(५) पच्चुप्पन्नानागतवारो

(क) अनुलोमपुग्गलो

११६. (क) यस्स दुक्खसच्चं निरुज्झति तस्स समुदयसच्चं निरुज्झिस्सतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे तेसं दुक्खसच्चं निरुज्झति, नो च तेसं समुदयसच्चं निरुज्झिस्सति. इतरेसं चवन्तानं पवत्ते चित्तस्स भङ्गक्खणे तेसं दुक्खसच्चञ्च निरुज्झति समुदयसच्चञ्च निरुज्झिस्सति.

(ख) यस्स वा पन समुदयसच्चं निरुज्झिस्सति तस्स दुक्खसच्चं निरुज्झतीति?

सब्बेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं समुदयसच्चं निरुज्झिस्सति, नो च तेसं दुक्खसच्चं निरुज्झति. सब्बेसं चवन्तानं पवत्ते चित्तस्स भङ्गक्खणे तेसं समुदयसच्चञ्च निरुज्झिस्सति दुक्खसच्चञ्च निरुज्झति.

(क) यस्स दुक्खसच्चं निरुज्झति तस्स मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे तेसं दुक्खसच्चं निरुज्झति, नो च तेसं मग्गसच्चं निरुज्झिस्सति. यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे तेसं दुक्खसच्चञ्च निरुज्झति मग्गसच्चञ्च निरुज्झिस्सति.

(ख) यस्स वा पन मग्गसच्चं निरुज्झिस्सति तस्स दुक्खसच्चं निरुज्झतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं मग्गसच्चं निरुज्झिस्सति, नो च तेसं दुक्खसच्चं निरुज्झति. यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे तेसं मग्गसच्चञ्च निरुज्झिस्सति दुक्खसच्चञ्च निरुज्झति.

११७. (क) यस्स समुदयसच्चं निरुज्झति तस्स मग्गसच्चं निरुज्झिस्सतीति?

ये पुथुज्जना मग्गं न पटिलभिस्सन्ति तेसं तण्हाय भङ्गक्खणे तेसं समुदयसच्चं निरुज्झति, नो च तेसं मग्गसच्चं निरुज्झिस्सति. ये मग्गं पटिलभिस्सन्ति तेसं तण्हाय भङ्गक्खणे तेसं समुदयसच्चञ्च निरुज्झति मग्गसच्चञ्च निरुज्झिस्सति.

(ख) यस्स वा पन मग्गसच्चं निरुज्झिस्सति तस्स समुदयसच्चं निरुज्झतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने निरोधसमापन्नानं असञ्ञसत्तानं तेसं मग्गसच्चं निरुज्झिस्सति, नो च तेसं समुदयसच्चं निरुज्झति. ये मग्गं पटिलभिस्सन्ति तेसं तण्हाय भङ्गक्खणे तेसं मग्गसच्चञ्च निरुज्झिस्सति समुदयसच्चञ्च निरुज्झति.

(ख) अनुलोमओकासो

११८. यत्थ दुक्खसच्चं निरुज्झति…पे….

(ग) अनुलोमपुग्गलोकासा

११९. (क) यस्स यत्थ दुक्खसच्चं निरुज्झति तस्स तत्थ समुदयसच्चं निरुज्झिस्सतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे असञ्ञसत्ता चवन्तानं तेसं तत्थ दुक्खसच्चं निरुज्झति, नो च तेसं तत्थ समुदयसच्चं निरुज्झिस्सति. इतरेसं चतुवोकारा पञ्चवोकारा चवन्तानं पवत्ते चित्तस्स भङ्गक्खणे तेसं तत्थ दुक्खसच्चञ्च निरुज्झति समुदयसच्चञ्च निरुज्झिस्सति.

(ख) यस्स वा पन यत्थ समुदयसच्चं निरुज्झिस्सति तस्स तत्थ दुक्खसच्चं निरुज्झतीति?

चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ समुदयसच्चं निरुज्झिस्सति, नो च तेसं तत्थ दुक्खसच्चं निरुज्झति. चतुवोकारा पञ्चवोकारा चवन्तानं पवत्ते चित्तस्स भङ्गक्खणे तेसं तत्थ समुदयसच्चञ्च निरुज्झिस्सति दुक्खसच्चञ्च निरुज्झति.

(क) यस्स यत्थ दुक्खसच्चं निरुज्झति तस्स तत्थ मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे आपायिकानं ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे असञ्ञसत्ता चवन्तानं तेसं तत्थ दुक्खसच्चं निरुज्झति, नो च तेसं तत्थ मग्गसच्चं निरुज्झिस्सति. यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे तेसं तत्थ दुक्खसच्चञ्च निरुज्झति मग्गसच्चञ्च निरुज्झिस्सति.

