(५) पच्चुप्पन्नानागतवारो

(क) अनुलोमपुग्गलो

५९. (क) यस्स कायसङ्खारो उप्पज्जति तस्स वचीसङ्खारो उप्पज्जिस्सतीति? आमन्ता.

(ख) यस्स वा पन वचीसङ्खारो उप्पज्जिस्सति तस्स कायसङ्खारो उप्पज्जतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं वचीसङ्खारो उप्पज्जिस्सति, नो च तेसं कायसङ्खारो उप्पज्जति. अस्सासपस्सासानं उप्पादक्खणे तेसं वचीसङ्खारो च उप्पज्जिस्सति कायसङ्खारो च उप्पज्जति.

(क) यस्स कायसङ्खारो उप्पज्जति तस्स चित्तसङ्खारो उप्पज्जिस्सतीति? आमन्ता.

(ख) यस्स वा पन चित्तसङ्खारो उप्पज्जिस्सति तस्स कायसङ्खारो उप्पज्जतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं चित्तसङ्खारो उप्पज्जिस्सति, नो च तेसं कायसङ्खारो उप्पज्जति. अस्सासपस्सासानं उप्पादक्खणे तेसं चित्तसङ्खारो च उप्पज्जिस्सति कायसङ्खारो च उप्पज्जति.

६०. (क) यस्स वचीसङ्खारो उप्पज्जति तस्स चित्तसङ्खारो उप्पज्जिस्सतीति?

सवितक्कसविचारपच्छिमचित्तस्स उप्पादक्खणे तेसं वचीसङ्खारो उप्पज्जति, नो च तेसं चित्तसङ्खारो उप्पज्जिस्सति. इतरेसं वितक्कविचारानं उप्पादक्खणे तेसं वचीसङ्खारो च उप्पज्जति चित्तसङ्खारो च उप्पज्जिस्सति.

(ख) यस्स वा पन चित्तसङ्खारो उप्पज्जिस्सति तस्स वचीसङ्खारो उप्पज्जतीति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे निरोधसमापन्नानं असञ्ञसत्तानं तेसं चित्तसङ्खारो उप्पज्जिस्सति, नो च तेसं वचीसङ्खारो उप्पज्जति. वितक्कविचारानं उप्पादक्खणे तेसं चित्तसङ्खारो च उप्पज्जिस्सति वचीसङ्खारो च उप्पज्जति.

(ख) अनुलोमओकासो

६१. यत्थ कायसङ्खारो उप्पज्जति…पे….

(ग) अनुलोमपुग्गलोकासा

६२. (क) यस्स यत्थ कायसङ्खारो उप्पज्जति तस्स तत्थ वचीसङ्खारो उप्पज्जिस्सतीति?

दुतियज्झानं ततियज्झानं समापन्नानं अस्सासपस्सासानं उप्पादक्खणे तेसं तत्थ कायसङ्खारो उप्पज्जति, नो च तेसं तत्थ वचीसङ्खारो उप्पज्जिस्सति. पठमज्झानं समापन्नानं कामावचरानं अस्सासपस्सासानं उप्पादक्खणे तेसं तत्थ कायसङ्खारो च उप्पज्जति वचीसङ्खारो च उप्पज्जिस्सति.

(ख) यस्स वा पन यत्थ वचीसङ्खारो उप्पज्जिस्सति तस्स तत्थ कायसङ्खारो उप्पज्जतीति?

पठमज्झानं समापन्नानं कामावचरानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे रूपावचरानं अरूपावचरानं तेसं तत्थ वचीसङ्खारो उप्पज्जिस्सति, नो च तेसं तत्थ कायसङ्खारो उप्पज्जति. पठमज्झानं समापन्नानं कामावचरानं अस्सासपस्सासानं उप्पादक्खणे तेसं तत्थ वचीसङ्खारो च उप्पज्जिस्सति कायसङ्खारो च उप्पज्जति.

(क) यस्स यत्थ कायसङ्खारो उप्पज्जति तस्स तत्थ चित्तसङ्खारो उप्पज्जिस्सतीति? आमन्ता.

(ख) यस्स वा पन यत्थ चित्तसङ्खारो उप्पज्जिस्सति तस्स तत्थ कायसङ्खारो उप्पज्जतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे तेसं तत्थ चित्तसङ्खारो उप्पज्जिस्सति, नो च तेसं तत्थ कायसङ्खारो उप्पज्जति. अस्सासपस्सासानं उप्पादक्खणे तेसं तत्थ चित्तसङ्खारो च उप्पज्जिस्सति कायसङ्खारो च उप्पज्जति.

६३. (क) यस्स यत्थ वचीसङ्खारो उप्पज्जति तस्स तत्थ चित्तसङ्खारो उप्पज्जिस्सतीति?

सवितक्कसविचारपच्छिमचित्तस्स उप्पादक्खणे तेसं तत्थ वचीसङ्खारो उप्पज्जति, नो च तेसं तत्थ चित्तसङ्खारो उप्पज्जिस्सति. इतरेसं वितक्कविचारानं उप्पादक्खणे तेसं तत्थ वचीसङ्खारो च उप्पज्जति चित्तसङ्खारो च उप्पज्जिस्सति.

(ख) यस्स वा पन यत्थ चित्तसङ्खारो उप्पज्जिस्सति तस्स तत्थ वचीसङ्खारो उप्पज्जतीति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे तेसं तत्थ चित्तसङ्खारो उप्पज्जिस्सति, नो च तेसं तत्थ वचीसङ्खारो उप्पज्जति. वितक्कविचारानं उप्पादक्खणे तेसं तत्थ चित्तसङ्खारो च उप्पज्जिस्सति वचीसङ्खारो च उप्पज्जति.

