१. पदसोधनवारो

(क) अनुलोमं

१०. (क) चक्खु चक्खुधातूति?

दिब्बचक्खु पञ्ञाचक्खु चक्खु, न चक्खुधातु. चक्खुधातु चक्खु चेव चक्खुधातु च.

(ख) चक्खुधातु चक्खूति? आमन्ता.

(क) सोतं सोतधातूति?

दिब्बसोतं तण्हासोतं सोतं, न सोतधातु. सोतधातु सोतञ्चेव सोतधातु च.

(ख) सोतधातु सोतन्ति? आमन्ता.

(क) घानं घानधातूति? आमन्ता.

(ख) घानधातु घानन्ति? आमन्ता. (जिव्हापि घानधातुसदिसा).

(क) कायो कायधातूति?

कायधातुं ठपेत्वा अवसेसो कायो [अवसेसो कायो कायो (स्या.)], न कायधातु. कायधातु कायो चेव कायधातु च.

(ख) कायधातु कायोति? आमन्ता.

(क) रूपं रूपधातूति?

रूपधातुं ठपेत्वा अवसेसं रूपं, न रूपधातु. रूपधातु रूपञ्चेव रूपधातु च.

(ख) रूपधातु रूपन्ति? आमन्ता. (सद्दो घानसदिसो).

(क) गन्धो गन्धधातूति?

सीलगन्धो समाधिगन्धो पञ्ञागन्धो गन्धो, न गन्धधातु. गन्धधातु गन्धो चेव गन्धधातु च.

(ख) गन्धधातु गन्धोति? आमन्ता.

(क) रसो रसधातूति?

अत्थरसो धम्मरसो विमुत्तिरसो रसो, न रसधातु. रसधातु रसो चेव रसधातु च.

(ख) रसधातु रसोति? आमन्ता. (फोट्ठब्बो घानसदिसो).

(क) चक्खुविञ्ञाणं चक्खुविञ्ञाणधातूति? आमन्ता.

(ख) चक्खुविञ्ञाणधातु चक्खुविञ्ञाणन्ति? आमन्ता.

सोतविञ्ञाणं…पे… घानविञ्ञाणं… जिव्हाविञ्ञाणं… कायविञ्ञाणं….

(क) मनो मनोधातूति?

मनोधातुं ठपेत्वा अवसेसो मनो, न मनोधातु. मनोधातु मनो चेव मनोधातु च.

(ख) मनोधातु मनोति? आमन्ता.

(क) मनोविञ्ञाणं मनोविञ्ञाणधातूति? आमन्ता.

(ख) मनोविञ्ञाणधातु मनोविञ्ञाणन्ति? आमन्ता.

(क) धम्मो धम्मधातूति?

धम्मधातुं ठपेत्वा अवसेसो धम्मो, न धम्मधातु. धम्मधातु धम्मो चेव धम्मधातु च.

(ख) धम्मधातु धम्मोति? आमन्ता.

(ख) पच्चनीकं

११. (क) न चक्खु न चक्खुधातूति? आमन्ता.

(ख) न चक्खुधातु न चक्खूति?

दिब्बचक्खु पञ्ञाचक्खु न चक्खुधातु, चक्खु. चक्खुञ्च चक्खुधातुञ्च ठपेत्वा अवसेसं न चेव चक्खु न च चक्खुधातु.

(क) न सोतं न सोतधातूति? आमन्ता.

(ख) न सोतधातु न सोतन्ति?

दिब्बसोतं तण्हासोतं न सोतधातु, सोतं. सोतञ्च सोतधातुञ्च ठपेत्वा अवसेसं न चेव सोतं न च सोतधातु.

(क) न घानं न घानधातूति? आमन्ता.

(ख) न घानधातु न घानन्ति? आमन्ता.

न जिव्हा… (संखित्तं [यं संखित्तं (स्या.)], उभतो आमन्ता).

(क) न कायो न कायधातूति? आमन्ता.

(ख) न कायधातु न कायोति?

कायधातुं ठपेत्वा अवसेसो न कायधातु, कायो. कायञ्च कायधातुञ्च ठपेत्वा अवसेसो [अवसेसो कायो (स्या.)] न चेव कायो न च कायधातु.

(क) न रूपं न रूपधातूति? आमन्ता.

(ख) न रूपधातु न रूपन्ति?

रूपधातुं ठपेत्वा अवसेसं न रूपधातु, रूपं. रूपञ्च रूपधातुञ्च ठपेत्वा अवसेसं न चेव रूपं न च रूपधातु.

न सद्दो…पे… न गन्धो न गन्धधातूति? आमन्ता.

न गन्धधातु न गन्धोति?

सीलगन्धो समाधिगन्धो पञ्ञागन्धो न गन्धधातु, गन्धो. गन्धञ्च गन्धधातुञ्च ठपेत्वा अवसेसो न चेव गन्धो न च गन्धधातु.

(क) न रसो न रसधातूति? आमन्ता.

(ख) न रसधातु न रसोति?

अत्थरसो धम्मरसो विमुत्तिरसो न रसधातु, रसो. रसञ्च रसधातुञ्च ठपेत्वा अवसेसो न चेव रसो न च रसधातु.

न फोट्ठब्बो…पे… न चक्खुविञ्ञाणं न चक्खुविञ्ञाणधातूति? आमन्ता.

न चक्खुविञ्ञाणधातु न चक्खुविञ्ञाणन्ति? आमन्ता.

न सोतविञ्ञाणं…पे… न घानविञ्ञाणं… न जिव्हाविञ्ञाणं… न कायविञ्ञाणं….

(क) न मनो न मनोधातूति? आमन्ता.

(ख) न मनोधातु न मनोति?

मनोधातुं ठपेत्वा अवसेसो न मनोधातु, मनो. मनञ्च मनोधातुञ्च ठपेत्वा अवसेसो न चेव मनो न च मनोधातु.

(क) न मनोविञ्ञाणं न मनोविञ्ञाणधातूति? आमन्ता.

(ख) न मनोविञ्ञाणधातु न मनोविञ्ञाणन्ति? आमन्ता.

(क) न धम्मो न धम्मधातूति? आमन्ता.

(ख) न धम्मधातु न धम्मोति?

धम्मधातुं ठपेत्वा अवसेसो न धम्मधातु, धम्मो. धम्मञ्च धम्मधातुञ्च ठपेत्वा अवसेसो न चेव धम्मो न च धम्मधातु.