(५) पच्चुप्पन्नानागतवारो

(क) अनुलोमपुग्गलो

२३०. (क) यस्स चक्खायतनं उप्पज्जति तस्स सोतायतनं निरुज्झिस्सतीति? आमन्ता.

(ख) यस्स वा पन सोतायतनं निरुज्झिस्सति तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं सोतायतनं निरुज्झिस्सति, नो च तेसं चक्खायतनं उप्पज्जति. सचक्खुकानं उपपज्जन्तानं तेसं सोतायतनञ्च निरुज्झिस्सति चक्खायतनञ्च उप्पज्जति.

(क) यस्स चक्खायतनं उप्पज्जति तस्स घानायतनं निरुज्झिस्सतीति?

पच्छिमभविकानं रूपावचरं उपपज्जन्तानं तेसं चक्खायतनं उप्पज्जति, नो च तेसं घानायतनं निरुज्झिस्सति. इतरेसं सचक्खुकानं उपपज्जन्तानं तेसं चक्खायतनञ्च उप्पज्जति घानायतनञ्च निरुज्झिस्सति.

(ख) यस्स वा पन घानायतनं निरुज्झिस्सति तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं घानायतनं निरुज्झिस्सति, नो च तेसं चक्खायतनं उप्पज्जति. सचक्खुकानं उपपज्जन्तानं तेसं घानायतनञ्च निरुज्झिस्सति चक्खायतनञ्च उप्पज्जति.

(क) यस्स चक्खायतनं उप्पज्जति तस्स रूपायतनं निरुज्झिस्सतीति? आमन्ता.

(ख) यस्स वा पन रूपायतनं निरुज्झिस्सति तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं…पे… सचक्खुकानं उपपज्जन्तानं तेसं रूपायतनञ्च निरुज्झिस्सति चक्खायतनञ्च उप्पज्जति.

(क) यस्स चक्खायतनं उप्पज्जति तस्स मनायतनं निरुज्झिस्सतीति? आमन्ता.

(ख) यस्स वा पन मनायतनं निरुज्झिस्सति तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं…पे… सचक्खुकानं उपपज्जन्तानं तेसं मनायतनञ्च निरुज्झिस्सति चक्खायतनञ्च उप्पज्जति.

(क) यस्स चक्खायतनं उप्पज्जति तस्स धम्मायतनं निरुज्झिस्सतीति? आमन्ता.

(ख) यस्स वा पन धम्मायतनं निरुज्झिस्सति तस्स चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं…पे… सचक्खुकानं उपपज्जन्तानं तेसं धम्मायतनञ्च निरुज्झिस्सति चक्खायतनञ्च उप्पज्जति.

२३१. यस्स घानायतनं उप्पज्जति तस्स रूपायतनं…पे… मनायतनं… धम्मायतनं निरुज्झिस्सतीति? आमन्ता.

यस्स वा पन धम्मायतनं निरुज्झिस्सति तस्स घानायतनं उप्पज्जतीति?

सब्बेसं चवन्तानं अघानकानं उपपज्जन्तानं तेसं धम्मायतनं निरुज्झिस्सति, नो च तेसं घानायतनं उप्पज्जति. सघानकानं उपपज्जन्तानं तेसं धम्मायतनञ्च निरुज्झिस्सति घानायतनञ्च उप्पज्जति.

२३२. यस्स रूपायतनं उप्पज्जति तस्स मनायतनं…पे… धम्मायतनं निरुज्झिस्सतीति? आमन्ता.

यस्स वा पन धम्मायतनं निरुज्झिस्सति तस्स रूपायतनं उप्पज्जतीति?

सब्बेसं चवन्तानं अरूपकानं उपपज्जन्तानं तेसं धम्मायतनं निरुज्झिस्सति, नो च तेसं रूपायतनं उप्पज्जति. सरूपकानं उपपज्जन्तानं तेसं धम्मायतनञ्च निरुज्झिस्सति रूपायतनञ्च उप्पज्जति.

२३३. (क) यस्स मनायतनं उप्पज्जति तस्स धम्मायतनं निरुज्झिस्सतीति? आमन्ता.

(ख) यस्स वा पन धम्मायतनं…पे…?

