५. पच्चुप्पन्नानागतवारो

२५३. (क) यो चक्खायतनं परिजानाति सो सोतायतनं परिजानिस्सतीति? नो.

(ख) यो वा पन सोतायतनं परिजानिस्सति सो चक्खायतनं परिजानातीति? नो.

(क) यो चक्खायतनं न परिजानाति सो सोतायतनं न परिजानिस्सतीति?

ये मग्गं पटिलभिस्सन्ति ते चक्खायतनं न परिजानन्ति, नो च सोतायतनं न परिजानिस्सन्ति. अरहा ये च पुथुज्जना मग्गं न पटिलभिस्सन्ति ते चक्खायतनञ्च न परिजानन्ति सोतायतनञ्च न परिजानिस्सन्ति.

(ख) यो वा पन सोतायतनं न परिजानिस्सति सो चक्खायतनं न परिजानातीति?

अग्गमग्गसमङ्गी सोतायतनं न परिजानिस्सति, नो च चक्खायतनं न परिजानाति. अरहा ये च पुथुज्जना मग्गं न पटिलभिस्सन्ति ते सोतायतनञ्च न परिजानिस्सन्ति चक्खायतनञ्च न परिजानन्ति.