(६) अतीतानागतवारो

(क) अनुलोमपुग्गलो

२४८. (क) यस्स चक्खायतनं उप्पज्जित्थ तस्स सोतायतनं निरुज्झिस्सतीति?

पञ्चवोकारे परिनिब्बन्तानं अरूपे पच्छिमभविकानं ये च अरूपं उपपज्जित्वा परिनिब्बायिस्सन्ति तेसं चवन्तानं तेसं चक्खायतनं उप्पज्जित्थ, नो च तेसं सोतायतनं निरुज्झिस्सति. इतरेसं तेसं चक्खायतनञ्च उप्पज्जित्थ सोतायतनञ्च निरुज्झिस्सति.

(ख) यस्स वा पन सोतायतनं निरुज्झिस्सति तस्स चक्खायतनं उप्पज्जित्थाति? आमन्ता.

(यथा निरोधवारे अतीतानागता [अतीतेनानागता (स्या.)] पुच्छा यस्सकम्पि यत्थकम्पि यस्सयत्थकम्पि अनुलोमम्पि पच्चनीकम्पि विभत्तं, एवं उप्पादनिरोधेपि अतीतानागता पुच्छा विभजितब्बा.)

उप्पादनिरोधवारो.

पवत्तिवारो निट्ठितो.