३. सुद्धायतनवारो

(क) अनुलोमं

१४. (क) चक्खु आयतनन्ति? आमन्ता.

(ख) आयतना चक्खायतनन्ति?

चक्खायतनं आयतनञ्चेव चक्खायतनञ्च. अवसेसा आयतना न चक्खायतनं.

सोतं आयतनन्ति?

आमन्ता.…पे… घानं… जिव्हा… कायो… रूपं… सद्दो… गन्धो… रसो… फोट्ठब्बो… मनो… धम्मो आयतनन्ति?

आमन्ता.

आयतना धम्मायतनन्ति?

धम्मायतनं आयतनञ्चेव धम्मायतनञ्च. अवसेसा आयतना न धम्मायतनं.

(ख) पच्चनीकं

१५. (क) न चक्खु नायतनन्ति?

चक्खुं ठपेत्वा अवसेसा आयतना न चक्खु, आयतना. चक्खुञ्च आयतनञ्च ठपेत्वा अवसेसा न चेव चक्खु न च आयतना.

(ख) नायतना न चक्खायतनन्ति? आमन्ता.

न सोतं नायतनन्ति?

सोतं ठपेत्वा…पे… घानं ठपेत्वा…पे… जिव्हं ठपेत्वा…पे… न च आयतना.

नायतना न जिव्हायतनन्ति? आमन्ता.

(क) न कायो नायतनन्ति? आमन्ता.

(ख) नायतना न कायायतनन्ति? आमन्ता.

न रूपं नायतनन्ति?

रूपं ठपेत्वा…पे… सद्दं ठपेत्वा…पे… गन्धं ठपेत्वा…पे… रसं ठपेत्वा…पे… फोट्ठब्बं ठपेत्वा…पे… न च आयतना. नायतना न फोट्ठब्बायतनन्ति? आमन्ता.

(क) न मनो नायतनन्ति?

मनं ठपेत्वा अवसेसा आयतना न मनो, आयतना. मनञ्च आयतनञ्च ठपेत्वा अवसेसा न चेव मनो न च आयतना.

(ख) नायतना न मनायतनन्ति? आमन्ता.

(क) न धम्मो नायतनन्ति? आमन्ता.

(ख) नायतना न धम्मायतनन्ति? आमन्ता.