१. पदसोधनवारो

(क) अनुलोमं

१०. (क) चक्खु चक्खायतनन्ति?

दिब्बचक्खु पञ्ञाचक्खु चक्खु, न चक्खायतनं. चक्खायतनं चक्खु चेव चक्खायतनञ्च.

(ख) चक्खायतनं चक्खूति? आमन्ता.

(क) सोतं सोतायतनन्ति?

दिब्बसोतं तण्हासोतं सोतं, न सोतायतनं. सोतायतनं सोतञ्चेव सोतायतनञ्च.

(ख) सोतायतनं सोतन्ति? आमन्ता.

(क) घानं घानायतनन्ति? आमन्ता.

(ख) घानायतनं घानन्ति? आमन्ता.

(क) जिव्हा जिव्हायतनन्ति? आमन्ता.

(ख) जिव्हायतनं जिव्हाति? आमन्ता.

(क) कायो कायायतनन्ति?

कायायतनं ठपेत्वा अवसेसो कायो, न कायायतनं. कायायतनं कायो चेव कायायतनञ्च.

(ख) कायायतनं कायोति? आमन्ता.

(क) रूपं रूपायतनन्ति?

रूपायतनं ठपेत्वा अवसेसं रूपं, न रूपायतनं. रूपायतनं रूपञ्चेव रूपायतनञ्च.

(ख) रूपायतनं रूपन्ति? आमन्ता.

(क) सद्दो सद्दायतनन्ति? आमन्ता.

(ख) सद्दायतनं सद्दोति? आमन्ता.

(क) गन्धो गन्धायतनन्ति?

सीलगन्धो समाधिगन्धो पञ्ञागन्धो गन्धो, न गन्धायतनं. गन्धायतनं गन्धो चेव गन्धायतनञ्च.

(ख) गन्धायतनं गन्धोति? आमन्ता.

(क) रसो रसायतनन्ति?

अत्थरसो धम्मरसो विमुत्तिरसो रसो, न रसायतनं. रसायतनं रसो चेव रसायतनञ्च.

(ख) रसायतनं रसोति? आमन्ता.

(क) फोट्ठब्बो फोट्ठब्बायतनन्ति? आमन्ता.

(ख) फोट्ठब्बायतनं फोट्ठब्बोति? आमन्ता.

(क) मनो मनायतनन्ति? आमन्ता.

(ख) मनायतनं मनोति? आमन्ता.

(क) धम्मो धम्मायतनन्ति?

धम्मायतनं ठपेत्वा अवसेसो धम्मो, न धम्मायतनं. धम्मायतनं धम्मो चेव धम्मायतनञ्च.

(ख) धम्मायतनं धम्मोति? आमन्ता.

(ख) पच्चनीकं

११. (क) न चक्खु न चक्खायतनन्ति? आमन्ता.

(ख) न चक्खायतनं न चक्खूति?

दिब्बचक्खु पञ्ञाचक्खु न चक्खायतनं, चक्खु. चक्खुञ्च चक्खायतनञ्च ठपेत्वा अवसेसं [अवसेसा (स्या. पी.)] न चेव चक्खु न च चक्खायतनं.

(क) न सोतं न सोतायतनन्ति? आमन्ता.

(ख) न सोतायतनं न सोतन्ति?

दिब्बसोतं तण्हासोतं न सोतायतनं, सोतं. सोतञ्च सोतायतनञ्च ठपेत्वा अवसेसं न चेव सोतं न च सोतायतनं.

(क) न घानं न घानायतनन्ति? आमन्ता.

(ख) न घानायतनं न घानन्ति? आमन्ता.

(क) न जिव्हा न जिव्हायतनन्ति? आमन्ता.

(ख) न जिव्हायतनं न जिव्हाति? आमन्ता.

(क) न कायो न कायायतनन्ति? आमन्ता.

(ख) न कायायतनं न कायोति?

कायायतनं ठपेत्वा अवसेसो न कायायतनं, कायो. कायञ्च कायायतनञ्च ठपेत्वा अवसेसं [अवसेसो (स्या.)] न चेव कायो न च कायायतनं.

(क) न रूपं न रूपायतनन्ति? आमन्ता.

(ख) न रूपायतनं न रूपन्ति?

रूपायतनं ठपेत्वा अवसेसं न रूपायतनं, रूपं. रूपञ्च रूपायतनञ्च ठपेत्वा अवसेसं न चेव रूपं न च रूपायतनं.

(क) न सद्दो न सद्दायतनन्ति? आमन्ता.

(ख) न सद्दायतनं न सद्दोति? आमन्ता.

(क) न गन्धो न गन्धायतनन्ति? आमन्ता.

(ख) न गन्धायतनं न गन्धोति?

सीलगन्धो समाधिगन्धो पञ्ञागन्धो न गन्धायतनं, गन्धो. गन्धञ्च गन्धायतनञ्च ठपेत्वा अवसेसं [अवसेसा (स्या.)] न चेव गन्धो न च गन्धायतनं.

(क) न रसो न रसायतनन्ति? आमन्ता.

(ख) न रसायतनं न रसोति?

अत्थरसो धम्मरसो विमुत्तिरसो न रसायतनं, रसो. रसञ्च रसायतनञ्च ठपेत्वा अवसेसं न चेव रसो न च रसायतनं.

(क) न फोट्ठब्बो न फोट्ठब्बायतनन्ति? आमन्ता.

(ख) न फोट्ठब्बायतनं न फोट्ठब्बोति? आमन्ता.

(क) न मनो न मनायतनन्ति? आमन्ता.

(ख) न मनायतनं न मनोति? आमन्ता.

(क) न धम्मो न धम्मायतनन्ति? आमन्ता.

(ख) न धम्मायतनं न धम्मोति?

धम्मायतनं ठपेत्वा अवसेसो न धम्मायतनं, धम्मो. धम्मञ्च धम्मायतनञ्च ठपेत्वा अवसेसं न चेव धम्मो न च धम्मायतनं.