सब्बेसं चवन्तानं अचित्तकानं उपपज्जन्तानं तेसं धम्मायतनं निरुज्झिस्सति, नो च तेसं मनायतनं उप्पज्जति. सचित्तकानं उपपज्जन्तानं तेसं धम्मायतनञ्च निरुज्झिस्सति मनायतनञ्च उप्पज्जति.

(ख) अनुलोमओकासो

२३४. यत्थ चक्खायतनं उप्पज्जति…पे….

(ग) अनुलोमपुग्गलोकासा

२३५. (क) यस्स यत्थ चक्खायतनं उप्पज्जति तस्स तत्थ सोतायतनं निरुज्झिस्सतीति? आमन्ता.

(ख) यस्स वा पन यत्थ सोतायतनं निरुज्झिस्सति तस्स तत्थ चक्खायतनं उप्पज्जतीति?

पञ्चवोकारा चवन्तानं अचक्खुकानं कामावचरं उपपज्जन्तानं तेसं तत्थ सोतायतनं निरुज्झिस्सति, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ सोतायतनञ्च निरुज्झिस्सति चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ घानायतनं निरुज्झिस्सतीति?

रूपावचरं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ घानायतनं निरुज्झिस्सति. सचक्खुकानं कामावचरं उपपज्जन्तानं तेसं तत्थ चक्खायतनञ्च उप्पज्जति घानायतनञ्च निरुज्झिस्सति.

(ख) यस्स वा पन यत्थ घानायतनं निरुज्झिस्सति तस्स तत्थ चक्खायतनं उप्पज्जतीति?

कामावचरा चवन्तानं अचक्खुकानं कामावचरं उपपज्जन्तानं तेसं तत्थ घानायतनं निरुज्झिस्सति, नो च तेसं तत्थ चक्खायतनं उप्पज्जति. सचक्खुकानं कामावचरं उपपज्जन्तानं तेसं तत्थ घानायतनञ्च निरुज्झिस्सति चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ रूपायतनं निरुज्झिस्सतीति? आमन्ता.

(ख) यस्स वा पन यत्थ रूपायतनं निरुज्झिस्सति तस्स तत्थ चक्खायतनं उप्पज्जतीति?

पञ्चवोकारा चवन्तानं अचक्खुकानं कामावचरं उपपज्जन्तानं असञ्ञसत्तानं तेसं तत्थ रूपायतनं निरुज्झिस्सति, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ रूपायतनञ्च निरुज्झिस्सति चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ मनायतनं निरुज्झिस्सतीति? आमन्ता.

(ख) यस्स वा पन यत्थ मनायतनं निरुज्झिस्सति तस्स तत्थ चक्खायतनं उप्पज्जतीति?

पञ्चवोकारा चवन्तानं अचक्खुकानं कामावचरं उपपज्जन्तानं अरूपानं तेसं तत्थ मनायतनं निरुज्झिस्सति, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ मनायतनञ्च निरुज्झिस्सति चक्खायतनञ्च उप्पज्जति.

(क) यस्स यत्थ चक्खायतनं उप्पज्जति तस्स तत्थ धम्मायतनं निरुज्झिस्सतीति? आमन्ता.

(ख) यस्स वा पन यत्थ धम्मायतनं निरुज्झिस्सति तस्स तत्थ चक्खायतनं उप्पज्जतीति?

सब्बेसं चवन्तानं अचक्खुकानं उपपज्जन्तानं तेसं तत्थ धम्मायतनं निरुज्झिस्सति, नो च तेसं तत्थ चक्खायतनं उप्पज्जति. सचक्खुकानं उपपज्जन्तानं तेसं तत्थ धम्मायतनञ्च निरुज्झिस्सति चक्खायतनञ्च उप्पज्जति. (चक्खायतनमूलकं)

२३६. (क) यस्स यत्थ घानायतनं उप्पज्जति तस्स तत्थ रूपायतनं निरुज्झिस्सतीति? आमन्ता.

(ख) यस्स वा पन यत्थ रूपायतनं निरुज्झिस्सति तस्स तत्थ घानायतनं उप्पज्जतीति?

कामावचरा चवन्तानं अघानकानं कामावचरं उपपज्जन्तानं रूपावचरानं तेसं तत्थ रूपायतनं निरुज्झिस्सति, नो च तेसं तत्थ घानायतनं उप्पज्जति. सघानकानं उपपज्जन्तानं तेसं तत्थ रूपायतनञ्च निरुज्झिस्सति घानायतनञ्च उप्पज्जति.

