(४) पच्चुप्पन्नातीतवारो

(क) अनुलोमपुग्गलो

१०६. (क) यस्स दुक्खसच्चं निरुज्झति तस्स समुदयसच्चं निरुज्झित्थाति? आमन्ता.

(ख) यस्स वा पन समुदयसच्चं निरुज्झित्थ तस्स दुक्खसच्चं निरुज्झतीति?

सब्बेसं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं समुदयसच्चं निरुज्झित्थ, नो च तेसं दुक्खसच्चं निरुज्झति. सब्बेसं चवन्तानं पवत्ते चित्तस्स भङ्गक्खणे तेसं समुदयसच्चञ्च निरुज्झित्थ दुक्खसच्चञ्च निरुज्झति.

(क) यस्स दुक्खसच्चं निरुज्झति तस्स मग्गसच्चं निरुज्झित्थाति?

अनभिसमेतावीनं चवन्तानं पवत्ते चित्तस्स भङ्गक्खणे तेसं दुक्खसच्चं निरुज्झति, नो च तेसं मग्गसच्चं निरुज्झित्थ. अभिसमेतावीनं चवन्तानं पवत्ते चित्तस्स भङ्गक्खणे तेसं दुक्खसच्चञ्च निरुज्झति मग्गसच्चञ्च निरुज्झित्थ.

(ख) यस्स वा पन मग्गसच्चं निरुज्झित्थ तस्स दुक्खसच्चं निरुज्झतीति?

अभिसमेतावीनं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं मग्गसच्चं निरुज्झित्थ, नो च तेसं दुक्खसच्चं निरुज्झति. अभिसमेतावीनं चवन्तानं पवत्ते चित्तस्स भङ्गक्खणे तेसं मग्गसच्चञ्च निरुज्झित्थ दुक्खसच्चञ्च निरुज्झति.

१०७. (क) यस्स समुदयसच्चं निरुज्झति तस्स मग्गसच्चं निरुज्झित्थाति?

अनभिसमेतावीनं तण्हाय भङ्गक्खणे तेसं समुदयसच्चं निरुज्झति, नो च तेसं मग्गसच्चं निरुज्झित्थ. अभिसमेतावीनं तण्हाय भङ्गक्खणे तेसं समुदयसच्चञ्च निरुज्झति मग्गसच्चञ्च निरुज्झित्थ.

(ख) यस्स वा पन मग्गसच्चं निरुज्झित्थ तस्स समुदयसच्चं निरुज्झतीति?

अभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने निरोधसमापन्नानं तेसं मग्गसच्चं निरुज्झित्थ, नो च तेसं समुदयसच्चं निरुज्झति. अभिसमेतावीनं तण्हाय भङ्गक्खणे तेसं मग्गसच्चञ्च निरुज्झित्थ समुदयसच्चञ्च निरुज्झति.

(ख) अनुलोमओकासो

१०८. यत्थ दुक्खसच्चं निरुज्झति…पे….

(ग) अनुलोमपुग्गलोकासा

१०९. (क) यस्स यत्थ दुक्खसच्चं निरुज्झति तस्स तत्थ समुदयसच्चं निरुज्झित्थाति?

सुद्धावासानं उपपत्तिचित्तस्स भङ्गक्खणे असञ्ञसत्ता चवन्तानं तेसं तत्थ दुक्खसच्चं निरुज्झति, नो च तेसं तत्थ समुदयसच्चं निरुज्झित्थ. इतरेसं चतुवोकारा पञ्चवोकारा चवन्तानं पवत्ते चित्तस्स भङ्गक्खणे तेसं तत्थ दुक्खसच्चञ्च निरुज्झति समुदयसच्चञ्च निरुज्झित्थ.

(ख) यस्स वा पन यत्थ समुदयसच्चं निरुज्झित्थ तस्स तत्थ दुक्खसच्चं निरुज्झतीति?

चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ समुदयसच्चं निरुज्झित्थ, नो च तेसं तत्थ दुक्खसच्चं निरुज्झति. चतुवोकारा पञ्चवोकारा चवन्तानं पवत्ते चित्तस्स भङ्गक्खणे तेसं तत्थ समुदयसच्चञ्च निरुज्झित्थ दुक्खसच्चञ्च निरुज्झति.

(क) यस्स यत्थ दुक्खसच्चं निरुज्झति तस्स तत्थ मग्गसच्चं निरुज्झित्थाति?

