(१) पच्चुप्पन्नवारो

(क) अनुलोमपुग्गलो

१८. (क) यस्स चक्खुधातु उप्पज्जति तस्स सोतधातु उप्पज्जतीति?

सचक्खुकानं असोतकानं उपपज्जन्तानं तेसं चक्खुधातु उप्पज्जति, नो च तेसं सोतधातु उप्पज्जति. सचक्खुकानं ससोतकानं उपपज्जन्तानं तेसं चक्खुधातु च उप्पज्जति सोतधातु च उप्पज्जति.

(ख) यस्स वा पन सोतधातु उप्पज्जति तस्स चक्खुधातु उप्पज्जतीति?

ससोतकानं अचक्खुकानं उपपज्जन्तानं तेसं सोतधातु उप्पज्जति, नो च तेसं चक्खुधातु उप्पज्जति. ससोतकानं सचक्खुकानं उपपज्जन्तानं तेसं सोतधातु च उप्पज्जति चक्खुधातु च उप्पज्जति.

(क) यस्स चक्खुधातु उप्पज्जति तस्स घानधातु उप्पज्जतीति?

सचक्खुकानं अघानकानं उपपज्जन्तानं तेसं चक्खुधातु उप्पज्जति, नो च तेसं घानधातु उप्पज्जति. सचक्खुकानं सघानकानं उपपज्जन्तानं तेसं चक्खुधातु च उप्पज्जति घानधातु च उप्पज्जति.

(ख) यस्स वा पन घानधातु उप्पज्जति तस्स चक्खुधातु उप्पज्जतीति?

सघानकानं अचक्खुकानं उपपज्जन्तानं तेसं घानधातु उप्पज्जति, नो च तेसं चक्खुधातु उप्पज्जति. सघानकानं सचक्खुकानं उपपज्जन्तानं तेसं घानधातु च उप्पज्जति चक्खुधातु च उप्पज्जति.

(क) यस्स चक्खुधातु उप्पज्जति तस्स रूपधातु उप्पज्जतीति? आमन्ता.

(ख) यस्स वा पन रूपधातु उप्पज्जति तस्स चक्खुधातु उप्पज्जतीति?

सरूपकानं अचक्खुकानं उपपज्जन्तानं तेसं रूपधातु उप्पज्जति, नो च तेसं चक्खुधातु उप्पज्जति. सचक्खुकानं उपपज्जन्तानं तेसं रूपधातु च उप्पज्जति चक्खुधातु च उप्पज्जति.

(क) यस्स चक्खुधातु उप्पज्जति तस्स मनोविञ्ञाणधातु उप्पज्जतीति? आमन्ता.

(ख) यस्स वा पन मनोविञ्ञाणधातु उप्पज्जति तस्स चक्खुधातु उप्पज्जतीति?

सचित्तकानं अचक्खुकानं उपपज्जन्तानं तेसं मनोविञ्ञाणधातु उप्पज्जति, नो च तेसं चक्खुधातु उप्पज्जति. सचक्खुकानं उपपज्जन्तानं तेसं मनोविञ्ञाणधातु च उप्पज्जति चक्खुधातु च उप्पज्जति.

(क) यस्स चक्खुधातु उप्पज्जति तस्स धम्मधातु उप्पज्जतीति? आमन्ता.

(ख) यस्स वा पन धम्मधातु उप्पज्जति तस्स चक्खुधातु उप्पज्जतीति?

अचक्खुकानं उपपज्जन्तानं तेसं धम्मधातु उप्पज्जति, नो च तेसं चक्खुधातु उप्पज्जति. सचक्खुकानं उपपज्जन्तानं तेसं धम्मधातु च उप्पज्जति चक्खुधातु च उप्पज्जति.

(यथा आयतनयमकं विभत्तं एवं धातुयमकम्पि विभजितब्बं, सदिसं कातब्बं).