१. पदसोधनवारो

(क) अनुलोमं

१०. (क) दुक्खं दुक्खसच्चन्ति? आमन्ता.

(ख) दुक्खसच्चं दुक्खन्ति?

कायिकं दुक्खं चेतसिकं दुक्खं ठपेत्वा अवसेसं दुक्खसच्चं [अवसेसं दुक्खसच्चं दुक्खसच्चं (स्या.) एवमुपरिपि], न दुक्खं. कायिकं दुक्खं चेतसिकं दुक्खं दुक्खञ्चेव दुक्खसच्चञ्च.

(क) समुदयो समुदयसच्चन्ति?

समुदयसच्चं ठपेत्वा अवसेसो समुदयो, न समुदयसच्चं. समुदयसच्चं समुदयो चेव समुदयसच्चञ्च.

(ख) समुदयसच्चं समुदयोति? आमन्ता.

(क) निरोधो निरोधसच्चन्ति?

निरोधसच्चं ठपेत्वा अवसेसो निरोधो, न निरोधसच्चं. निरोधसच्चं निरोधो चेव निरोधसच्चञ्च.

(ख) निरोधसच्चं निरोधोति? आमन्ता.

(क) मग्गो मग्गसच्चन्ति?

मग्गसच्चं ठपेत्वा अवसेसो मग्गो, न मग्गसच्चं. मग्गसच्चं मग्गो चेव मग्गसच्चञ्च.

(ख) मग्गसच्चं मग्गोति? आमन्ता.

(ख) पच्चनीकं

११. (क) न दुक्खं न दुक्खसच्चन्ति?

कायिकं दुक्खं चेतसिकं दुक्खं ठपेत्वा अवसेसं न दुक्खं [अवसेसं दुक्खसच्चं न दुक्खं (सी. स्या. क.) एवं अवसेसेसु तीसु सच्चेसु] दुक्खसच्चं. दुक्खञ्च दुक्खसच्चञ्च ठपेत्वा अवसेसं न चेव दुक्खं न च दुक्खसच्चं.

(ख) न दुक्खसच्चं न दुक्खन्ति? आमन्ता.

(क) न समुदयो न समुदयसच्चन्ति? आमन्ता.

(ख) न समुदयसच्चं न समुदयोति?

समुदयसच्चं ठपेत्वा अवसेसो न समुदयसच्चं, समुदयो. समुदयञ्च समुदयसच्चञ्च ठपेत्वा अवसेसो न चेव समुदयो न च समुदयसच्चं.

(क) न निरोधो न निरोधसच्चन्ति? आमन्ता.

(ख) न निरोधसच्चं न निरोधोति?

निरोधसच्चं ठपेत्वा अवसेसो न निरोधसच्चं, निरोधो. निरोधञ्च निरोधसच्चञ्च ठपेत्वा अवसेसो न चेव निरोधो न च निरोधसच्चं.

(क) न मग्गो न मग्गसच्चन्ति? आमन्ता.

(ख) न मग्गसच्चं न मग्गोति?

मग्गसच्चं ठपेत्वा अवसेसो न मग्गसच्चं, मग्गो. मग्गञ्च मग्गसच्चञ्च ठपेत्वा अवसेसो न चेव मग्गो न च मग्गसच्चं.