२. पदसोधनमूलचक्कवारो

(क) अनुलोमं

१२. (क) दुक्खं दुक्खसच्चन्ति? आमन्ता.

(ख) सच्चा समुदयसच्चन्ति?

समुदयसच्चं सच्चञ्चेव समुदयसच्चञ्च. अवसेसा सच्चा [अवसेसा सच्चा सच्चा (स्या.)] न समुदयसच्चं.

दुक्खं दुक्खसच्चन्ति? आमन्ता.

सच्चा निरोधसच्चन्ति?…पे… सच्चा मग्गसच्चन्ति?

मग्गसच्चं सच्चञ्चेव मग्गसच्चञ्च. अवसेसा सच्चा न मग्गसच्चं.

१३. समुदयो समुदयसच्चन्ति?

समुदयसच्चं ठपेत्वा अवसेसो समुदयो, न समुदयसच्चं. समुदयसच्चं समुदयो चेव समुदयसच्चञ्च. सच्चा दुक्खसच्चन्ति? …पे… सच्चा निरोधसच्चन्ति?…पे… सच्चा मग्गसच्चन्ति?

मग्गसच्चं सच्चञ्चेव मग्गसच्चञ्च. अवसेसा सच्चा न मग्गसच्चं.

१४. निरोधो निरोधसच्चन्ति?

निरोधसच्चं ठपेत्वा अवसेसो निरोधो, न निरोधसच्चं. निरोधसच्चं निरोधो चेव निरोधसच्चञ्च.

सच्चा दुक्खसच्चन्ति?…पे… सच्चा समुदयसच्चन्ति? …पे… सच्चा मग्गसच्चन्ति?

मग्गसच्चं सच्चञ्चेव मग्गसच्चञ्च. अवसेसा सच्चा न मग्गसच्चं.

१५. मग्गो मग्गसच्चन्ति?

मग्गसच्चं ठपेत्वा अवसेसो मग्गो, न मग्गसच्चं. मग्गसच्चं मग्गो चेव मग्गसच्चञ्च.

सच्चा दुक्खसच्चन्ति?…पे… सच्चा समुदयसच्चन्ति? …पे… सच्चा निरोधसच्चन्ति?

निरोधसच्चं सच्चञ्चेव निरोधसच्चञ्च. अवसेसा सच्चा न निरोधसच्चं.

(ख) पच्चनीकं

१६. (क) न दुक्खं न दुक्खसच्चन्ति?

कायिकं दुक्खं चेतसिकं दुक्खं ठपेत्वा अवसेसं न दुक्खं, दुक्खसच्चं. दुक्खञ्च दुक्खसच्चञ्च ठपेत्वा अवसेसं न चेव दुक्खं न च दुक्खसच्चं.

(ख) न सच्चा न समुदयसच्चन्ति? आमन्ता.

न दुक्खं न दुक्खसच्चन्ति?

कायिकं दुक्खं चेतसिकं दुक्खं ठपेत्वा अवसेसं न दुक्खं, दुक्खसच्चं. दुक्खञ्च दुक्खसच्चञ्च ठपेत्वा अवसेसं न चेव दुक्खं न च दुक्खसच्चं.

न सच्चा न निरोधसच्चन्ति?…पे… न सच्चा न मग्गसच्चन्ति? आमन्ता.

१७. (क) न समुदयो न समुदयसच्चन्ति? आमन्ता.

(ख) न सच्चा न दुक्खसच्चन्ति? आमन्ता.

न समुदयो न समुदयसच्चन्ति? आमन्ता.

न सच्चा न निरोधसच्चन्ति?…पे… न सच्चा न मग्गसच्चन्ति? आमन्ता.

१८. न निरोधो न निरोधसच्चन्ति? आमन्ता.

न सच्चा न दुक्खसच्चन्ति?…पे… न सच्चा न समुदयसच्चन्ति?…पे… न सच्चा न मग्गसच्चन्ति? आमन्ता.

१९. (क) न मग्गो न मग्गसच्चन्ति? आमन्ता.

(ख) न सच्चा न दुक्खसच्चन्ति? आमन्ता.

न मग्गो न मग्गसच्चन्ति? आमन्ता.

न सच्चा न समुदयसच्चन्ति?…पे… न सच्चा न निरोधसच्चन्ति? आमन्ता.