(२) अतीतवारो

(क) अनुलोमपुग्गलो

३८. (क) यस्स दुक्खसच्चं उप्पज्जित्थ तस्स समुदयसच्चं उप्पज्जित्थाति? आमन्ता.

(ख) यस्स वा पन समुदयसच्चं उप्पज्जित्थ तस्स दुक्खसच्चं उप्पज्जित्थाति? आमन्ता.

(क) यस्स दुक्खसच्चं उप्पज्जित्थ तस्स मग्गसच्चं उप्पज्जित्थाति?

अनभिसमेतावीनं तेसं दुक्खसच्चं उप्पज्जित्थ, नो च तेसं मग्गसच्चं उप्पज्जित्थ. अभिसमेतावीनं तेसं दुक्खसच्चञ्च उप्पज्जित्थ मग्गसच्चञ्च उप्पज्जित्थ.

(ख) यस्स वा पन…पे… उप्पज्जित्थाति? आमन्ता.

३९. (क) यस्स समुदयसच्चं उप्पज्जित्थ तस्स मग्गसच्चं उप्पज्जित्थाति?

अनभिसमेतावीनं तेसं समुदयसच्चं उप्पज्जित्थ, नो च तेसं मग्गसच्चं उप्पज्जित्थ. अभिसमेतावीनं तेसं समुदयसच्चञ्च उप्पज्जित्थ मग्गसच्चञ्च उप्पज्जित्थ.

(ख) यस्स वा पन…पे… उप्पज्जित्थाति? आमन्ता.

(ख) अनुलोमओकासो

४०. यत्थ दुक्खसच्चं उप्पज्जित्थ…पे….

(यत्थकम्पि सब्बत्थ सदिसं. तन्तिनानाकरणं हेट्ठा यत्थकसदिसं).

(ग) अनुलोमपुग्गलोकासा

४१. (क) यस्स यत्थ दुक्खसच्चं उप्पज्जित्थ तस्स तत्थ समुदयसच्चं उप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ दुक्खसच्चं उप्पज्जित्थ, नो च तेसं तत्थ समुदयसच्चं उप्पज्जित्थ. इतरेसं चतुवोकारानं पञ्चवोकारानं तेसं तत्थ दुक्खसच्चञ्च उप्पज्जित्थ समुदयसच्चञ्च उप्पज्जित्थ.

(ख) यस्स वा पन यत्थ…पे… उप्पज्जित्थाति? आमन्ता.

(क) यस्स यत्थ दुक्खसच्चं उप्पज्जित्थ तस्स तत्थ मग्गसच्चं उप्पज्जित्थाति?

सुद्धावासानं दुतिये चित्ते वत्तमाने अनभिसमेतावीनं असञ्ञसत्तानं तेसं तत्थ दुक्खसच्चं उप्पज्जित्थ, नो च तेसं तत्थ मग्गसच्चं उप्पज्जित्थ. अभिसमेतावीनं तेसं तत्थ दुक्खसच्चञ्च उप्पज्जित्थ मग्गसच्चञ्च उप्पज्जित्थ.

(ख) यस्स वा पन यत्थ…पे… उप्पज्जित्थाति? आमन्ता.

४२. (क) यस्स यत्थ समुदयसच्चं उप्पज्जित्थ तस्स तत्थ मग्गसच्चं उप्पज्जित्थाति?

सुद्धावासानं दुतिये अकुसले चित्ते वत्तमाने अनभिसमेतावीनं तेसं तत्थ समुदयसच्चं उप्पज्जित्थ, नो च तेसं तत्थ मग्गसच्चं उप्पज्जित्थ. अभिसमेतावीनं तेसं तत्थ समुदयसच्चञ्च उप्पज्जित्थ मग्गसच्चञ्च उप्पज्जित्थ.

(ख) यस्स वा पन यत्थ…पे… उप्पज्जित्थाति? आमन्ता.

(घ) पच्चनीकपुग्गलो

४३. (क) यस्स दुक्खसच्चं नुप्पज्जित्थ तस्स समुदयसच्चं नुप्पज्जित्थाति? नत्थि.

(ख) यस्स वा पन…पे… नुप्पज्जित्थाति? नत्थि.

(क) यस्स दुक्खसच्चं नुप्पज्जित्थ तस्स मग्गसच्चं नुप्पज्जित्थाति? नत्थि.

(ख) यस्स वा पन मग्गसच्चं नुप्पज्जित्थ तस्स दुक्खसच्चं नुप्पज्जित्थाति? उप्पज्जित्थ.

४४. (क) यस्स समुदयसच्चं नुप्पज्जित्थ तस्स मग्गसच्चं नुप्पज्जित्थाति? नत्थि.

(ख) यस्स वा पन…पे… नुप्पज्जित्थाति? उप्पज्जित्थ.

(ङ) पच्चनीकओकासो

४५. यत्थ दुक्खसच्चं नुप्पज्जित्थ…पे….

(च) पच्चनीकपुग्गलोकासा

४६. (क) यस्स यत्थ दुक्खसच्चं नुप्पज्जित्थ तस्स तत्थ समुदयसच्चं नुप्पज्जित्थाति? आमन्ता.

(ख) यस्स वा पन यत्थ समुदयसच्चं नुप्पज्जित्थ तस्स तत्थ दुक्खसच्चं नुप्पज्जित्थाति?

सुद्धावासानं दुतिये चित्ते वत्तमाने असञ्ञसत्तानं तेसं तत्थ समुदयसच्चं नुप्पज्जित्थ, नो च तेसं तत्थ दुक्खसच्चं नुप्पज्जित्थ. सुद्धावासं उपपज्जन्तानं तेसं तत्थ समुदयसच्चञ्च नुप्पज्जित्थ दुक्खसच्चञ्च नुप्पज्जित्थ.

(क) यस्स यत्थ दुक्खसच्चं नुप्पज्जित्थ तस्स तत्थ मग्गसच्चं नुप्पज्जित्थाति? आमन्ता.

(ख) यस्स वा पन यत्थ मग्गसच्चं नुप्पज्जित्थ तस्स तत्थ दुक्खसच्चं नुप्पज्जित्थाति?

सुद्धावासानं दुतिये चित्ते वत्तमाने अनभिसमेतावीनं असञ्ञसत्तानं तेसं तत्थ मग्गसच्चं नुप्पज्जित्थ, नो च तेसं तत्थ दुक्खसच्चं नुप्पज्जित्थ. सुद्धावासं उपपज्जन्तानं तेसं तत्थ मग्गसच्चञ्च नुप्पज्जित्थ दुक्खसच्चञ्च नुप्पज्जित्थ.

४७. (क) यस्स यत्थ समुदयसच्चं नुप्पज्जित्थ तस्स तत्थ मग्गसच्चं नुप्पज्जित्थाति? आमन्ता.

(ख) यस्स वा पन यत्थ मग्गसच्चं नुप्पज्जित्थ तस्स तत्थ समुदयसच्चं नुप्पज्जित्थाति?

सुद्धावासानं दुतिये अकुसले चित्ते वत्तमाने अनभिसमेतावीनं तेसं तत्थ मग्गसच्चं नुप्पज्जित्थ, नो च तेसं तत्थ समुदयसच्चं नुप्पज्जित्थ. सुद्धावासानं दुतिये चित्ते वत्तमाने असञ्ञसत्तानं तेसं तत्थ मग्गसच्चञ्च नुप्पज्जित्थ समुदयसच्चञ्च नुप्पज्जित्थ.