सुद्धावासानं उपपत्तिचित्तस्स भङ्गक्खणे अनभिसमेतावीनं चवन्तानं पवत्ते चित्तस्स भङ्गक्खणे असञ्ञसत्ता चवन्तानं तेसं तत्थ दुक्खसच्चं निरुज्झति, नो च तेसं तत्थ मग्गसच्चं निरुज्झित्थ. अभिसमेतावीनं चवन्तानं पवत्ते चित्तस्स भङ्गक्खणे तेसं तत्थ दुक्खसच्चञ्च निरुज्झति मग्गसच्चञ्च निरुज्झित्थ.

(ख) यस्स वा पन यत्थ मग्गसच्चं निरुज्झित्थ तस्स तत्थ दुक्खसच्चं निरुज्झतीति?

अभिसमेतावीनं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ मग्गसच्चं निरुज्झित्थ, नो च तेसं तत्थ दुक्खसच्चं निरुज्झति. अभिसमेतावीनं चवन्तानं पवत्ते चित्तस्स भङ्गक्खणे तेसं तत्थ मग्गसच्चञ्च निरुज्झित्थ दुक्खसच्चञ्च निरुज्झति.

११०. (क) यस्स यत्थ समुदयसच्चं निरुज्झति तस्स तत्थ मग्गसच्चं निरुज्झित्थाति?

अनभिसमेतावीनं तण्हाय भङ्गक्खणे तेसं तत्थ समुदयसच्चं निरुज्झति, नो च तेसं तत्थ मग्गसच्चं निरुज्झित्थ. अभिसमेतावीनं तण्हाय भङ्गक्खणे तेसं तत्थ समुदयसच्चञ्च निरुज्झति मग्गसच्चञ्च निरुज्झित्थ.

(ख) यस्स वा पन यत्थ मग्गसच्चं निरुज्झित्थ तस्स तत्थ समुदयसच्चं निरुज्झतीति?

अभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने तेसं तत्थ मग्गसच्चं निरुज्झित्थ, नो च तेसं तत्थ समुदयसच्चं निरुज्झति. अभिसमेतावीनं तण्हाय भङ्गक्खणे तेसं तत्थ मग्गसच्चञ्च निरुज्झित्थ समुदयसच्चञ्च निरुज्झति.

(घ) पच्चनीकपुग्गलो

१११. (क) यस्स दुक्खसच्चं न निरुज्झति तस्स समुदयसच्चं न निरुज्झित्थाति? निरुज्झित्थ.

(ख) यस्स वा पन समुदयसच्चं न निरुज्झित्थ तस्स दुक्खसच्चं न निरुज्झतीति? नत्थि.

(क) यस्स दुक्खसच्चं न निरुज्झति तस्स मग्गसच्चं न निरुज्झित्थाति?

अभिसमेतावीनं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं दुक्खसच्चं न निरुज्झति, नो च तेसं मग्गसच्चं न निरुज्झित्थ. अनभिसमेतावीनं उपपज्जन्तानं पवत्ते चित्तस्स उप्पादक्खणे तेसं दुक्खसच्चञ्च न निरुज्झति मग्गसच्चञ्च न निरुज्झित्थ.

(ख) यस्स वा पन मग्गसच्चं न निरुज्झित्थ तस्स दुक्खसच्चं न निरुज्झतीति?

अनभिसमेतावीनं चवन्तानं पवत्ते चित्तस्स भङ्गक्खणे तेसं मग्गसच्चं न निरुज्झित्थ, नो च तेसं दुक्खसच्चं न निरुज्झति. अनभिसमेतावीनं उपपज्जन्तानं पवत्ते चित्तस्स उप्पादक्खणे तेसं मग्गसच्चञ्च न निरुज्झित्थ दुक्खसच्चञ्च न निरुज्झति.

११२. (क) यस्स समुदयसच्चं न निरुज्झति तस्स मग्गसच्चं न निरुज्झित्थाति?

अभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने निरोधसमापन्नानं तेसं समुदयसच्चं न निरुज्झति, नो च तेसं मग्गसच्चं न निरुज्झित्थ. अनभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने असञ्ञसत्तानं तेसं समुदयसच्चञ्च न निरुज्झति मग्गसच्चञ्च न निरुज्झित्थ.

(ख) यस्स वा पन मग्गसच्चं न निरुज्झित्थ तस्स समुदयसच्चं न निरुज्झतीति?

अनभिसमेतावीनं तण्हाय भङ्गक्खणे तेसं मग्गसच्चं न निरुज्झित्थ, नो च तेसं समुदयसच्चं न निरुज्झति. अनभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने असञ्ञसत्तानं तेसं मग्गसच्चञ्च न निरुज्झित्थ समुदयसच्चञ्च न निरुज्झति.

