५. पच्चुप्पन्नानागतवारो

१६९. (क) यो दुक्खसच्चं परिजानाति सो समुदयसच्चं पजहिस्सतीति? नो.

(ख) यो वा पन समुदयसच्चं पजहिस्सति सो दुक्खसच्चं परिजानातीति? नो.

(क) यो दुक्खसच्चं न परिजानाति सो समुदयसच्चं नप्पजहिस्सतीति?

ये मग्गं पटिलभिस्सन्ति ते दुक्खसच्चं न परिजानन्ति, नो च समुदयसच्चं नप्पजहिस्सन्ति. अरहा ये च पुथुज्जना मग्गं न पटिलभिस्सन्ति ते दुक्खसच्चञ्च न परिजानन्ति समुदयसच्चञ्च नप्पजहिस्सन्ति.

(ख) यो वा पन समुदयसच्चं नप्पजहिस्सति सो दुक्खसच्चं न परिजानातीति?

अग्गमग्गसमङ्गी समुदयसच्चं नप्पजहिस्सति, नो च दुक्खसच्चं न परिजानाति. अरहा ये च पुथुज्जना मग्गं न पटिलभिस्सन्ति ते समुदयसच्चञ्च नप्पजहिस्सन्ति दुक्खसच्चञ्च न परिजानन्ति.