(क) यस्स यत्थ घानायतनं उप्पज्जति तस्स तत्थ मनायतनं निरुज्झिस्सतीति? आमन्ता.

(ख) यस्स वा पन यत्थ मनायतनं…पे…?

कामावचरा चवन्तानं अघानकानं कामावचरं उपपज्जन्तानं रूपावचरानं अरूपावचरानं तेसं तत्थ मनायतनं…पे… सघानकानं उपपज्जन्तानं तेसं तत्थ मनायतनञ्च निरुज्झिस्सति घानायतनञ्च उप्पज्जति.

(क) यस्स यत्थ घानायतनं उप्पज्जति तस्स तत्थ धम्मायतनं निरुज्झिस्सतीति? आमन्ता.

(ख) यस्स वा पन यत्थ धम्मायतनं…पे…?

सब्बेसं चवन्तानं अघानकानं उपपज्जन्तानं तेसं तत्थ धम्मायतनं…पे… सघानकानं उपपज्जन्तानं तेसं तत्थ धम्मायतनञ्च निरुज्झिस्सति घानायतनञ्च उप्पज्जति. (घानायतनमूलकं)

२३७. (क) यस्स यत्थ रूपायतनं उप्पज्जति तस्स तत्थ मनायतनं निरुज्झिस्सतीति?

असञ्ञसत्तं उपपज्जन्तानं तेसं तत्थ रूपायतनं उप्पज्जति, नो च तेसं तत्थ…पे… पञ्चवोकारं उपपज्जन्तानं तेसं तत्थ…पे….

(ख) यस्स वा पन यत्थ मनायतनं…पे…?

पञ्चवोकारा चवन्तानं अरूपानं तेसं तत्थ…पे… पञ्चवोकारं उपपज्जन्तानं तेसं तत्थ मनायतनञ्च निरुज्झिस्सति रूपायतनञ्च उप्पज्जति.

(क) यस्स यत्थ रूपायतनं उप्पज्जति तस्स तत्थ धम्मायतनं निरुज्झिस्सतीति? आमन्ता.

(ख) यस्स वा पन यत्थ धम्मायतनं…पे…?

सब्बेसं चवन्तानं अरूपकानं उपपज्जन्तानं तेसं तत्थ धम्मायतनं निरुज्झिस्सति, नो च तेसं तत्थ रूपायतनं उप्पज्जति. सरूपकानं उपपज्जन्तानं तेसं तत्थ धम्मायतनञ्च निरुज्झिस्सति रूपायतनञ्च उप्पज्जति.

२३८. (क) यस्स यत्थ मनायतनं उप्पज्जति तस्स तत्थ धम्मायतनं निरुज्झिस्सतीति? आमन्ता.

(ख) यस्स वा पन यत्थ धम्मायतनं निरुज्झिस्सति तस्स तत्थ मनायतनं उप्पज्जतीति?

सब्बेसं चवन्तानं अचित्तकानं उपपज्जन्तानं तेसं तत्थ धम्मायतनं निरुज्झिस्सति, नो च तेसं तत्थ मनायतनं उप्पज्जति. सचित्तकानं उपपज्जन्तानं तेसं तत्थ धम्मायतनञ्च निरुज्झिस्सति मनायतनञ्च उप्पज्जति.

(घ) पच्चनीकपुग्गलो

२३९. (क) यस्स चक्खायतनं नुप्पज्जति तस्स सोतायतनं न निरुज्झिस्सतीति?

सब्बेसं चवन्तानं अचक्खुकानं उपपज्जन्तानं तेसं चक्खायतनं नुप्पज्जति, नो च तेसं सोतायतनं न निरुज्झिस्सति. पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं चक्खायतनञ्च नुप्पज्जति सोतायतनञ्च न निरुज्झिस्सति.

(ख) यस्स वा पन सोतायतनं न निरुज्झिस्सति तस्स चक्खायतनं नुप्पज्जतीति? आमन्ता.

(क) यस्स चक्खायतनं नुप्पज्जति तस्स घानायतनं न निरुज्झिस्सतीति?

सब्बेसं चवन्तानं अचक्खुकानं उपपज्जन्तानं तेसं चक्खायतनं नुप्पज्जति, नो च तेसं घानायतनं न निरुज्झिस्सति. पञ्चवोकारे परिनिब्बन्तानं अरूपे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं चक्खायतनञ्च नुप्पज्जति घानायतनञ्च न निरुज्झिस्सति.

