(४) पच्चुप्पन्नातीतवारो

(क) अनुलोमपुग्गलो

५८. (क) यस्स दुक्खसच्चं उप्पज्जति तस्स समुदयसच्चं उप्पज्जित्थाति? आमन्ता.

(ख) यस्स वा पन समुदयसच्चं उप्पज्जित्थ तस्स दुक्खसच्चं उप्पज्जतीति?

सब्बेसं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं समुदयसच्चं उप्पज्जित्थ, नो च तेसं दुक्खसच्चं उप्पज्जति. सब्बेसं उपपज्जन्तानं पवत्ते चित्तस्स उप्पादक्खणे तेसं समुदयसच्चञ्च उप्पज्जित्थ दुक्खसच्चञ्च उप्पज्जति.

(क) यस्स दुक्खसच्चं उप्पज्जति तस्स मग्गसच्चं उप्पज्जित्थाति? अनभिसमेतावीनं उपपज्जन्तानं पवत्ते चित्तस्स उप्पादक्खणे तेसं दुक्खसच्चं उप्पज्जति, नो च तेसं मग्गसच्चं उप्पज्जित्थ. अभिसमेतावीनं उपपज्जन्तानं पवत्ते चित्तस्स उप्पादक्खणे तेसं दुक्खसच्चञ्च उप्पज्जति मग्गसच्चञ्च उप्पज्जित्थ.

(ख) यस्स वा पन मग्गसच्चं उप्पज्जित्थ तस्स दुक्खसच्चं उप्पज्जतीति?

अभिसमेतावीनं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं मग्गसच्चं उप्पज्जित्थ, नो च तेसं दुक्खसच्चं उप्पज्जति. अभिसमेतावीनं उपपज्जन्तानं पवत्ते चित्तस्स उप्पादक्खणे तेसं मग्गसच्चञ्च उप्पज्जित्थ दुक्खसच्चञ्च उप्पज्जति.

५९. (क) यस्स समुदयसच्चं उप्पज्जति तस्स मग्गसच्चं उप्पज्जित्थाति?

अनभिसमेतावीनं तण्हाय उप्पादक्खणे तेसं समुदयसच्चं उप्पज्जति, नो च तेसं मग्गसच्चं उप्पज्जित्थ. अभिसमेतावीनं तण्हाय उप्पादक्खणे तेसं समुदयसच्चञ्च उप्पज्जति मग्गसच्चञ्च उप्पज्जित्थ.

(ख) यस्स वा पन मग्गसच्चं उप्पज्जित्थ तस्स समुदयसच्चं उप्पज्जतीति?

अभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने निरोधसमापन्नानं तेसं मग्गसच्चं उप्पज्जित्थ, नो च तेसं समुदयसच्चं उप्पज्जति. अभिसमेतावीनं तण्हाय उप्पादक्खणे तेसं मग्गसच्चञ्च उप्पज्जित्थ समुदयसच्चञ्च उप्पज्जति.

(ख) अनुलोमओकासो

६०. यत्थ दुक्खसच्चं उप्पज्जति…पे… (यत्थका सदिसा सब्बे).

(ग) अनुलोमपुग्गलोकासा

६१. (क) यस्स यत्थ दुक्खसच्चं उप्पज्जति तस्स तत्थ समुदयसच्चं उप्पज्जित्थाति?

सुद्धावासानं उपपत्तिचित्तस्स [उप्पत्तिचित्तस्स (स्या.)] उप्पादक्खणे असञ्ञसत्तं उपपज्जन्तानं तेसं तत्थ दुक्खसच्चं उप्पज्जति, नो च तेसं तत्थ समुदयसच्चं उप्पज्जित्थ. इतरेसं चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे तेसं तत्थ दुक्खसच्चञ्च उप्पज्जति समुदयसच्चञ्च उप्पज्जित्थ.

(ख) यस्स वा पन यत्थ समुदयसच्चं उप्पज्जित्थ तस्स तत्थ दुक्खसच्चं उप्पज्जतीति?

चतुवोकारा पञ्चवोकारा चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ समुदयसच्चं उप्पज्जित्थ, नो च तेसं तत्थ दुक्खसच्चं उप्पज्जति. चतुवोकारं पञ्चवोकारं उपपज्जन्तानं पवत्ते चित्तस्स उप्पादक्खणे तेसं तत्थ समुदयसच्चञ्च उप्पज्जित्थ दुक्खसच्चञ्च उप्पज्जति.

(क) यस्स यत्थ दुक्खसच्चं उप्पज्जति तस्स तत्थ मग्गसच्चं उप्पज्जित्थाति?

