(३) अनागतवारो

(क) अनुलोमपुग्गलो

९७. (क) यस्स दुक्खसच्चं निरुज्झिस्सति तस्स समुदयसच्चं निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति [पटिलभिस्सन्ति तस्स चित्तस्स उप्पादक्खणे (सी. स्या.) उप्पादवारे पन पाठन्तरं नत्थि] तेसं दुक्खसच्चं निरुज्झिस्सति, नो च तेसं समुदयसच्चं निरुज्झिस्सति. इतरेसं तेसं दुक्खसच्चञ्च निरुज्झिस्सति समुदयसच्चञ्च निरुज्झिस्सति.

(ख) यस्स वा पन…पे…? आमन्ता.

(क) यस्स दुक्खसच्चं निरुज्झिस्सति तस्स मग्गसच्चं निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं दुक्खसच्चं निरुज्झिस्सति, नो च तेसं मग्गसच्चं निरुज्झिस्सति. अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं दुक्खसच्चञ्च निरुज्झिस्सति मग्गसच्चञ्च निरुज्झिस्सति.

(ख) यस्स वा पन…पे…. आमन्ता.

९८. (क) यस्स समुदयसच्चं निरुज्झिस्सति तस्स मग्गसच्चं निरुज्झिस्सतीति?

ये पुथुज्जना मग्गं न पटिलभिस्सन्ति तेसं समुदयसच्चं निरुज्झिस्सति, नो च तेसं मग्गसच्चं निरुज्झिस्सति. ये मग्गं पटिलभिस्सन्ति तेसं समुदयसच्चञ्च निरुज्झिस्सति मग्गसच्चञ्च निरुज्झिस्सति.

(ख) यस्स वा पन मग्गसच्चं निरुज्झिस्सति तस्स समुदयसच्चं निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तेसं मग्गसच्चं निरुज्झिस्सति, नो च तेसं समुदयसच्चं निरुज्झिस्सति. ये मग्गं पटिलभिस्सन्ति तेसं मग्गसच्चञ्च निरुज्झिस्सति समुदयसच्चञ्च निरुज्झिस्सति.

(ख) अनुलोमओकासो

९९. यत्थ दुक्खसच्चं निरुज्झिस्सति…पे….

(ग) अनुलोमपुग्गलोकासा

१००. यस्स यत्थ दुक्खसच्चं निरुज्झिस्सति तस्स तत्थ समुदयसच्चं निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ दुक्खसच्चं निरुज्झिस्सति, नो च तेसं तत्थ समुदयसच्चं निरुज्झिस्सति. इतरेसं चतुवोकारानं पञ्चवोकारानं तेसं तत्थ दुक्खसच्चञ्च निरुज्झिस्सति समुदयसच्चञ्च निरुज्झिस्सति…पे….

(यस्सकम्पि यस्सयत्थकम्पि सदिसं).

(घ) पच्चनीकपुग्गलो

१०१. (क) यस्स दुक्खसच्चं न निरुज्झिस्सति तस्स समुदयसच्चं न निरुज्झिस्सतीति? आमन्ता.

(ख) यस्स वा पन समुदयसच्चं न निरुज्झिस्सति तस्स दुक्खसच्चं न निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं समुदयसच्चं न निरुज्झिस्सति, नो च तेसं दुक्खसच्चं न निरुज्झिस्सति. पच्छिमचित्तस्स भङ्गक्खणे तेसं समुदयसच्चञ्च न निरुज्झिस्सति दुक्खसच्चञ्च न निरुज्झिस्सति.

(क) यस्स दुक्खसच्चं न निरुज्झिस्सति तस्स मग्गसच्चं न निरुज्झिस्सतीति? आमन्ता.

(ख) यस्स वा पन मग्गसच्चं न निरुज्झिस्सति तस्स दुक्खसच्चं न निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति तेसं मग्गसच्चं न निरुज्झिस्सति, नो च तेसं दुक्खसच्चं न निरुज्झिस्सति. पच्छिमचित्तस्स भङ्गक्खणे तेसं मग्गसच्चञ्च न निरुज्झिस्सति दुक्खसच्चञ्च न निरुज्झिस्सति.

