(४) पच्चुप्पन्नातीतवारो

(क) अनुलोमपुग्गलो

४९. (क) यस्स कायसङ्खारो उप्पज्जति तस्स वचीसङ्खारो उप्पज्जित्थाति? आमन्ता.

(ख) यस्स वा पन वचीसङ्खारो उप्पज्जित्थ तस्स कायसङ्खारो उप्पज्जतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं वचीसङ्खारो उप्पज्जित्थ, नो च तेसं कायसङ्खारो उप्पज्जति. अस्सासपस्सासानं उप्पादक्खणे तेसं वचीसङ्खारो च उप्पज्जित्थ कायसङ्खारो च उप्पज्जति.

(क) यस्स कायसङ्खारो उप्पज्जति तस्स चित्तसङ्खारो उप्पज्जित्थाति? आमन्ता.

(ख) यस्स वा पन चित्तसङ्खारो उप्पज्जित्थ तस्स कायसङ्खारो उप्पज्जतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे निरोधसमापन्नानं असञ्ञसत्तानं तेसं चित्तसङ्खारो उप्पज्जित्थ, नो च तेसं कायसङ्खारो उप्पज्जति. अस्सासपस्सासानं उप्पादक्खणे तेसं चित्तसङ्खारो च उप्पज्जित्थ कायसङ्खारो च उप्पज्जति.

५०. (क) यस्स वचीसङ्खारो उप्पज्जति तस्स चित्तसङ्खारो उप्पज्जित्थाति? आमन्ता.

(ख) यस्स वा पन चित्तसङ्खारो उप्पज्जित्थ तस्स वचीसङ्खारो उप्पज्जतीति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे निरोधसमापन्नानं असञ्ञसत्तानं तेसं चित्तसङ्खारो उप्पज्जित्थ, नो च तेसं वचीसङ्खारो उप्पज्जति. वितक्कविचारानं उप्पादक्खणे तेसं चित्तसङ्खारो च उप्पज्जित्थ वचीसङ्खारो च उप्पज्जति.

(ख) अनुलोमओकासो

५१. यत्थ कायसङ्खारो उप्पज्जति…पे….

(ग) अनुलोमपुग्गलोकासा

५२. (क) यस्स यत्थ कायसङ्खारो उप्पज्जति तस्स तत्थ वचीसङ्खारो उप्पज्जित्थाति?

दुतियज्झानं ततियज्झानं समापन्नानं अस्सासपस्सासानं उप्पादक्खणे तेसं तत्थ कायसङ्खारो उप्पज्जति, नो च तेसं तत्थ वचीसङ्खारो उप्पज्जित्थ. पठमज्झानं समापन्नानं कामावचरानं अस्सासपस्सासानं उप्पादक्खणे तेसं तत्थ कायसङ्खारो च उप्पज्जति वचीसङ्खारो च उप्पज्जित्थ.

(ख) यस्स वा पन यत्थ वचीसङ्खारो उप्पज्जित्थ तस्स तत्थ कायसङ्खारो उप्पज्जतीति?

पठमज्झानं समापन्नानं कामावचरानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे रूपावचरानं अरूपावचरानं तेसं तत्थ वचीसङ्खारो उप्पज्जित्थ, नो च तेसं तत्थ कायसङ्खारो उप्पज्जति. पठमज्झानं समापन्नानं कामावचरानं अस्सासपस्सासानं उप्पादक्खणे तेसं तत्थ वचीसङ्खारो च उप्पज्जित्थ कायसङ्खारो च उप्पज्जति.

(क) यस्स यत्थ कायसङ्खारो उप्पज्जति तस्स तत्थ चित्तसङ्खारो उप्पज्जित्थाति? आमन्ता.

(ख) यस्स वा पन यत्थ चित्तसङ्खारो उप्पज्जित्थ तस्स तत्थ कायसङ्खारो उप्पज्जतीति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे तेसं तत्थ चित्तसङ्खारो उप्पज्जित्थ, नो च तेसं तत्थ कायसङ्खारो उप्पज्जति. अस्सासपस्सासानं उप्पादक्खणे तेसं तत्थ चित्तसङ्खारो च उप्पज्जित्थ कायसङ्खारो च उप्पज्जति.

५३. (क) यस्स यत्थ वचीसङ्खारो उप्पज्जति तस्स तत्थ चित्तसङ्खारो उप्पज्जित्थाति? आमन्ता.

(ख) यस्स वा पन यत्थ चित्तसङ्खारो उप्पज्जित्थ तस्स तत्थ वचीसङ्खारो उप्पज्जतीति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे तेसं तत्थ चित्तसङ्खारो उप्पज्जित्थ, नो च तेसं तत्थ वचीसङ्खारो उप्पज्जति. वितक्कविचारानं उप्पादक्खणे तेसं तत्थ चित्तसङ्खारो च उप्पज्जित्थ वचीसङ्खारो च उप्पज्जति.

