६. अतीतानागतवारो

१७०. (क) यो दुक्खसच्चं परिजानित्थ सो समुदयसच्चं पजहिस्सतीति? नो.

(ख) यो वा पन समुदयसच्चं पजहिस्सति सो दुक्खसच्चं परिजानित्थाति? नो.

(क) यो दुक्खसच्चं न परिजानित्थ सो समुदयसच्चं नप्पजहिस्सतीति?

ये मग्गं पटिलभिस्सन्ति ते दुक्खसच्चं न परिजानित्थ, नो च ते समुदयसच्चं नप्पजहिस्सन्ति. अग्गमग्गसमङ्गी ये च पुथुज्जना मग्गं न पटिलभिस्सन्ति ते दुक्खसच्चञ्च न परिजानित्थ समुदयसच्चञ्च नप्पजहिस्सन्ति.

(ख) यो वा पन समुदयसच्चं नप्पजहिस्सति सो दुक्खसच्चं न परिजानित्थाति?

अरहा समुदयसच्चं नप्पजहिस्सति, नो च दुक्खसच्चं न परिजानित्थ. अग्गमग्गसमङ्गी ये च पुथुज्जना मग्गं न पटिलभिस्सन्ति ते समुदयसच्चञ्च नप्पजहिस्सन्ति दुक्खसच्चञ्च न परिजानित्थ.

परिञ्ञावारो.

सच्चयमकं निट्ठितं.