(४) पच्चुप्पन्नातीतवारो

(क) अनुलोमपुग्गलो

९८. (क) यस्स कायसङ्खारो निरुज्झति तस्स वचीसङ्खारो निरुज्झित्थाति? आमन्ता.

(ख) यस्स वा पन वचीसङ्खारो निरुज्झित्थ तस्स कायसङ्खारो निरुज्झतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे निरोधसमापन्नानं असञ्ञसत्तानं तेसं वचीसङ्खारो निरुज्झित्थ, नो च तेसं कायसङ्खारो निरुज्झति. अस्सासपस्सासानं भङ्गक्खणे तेसं वचीसङ्खारो च निरुज्झित्थ कायसङ्खारो च निरुज्झति.

(क) यस्स कायसङ्खारो निरुज्झति तस्स चित्तसङ्खारो निरुज्झित्थाति? आमन्ता.

(ख) यस्स वा पन चित्तसङ्खारो निरुज्झित्थ तस्स कायसङ्खारो निरुज्झतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे निरोधसमापन्नानं असञ्ञसत्तानं तेसं चित्तसङ्खारो निरुज्झित्थ, नो च तेसं कायसङ्खारो निरुज्झति. अस्सासपस्सासानं भङ्गक्खणे तेसं चित्तसङ्खारो च निरुज्झित्थ कायसङ्खारो च निरुज्झति.

९९. (क) यस्स वचीसङ्खारो निरुज्झति तस्स चित्तसङ्खारो निरुज्झित्थाति? आमन्ता.

(ख) यस्स वा पन चित्तसङ्खारो निरुज्झित्थ तस्स वचीसङ्खारो निरुज्झतीति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे निरोधसमापन्नानं असञ्ञसत्तानं तेसं चित्तसङ्खारो निरुज्झित्थ, नो च तेसं वचीसङ्खारो निरुज्झति. वितक्कविचारानं भङ्गक्खणे तेसं चित्तसङ्खारो च निरुज्झित्थ वचीसङ्खारो च निरुज्झति.

(ख) अनुलोमओकासो

१००. यत्थ कायसङ्खारो निरुज्झति…पे….

(ग) अनुलोमपुग्गलोकासा

१०१. (क) यस्स यत्थ कायसङ्खारो निरुज्झति तस्स तत्थ वचीसङ्खारो निरुज्झित्थाति?

दुतियज्झानं ततियज्झानं समापन्नानं अस्सासपस्सासानं भङ्गक्खणे तेसं तत्थ कायसङ्खारो निरुज्झति, नो च तेसं तत्थ वचीसङ्खारो निरुज्झित्थ. पठमज्झानं समापन्नानं कामावचरानं अस्सासपस्सासानं भङ्गक्खणे तेसं तत्थ कायसङ्खारो च निरुज्झति वचीसङ्खारो च निरुज्झित्थ.

(ख) यस्स वा पन यत्थ वचीसङ्खारो निरुज्झित्थ तस्स तत्थ कायसङ्खारो निरुज्झतीति?

पठमज्झानं समापन्नानं कामावचरानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे रूपावचरानं अरूपावचरानं तेसं तत्थ वचीसङ्खारो निरुज्झित्थ, नो च तेसं तत्थ कायसङ्खारो निरुज्झति. पठमज्झानं समापन्नानं कामावचरानं अस्सासपस्सासानं भङ्गक्खणे तेसं तत्थ वचीसङ्खारो च निरुज्झित्थ कायसङ्खारो च निरुज्झति.

(क) यस्स यत्थ कायसङ्खारो निरुज्झति तस्स तत्थ चित्तसङ्खारो निरुज्झित्थाति? आमन्ता.

(ख) यस्स वा पन यत्थ चित्तसङ्खारो निरुज्झित्थ तस्स तत्थ कायसङ्खारो निरुज्झतीति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे तेसं तत्थ चित्तसङ्खारो निरुज्झित्थ, नो च तेसं तत्थ कायसङ्खारो निरुज्झति. अस्सासपस्सासानं भङ्गक्खणे तेसं तत्थ चित्तसङ्खारो च निरुज्झित्थ कायसङ्खारो च निरुज्झति.

१०२. (क) यस्स यत्थ वचीसङ्खारो निरुज्झति तस्स तत्थ चित्तसङ्खारो निरुज्झित्थाति? आमन्ता.

(ख) यस्स वा पन यत्थ चित्तसङ्खारो निरुज्झित्थ तस्स तत्थ वचीसङ्खारो निरुज्झतीति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे तेसं तत्थ चित्तसङ्खारो निरुज्झित्थ, नो च तेसं तत्थ वचीसङ्खारो निरुज्झति. वितक्कविचारानं भङ्गक्खणे तेसं तत्थ चित्तसङ्खारो च निरुज्झित्थ वचीसङ्खारो च निरुज्झति.