(ख) यस्स वा पन घानायतनं न निरुज्झिस्सति तस्स चक्खायतनं नुप्पज्जतीति?

पच्छिमभविकानं रूपावचरं उपपज्जन्तानं तेसं घानायतनं न निरुज्झिस्सति, नो च तेसं चक्खायतनं नुप्पज्जति. पञ्चवोकारे परिनिब्बन्तानं अरूपे पच्छिमभविकानं ये च रूपावचरं अरूपावचरं उपपज्जित्वा परिनिब्बायिस्सन्ति तेसं चवन्तानं तेसं घानायतनञ्च न निरुज्झिस्सति चक्खायतनञ्च नुप्पज्जति.

(क) यस्स चक्खायतनं नुप्पज्जति तस्स रूपायतनं न निरुज्झिस्सतीति?

सब्बेसं चवन्तानं अचक्खुकानं उपपज्जन्तानं तेसं चक्खायतनं नुप्पज्जति, नो च तेसं रूपायतनं न निरुज्झिस्सति. पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं चक्खायतनञ्च नुप्पज्जति रूपायतनञ्च न निरुज्झिस्सति.

(ख) यस्स वा पन रूपायतनं…पे…? आमन्ता.

यस्स चक्खायतनं नुप्पज्जति तस्स मनायतनं…पे… धम्मायतनं न निरुज्झिस्सतीति?

सब्बेसं चवन्तानं अचक्खुकानं उपपज्जन्तानं तेसं चक्खायतनं नुप्पज्जति, नो च तेसं धम्मायतनं न निरुज्झिस्सति. परिनिब्बन्तानं तेसं चक्खायतनञ्च नुप्पज्जति धम्मायतनञ्च न निरुज्झिस्सति.

यस्स वा पन धम्मायतनं…पे…? आमन्ता. (चक्खायतनमूलकं)

२४०. (क) यस्स घानायतनं नुप्पज्जति तस्स रूपायतनं न निरुज्झिस्सतीति?

सब्बेसं चवन्तानं अघानकानं उपपज्जन्तानं तेसं घानायतनं नुप्पज्जति, नो च तेसं रूपायतनं न निरुज्झिस्सति. पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं घानायतनञ्च नुप्पज्जति रूपायतनञ्च न निरुज्झिस्सति.

(ख) यस्स वा पन रूपायतनं…पे…? आमन्ता.

यस्स घानायतनं नुप्पज्जति तस्स मनायतनं…पे… धम्मायतनं न निरुज्झिस्सतीति?

सब्बेसं चवन्तानं अघानकानं उपपज्जन्तानं तेसं घानायतनं नुप्पज्जति, नो च तेसं धम्मायतनं न निरुज्झिस्सति. परिनिब्बन्तानं तेसं घानायतनञ्च नुप्पज्जति धम्मायतनञ्च न निरुज्झिस्सति.

यस्स वा पन धम्मायतनं…पे…? आमन्ता. (घानायतनमूलकं)

२४१. यस्स रूपायतनं नुप्पज्जति तस्स मनायतनं…पे… धम्मायतनं न निरुज्झिस्सतीति?

सब्बेसं चवन्तानं अरूपकानं उपपज्जन्तानं तेसं रूपायतनं नुप्पज्जति, नो च तेसं धम्मायतनं न निरुज्झिस्सति. परिनिब्बन्तानं तेसं रूपायतनञ्च नुप्पज्जति धम्मायतनञ्च न निरुज्झिस्सति.

यस्स वा पन धम्मायतनं…पे…? आमन्ता.

२४२. (क) यस्स मनायतनं नुप्पज्जति तस्स धम्मायतनं न निरुज्झिस्सतीति?

सब्बेसं चवन्तानं अचित्तकानं उपपज्जन्तानं तेसं मनायतनं नुप्पज्जति, नो च तेसं धम्मायतनं न निरुज्झिस्सति. परिनिब्बन्तानं तेसं मनायतनञ्च नुप्पज्जति धम्मायतनञ्च न निरुज्झिस्सति.

(ख) यस्स वा पन धम्मायतनं न निरुज्झिस्सति तस्स मनायतनं नुप्पज्जतीति? आमन्ता.

