४. सुद्धसच्चमूलचक्कवारो

(क) अनुलोमं

२२. (क) दुक्खं सच्चन्ति? आमन्ता.

(ख) सच्चा समुदयसच्चन्ति?

समुदयसच्चं सच्चञ्चेव समुदयसच्चञ्च. अवसेसा सच्चा न समुदयसच्चं.

दुक्खं सच्चन्ति? आमन्ता.

सच्चा निरोधसच्चन्ति?…पे…. सच्चा मग्गसच्चन्ति?

मग्गसच्चं सच्चञ्चेव मग्गसच्चञ्च. अवसेसा सच्चा न मग्गसच्चं.

समुदयो सच्चन्ति? आमन्ता.…पे….

निरोधो सच्चन्ति? आमन्ता.…पे….

मग्गो सच्चन्ति? आमन्ता.

सच्चा दुक्खसच्चन्ति?…पे… सच्चा समुदयसच्चन्ति? …पे… सच्चा निरोधसच्चन्ति?

निरोधसच्चं सच्चञ्चेव निरोधसच्चञ्च. अवसेसा सच्चा न निरोधसच्चं.

(ख) पच्चनीकं

२३. (क) न दुक्खं न सच्चन्ति?

दुक्खं ठपेत्वा अवसेसा सच्चा न दुक्खं, सच्चा. दुक्खञ्च सच्चञ्च ठपेत्वा अवसेसा न चेव दुक्खं न च सच्चा.

(ख) न सच्चा न समुदयसच्चन्ति? आमन्ता.

न दुक्खं न सच्चन्ति?

दुक्खं ठपेत्वा अवसेसा सच्चा न दुक्खं, सच्चा. दुक्खञ्च सच्चञ्च ठपेत्वा अवसेसा न चेव दुक्खं न च सच्चा.

न सच्चा न निरोधसच्चन्ति?…पे… न सच्चा न मग्गसच्चन्ति? आमन्ता.

२४. न समुदयो न सच्चन्ति?

समुदयं ठपेत्वा अवसेसा सच्चा न समुदयो, सच्चा. समुदयञ्च सच्चञ्च ठपेत्वा अवसेसा न चेव समुदयो न च सच्चा.

न सच्चा न दुक्खसच्चन्ति?…पे….

२५. न निरोधो न सच्चन्ति?

निरोधं ठपेत्वा…पे….

२६. (क) न मग्गो न सच्चन्ति?

मग्गं ठपेत्वा अवसेसा सच्चा न मग्गो, सच्चा. मग्गञ्च सच्चञ्च ठपेत्वा अवसेसा न चेव मग्गो न च सच्चा.

(ख) न सच्चा न दुक्खसच्चन्ति? आमन्ता.

न मग्गो न सच्चन्ति?

मग्गं ठपेत्वा अवसेसा सच्चा न मग्गो, सच्चा. मग्गञ्च सच्चञ्च ठपेत्वा अवसेसा न चेव मग्गो न च सच्चा.

न सच्चा न समुदयसच्चन्ति? आमन्ता.…पे….

न सच्चा न निरोधसच्चन्ति? आमन्ता.

पण्णत्तिनिद्देसवारो.