सुद्धावासानं उपपत्तिचित्तस्स उप्पादक्खणे अनभिसमेतावीनं उपपज्जन्तानं पवत्ते चित्तस्स उप्पादक्खणे असञ्ञसत्तं उपपज्जन्तानं तेसं तत्थ दुक्खसच्चं उप्पज्जति, नो च तेसं तत्थ मग्गसच्चं उप्पज्जित्थ. अभिसमेतावीनं उपपज्जन्तानं पवत्ते चित्तस्स उप्पादक्खणे तेसं तत्थ दुक्खसच्चञ्च उप्पज्जति मग्गसच्चञ्च उप्पज्जित्थ.

(ख) यस्स वा पन यत्थ मग्गसच्चं उप्पज्जित्थ तस्स तत्थ दुक्खसच्चं उप्पज्जतीति?

अभिसमेतावीनं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ मग्गसच्चं उप्पज्जित्थ, नो च तेसं तत्थ दुक्खसच्चं उप्पज्जति. अभिसमेतावीनं उपपज्जन्तानं पवत्ते चित्तस्स उप्पादक्खणे तेसं तत्थ मग्गसच्चञ्च उप्पज्जित्थ दुक्खसच्चञ्च उप्पज्जति.

६२. (क) यस्स यत्थ समुदयसच्चं उप्पज्जति तस्स तत्थ मग्गसच्चं उप्पज्जित्थाति?

अनभिसमेतावीनं तण्हाय उप्पादक्खणे तेसं तत्थ समुदयसच्चं उप्पज्जति, नो च तेसं तत्थ मग्गसच्चं उप्पज्जित्थ. अभिसमेतावीनं तण्हाय उप्पादक्खणे तेसं तत्थ समुदयसच्चञ्च उप्पज्जति मग्गसच्चञ्च उप्पज्जित्थ.

(ख) यस्स वा पन यत्थ मग्गसच्चं उप्पज्जित्थ तस्स तत्थ समुदयसच्चं उप्पज्जतीति?

अभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने तेसं तत्थ मग्गसच्चं उप्पज्जित्थ, नो च तेसं तत्थ समुदयसच्चं उप्पज्जति. अभिसमेतावीनं तण्हाय उप्पादक्खणे तेसं तत्थ मग्गसच्चञ्च उप्पज्जित्थ समुदयसच्चञ्च उप्पज्जति.

(घ) पच्चनीकपुग्गलो

६३. (क) यस्स दुक्खसच्चं नुप्पज्जति तस्स समुदयसच्चं नुप्पज्जित्थाति?

उप्पज्जित्थ.

(ख) यस्स वा पन समुदयसच्चं नुप्पज्जित्थ तस्स दुक्खसच्चं नुप्पज्जतीति? नत्थि.

(क) यस्स दुक्खसच्चं नुप्पज्जति तस्स मग्गसच्चं नुप्पज्जित्थाति?

अभिसमेतावीनं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं दुक्खसच्चं नुप्पज्जति, नो च तेसं मग्गसच्चं नुप्पज्जित्थ. अनभिसमेतावीनं चवन्तानं पवत्ते चित्तस्स भङ्गक्खणे तेसं दुक्खसच्चञ्च नुप्पज्जति मग्गसच्चञ्च नुप्पज्जित्थ.

(ख) यस्स वा पन मग्गसच्चं नुप्पज्जित्थ तस्स दुक्खसच्चं नुप्पज्जतीति?

अनभिसमेतावीनं उपपज्जन्तानं पवत्ते चित्तस्स उप्पादक्खणे तेसं मग्गसच्चं नुप्पज्जित्थ, नो च तेसं दुक्खसच्चं नुप्पज्जति. अनभिसमेतावीनं चवन्तानं पवत्ते चित्तस्स भङ्गक्खणे तेसं मग्गसच्चञ्च नुप्पज्जित्थ दुक्खसच्चञ्च नुप्पज्जति.

६४. (क) यस्स समुदयसच्चं नुप्पज्जति तस्स मग्गसच्चं नुप्पज्जित्थाति?

अभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने निरोधसमापन्नानं तेसं समुदयसच्चं नुप्पज्जति, नो च तेसं मग्गसच्चं नुप्पज्जित्थ. अनभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने असञ्ञसत्तानं तेसं समुदयसच्चञ्च नुप्पज्जति मग्गसच्चञ्च नुप्पज्जित्थ.

(ख) यस्स वा पन मग्गसच्चं नुप्पज्जित्थ तस्स समुदयसच्चं नुप्पज्जतीति?

अनभिसमेतावीनं तण्हाय उप्पादक्खणे तेसं मग्गसच्चं नुप्पज्जित्थ, नो च तेसं समुदयसच्चं नुप्पज्जति. अनभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने असञ्ञसत्तानं तेसं मग्गसच्चञ्च नुप्पज्जित्थ समुदयसच्चञ्च नुप्पज्जति.

