यस्स कायसङ्खारो निरुज्झित्थ तस्स वचीसङ्खारो निरुज्झिस्सतीति?

सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं कायसङ्खारो निरुज्झित्थ, नो च तेसं वचीसङ्खारो निरुज्झिस्सति. इतरेसं तेसं कायसङ्खारो च निरुज्झित्थ वचीसङ्खारो च निरुज्झिस्सति.

(ख) यस्स वा पन…पे…? आमन्ता.

(क) यस्स कायसङ्खारो निरुज्झित्थ तस्स चित्तसङ्खारो निरुज्झिस्सतीति?

पच्छिमचित्तस्स भङ्गक्खणे तेसं कायसङ्खारो निरुज्झित्थ, नो च तेसं चित्तसङ्खारो निरुज्झिस्सति. इतरेसं तेसं कायसङ्खारो च निरुज्झित्थ चित्तसङ्खारो च निरुज्झिस्सति.

(ख) यस्स वा पन…पे…? आमन्ता.

११९. (क) यस्स वचीसङ्खारो निरुज्झित्थ तस्स चित्तसङ्खारो निरुज्झिस्सतीति?

पच्छिमचित्तस्स भङ्गक्खणे तेसं वचीसङ्खारो निरुज्झित्थ, नो च तेसं चित्तसङ्खारो निरुज्झिस्सति. इतरेसं तेसं वचीसङ्खारो च निरुज्झित्थ चित्तसङ्खारो च निरुज्झिस्सति.

(ख) यस्स वा पन…पे…? आमन्ता.

(ख) अनुलोमओकासो

१२०. यत्थ कायसङ्खारो निरुज्झित्थ…पे….

(ग) अनुलोमपुग्गलोकासा

१२१. (क) यस्स यत्थ कायसङ्खारो निरुज्झित्थ तस्स तत्थ वचीसङ्खारो निरुज्झिस्सतीति?

कामावचरे पच्छिमचित्तस्स भङ्गक्खणे दुतियज्झानं ततियज्झानं समापन्नानं तेसं तत्थ कायसङ्खारो निरुज्झित्थ, नो च तेसं तत्थ वचीसङ्खारो निरुज्झिस्सति. पठमज्झानं समापन्नानं इतरेसं कामावचरानं तेसं तत्थ कायसङ्खारो न निरुज्झित्थ वचीसङ्खारो च निरुज्झिस्सति.

(ख) यस्स वा पन यत्थ वचीसङ्खारो निरुज्झिस्सति तस्स तत्थ कायसङ्खारो निरुज्झित्थाति?

रूपावचरानं अरूपावचरानं तेसं तत्थ वचीसङ्खारो निरुज्झिस्सति, नो च तेसं तत्थ कायसङ्खारो निरुज्झित्थ. पठमज्झानं समापन्नानं कामावचरानं तेसं तत्थ वचीसङ्खारो च निरुज्झिस्सति कायसङ्खारो च निरुज्झित्थ.

(क) यस्स यत्थ कायसङ्खारो निरुज्झित्थ तस्स तत्थ चित्तसङ्खारो निरुज्झिस्सतीति?

कामावचरे पच्छिमचित्तस्स भङ्गक्खणे तेसं तत्थ कायसङ्खारो निरुज्झित्थ, नो च तेसं तत्थ चित्तसङ्खारो निरुज्झिस्सति. पठमज्झानं दुतियज्झानं ततियज्झानं समापन्नानं इतरेसं कामावचरानं तेसं तत्थ कायसङ्खारो च निरुज्झित्थ चित्तसङ्खारो च निरुज्झिस्सति.

(ख) यस्स वा पन यत्थ चित्तसङ्खारो निरुज्झिस्सति तस्स तत्थ कायसङ्खारो निरुज्झित्थाति?

चतुत्थज्झानं समापन्नानं रूपावचरानं अरूपावचरानं तेसं तत्थ चित्तसङ्खारो निरुज्झिस्सति, नो च तेसं तत्थ कायसङ्खारो निरुज्झित्थ. पठमज्झानं दुतियज्झानं ततियज्झानं समापन्नानं कामावचरानं तेसं तत्थ चित्तसङ्खारो च निरुज्झिस्सति कायसङ्खारो च निरुज्झित्थ.

१२२. (क) यस्स यत्थ वचीसङ्खारो निरुज्झित्थ तस्स तत्थ चित्तसङ्खारो निरुज्झिस्सतीति?

सवितक्कसविचारभूमियं पच्छिमचित्तस्स भङ्गक्खणे तेसं तत्थ वचीसङ्खारो निरुज्झित्थ, नो च तेसं तत्थ चित्तसङ्खारो निरुज्झिस्सति. इतरेसं सवितक्कसविचारभूमियं तेसं तत्थ वचीसङ्खारो च निरुज्झित्थ चित्तसङ्खारो च निरुज्झिस्सति.

(ख) यस्स वा पन यत्थ चित्तसङ्खारो निरुज्झिस्सति तस्स तत्थ वचीसङ्खारो निरुज्झित्थाति?

अवितक्कअविचारभूमियं तेसं तत्थ चित्तसङ्खारो निरुज्झिस्सति, नो च तेसं तत्थ वचीसङ्खारो निरुज्झित्थ. सवितक्कसविचारभूमियं तेसं तत्थ चित्तसङ्खारो च निरुज्झिस्सति वचीसङ्खारो च निरुज्झित्थ.

