(६) अतीतानागतवारो

(क) अनुलोमपुग्गलो

६९. (क) यस्स कायसङ्खारो उप्पज्जित्थ तस्स वचीसङ्खारो उप्पज्जिस्सतीति?

पच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति तेसं कायसङ्खारो उप्पज्जित्थ, नो च तेसं वचीसङ्खारो उप्पज्जिस्सति. इतरेसं तेसं कायसङ्खारो च उप्पज्जित्थ वचीसङ्खारो च उप्पज्जिस्सति.

(ख) यस्स वा पन…पे…? आमन्ता.

(क) यस्स कायसङ्खारो उप्पज्जित्थ तस्स चित्तसङ्खारो उप्पज्जिस्सतीति?

पच्छिमचित्तसमङ्गीनं तेसं कायसङ्खारो उप्पज्जित्थ, नो च तेसं चित्तसङ्खारो उप्पज्जिस्सति. इतरेसं तेसं कायसङ्खारो च उप्पज्जित्थ चित्तसङ्खारो च उप्पज्जिस्सति.

(ख) यस्स वा पन…पे…. आमन्ता.

७०. (क) यस्स वचीसङ्खारो उप्पज्जित्थ तस्स चित्तसङ्खारो उप्पज्जिस्सतीति?

पच्छिमचित्तसमङ्गीनं तेसं वचीसङ्खारो उप्पज्जित्थ, नो च तेसं चित्तसङ्खारो उप्पज्जिस्सति. इतरेसं तेसं वचीसङ्खारो च उप्पज्जित्थ चित्तसङ्खारो च उप्पज्जिस्सति.

(ख) यस्स वा पन…पे…? आमन्ता.

(ख) अनुलोमओकासो

७१. यत्थ कायसङ्खारो उप्पज्जित्थ…पे….

(ग) अनुलोमपुग्गलोकासा

७२. (क) यस्स यत्थ कायसङ्खारो उप्पज्जित्थ तस्स तत्थ वचीसङ्खारो उप्पज्जिस्सतीति?

कामावचरे पच्छिमचित्तसमङ्गीनं दुतियज्झानं ततियज्झानं समापन्नानं तेसं तत्थ कायसङ्खारो उप्पज्जित्थ, नो च तेसं तत्थ वचीसङ्खारो उप्पज्जिस्सति. पठमज्झानं समापन्नानं इतरेसं कामावचरानं तेसं तत्थ कायसङ्खारो च उप्पज्जित्थ वचीसङ्खारो च उप्पज्जिस्सति.

(ख) यस्स वा पन यत्थ वचीसङ्खारो उप्पज्जिस्सति तस्स तत्थ कायसङ्खारो उप्पज्जित्थाति?

रूपावचरानं अरूपावचरानं तेसं तत्थ वचीसङ्खारो उप्पज्जिस्सति, नो च तेसं तत्थ कायसङ्खारो उप्पज्जित्थ. पठमज्झानं समापन्नानं कामावचरानं तेसं तत्थ वचीसङ्खारो च उप्पज्जिस्सति कायसङ्खारो च उप्पज्जित्थ.

(क) यस्स यत्थ कायसङ्खारो उप्पज्जित्थ तस्स तत्थ चित्तसङ्खारो उप्पज्जिस्सतीति?

कामावचरे पच्छिमचित्तसमङ्गीनं तेसं तत्थ कायसङ्खारो उप्पज्जित्थ, नो च तेसं तत्थ चित्तसङ्खारो उप्पज्जिस्सति. पठमज्झानं दुतियज्झानं ततियज्झानं समापन्नानं इतरेसं कामावचरानं तेसं तत्थ कायसङ्खारो च उप्पज्जित्थ चित्तसङ्खारो च उप्पज्जिस्सति.

(ख) यस्स वा पन यत्थ चित्तसङ्खारो उप्पज्जिस्सति तस्स तत्थ कायसङ्खारो उप्पज्जित्थाति?

चतुत्थज्झानं समापन्नानं रूपावचरानं अरूपावचरानं तेसं तत्थ चित्तसङ्खारो उप्पज्जिस्सति, नो च तेसं तत्थ कायसङ्खारो उप्पज्जित्थ. पठमज्झानं दुतियज्झानं ततियज्झानं समापन्नानं कामावचरानं तेसं तत्थ चित्तसङ्खारो च उप्पज्जिस्सति कायसङ्खारो च उप्पज्जित्थ.

७३. (क) यस्स यत्थ वचीसङ्खारो उप्पज्जित्थ तस्स तत्थ चित्तसङ्खारो उप्पज्जिस्सतीति?

सवितक्कसविचारभूमियं पच्छिमचित्तसमङ्गीनं तेसं तत्थ वचीसङ्खारो उप्पज्जित्थ, नो च तेसं तत्थ चित्तसङ्खारो उप्पज्जिस्सति. इतरेसं सवितक्कसविचारभूमियं तेसं तत्थ वचीसङ्खारो च उप्पज्जित्थ चित्तसङ्खारो च उप्पज्जिस्सति.

(ख) यस्स वा पन यत्थ चित्तसङ्खारो उप्पज्जिस्सति तस्स तत्थ वचीसङ्खारो उप्पज्जित्थाति?

अवितक्कअविचारभूमियं तेसं तत्थ चित्तसङ्खारो उप्पज्जिस्सति, नो च तेसं तत्थ वचीसङ्खारो उप्पज्जित्थ. सवितक्कसविचारभूमियं तेसं तत्थ चित्तसङ्खारो च उप्पज्जिस्सति वचीसङ्खारो च उप्पज्जित्थ.