(ङ) पच्चनीकओकासो

२४३. यत्थ चक्खायतनं नुप्पज्जति…पे….

(च) पच्चनीकपुग्गलोकासा

२४४. (क) यस्स यत्थ चक्खायतनं नुप्पज्जति तस्स तत्थ सोतायतनं न निरुज्झिस्सतीति?

पञ्चवोकारा चवन्तानं अचक्खुकानं कामावचरं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ सोतायतनं न निरुज्झिस्सति. पञ्चवोकारे परिनिब्बन्तानं असञ्ञसत्तानं अरूपानं तेसं तत्थ चक्खायतनञ्च नुप्पज्जति सोतायतनञ्च न निरुज्झिस्सति.

(ख) यस्स वा पन यत्थ सोतायतनं न निरुज्झिस्सति तस्स तत्थ चक्खायतनं नुप्पज्जतीति? आमन्ता.

(क) यस्स यत्थ चक्खायतनं नुप्पज्जति तस्स तत्थ घानायतनं न निरुज्झिस्सतीति?

कामावचरा चवन्तानं अचक्खुकानं कामावचरं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ घानायतनं न निरुज्झिस्सति. कामावचरे परिनिब्बन्तानं रूपावचरा चवन्तानं असञ्ञसत्तानं अरूपानं तेसं तत्थ चक्खायतनञ्च नुप्पज्जति घानायतनञ्च न निरुज्झिस्सति.

(ख) यस्स वा पन यत्थ घानायतनं न निरुज्झिस्सति तस्स तत्थ चक्खायतनं नुप्पज्जतीति?

रूपावचरं उपपज्जन्तानं तेसं तत्थ घानायतनं न निरुज्झिस्सति, नो च तेसं तत्थ चक्खायतनं नुप्पज्जति. कामावचरे परिनिब्बन्तानं रूपावचरा चवन्तानं असञ्ञसत्तानं अरूपानं तेसं तत्थ घानायतनञ्च न निरुज्झिस्सति चक्खायतनञ्च नुप्पज्जति.

(क) यस्स यत्थ चक्खायतनं नुप्पज्जति तस्स तत्थ रूपायतनं न निरुज्झिस्सतीति?

पञ्चवोकारा चवन्तानं अचक्खुकानं कामावचरं उपपज्जन्तानं असञ्ञसत्तानं तेसं तत्थ चक्खायतनं नुप्पज्जति, नो च तेसं तत्थ रूपायतनं न निरुज्झिस्सति. पञ्चवोकारे परिनिब्बन्तानं अरूपानं तेसं तत्थ चक्खायतनञ्च नुप्पज्जति रूपायतनञ्च न निरुज्झिस्सति.

(ख) यस्स वा पन यत्थ रूपायतनं न निरुज्झिस्सति तस्स तत्थ चक्खायतनं नुप्पज्जतीति? आमन्ता.

(क) यस्स यत्थ चक्खायतनं नुप्पज्जति तस्स तत्थ मनायतनं न निरुज्झिस्सतीति?

पञ्चवोकारा चवन्तानं अचक्खुकानं कामावचरं उपपज्जन्तानं अरूपानं तसं तत्थ चक्खायतनं नुप्पज्जति, नो च तेसं तत्थ मनायतनं न निरुज्झिस्सति. परिनिब्बन्तानं असञ्ञसत्तानं तेसं तत्थ चक्खायतनञ्च नुप्पज्जति मनायतनञ्च न निरुज्झिस्सति.

(ख) यस्स वा पन यत्थ मनायतनं न निरुज्झिस्सति तस्स तत्थ चक्खायतनं नुप्पज्जतीति? आमन्ता.

(क) यस्स यत्थ चक्खायतनं नुप्पज्जति तस्स तत्थ धम्मायतनं न निरुज्झिस्सतीति?

सब्बेसं चवन्तानं अचक्खुकानं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ धम्मायतनं न निरुज्झिस्सति. परिनिब्बन्तानं तेसं तत्थ चक्खायतनञ्च नुप्पज्जति धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ चक्खायतनं नुप्पज्जतीति? आमन्ता. (चक्खायतनमूलकं)

२४५. (क) यस्स यत्थ घानायतनं नुप्पज्जति तस्स तत्थ रूपायतनं न निरुज्झिस्सतीति?