१०२. (क) यस्स समुदयसच्चं न निरुज्झिस्सति तस्स मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तेसं समुदयसच्चं न निरुज्झिस्सति, नो च तेसं मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं तेसं समुदयसच्चञ्च न निरुज्झिस्सति मग्गसच्चञ्च न निरुज्झिस्सति.

(ख) यस्स वा पन मग्गसच्चं न निरुज्झिस्सति तस्स समुदयसच्चं न निरुज्झिस्सतीति?

ये पुथुज्जना मग्गं न पटिलभिस्सन्ति तेसं मग्गसच्चं न निरुज्झिस्सति, नो च तेसं समुदयसच्चं न निरुज्झिस्सति. अग्गमग्गस्स भङ्गक्खणे अरहन्तानं तेसं मग्गसच्चञ्च न निरुज्झिस्सति समुदयसच्चञ्च न निरुज्झिस्सति.

(ङ) पच्चनीकओकासो

१०३. यत्थ दुक्खसच्चं न निरुज्झिस्सति…पे….

(च) पच्चनीकपुग्गलोकासा

१०४. (क) यस्स यत्थ दुक्खसच्चं न निरुज्झिस्सति तस्स तत्थ समुदयसच्चं न निरुज्झिस्सतीति? आमन्ता.

(ख) यस्स वा पन यत्थ समुदयसच्चं न निरुज्झिस्सति तस्स तत्थ दुक्खसच्चं न निरुज्झिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ समुदयसच्चं न निरुज्झिस्सति, नो च तेसं तत्थ दुक्खसच्चं न निरुज्झिस्सति. पच्छिमचित्तस्स भङ्गक्खणे तेसं तत्थ समुदयसच्चञ्च न निरुज्झिस्सति दुक्खसच्चञ्च न निरुज्झिस्सति.

(क) यस्स यत्थ दुक्खसच्चं न निरुज्झिस्सति तस्स तत्थ मग्गसच्चं न निरुज्झिस्सतीति? आमन्ता.

(ख) यस्स वा पन यत्थ मग्गसच्चं न निरुज्झिस्सति तस्स तत्थ दुक्खसच्चं न निरुज्झिस्सतीति?

अग्गमग्गस्स भङ्गक्खणे अरहन्तानं ये च पुथुज्जना मग्गं न पटिलभिस्सन्ति आपायिकानं असञ्ञसत्तानं तेसं तत्थ मग्गसच्चं न निरुज्झिस्सति, नो च तेसं तत्थ दुक्खसच्चं न निरुज्झिस्सति. पच्छिमचित्तस्स भङ्गक्खणे तेसं तत्थ मग्गसच्चञ्च न निरुज्झिस्सति दुक्खसच्चञ्च न निरुज्झिस्सति.

१०५. (क) यस्स यत्थ समुदयसच्चं न निरुज्झिस्सति तस्स तत्थ मग्गसच्चं न निरुज्झिस्सतीति?

अग्गमग्गस्स उप्पादक्खणे यस्स चित्तस्स अनन्तरा अग्गमग्गं पटिलभिस्सन्ति तेसं तत्थ समुदयसच्चं न निरुज्झिस्सति, नो च तेसं तत्थ मग्गसच्चं न निरुज्झिस्सति. अग्गमग्गस्स भङ्गक्खणे अरहन्तानं असञ्ञसत्तानं तेसं तत्थ समुदयसच्चञ्च न निरुज्झिस्सति मग्गसच्चञ्च न निरुज्झिस्सति.

(ख) यस्स वा पन यत्थ मग्गसच्चं न निरुज्झिस्सति तस्स तत्थ समुदयसच्चं न निरुज्झिस्सतीति?

आपायिकानं ये च पुथुज्जना मग्गं न पटिलभिस्सन्ति तेसं तत्थ मग्गसच्चं न निरुज्झिस्सति, नो च तेसं तत्थ समुदयसच्चं न निरुज्झिस्सति. अग्गमग्गस्स भङ्गक्खणे अरहन्तानं असञ्ञसत्तानं तेसं तत्थ मग्गसच्चञ्च न निरुज्झिस्सति समुदयसच्चञ्च न निरुज्झिस्सति.