(ङ) पच्चनीकओकासो

११३. यत्थ दुक्खसच्चं न निरुज्झति…पे….

(च) पच्चनीकपुग्गलोकासा

११४. (क) यस्स यत्थ दुक्खसच्चं न निरुज्झति तस्स तत्थ समुदयसच्चं न निरुज्झित्थाति?

चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ दुक्खसच्चं न निरुज्झति, नो च तेसं तत्थ समुदयसच्चं न निरुज्झित्थ. सुद्धावासानं उपपत्तिचित्तस्स उप्पादक्खणे असञ्ञसत्तं उपपज्जन्तानं तेसं तत्थ दुक्खसच्चञ्च न निरुज्झति समुदयसच्चञ्च न निरुज्झित्थ.

(ख) यस्स वा पन यत्थ समुदयसच्चं न निरुज्झित्थ तस्स तत्थ दुक्खसच्चं न निरुज्झतीति?

सुद्धावासानं उपपत्तिचित्तस्स भङ्गक्खणे असञ्ञसत्ता चवन्तानं तेसं तत्थ समुदयसच्चं न निरुज्झित्थ, नो च तेसं तत्थ दुक्खसच्चं न निरुज्झति. सुद्धावासानं उपपत्तिचित्तस्स उप्पादक्खणे असञ्ञसत्तं उपपज्जन्तानं तेसं तत्थ समुदयसच्चञ्च न निरुज्झित्थ दुक्खसच्चञ्च न निरुज्झति.

(क) यस्स यत्थ दुक्खसच्चं न निरुज्झति तस्स तत्थ मग्गसच्चं न निरुज्झित्थाति?

अभिसमेतावीनं उपपज्जन्तानं पवत्ते चित्तस्स उप्पादक्खणे अरूपे मग्गस्स च फलस्स च भङ्गक्खणे तेसं तत्थ दुक्खसच्चं न निरुज्झति, नो च तेसं तत्थ मग्गसच्चं न निरुज्झित्थ. सुद्धावासानं उपपत्तिचित्तस्स उप्पादक्खणे अनभिसमेतावीनं उपपज्जन्तानं पवत्ते चित्तस्स उप्पादक्खणे असञ्ञसत्तं उपपज्जन्तानं तेसं तत्थ दुक्खसच्चञ्च न निरुज्झति मग्गसच्चञ्च न निरुज्झित्थ.

(ख) यस्स वा पन यत्थ मग्गसच्चं न निरुज्झित्थ तस्स तत्थ दुक्खसच्चं न निरुज्झतीति?

सुद्धावासानं उपपत्तिचित्तस्स भङ्गक्खणे अनभिसमेतावीनं चवन्तानं पवत्ते चित्तस्स भङ्गक्खणे असञ्ञसत्ता चवन्तानं तेसं तत्थ मग्गसच्चं न निरुज्झित्थ, नो च तेसं तत्थ दुक्खसच्चं न निरुज्झति. सुद्धावासानं उपपत्तिचित्तस्स उप्पादक्खणे अनभिसमेतावीनं उपपज्जन्तानं पवत्ते चित्तस्स उप्पादक्खणे असञ्ञसत्तं उपपज्जन्तानं तेसं तत्थ मग्गसच्चञ्च न निरुज्झित्थ दुक्खसच्चञ्च न निरुज्झति.

११५. (क) यस्स यत्थ समुदयसच्चं न निरुज्झति तस्स तत्थ मग्गसच्चं न निरुज्झित्थाति?

अभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने तेसं तत्थ समुदयसच्चं न निरुज्झति, नो च तेसं तत्थ मग्गसच्चं न निरुज्झित्थ. सुद्धावासानं दुतिये चित्ते वत्तमाने अनभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ समुदयसच्चञ्च न निरुज्झति मग्गसच्चञ्च न निरुज्झित्थ.

(ख) यस्स वा पन यत्थ मग्गसच्चं न निरुज्झित्थ तस्स तत्थ समुदयसच्चं न निरुज्झतीति?

अनभिसमेतावीनं तण्हाय भङ्गक्खणे तेसं तत्थ मग्गसच्चं न निरुज्झित्थ, नो च तेसं तत्थ समुदयसच्चं न निरुज्झति. सुद्धावासानं दुतिये चित्ते वत्तमाने अनभिसमेतावीनं तण्हाय उप्पादक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ मग्गसच्चञ्च न निरुज्झित्थ समुदयसच्चञ्च न निरुज्झति.