(घ) पच्चनीकपुग्गलो

६४. (क) यस्स कायसङ्खारो नुप्पज्जति तस्स वचीसङ्खारो नुप्पज्जिस्सतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं कायसङ्खारो नुप्पज्जति, नो च तेसं वचीसङ्खारो नुप्पज्जिस्सति. पच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं कायसङ्खारो च नुप्पज्जति वचीसङ्खारो च नुप्पज्जिस्सति.

(ख) यस्स वा पन वचीसङ्खारो नुप्पज्जिस्सति तस्स कायसङ्खारो नुप्पज्जतीति? आमन्ता.

(क) यस्स कायसङ्खारो नुप्पज्जति तस्स चित्तसङ्खारो नुप्पज्जिस्सतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं कायसङ्खारो नुप्पज्जति, नो च तेसं चित्तसङ्खारो नुप्पज्जिस्सति. पच्छिमचित्तसमङ्गीनं तेसं कायसङ्खारो च नुप्पज्जति चित्तसङ्खारो च नुप्पज्जिस्सति.

(ख) यस्स वा पन…पे…? आमन्ता.

६५. (क) यस्स वचीसङ्खारो नुप्पज्जति तस्स चित्तसङ्खारो नुप्पज्जिस्सतीति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे निरोधसमापन्नानं असञ्ञसत्तानं तेसं वचीसङ्खारो नुप्पज्जति, नो च तेसं चित्तसङ्खारो नुप्पज्जिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं तेसं वचीसङ्खारो च नुप्पज्जति चित्तसङ्खारो च नुप्पज्जिस्सति.

(ख) यस्स वा पन चित्तसङ्खारो नुप्पज्जिस्सति तस्स वचीसङ्खारो नुप्पज्जतीति?

सवितक्कसविचारपच्छिमचित्तस्स उप्पादक्खणे तेसं चित्तसङ्खारो नुप्पज्जिस्सति, नो च तेसं वचीसङ्खारो नुप्पज्जति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं तेसं चित्तसङ्खारो च नुप्पज्जिस्सति वचीसङ्खारो च नुप्पज्जति.

४. (ङ) पच्चनीकओकासो

६६. यत्थ कायसङ्खारो नुप्पज्जति…पे….

(च) पच्चनीकपुग्गलोकासा

६७. (क) यस्स यत्थ कायसङ्खारो नुप्पज्जति तस्स तत्थ वचीसङ्खारो नुप्पज्जिस्सतीति?

पठमज्झानं समापन्नानं कामावचरानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे रूपावचरानं अरूपावचरानं तेसं तत्थ कायसङ्खारो नुप्पज्जति, नो च तेसं तत्थ वचीसङ्खारो नुप्पज्जिस्सति. पच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति दुतियज्झानं ततियज्झानं समापन्नानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे चतुत्थज्झानं समापन्नानं असञ्ञसत्तानं तेसं तत्थ कायसङ्खारो च नुप्पज्जति वचीसङ्खारो च नुप्पज्जिस्सति.

(ख) यस्स वा पन यत्थ वचीसङ्खारो नुप्पज्जिस्सति तस्स तत्थ कायसङ्खारो नुप्पज्जतीति?

दुतियज्झानं ततियज्झानं समापन्नानं अस्सासपस्सासानं उप्पादक्खणे तेसं तत्थ वचीसङ्खारो नुप्पज्जिस्सति, नो च तेसं तत्थ कायसङ्खारो नुप्पज्जति. पच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति दुतियज्झानं ततियज्झानं समापन्नानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे चतुत्थज्झानं समापन्नानं असञ्ञसत्तानं तेसं तत्थ वचीसङ्खारो च नुप्पज्जिस्सति कायसङ्खारो च नुप्पज्जति.

(क) यस्स यत्थ कायसङ्खारो नुप्पज्जति तस्स तत्थ चित्तसङ्खारो नुप्पज्जिस्सतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे तेसं तत्थ कायसङ्खारो नुप्पज्जति, नो च तेसं तत्थ चित्तसङ्खारो नुप्पज्जिस्सति. पच्छिमचित्तसमङ्गीनं असञ्ञसत्तानं तेसं तत्थ कायसङ्खारो च नुप्पज्जति चित्तसङ्खारो च नुप्पज्जिस्सति.

(ख) यस्स वा पन यत्थ चित्तसङ्खारो नुप्पज्जिस्सति तस्स तत्थ कायसङ्खारो नुप्पज्जतीति? आमन्ता.

६८. (क) यस्स यत्थ वचीसङ्खारो नुप्पज्जति तस्स तत्थ चित्तसङ्खारो नुप्पज्जिस्सतीति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे तेसं तत्थ वचीसङ्खारो नुप्पज्जति, नो च तेसं तत्थ चित्तसङ्खारो नुप्पज्जिस्सति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं असञ्ञसत्तानं तेसं तत्थ वचीसङ्खारो च नुप्पज्जति चित्तसङ्खारो च नुप्पज्जिस्सति.

(ख) यस्स वा पन यत्थ चित्तसङ्खारो नुप्पज्जिस्सति तस्स तत्थ वचीसङ्खारो नुप्पज्जतीति?

सवितक्कसविचारपच्छिमचित्तस्स उप्पादक्खणे तेसं तत्थ चित्तसङ्खारो नुप्पज्जिस्सति, नो च तेसं तत्थ वचीसङ्खारो नुप्पज्जति. सवितक्कसविचारपच्छिमचित्तस्स भङ्गक्खणे अवितक्कअविचारपच्छिमचित्तसमङ्गीनं असञ्ञसत्तानं तेसं तत्थ चित्तसङ्खारो च नुप्पज्जिस्सति वचीसङ्खारो च नुप्पज्जति.