(३) अनागतवारो

(क) अनुलोमपुग्गलो

४८. (क) यस्स दुक्खसच्चं उप्पज्जिस्सति तस्स समुदयसच्चं उप्पज्जिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं दुक्खसच्चं उप्पज्जिस्सति, नो च तेसं समुदयसच्चं उप्पज्जिस्सति. इतरेसं तेसं दुक्खसच्चञ्च उप्पज्जिस्सति समुदयसच्चञ्च उप्पज्जिस्सति.

(ख) यस्स वा पन…पे…? आमन्ता.

(क) यस्स दुक्खसच्चं उप्पज्जिस्सति तस्स मग्गसच्चं उप्पज्जिस्सतीति?

अग्गमग्गसमङ्गीनं अरहन्तानं ये च पुथुज्जना मग्गं न पटिलभिस्सन्ति तेसं दुक्खसच्चं उप्पज्जिस्सति, नो च तेसं मग्गसच्चं उप्पज्जिस्सति. यस्स चित्तस्स अनन्तरा अग्गमग्गं पटिलभिस्सन्ति ये चञ्ञे मग्गं पटिलभिस्सन्ति तेसं दुक्खसच्चञ्च उप्पज्जिस्सति मग्गसच्चञ्च उप्पज्जिस्सति.

(ख) यस्स वा पन…पे… उप्पज्जिस्सतीति? आमन्ता.

४९. (क) यस्स समुदयसच्चं उप्पज्जिस्सति तस्स मग्गसच्चं उप्पज्जिस्सतीति?

ये पुथुज्जना मग्गं न पटिलभिस्सन्ति तेसं समुदयसच्चं उप्पज्जिस्सति, नो च तेसं मग्गसच्चं उप्पज्जिस्सति. ये मग्गं पटिलभिस्सन्ति तेसं समुदयसच्चञ्च उप्पज्जिस्सति मग्गसच्चञ्च उप्पज्जिस्सति.

(ख) यस्स वा पन मग्गसच्चं उप्पज्जिस्सति तस्स समुदयसच्चं उप्पज्जिस्सतीति?

यस्स चित्तस्स अनन्तरा अग्गमग्गं पटिलभिस्सन्ति तेसं मग्गसच्चं उप्पज्जिस्सति, नो च तेसं समुदयसच्चं उप्पज्जिस्सति. ये मग्गं पटिलभिस्सन्ति तेसं मग्गसच्चञ्च उप्पज्जिस्सति समुदयसच्चञ्च उप्पज्जिस्सति.

(ख) अनुलोमओकासो

५०. यत्थ दुक्खसच्चं उप्पज्जिस्सति…पे….

(ग) अनुलोमपुग्गलोकासा

५१. (क) यस्स यत्थ दुक्खसच्चं उप्पज्जिस्सति तस्स तत्थ समुदयसच्चं उप्पज्जिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ दुक्खसच्चं उप्पज्जिस्सति, नो च तेसं तत्थ समुदयसच्चं उप्पज्जिस्सति. इतरेसं चतुवोकारानं पञ्चवोकारानं तेसं तत्थ दुक्खसच्चञ्च उप्पज्जिस्सति समुदयसच्चञ्च उप्पज्जिस्सति.

(ख) यस्स वा पन यत्थ समुदयसच्चं उप्पज्जिस्सति…पे… उप्पज्जिस्सतीति? आमन्ता.

(क) यस्स यत्थ दुक्खसच्चं उप्पज्जिस्सति तस्स तत्थ मग्गसच्चं उप्पज्जिस्सतीति?

अग्गमग्गसमङ्गीनं अरहन्तानं ये च पुथुज्जना मग्गं न पटिलभिस्सन्ति आपायिकानं असञ्ञसत्तानं तेसं तत्थ दुक्खसच्चं उप्पज्जिस्सति, नो च तेसं तत्थ मग्गसच्चं उप्पज्जिस्सति. यस्स चित्तस्स अनन्तरा अग्गमग्गं पटिलभिस्सन्ति, ये चञ्ञे मग्गं पटिलभिस्सन्ति तेसं तत्थ दुक्खसच्चञ्च उप्पज्जिस्सति मग्गसच्चञ्च उप्पज्जिस्सति.