(घ) पच्चनीकपुग्गलो

५४. (क) यस्स कायसङ्खारो नुप्पज्जति तस्स वचीसङ्खारो नुप्पज्जित्थाति? उप्पज्जित्थ.

(ख) यस्स वा पन वचीसङ्खारो नुप्पज्जित्थ तस्स कायसङ्खारो नुप्पज्जतीति? नत्थि.

(क) यस्स कायसङ्खारो नुप्पज्जति तस्स चित्तसङ्खारो नुप्पज्जित्थाति? उप्पज्जित्थ.

(ख) यस्स वा पन चित्तसङ्खारो नुप्पज्जित्थ तस्स कायसङ्खारो नुप्पज्जतीति? नत्थि.

५५. (क) यस्स वचीसङ्खारो नुप्पज्जति तस्स चित्तसङ्खारो नुप्पज्जित्थाति? उप्पज्जित्थ.

(ख) यस्स वा पन…पे…? नत्थि.

(ङ) पच्चनीकओकासो

५६. यत्थ कायसङ्खारो नुप्पज्जति…पे….

(च) पच्चनीकपुग्गलोकासा

५७. (क) यस्स यत्थ कायसङ्खारो नुप्पज्जति तस्स तत्थ वचीसङ्खारो नुप्पज्जित्थाति?

पठमज्झानं समापन्नानं कामावचरानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे रूपावचरानं अरूपावचरानं तेसं तत्थ कायसङ्खारो नुप्पज्जति, नो च तेसं तत्थ वचीसङ्खारो नुप्पज्जित्थ. दुतियज्झानं ततियज्झानं समापन्नानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे चतुत्थज्झानं समापन्नानं सुद्धावासानं दुतिये चित्ते वत्तमाने असञ्ञसत्तानं तेसं तत्थ कायसङ्खारो च नुप्पज्जति वचीसङ्खारो च नुप्पज्जित्थ.

(ख) यस्स वा पन यत्थ वचीसङ्खारो नुप्पज्जित्थ तस्स तत्थ कायसङ्खारो नुप्पज्जतीति?

दुतियज्झानं ततियज्झानं समापन्नानं अस्सासपस्सासानं उप्पादक्खणे तेसं तत्थ वचीसङ्खारो नुप्पज्जित्थ, नो च तेसं तत्थ कायसङ्खारो नुप्पज्जति. दुतियज्झानं ततियज्झानं समापन्नानं अस्सासपस्सासानं भङ्गक्खणे तेसंयेव विना अस्सासपस्सासेहि चित्तस्स उप्पादक्खणे चतुत्थज्झानं समापन्नानं सुद्धावासानं दुतिये चित्ते वत्तमाने असञ्ञसत्तानं तेसं तत्थ वचीसङ्खारो च नुप्पज्जित्थ कायसङ्खारो च नुप्पज्जति.

(क) यस्स यत्थ कायसङ्खारो नुप्पज्जति तस्स तत्थ चित्तसङ्खारो नुप्पज्जित्थाति?

सब्बेसं चित्तस्स भङ्गक्खणे विना अस्सासपस्सासेहि चित्तस्स उप्पादक्खणे तेसं तत्थ कायसङ्खारो नुप्पज्जति, नो च तेसं तत्थ चित्तसङ्खारो नुप्पज्जित्थ. सुद्धावासं उपपज्जन्तानं असञ्ञसत्तानं तेसं तत्थ कायसङ्खारो च नुप्पज्जति चित्तसङ्खारो च नुप्पज्जित्थ.

(ख) यस्स वा पन यत्थ चित्तसङ्खारो नुप्पज्जित्थ तस्स तत्थ कायसङ्खारो नुप्पज्जतीति? आमन्ता.

५८. (क) यस्स यत्थ वचीसङ्खारो नुप्पज्जति तस्स तत्थ चित्तसङ्खारो नुप्पज्जित्थाति?

सब्बेसं चित्तस्स भङ्गक्खणे विना वितक्कविचारेहि चित्तस्स उप्पादक्खणे तेसं तत्थ वचीसङ्खारो नुप्पज्जति, नो च तेसं तत्थ चित्तसङ्खारो नुप्पज्जित्थ. सुद्धावासं उपपज्जन्तानं असञ्ञसत्तानं तेसं तत्थ वचीसङ्खारो च नुप्पज्जति चित्तसङ्खारो च नुप्पज्जित्थ.

(ख) यस्स वा पन यत्थ…पे…? आमन्ता.