३. सुद्धसच्चवारो

(क) अनुलोमं

२०. (क) दुक्खं सच्चन्ति? आमन्ता.

(ख) सच्चा दुक्खसच्चन्ति?

दुक्खसच्चं सच्चञ्चेव दुक्खसच्चञ्च. अवसेसा सच्चा न दुक्खसच्चं.

समुदयो सच्चन्ति? आमन्ता…पे….

निरोधो सच्चन्ति? आमन्ता…पे….

(क) मग्गो सच्चन्ति? आमन्ता.

(ख) सच्चा मग्गसच्चन्ति?

मग्गसच्चं सच्चञ्चेव मग्गसच्चञ्च. अवसेसा सच्चा न मग्गसच्चं.

(ख) पच्चनीकं

२१. (क) न दुक्खं न सच्चन्ति?

दुक्खं ठपेत्वा अवसेसा सच्चा न दुक्खं, सच्चा. दुक्खञ्च सच्चञ्च ठपेत्वा अवसेसं न चेव दुक्खं न च सच्चा.

(ख) न सच्चा न दुक्खसच्चन्ति? आमन्ता.

न समुदयो न सच्चन्ति?

समुदयं ठपेत्वा…पे… निरोधं ठपेत्वा…पे….

(क) न मग्गो न सच्चन्ति?

मग्गं ठपेत्वा अवसेसा सच्चा न मग्गो, सच्चा. मग्गञ्च सच्चञ्च ठपेत्वा अवसेसा न चेव मग्गो न च सच्चा.

(ख) न सच्चा न मग्गसच्चन्ति? आमन्ता.