(ङ) पच्चनीकओकासो

६५. यत्थ दुक्खसच्चं नुप्पज्जति…पे….

(च) पच्चनीकपुग्गलोकासा

६६. (क) यस्स यत्थ दुक्खसच्चं नुप्पज्जति तस्स तत्थ समुदयसच्चं नुप्पज्जित्थाति?

चतुवोकारा पञ्चवोकारा चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ दुक्खसच्चं नुप्पज्जति, नो च तेसं तत्थ समुदयसच्चं नुप्पज्जित्थ. सुद्धावासानं उपपत्तिचित्तस्स भङ्गक्खणे असञ्ञसत्ता चवन्तानं तेसं तत्थ दुक्खसच्चञ्च नुप्पज्जति समुदयसच्चञ्च नुप्पज्जित्थ.

(ख) यस्स वा पन यत्थ समुदयसच्चं नुप्पज्जित्थ तस्स तत्थ दुक्खसच्चं नुप्पज्जतीति?

सुद्धावासानं उपपत्तिचित्तस्स उप्पादक्खणे असञ्ञसत्तं उपपज्जन्तानं तेसं तत्थ समुदयसच्चं नुप्पज्जित्थ, नो च तेसं तत्थ दुक्खसच्चं नुप्पज्जति. सुद्धावासानं उपपत्तिचित्तस्स भङ्गक्खणे असञ्ञसत्ता चवन्तानं तेसं तत्थ समुदयसच्चञ्च नुप्पज्जित्थ दुक्खसच्चञ्च नुप्पज्जति.

(क) यस्स यत्थ दुक्खसच्चं नुप्पज्जति तस्स तत्थ मग्गसच्चं नुप्पज्जित्थाति?

अभिसमेतावीनं चवन्तानं पवत्ते चित्तस्स भङ्गक्खणे अरूपे मग्गस्स च फलस्स च उप्पादक्खणे तेसं तत्थ दुक्खसच्चं नुप्पज्जति, नो च तेसं तत्थ मग्गसच्चं नुप्पज्जित्थ. सुद्धावासानं उपपत्तिचित्तस्स भङ्गक्खणे अनभिसमेतावीनं चवन्तानं पवत्ते चित्तस्स भङ्गक्खणे असञ्ञसत्ता चवन्तानं तेसं तत्थ दुक्खसच्चञ्च नुप्पज्जति मग्गसच्चञ्च नुप्पज्जित्थ.

(ख) यस्स वा पन यत्थ मग्गसच्चं नुप्पज्जित्थ तस्स तत्थ दुक्खसच्चं नुप्पज्जतीति?

सुद्धावासानं उपपत्तिचित्तस्स उप्पादक्खणे अनभिसमेतावीनं उपपज्जन्तानं पवत्ते चित्तस्स उप्पादक्खणे असञ्ञसत्तं उपपज्जन्तानं तेसं तत्थ मग्गसच्चं नुप्पज्जित्थ, नो च तेसं तत्थ दुक्खसच्चं नुप्पज्जति. सुद्धावासानं उपपत्तिचित्तस्स भङ्गक्खणे अनभिसमेतावीनं चवन्तानं पवत्ते चित्तस्स भङ्गक्खणे असञ्ञसत्ता चवन्तानं तेसं तत्थ मग्गसच्चञ्च नुप्पज्जित्थ दुक्खसच्चञ्च नुप्पज्जति.

६७. (क) यस्स यत्थ समुदयसच्चं नुप्पज्जति तस्स तत्थ मग्गसच्चं नुप्पज्जित्थाति?

अभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने तेसं तत्थ समुदयसच्चं नुप्पज्जति, नो च तेसं तत्थ मग्गसच्चं नुप्पज्जित्थ. सुद्धावासानं दुतिये चित्ते वत्तमाने अनभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ समुदयसच्चञ्च नुप्पज्जति मग्गसच्चञ्च नुप्पज्जित्थ.

(ख) यस्स वा पन यत्थ मग्गसच्चं नुप्पज्जित्थ तस्स तत्थ समुदयसच्चं नुप्पज्जतीति?

अनभिसमेतावीनं तण्हाय उप्पादक्खणे तेसं तत्थ मग्गसच्चं नुप्पज्जित्थ, नो च तेसं तत्थ समुदयसच्चं नुप्पज्जति. सुद्धावासानं दुतिये चित्ते वत्तमाने अनभिसमेतावीनं तण्हाय भङ्गक्खणे तण्हाविप्पयुत्तचित्ते वत्तमाने असञ्ञसत्तानं तेसं तत्थ मग्गसच्चञ्च नुप्पज्जित्थ समुदयसच्चञ्च नुप्पज्जति.