(घ) पच्चनीकपुग्गलो

१२३. (क) यस्स कायसङ्खारो न निरुज्झित्थ तस्स वचीसङ्खारो न निरुज्झिस्सतीति? नत्थि.

(ख) यस्स वा पन वचीसङ्खारो न निरुज्झिस्सति तस्स कायसङ्खारो न निरुज्झित्थाति? निरुज्झित्थ.

(क) यस्स कायसङ्खारो न निरुज्झित्थ तस्स चित्तसङ्खारो न निरुज्झिस्सतीति? नत्थि.

(ख) यस्स वा पन चित्तसङ्खारो न निरुज्झिस्सति तस्स कायसङ्खारो न निरुज्झित्थाति? निरुज्झित्थ.

१२४. (क) यस्स वचीसङ्खारो न निरुज्झित्थ तस्स चित्तसङ्खारो न निरुज्झिस्सतीति? नत्थि.

(ख) यस्स वा पन चित्तसङ्खारो न निरुज्झिस्सति तस्स वचीसङ्खारो न निरुज्झित्थाति? निरुज्झित्थ.

(ङ) पच्चनीकओकासो

१२५. यत्थ कायसङ्खारो न निरुज्झित्थ…पे….

(च) पच्चनीकपुग्गलोकासा

१२६. (क) यस्स यत्थ कायसङ्खारो न निरुज्झित्थ तस्स तत्थ वचीसङ्खारो न निरुज्झिस्सतीति?

रूपावचरानं अरूपावचरानं तेसं तत्थ कायसङ्खारो न निरुज्झित्थ, नो च तेसं तत्थ वचीसङ्खारो न निरुज्झिस्सति. रूपावचरे अरूपावचरे सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति चतुत्थज्झानं समापन्नानं असञ्ञसत्तानं तेसं तत्थ कायसङ्खारो च न निरुज्झित्थ वचीसङ्खारो च न निरुज्झिस्सति.

(ख) यस्स वा पन यत्थ वचीसङ्खारो न निरुज्झिस्सति तस्स तत्थ कायसङ्खारो न निरुज्झित्थाति?

कामावचरे पच्छिमचित्तस्स भङ्गक्खणे दुतियज्झानं ततियज्झानं समापन्नानं तेसं तत्थ वचीसङ्खारो न निरुज्झिस्सति, नो च तेसं तत्थ कायसङ्खारो न निरुज्झित्थ. रूपावचरे अरूपावचरे सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति चतुत्थज्झानं समापन्नानं असञ्ञसत्तानं तेसं तत्थ वचीसङ्खारो च न निरुज्झिस्सति कायसङ्खारो च न निरुज्झित्थ.

(क) यस्स यत्थ कायसङ्खारो न निरुज्झित्थ तस्स तत्थ चित्तसङ्खारो न निरुज्झिस्सतीति?

चतुत्थज्झानं समापन्नानं रूपावचरानं अरूपावचरानं तेसं तत्थ कायसङ्खारो न निरुज्झित्थ, नो च तेसं तत्थ चित्तसङ्खारो न निरुज्झिस्सति. रूपावचरे अरूपावचरे पच्छिमचित्तस्स भङ्गक्खणे असञ्ञसत्तानं तेसं तत्थ कायसङ्खारो च न निरुज्झित्थ चित्तसङ्खारो च न निरुज्झिस्सति.

(ख) यस्स वा पन यत्थ चित्तसङ्खारो न निरुज्झिस्सति तस्स तत्थ कायसङ्खारो न निरुज्झित्थाति?

कामावचरे पच्छिमचित्तस्स भङ्गक्खणे तेसं तत्थ चित्तसङ्खारो न निरुज्झिस्सति, नो च तेसं तत्थ कायसङ्खारो न निरुज्झित्थ. रूपावचरे अरूपावचरे पच्छिमचित्तस्स भङ्गक्खणे असञ्ञसत्तानं तेसं तत्थ चित्तसङ्खारो च न निरुज्झिस्सति कायसङ्खारो च न निरुज्झित्थ.

१२७. (क) यस्स यत्थ वचीसङ्खारो न निरुज्झित्थ तस्स तत्थ चित्तसङ्खारो न निरुज्झिस्सतीति?

अवितक्कअविचारभूमियं तेसं तत्थ वचीसङ्खारो न निरुज्झित्थ, नो च तेसं तत्थ चित्तसङ्खारो न निरुज्झिस्सति. अवितक्कअविचारभूमियं पच्छिमचित्तस्स भङ्गक्खणे असञ्ञसत्तानं तेसं तत्थ वचीसङ्खारो च न निरुज्झित्थ चित्तसङ्खारो च न निरुज्झिस्सति.

(ख) यस्स वा पन यत्थ चित्तसङ्खारो न निरुज्झिस्सति तस्स तत्थ वचीसङ्खारो न निरुज्झित्थाति?

सवितक्कसविचारभूमियं पच्छिमचित्तस्स भङ्गक्खणे तेसं तत्थ चित्तसङ्खारो न निरुज्झिस्सति, नो च तेसं तत्थ वचीसङ्खारो न निरुज्झित्थ. अवितक्कअविचारभूमियं पच्छिमचित्तस्स भङ्गक्खणे असञ्ञसत्तानं तेसं तत्थ चित्तसङ्खारो च न निरुज्झिस्सति वचीसङ्खारो च न निरुज्झित्थ.

निरोधवारो.