(६) अतीतानागतवारो

(क) अनुलोमपुग्गलो

१२६. (क) यस्स दुक्खसच्चं निरुज्झित्थ तस्स समुदयसच्चं निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं दुक्खसच्चं निरुज्झित्थ, नो च तेसं समुदयसच्चं निरुज्झिस्सति. इतरेसं तेसं दुक्खसच्चञ्च निरुज्झित्थ समुदयसच्चञ्च निरुज्झिस्सति.

(ख) यस्स वा पन…पे…? आमन्ता.

(क) यस्स दुक्खसच्चं निरुज्झित्थ तस्स मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं दुक्खसच्चं निरुज्झित्थ, नो च तेसं मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं दुक्खसच्चञ्च निरुज्झित्थ मग्गसच्चञ्च निरुज्झिस्सति.

(ख) यस्स वा पन…पे…? आमन्ता.

१२७. (क) यस्स समुदयसच्चं निरुज्झित्थ तस्स मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं समुदयसच्चं निरुज्झित्थ, नो च तेसं मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं समुदयसच्चञ्च निरुज्झित्थ मग्गसच्चञ्च निरुज्झिस्सति.

(ख) यस्स वा पन…पे…? आमन्ता.

(ख) अनुलोमओकासो

१२८. यत्थ दुक्खसच्चं निरुज्झित्थ…पे….

(ग) अनुलोमपुग्गलोकासा

१२९. (क) यस्स यत्थ दुक्खसच्चं निरुज्झित्थ तस्स तत्थ समुदयसच्चं निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ दुक्खसच्चं निरुज्झित्थ, नो च तेसं तत्थ समुदयसच्चं निरुज्झिस्सति. इतरेसं चतुवोकारानं पञ्चवोकारानं तेसं तत्थ दुक्खसच्चञ्च निरुज्झित्थ समुदयसच्चञ्च निरुज्झिस्सति.

(ख) यस्स वा पन यत्थ समुदयसच्चं निरुज्झिस्सति तस्स तत्थ दुक्खसच्चं निरुज्झित्थाति?

सुद्धावासं उपपज्जन्तानं तेसं तत्थ समुदयसच्चं निरुज्झिस्सति, नो च तेसं तत्थ दुक्खसच्चं निरुज्झित्थ. इतरेसं चतुवोकारानं पञ्चवोकारानं तेसं तत्थ समुदयसच्चञ्च निरुज्झिस्सति दुक्खसच्चञ्च निरुज्झित्थ.

(क) यस्स यत्थ दुक्खसच्चं निरुज्झित्थ तस्स तत्थ मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति आपायिकानं असञ्ञसत्तानं तेसं तत्थ दुक्खसच्चं निरुज्झित्थ, नो च तेसं तत्थ मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तत्थ दुक्खसच्चञ्च निरुज्झित्थ मग्गसच्चञ्च निरुज्झिस्सति.

(ख) यस्स वा पन यत्थ मग्गसच्चं निरुज्झिस्सति तस्स तत्थ दुक्खसच्चं निरुज्झित्थाति?

सुद्धावासं उपपज्जन्तानं तेसं तत्थ मग्गसच्चं निरुज्झिस्सति, नो च तेसं तत्थ दुक्खसच्चं निरुज्झित्थ. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तत्थ मग्गसच्चञ्च निरुज्झिस्सति दुक्खसच्चञ्च निरुज्झित्थ.

१३०. (क) यस्स यत्थ समुदयसच्चं निरुज्झित्थ तस्स तत्थ मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति आपायिकानं तेसं तत्थ समुदयसच्चं निरुज्झित्थ, नो च तेसं तत्थ मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तत्थ समुदयसच्चञ्च निरुज्झित्थ मग्गसच्चञ्च निरुज्झिस्सति.

(ख) यस्स वा पन यत्थ मग्गसच्चं निरुज्झिस्सति तस्स तत्थ समुदयसच्चं निरुज्झित्थाति.

सुद्धावासानं दुतिये चित्ते वत्तमाने तेसं तत्थ मग्गसच्चं निरुज्झिस्सति, नो च तेसं तत्थ समुदयसच्चं निरुज्झित्थ. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं तत्थ मग्गसच्चञ्च निरुज्झिस्सति समुदयसच्चञ्च निरुज्झित्थ.

(घ) पच्चनीकपुग्गलो

१३१. (क) यस्स दुक्खसच्चं न निरुज्झित्थ तस्स समुदयसच्चं न निरुज्झिस्सतीति? नत्थि.

(ख) यस्स वा पन समुदयसच्चं न निरुज्झिस्सति तस्स दुक्खसच्चं न निरुज्झित्थाति? निरुज्झित्थ.

(क) यस्स दुक्खसच्चं न निरुज्झित्थ तस्स मग्गसच्चं न निरुज्झिस्सतीति? नत्थि.

(ख) यस्स वा पन मग्गसच्चं न निरुज्झिस्सति तस्स दुक्खसच्चं न निरुज्झित्थाति? निरुज्झित्थ.

१३२. (क) यस्स समुदयसच्चं न निरुज्झित्थ तस्स मग्गसच्चं न निरुज्झिस्सतीति? नत्थि.

(ख) यस्स वा पन मग्गसच्चं न निरुज्झिस्सति तस्स समुदयसच्चं न निरुज्झित्थाति? निरुज्झित्थ.

(ङ) पच्चनीकओकासो

१३३. यत्थ दुक्खसच्चं न निरुज्झित्थ…पे….

(च) पच्चनीकपुग्गलोकासा

१३४. (क) यस्स यत्थ दुक्खसच्चं न निरुज्झित्थ तस्स तत्थ समुदयसच्चं न निरुज्झिस्सतीति? निरुज्झिस्सति.

(ख) यस्स वा पन यत्थ समुदयसच्चं न निरुज्झिस्सति तस्स तत्थ दुक्खसच्चं न निरुज्झित्थाति? निरुज्झित्थ.

(क) यस्स यत्थ दुक्खसच्चं न निरुज्झित्थ तस्स तत्थ मग्गसच्चं न निरुज्झिस्सतीति? निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ दुक्खसच्चं न निरुज्झित्थाति? निरुज्झित्थ.

१३५. (क) यस्स यत्थ समुदयसच्चं न निरुज्झित्थ तस्स तत्थ मग्गसच्चं न निरुज्झिस्सतीति?

सुद्धावासानं दुतिये चित्ते वत्तमाने तेसं तत्थ समुदयसच्चं न निरुज्झित्थ, नो च तेसं तत्थ मग्गसच्चं न निरुज्झिस्सति. असञ्ञसत्तानं तेसं तत्थ समुदयसच्चञ्च न निरुज्झित्थ मग्गसच्चञ्च न निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ समुदयसच्चं न निरुज्झित्थाति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति आपायिकानं तेसं तत्थ मग्गसच्चं न निरुज्झिस्सति, नो च तेसं तत्थ समुदयसच्चं न निरुज्झित्थ. असञ्ञसत्तानं तेसं तत्थ मग्गसच्चञ्च न निरुज्झिस्सति समुदयसच्चञ्च न निरुज्झित्थ.

निरोधवारो.