(घ) पच्चनीकपुग्गलो

१०३. (क) यस्स कायसङ्खारो न निरुज्झति तस्स वचीसङ्खारो न निरुज्झित्थाति? निरुज्झित्थ.

(ख) यस्स वा पन वचीसङ्खारो न निरुज्झित्थ तस्स कायसङ्खारो न निरुज्झतीति? नत्थि.

(क) यस्स कायसङ्खारो न निरुज्झति तस्स चित्तसङ्खारो न निरुज्झित्थाति? निरुज्झित्थ.

(ख) यस्स वा पन चित्तसङ्खारो न निरुज्झित्थ तस्स कायसङ्खारो न निरुज्झतीति? नत्थि.

१०४. (क) यस्स वचीसङ्खारो न निरुज्झति तस्स चित्तसङ्खारो न निरुज्झित्थाति? निरुज्झित्थ.

(ख) यस्स वा पन चित्तसङ्खारो न निरुज्झित्थ तस्स वचीसङ्खारो न निरुज्झतीति? नत्थि.

(ङ) पच्चनीकओकासो

१०५. यत्थ कायसङ्खारो न निरुज्झति…पे….

(च) पच्चनीकपुग्गलोकासा

१०६. (क) यस्स यत्थ कायसङ्खारो न निरुज्झति तस्स तत्थ वचीसङ्खारो न निरुज्झित्थाति?

पठमज्झानं समापन्नानं कामावचरानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे रूपावचरानं अरूपावचरानं तेसं तत्थ कायसङ्खारो न निरुज्झति, नो च तेसं तत्थ वचीसङ्खारो न निरुज्झित्थ. दुतियज्झानं ततियज्झानं समापन्नानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे चतुत्थज्झानं समापन्नानं सुद्धावासानं दुतिये चित्ते वत्तमाने असञ्ञसत्तानं तेसं तत्थ कायसङ्खारो च न निरुज्झति वचीसङ्खारो च न निरुज्झित्थ.

(ख) यस्स वा पन यत्थ वचीसङ्खारो न निरुज्झित्थ तस्स तत्थ कायसङ्खारो न निरुज्झतीति?

दुतियज्झानं ततियज्झानं समापन्नानं अस्सासपस्सासानं भङ्गक्खणे तेसं तत्थ वचीसङ्खारो न निरुज्झित्थ, नो च तेसं तत्थ कायसङ्खारो न निरुज्झति. दुतियज्झानं ततियज्झानं समापन्नानं अस्सासपस्सासानं उप्पादक्खणे तेसंयेव विना अस्सासपस्सासेहि चित्तस्स भङ्गक्खणे चतुत्थज्झानं समापन्नानं सुद्धावासानं दुतिये चित्ते वत्तमाने असञ्ञसत्तानं तेसं तत्थ वचीसङ्खारो च न निरुज्झित्थ कायसङ्खारो च न निरुज्झति.

(क) यस्स यत्थ कायसङ्खारो न निरुज्झति तस्स तत्थ चित्तसङ्खारो न निरुज्झित्थाति?

सब्बेसं चित्तस्स उप्पादक्खणे विना अस्सासपस्सासेहि चित्तस्स भङ्गक्खणे तेसं तत्थ कायसङ्खारो न निरुज्झति, नो च तेसं तत्थ चित्तसङ्खारो न निरुज्झित्थ. सुद्धावासं उपपज्जन्तानं असञ्ञसत्तानं तेसं तत्थ कायसङ्खारो च न निरुज्झति चित्तसङ्खारो च न निरुज्झित्थ.

(ख) यस्स वा पन यत्थ चित्तसङ्खारो न निरुज्झित्थ तस्स तत्थ कायसङ्खारो न निरुज्झतीति? आमन्ता.

१०७. (क) यस्स यत्थ वचीसङ्खारो न निरुज्झति तस्स तत्थ चित्तसङ्खारो न निरुज्झित्थाति?

सब्बेसं चित्तस्स उप्पादक्खणे विना वितक्कविचारेहि चित्तस्स भङ्गक्खणे तेसं तत्थ वचीसङ्खारो न निरुज्झति, नो च तेसं तत्थ चित्तसङ्खारो न निरुज्झित्थ. सुद्धावासं उपपज्जन्तानं असञ्ञसत्तानं तेसं तत्थ वचीसङ्खारो च न निरुज्झति चित्तसङ्खारो च न निरुज्झित्थ.

(ख) यस्स वा पन यत्थ चित्तसङ्खारो न निरुज्झित्थ तस्स तत्थ वचीसङ्खारो न निरुज्झतीति? आमन्ता.