(ख) यस्स वा पन यत्थ मग्गसच्चं उप्पज्जिस्सति तस्स तत्थ दुक्खसच्चं उप्पज्जिस्सतीति? आमन्ता.

५२. (क) यस्स यत्थ समुदयसच्चं उप्पज्जिस्सति तस्स तत्थ मग्गसच्चं उप्पज्जिस्सतीति?

आपायिकानं ये च पुथुज्जना मग्गं न पटिलभिस्सन्ति तेसं तत्थ समुदयसच्चं उप्पज्जिस्सति, नो च तेसं तत्थ मग्गसच्चं उप्पज्जिस्सति. ये मग्गं पटिलभिस्सन्ति तेसं तत्थ समुदयसच्चञ्च उप्पज्जिस्सति मग्गसच्चञ्च उप्पज्जिस्सति.

(ख) यस्स वा पन यत्थ मग्गसच्चं उप्पज्जिस्सति तस्स तत्थ समुदयसच्चं उप्पज्जिस्सतीति?

यस्स चित्तस्स अनन्तरा अग्गमग्गं पटिलभिस्सन्ति तेसं तत्थ मग्गसच्चं उप्पज्जिस्सति, नो च तेसं तत्थ समुदयसच्चं उप्पज्जिस्सति. ये मग्गं पटिलभिस्सन्ति तेसं तत्थ मग्गसच्चञ्च उप्पज्जिस्सति समुदयसच्चञ्च उप्पज्जिस्सति.

(घ) पच्चनीकपुग्गलो

५३. (क) यस्स दुक्खसच्चं नुप्पज्जिस्सति तस्स समुदयसच्चं नुप्पज्जिस्सतीति? आमन्ता.

(ख) यस्स वा पन समुदयसच्चं नुप्पज्जिस्सति तस्स दुक्खसच्चं नुप्पज्जिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति तेसं समुदयसच्चं नुप्पज्जिस्सति, नो च तेसं दुक्खसच्चं नुप्पज्जिस्सति. पच्छिमचित्तसमङ्गीनं तेसं समुदयसच्चञ्च नुप्पज्जिस्सति दुक्खसच्चञ्च नुप्पज्जिस्सति.

(क) यस्स दुक्खसच्चं नुप्पज्जिस्सति तस्स मग्गसच्चं नुप्पज्जिस्सतीति? आमन्ता.

(ख) यस्स वा पन मग्गसच्चं नुप्पज्जिस्सति तस्स दुक्खसच्चं नुप्पज्जिस्सतीति?

अग्गमग्गसमङ्गीनं अरहन्तानं ये च पुथुज्जना मग्गं न पटिलभिस्सन्ति तेसं मग्गसच्चं नुप्पज्जिस्सति, नो च तेसं दुक्खसच्चं नुप्पज्जिस्सति. पच्छिमचित्तसमङ्गीनं तेसं मग्गसच्चञ्च नुप्पज्जिस्सति दुक्खसच्चञ्च नुप्पज्जिस्सति.

५४. (क) यस्स समुदयसच्चं नुप्पज्जिस्सति तस्स मग्गसच्चं नुप्पज्जिस्सतीति?

यस्स चित्तस्स अनन्तरा अग्गमग्गं पटिलभिस्सन्ति तेसं समुदयसच्चं नुप्पज्जिस्सति, नो च तेसं मग्गसच्चं नुप्पज्जिस्सति. अग्गमग्गसमङ्गीनं अरहन्तानं तेसं समुदयसच्चञ्च नुप्पज्जिस्सति मग्गसच्चञ्च नुप्पज्जिस्सति.

(ख) यस्स वा पन मग्गसच्चं नुप्पज्जिस्सति तस्स समुदयसच्चं नुप्पज्जिस्सतीति?