(ख) यस्स वा पन यत्थ मग्गसच्चं निरुज्झिस्सति तस्स तत्थ दुक्खसच्चं निरुज्झतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ मग्गसच्चं निरुज्झिस्सति, नो च तेसं तत्थ दुक्खसच्चं निरुज्झति. यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे ये चञ्ञे मग्गं पटिलभिस्सन्ति तेसं चवन्तानं पवत्ते चित्तस्स भङ्गक्खणे तेसं तत्थ मग्गसच्चञ्च निरुज्झिस्सति दुक्खसच्चञ्च निरुज्झति.

१२०. (क) यस्स यत्थ समुदयसच्चं निरुज्झति तस्स तत्थ मग्गसच्चं निरुज्झिस्सतीति?

आपायिकानं ये च पुथुज्जना मग्गं न पटिलभिस्सन्ति तेसं तण्हाय भङ्गक्खणे तेसं तत्थ समुदयसच्चं निरुज्झति, नो च तेसं तत्थ मग्गसच्चं निरुज्झिस्सति. ये मग्गं पटिलभिस्सन्ति तेसं तण्हाय भङ्गक्खणे तेसं तत्थ समुदयसच्चञ्च निरुज्झति मग्गसच्चञ्च निरुज्झिस्सति.

(ख) यस्स वा पन यत्थ मग्गसच्चं निरुज्झिस्सति तस्स तत्थ समुदयसच्चं निरुज्झतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने तेसं तत्थ मग्गसच्चं निरुज्झिस्सति, नो च तेसं तत्थ समुदयसच्चं निरुज्झति. ये मग्गं पटिलभिस्सन्ति तेसं तण्हाय भङ्गक्खणे तेसं तत्थ मग्गसच्चञ्च निरुज्झिस्सति समुदयसच्चञ्च निरुज्झति.

(घ) पच्चनीकपुग्गलो

१२१. (क) यस्स दुक्खसच्चं न निरुज्झति तस्स समुदयसच्चं न निरुज्झिस्सतीति?

सब्बेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं दुक्खसच्चं न निरुज्झति, नो च तेसं समुदयसच्चं न निरुज्झिस्सति. अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे अरूपे अग्गमग्गस्स च फलस्स च भङ्गक्खणे तेसं दुक्खसच्चञ्च न निरुज्झति समुदयसच्चञ्च न निरुज्झिस्सति.

(ख) यस्स वा पन समुदयसच्चं न निरुज्झिस्सति तस्स दुक्खसच्चं न निरुज्झतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे तेसं समुदयसच्चं न निरुज्झिस्सति, नो च तेसं दुक्खसच्चं न निरुज्झति. अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे अरूपे अग्गमग्गस्स च फलस्स च भङ्गक्खणे तेसं समुदयसच्चञ्च न निरुज्झिस्सति दुक्खसच्चञ्च न निरुज्झति.

(क) यस्स दुक्खसच्चं न निरुज्झति तस्स मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं दुक्खसच्चं न निरुज्झति, नो च तेसं मग्गसच्चं न निरुज्झिस्सति. अरहन्तानं चित्तस्स उप्पादक्खणे ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे अग्गमग्गस्स च फलस्स च भङ्गक्खणे तेसं दुक्खसच्चञ्च न निरुज्झति मग्गसच्चञ्च न निरुज्झिस्सति.

(ख) यस्स वा पन मग्गसच्चं न निरुज्झिस्सति तस्स दुक्खसच्चं न निरुज्झतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे तेसं मग्गसच्चं न निरुज्झिस्सति, नो च तेसं दुक्खसच्चं न निरुज्झति. अरहन्तानं चित्तस्स उप्पादक्खणे ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे अग्गमग्गस्स च फलस्स च भङ्गक्खणे तेसं मग्गसच्चञ्च न निरुज्झिस्सति दुक्खसच्चञ्च न निरुज्झति.

१२२. (क) यस्स समुदयसच्चं न निरुज्झति तस्स मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने निरोधसमापन्नानं असञ्ञसत्तानं तेसं समुदयसच्चं न निरुज्झति, नो च तेसं मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने तेसं समुदयसच्चञ्च न निरुज्झति मग्गसच्चञ्च न निरुज्झिस्सति.

(ख) यस्स वा पन मग्गसच्चं न निरुज्झिस्सति तस्स समुदयसच्चं न निरुज्झतीति?