कामावचरा चवन्तानं अघानकानं कामावचरं उपपज्जन्तानं रूपावचरानं तेसं तत्थ घानायतनं नुप्पज्जति, नो च तेसं तत्थ रूपायतनं न निरुज्झिस्सति. पञ्चवोकारे परिनिब्बन्तानं अरूपानं तेसं तत्थ घानायतनञ्च नुप्पज्जति रूपायतनञ्च न निरुज्झिस्सति.

(ख) यस्स वा पन यत्थ रूपायतनं न निरुज्झिस्सति तस्स तत्थ घानायतनं नुप्पज्जतीति? आमन्ता.

(क) यस्स यत्थ घानायतनं नुप्पज्जति तस्स तत्थ मनायतनं न निरुज्झिस्सतीति?

कामावचरा चवन्तानं अघानकानं कामावचरं उपपज्जन्तानं रूपावचरानं अरूपावचरानं तेसं तत्थ घानायतनं नुप्पज्जति, नो च तेसं तत्थ मनायतनं न निरुज्झिस्सति. परिनिब्बन्तानं असञ्ञसत्तानं तेसं तत्थ घानायतनञ्च नुप्पज्जति मनायतनञ्च न निरुज्झिस्सति.

(ख) यस्स वा पन यत्थ मनायतनं न निरुज्झिस्सति तस्स तत्थ घानायतनं नुप्पज्जतीति? आमन्ता.

(क) यस्स यत्थ घानायतनं नुप्पज्जति तस्स तत्थ धम्मायतनं न निरुज्झिस्सतीति?

सब्बेसं चवन्तानं अघानकानं उपपज्जन्तानं तेसं तत्थ घानायतनं नुप्पज्जति, नो च तेसं तत्थ धम्मायतनं न निरुज्झिस्सति. परिनिब्बन्तानं तेसं तत्थ घानायतनञ्च नुप्पज्जति धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ घानायतनं नुप्पज्जतीति? आमन्ता. (घानायतनमूलकं)

२४६. (क) यस्स यत्थ रूपायतनं नुप्पज्जति तस्स तत्थ मनायतनं न निरुज्झिस्सतीति?

पञ्चवोकारा चवन्तानं अरूपानं तेसं तत्थ रूपायतनं नुप्पज्जति, नो च तेसं तत्थ मनायतनं न निरुज्झिस्सति. परिनिब्बन्तानं असञ्ञसत्ता चवन्तानं तेसं तत्थ रूपायतनञ्च नुप्पज्जति मनायतनञ्च न निरुज्झिस्सति.

(ख) यस्स वा पन यत्थ मनायतनं न निरुज्झिस्सति तस्स तत्थ रूपायतनं नुप्पज्जतीति?

असञ्ञसत्तं उपपज्जन्तानं तेसं तत्थ मनायतनं न निरुज्झिस्सति, नो च तेसं तत्थ रूपायतनं नुप्पज्जति. परिनिब्बन्तानं असञ्ञसत्ता चवन्तानं तेसं तत्थ मनायतनञ्च न निरुज्झिस्सति रूपायतनञ्च नुप्पज्जति.

(क) यस्स यत्थ रूपायतनं नुप्पज्जति तस्स तत्थ धम्मायतनं न निरुज्झिस्सतीति?

सब्बेसं चवन्तानं अरूपकानं उपपज्जन्तानं तेसं तत्थ रूपायतनं नुप्पज्जति, नो च तेसं तत्थ धम्मायतनं न निरुज्झिस्सति. परिनिब्बन्तानं तेसं तत्थ रूपायतनञ्च नुप्पज्जति धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ रूपायतनं नुप्पज्जतीति? आमन्ता.

२४७. (क) यस्स यत्थ मनायतनं नुप्पज्जति तस्स तत्थ धम्मायतनं न निरुज्झिस्सतीति?

सब्बेसं चवन्तानं अचित्तकानं उपपज्जन्तानं तेसं तत्थ मनायतनं नुप्पज्जति, नो च तेसं तत्थ धम्मायतनं न निरुज्झिस्सति. परिनिब्बन्तानं तेसं तत्थ मनायतनञ्च नुप्पज्जति धम्मायतनञ्च न निरुज्झिस्सति.

(ख) यस्स वा पन यत्थ धम्मायतनं न निरुज्झिस्सति तस्स तत्थ मनायतनं नुप्पज्जतीति? आमन्ता.