(घ) पच्चनीकपुग्गलो

७४. (क) यस्स कायसङ्खारो नुप्पज्जित्थ तस्स वचीसङ्खारो नुप्पज्जिस्सतीति? नत्थि.

(ख) यस्स वा पन वचीसङ्खारो नुप्पज्जिस्सति तस्स कायसङ्खारो नुप्पज्जित्थाति? उप्पज्जित्थ.

(क) यस्स कायसङ्खारो नुप्पज्जित्थ तस्स चित्तसङ्खारो नुप्पज्जिस्सतीति? नत्थि.

(ख) यस्स वा पन चित्तसङ्खारो नुप्पज्जिस्सति तस्स कायसङ्खारो नुप्पज्जित्थाति? उप्पज्जित्थ.

७५. (क) यस्स वचीसङ्खारो नुप्पज्जित्थ तस्स चित्तसङ्खारो नुप्पज्जिस्सतीति? नत्थि.

(ख) यस्स वा पन चित्तसङ्खारो नुप्पज्जिस्सति तस्स वचीसङ्खारो नुप्पज्जित्थाति? उप्पज्जित्थ.

(ङ) पच्चनीकओकासो

७६. यत्थ कायसङ्खारो नुप्पज्जित्थ…पे….

(च) पच्चनीकपुग्गलोकासा

७७. (क) यस्स यत्थ कायसङ्खारो नुप्पज्जित्थ तस्स तत्थ वचीसङ्खारो नुप्पज्जिस्सतीति?

रूपावचरानं अरूपावचरानं तेसं तत्थ कायसङ्खारो नुप्पज्जित्थ, नो च तेसं तत्थ वचीसङ्खारो नुप्पज्जिस्सति. रूपावचरे अरूपावचरे पच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति चतुत्थज्झानं समापन्नानं असञ्ञसत्तानं तेसं तत्थ कायसङ्खारो च नुप्पज्जित्थ वचीसङ्खारो च नुप्पज्जिस्सति.

(ख) यस्स वा पन यत्थ वचीसङ्खारो नुप्पज्जिस्सति तस्स तत्थ कायसङ्खारो नुप्पज्जित्थाति?

कामावचरे पच्छिमचित्तसमङ्गीनं दुतियज्झानं ततियज्झानं समापन्नानं तेसं तत्थ वचीसङ्खारो नुप्पज्जिस्सति, नो च तेसं तत्थ कायसङ्खारो नुप्पज्जित्थ. रूपावचरे अरूपावचरे पच्छिमचित्तसमङ्गीनं यस्स चित्तस्स अनन्तरा अवितक्कअविचारं पच्छिमचित्तं उप्पज्जिस्सति चतुत्थज्झानं समापन्नानं असञ्ञसत्तानं तेसं तत्थ वचीसङ्खारो च नुप्पज्जिस्सति कायसङ्खारो च नुप्पज्जित्थ.

(क) यस्स यत्थ कायसङ्खारो नुप्पज्जित्थ तस्स तत्थ चित्तसङ्खारो नुप्पज्जिस्सतीति?

चतुत्थज्झानं समापन्नानं रूपावचरानं अरूपावचरानं तेसं तत्थ कायसङ्खारो नुप्पज्जित्थ, नो च तेसं तत्थ चित्तसङ्खारो नुप्पज्जिस्सति. रूपावचरे अरूपावचरे पच्छिमचित्तसमङ्गीनं असञ्ञसत्तानं तेसं तत्थ कायसङ्खारो च नुप्पज्जित्थ चित्तसङ्खारो च नुप्पज्जिस्सति.

(ख) यस्स वा पन यत्थ चित्तसङ्खारो नुप्पज्जिस्सति तस्स तत्थ कायसङ्खारो नुप्पज्जित्थाति?

कामावचरे पच्छिमचित्तसमङ्गीनं तेसं तत्थ चित्तसङ्खारो नुप्पज्जिस्सति, नो च तेसं तत्थ कायसङ्खारो नुप्पज्जित्थ. रूपावचरे अरूपावचरे पच्छिमचित्तसमङ्गीनं असञ्ञसत्तानं तेसं तत्थ चित्तसङ्खारो च नुप्पज्जिस्सति कायसङ्खारो च नुप्पज्जित्थ.

७८. (क) यस्स यत्थ वचीसङ्खारो नुप्पज्जित्थ तस्स तत्थ चित्तसङ्खारो नुप्पज्जिस्सतीति?

अवितक्कअविचारभूमियं तेसं तत्थ वचीसङ्खारो नुप्पज्जित्थ, नो च तेसं तत्थ चित्तसङ्खारो नुप्पज्जिस्सति. अवितक्कअविचारभूमियं पच्छिमचित्तसमङ्गीनं असञ्ञसत्तानं तेसं तत्थ वचीसङ्खारो च नुप्पज्जित्थ चित्तसङ्खारो च नुप्पज्जिस्सति.

(ख) यस्स वा पन यत्थ चित्तसङ्खारो नुप्पज्जिस्सति तस्स तत्थ वचीसङ्खारो नुप्पज्जित्थाति?

सवितक्कसविचारभूमियं पच्छिमचित्तसमङ्गीनं तेसं तत्थ चित्तसङ्खारो नुप्पज्जिस्सति, नो च तेसं तत्थ वचीसङ्खारो नुप्पज्जित्थ. अवितक्कअविचारभूमियं पच्छिमचित्तसमङ्गीनं असञ्ञसत्तानं तेसं तत्थ चित्तसङ्खारो च नुप्पज्जिस्सति वचीसङ्खारो च नुप्पज्जित्थ.

उप्पादवारो.