ये पुथुज्जना मग्गं न पटिलभिस्सन्ति तेसं मग्गसच्चं नुप्पज्जिस्सति, नो च तेसं समुदयसच्चं नुप्पज्जिस्सति. अग्गमग्गसमङ्गीनं अरहन्तानं तेसं मग्गसच्चञ्च नुप्पज्जिस्सति समुदयसच्चञ्च नुप्पज्जिस्सति.

(ङ) पच्चनीकओकासो

५५. यत्थ दुक्खसच्चं नुप्पज्जिस्सति…पे….

(च) पच्चनीकपुग्गलोकासा

५६. (क) यस्स यत्थ दुक्खसच्चं नुप्पज्जिस्सति तस्स तत्थ समुदयसच्चं नुप्पज्जिस्सतीति? आमन्ता.

(ख) यस्स वा पन यत्थ समुदयसच्चं नुप्पज्जिस्सति तस्स तत्थ दुक्खसच्चं नुप्पज्जिस्सतीति?

अग्गमग्गसमङ्गीनं अरहन्तानं यस्स चित्तस्स अनन्तरा अग्गमग्गं पटिलभिस्सन्ति असञ्ञसत्तानं तेसं तत्थ समुदयसच्चं नुप्पज्जिस्सति, नो च तेसं तत्थ दुक्खसच्चं नुप्पज्जिस्सति. पच्छिमचित्तसमङ्गीनं तेसं तत्थ समुदयसच्चञ्च नुप्पज्जिस्सति दुक्खसच्चञ्च नुप्पज्जिस्सति.

(क) यस्स यत्थ दुक्खसच्चं नुप्पज्जिस्सति तस्स तत्थ मग्गसच्चं नुप्पज्जिस्सतीति? आमन्ता.

(ख) यस्स वा पन यत्थ मग्गसच्चं नुप्पज्जिस्सति तस्स तत्थ दुक्खसच्चं नुप्पज्जिस्सतीति?

अग्गमग्गसमङ्गीनं अरहन्तानं ये च पुथुज्जना मग्गं न पटिलभिस्सन्ति आपायिकानं असञ्ञसत्तानं तेसं तत्थ मग्गसच्चं नुप्पज्जिस्सति, नो च तेसं तत्थ दुक्खसच्चं नुप्पज्जिस्सति. पच्छिमचित्तसमङ्गीनं तेसं तत्थ मग्गसच्चञ्च नुप्पज्जिस्सति दुक्खसच्चञ्च नुप्पज्जिस्सति.

५७. (क) यस्स यत्थ समुदयसच्चं नुप्पज्जिस्सति तस्स तत्थ मग्गसच्चं नुप्पज्जिस्सतीति?

यस्स चित्तस्स अनन्तरा अग्गमग्गं पटिलभिस्सन्ति तेसं तत्थ समुदयसच्चं नुप्पज्जिस्सति, नो च तेसं तत्थ मग्गसच्चं नुप्पज्जिस्सति. अग्गमग्गसमङ्गीनं अरहन्तानं असञ्ञसत्तानं तेसं तत्थ समुदयसच्चञ्च नुप्पज्जिस्सति मग्गसच्चञ्च नुप्पज्जिस्सति.

(ख) यस्स वा पन यत्थ मग्गसच्चं नुप्पज्जिस्सति तस्स तत्थ समुदयसच्चं नुप्पज्जिस्सतीति?

आपायिकानं ये च पुथुज्जना मग्गं न पटिलभिस्सन्ति तेसं तत्थ मग्गसच्चं नुप्पज्जिस्सति, नो च तेसं तत्थ समुदयसच्चं नुप्पज्जिस्सति. अग्गमग्गसमङ्गीनं अरहन्तानं असञ्ञसत्तानं तेसं तत्थ मग्गसच्चञ्च नुप्पज्जिस्सति समुदयसच्चञ्च नुप्पज्जिस्सति.