ये पुथुज्जना मग्गं न पटिलभिस्सन्ति तेसं तण्हाय भङ्गक्खणे तेसं मग्गसच्चं न निरुज्झिस्सति, नो च तेसं समुदयसच्चं न निरुज्झति. अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने [वत्तमाने, निरोधसमापन्नानं असञ्ञसत्तानं (सी. स्या.)] तेसं मग्गसच्चञ्च न निरुज्झिस्सति समुदयसच्चञ्च न निरुज्झति.

(ङ) पच्चनीकओकासो

१२३. यत्थ दुक्खसच्चं न निरुज्झति…पे….

(च) पच्चनीकपुग्गलोकासा

१२४. (क) यस्स यत्थ दुक्खसच्चं न निरुज्झति तस्स तत्थ समुदयसच्चं न निरुज्झिस्सतीति?

चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ दुक्खसच्चं न निरुज्झति, नो च तेसं तत्थ समुदयसच्चं न निरुज्झिस्सति. अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे असञ्ञसत्तं उपपज्जन्तानं अरूपे अग्गमग्गस्स च फलस्स च भङ्गक्खणे असञ्ञसत्तं उपपज्जन्तानं तेसं तत्थ दुक्खसच्चञ्च न निरुज्झति समुदयसच्चञ्च न निरुज्झिस्सति.

(ख) यस्स वा पन यत्थ समुदयसच्चं न निरुज्झिस्सति तस्स तत्थ दुक्खसच्चं न निरुज्झतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स भङ्गक्खणे असञ्ञसत्ता चवन्तानं तेसं तत्थ समुदयसच्चं न निरुज्झिस्सति, नो च तेसं तत्थ दुक्खसच्चं न निरुज्झति. अग्गमग्गस्स उप्पादक्खणे अरहन्तानं चित्तस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे अरूपे अग्गमग्गस्स च फलस्स च भङ्गक्खणे असञ्ञसत्तं उपपज्जन्तानं तेसं तत्थ समुदयसच्चञ्च न निरुज्झिस्सति दुक्खसच्चञ्च न निरुज्झति.

(क) यस्स यत्थ दुक्खसच्चं न निरुज्झति तस्स तत्थ मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तस्स चित्तस्स उप्पादक्खणे ये चञ्ञे मग्गं पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ दुक्खसच्चं न निरुज्झति, नो च तेसं तत्थ मग्गसच्चं न निरुज्झिस्सति. अरहन्तानं चित्तस्स उप्पादक्खणे आपायिकानं ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे असञ्ञसत्तं उपपज्जन्तानं अरूपे अग्गमग्गस्स च फलस्स च भङ्गक्खणे तेसं तत्थ दुक्खसच्चञ्च न निरुज्झति मग्गसच्चञ्च न निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ दुक्खसच्चं न निरुज्झतीति?

अग्गमग्गस्स भङ्गक्खणे अरहन्तानं चित्तस्स भङ्गक्खणे आपायिकानं ये च पुथुज्जना मग्गं न पटिलभिस्सन्ति तेसं चवन्तानं पवत्ते चित्तस्स भङ्गक्खणे असञ्ञसत्ता चवन्तानं तेसं तत्थ मग्गसच्चं न निरुज्झिस्सति, नो च तेसं तत्थ दुक्खसच्चं न निरुज्झति. अरहन्तानं चित्तस्स उप्पादक्खणे आपायिकानं ये च पुथुज्जना मग्गं न पटिलभिस्सन्ति तेसं उपपज्जन्तानं पवत्ते चित्तस्स उप्पादक्खणे अरूपे अग्गमग्गस्स च फलस्स च भङ्गक्खणे असञ्ञसत्तं उपपज्जन्तानं तेसं तत्थ मग्गसच्चञ्च न निरुज्झिस्सति दुक्खसच्चञ्च न निरुज्झति.

१२५. (क) यस्स यत्थ समुदयसच्चं न निरुज्झति तस्स तत्थ मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने तेसं तत्थ समुदयसच्चं न निरुज्झति, नो च तेसं तत्थ मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं आपायिकानं ये च पुथुज्जना मग्गं न पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ समुदयसच्चञ्च न निरुज्झति मग्गसच्चञ्च न निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ समुदयसच्चं न निरुज्झतीति?

आपायिकानं ये च पुथुज्जना मग्गं न पटिलभिस्सन्ति तेसं तण्हाय भङ्गक्खणे तेसं तत्थ मग्गसच्चं न निरुज्झिस्सति, नो च तेसं तत्थ समुदयसच्चं न निरुज्झति. अग्गमग्गस्स भङ्गक्खणे अरहन्तानं आपायिकानं ये च पुथुज्जना मग्गं न पटिलभिस्सन्ति तेसं तण्हाय उप्पादक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ मग्गसच्चञ्च न निरुज्झिस्सति समुदयसच्चञ्च न निरुज्झिति.