(४) पच्चुप्पन्नातीतवारो

(क) अनुलोमपुग्गलो

१५१. (क) यस्स चक्खायतनं निरुज्झति तस्स सोतायतनं निरुज्झित्थाति? आमन्ता.

(ख) यस्स वा पन सोतायतनं निरुज्झित्थ तस्स चक्खायतनं निरुज्झतीति?

सब्बेसं उपपज्जन्तानं अचक्खुकानं चवन्तानं तेसं सोतायतनं निरुज्झित्थ, नो च तेसं चक्खायतनं निरुज्झति. सचक्खुकानं चवन्तानं तेसं सोतायतनञ्च निरुज्झित्थ चक्खायतनञ्च निरुज्झति.

यस्स चक्खायतनं निरुज्झति तस्स घानायतनं…पे… रूपायतनं …पे… मनायतनं…पे… धम्मायतनं निरुज्झित्थाति? आमन्ता.

यस्स वा पन धम्मायतनं निरुज्झित्थ तस्स चक्खायतनं निरुज्झतीति?

सब्बेसं उपपज्जन्तानं अचक्खुकानं चवन्तानं तेसं धम्मायतनं निरुज्झित्थ, नो च तेसं चक्खायतनं निरुज्झति. सचक्खुकानं चवन्तानं तेसं धम्मायतनञ्च निरुज्झित्थ चक्खायतनञ्च निरुज्झति.

१५२. यस्स घानायतनं निरुज्झति तस्स रूपायतनं…पे… मनायतनं…पे… धम्मायतनं निरुज्झित्थाति? आमन्ता.

यस्स वा पन धम्मायतनं निरुज्झित्थ तस्स घानायतनं निरुज्झतीति?

सब्बेसं उपपज्जन्तानं अघानकानं चवन्तानं तेसं धम्मायतनं निरुज्झित्थ, नो च तेसं घानायतनं निरुज्झति. सघानकानं चवन्तानं तेसं धम्मायतनञ्च निरुज्झित्थ घानायतनञ्च निरुज्झति.

१५३. यस्स रूपायतनं निरुज्झति तस्स मनायतनं…पे… धम्मायतनं निरुज्झित्थाति? आमन्ता.

यस्स वा पन धम्मायतनं निरुज्झित्थ तस्स रूपायतनं निरुज्झतीति?

सब्बेसं उपपज्जन्तानं अरूपकानं चवन्तानं तेसं धम्मायतनं निरुज्झित्थ, नो च तेसं रूपायतनं निरुज्झति. सरूपकानं चवन्तानं तेसं धम्मायतनञ्च निरुज्झित्थ रूपायतनञ्च निरुज्झति.

१५४. (क) यस्स मनायतनं निरुज्झति तस्स धम्मायतनं निरुज्झित्थाति? आमन्ता.

(ख) यस्स वा पन धम्मायतनं निरुज्झित्थ तस्स मनायतनं निरुज्झतीति?

सब्बेसं उपपज्जन्तानं अचित्तकानं चवन्तानं तेसं धम्मायतनं निरुज्झित्थ, नो च तेसं मनायतनं निरुज्झति. सचित्तकानं चवन्तानं तेसं धम्मायतनञ्च निरुज्झित्थ मनायतनञ्च निरुज्झति.

(ख) अनुलोमओकासो

१५५. यत्थ चक्खायतनं निरुज्झति…पे….

(ग) अनुलोमपुग्गलोकासा

१५६. (क) यस्स यत्थ चक्खायतनं निरुज्झति तस्स तत्थ सोतायतनं निरुज्झित्थाति?

सुद्धावासे परिनिब्बन्तानं तेसं तत्थ चक्खायतनं निरुज्झति, नो च तेसं तत्थ सोतायतनं निरुज्झित्थ. इतरेसं सचक्खुकानं चवन्तानं तेसं तत्थ चक्खायतनञ्च निरुज्झति सोतायतनञ्च निरुज्झित्थ.

(ख) यस्स वा पन यत्थ सोतायतनं निरुज्झित्थ तस्स तत्थ चक्खायतनं निरुज्झतीति?

पञ्चवोकारं उपपज्जन्तानं अचक्खुकानं कामावचरा चवन्तानं तेसं तत्थ सोतायतनं निरुज्झित्थ, नो च तेसं तत्थ चक्खायतनं निरुज्झति. सचक्खुकानं चवन्तानं तेसं तत्थ सोतायतनञ्च निरुज्झित्थ चक्खायतनञ्च निरुज्झति.

(क) यस्स यत्थ चक्खायतनं निरुज्झति तस्स तत्थ घानायतनं निरुज्झित्थाति?

रूपावचरा चवन्तानं तेसं तत्थ चक्खायतनं निरुज्झति, नो च तेसं तत्थ घानायतनं निरुज्झित्थ. सचक्खुकानं कामावचरा चवन्तानं तेसं तत्थ चक्खायतनञ्च निरुज्झति घानायतनञ्च निरुज्झित्थ.

(ख) यस्स वा पन यत्थ घानायतनं निरुज्झित्थ तस्स तत्थ चक्खायतनं निरुज्झतीति?

कामावचरं उपपज्जन्तानं अचक्खुकानं कामावचरा चवन्तानं तेसं तत्थ घानायतनं निरुज्झित्थ, नो च तेसं तत्थ चक्खायतनं निरुज्झति. सचक्खुकानं कामावचरा चवन्तानं तेसं तत्थ घानायतनञ्च निरुज्झित्थ चक्खायतनञ्च निरुज्झति.

(क) यस्स यत्थ चक्खायतनं निरुज्झति तस्स तत्थ रूपायतनं निरुज्झित्थाति?

सुद्धावासे परिनिब्बन्तानं तेसं तत्थ चक्खायतनं निरुज्झति, नो च तेसं तत्थ रूपायतनं निरुज्झित्थ. इतरेसं सचक्खुकानं चवन्तानं तेसं तत्थ चक्खायतनञ्च निरुज्झति रूपायतनञ्च निरुज्झित्थ.

(ख) यस्स वा पन यत्थ रूपायतनं निरुज्झित्थ तस्स तत्थ चक्खायतनं निरुज्झतीति?

पञ्चवोकारं उपपज्जन्तानं अचक्खुकानं कामावचरा चवन्तानं असञ्ञसत्तानं तेसं तत्थ रूपायतनं निरुज्झित्थ, नो च तेसं तत्थ चक्खायतनं निरुज्झति. सचक्खुकानं चवन्तानं तेसं तत्थ रूपायतनञ्च निरुज्झित्थ चक्खायतनञ्च निरुज्झति.

(क) यस्स यत्थ चक्खायतनं निरुज्झति तस्स तत्थ मनायतनं निरुज्झित्थाति?

सुद्धावासे परिनिब्बन्तानं तेसं तत्थ चक्खायतनं निरुज्झति, नो च तेसं तत्थ मनायतनं निरुज्झित्थ. इतरेसं सचक्खुकानं चवन्तानं तेसं तत्थ चक्खायतनञ्च निरुज्झति मनायतनञ्च निरुज्झित्थ.

(ख) यस्स वा पन यत्थ मनायतनं निरुज्झित्थ तस्स तत्थ चक्खायतनं निरुज्झतीति?

पञ्चवोकारं उपपज्जन्तानं अचक्खुकानं कामावचरा चवन्तानं अरूपानं तेसं तत्थ मनायतनं निरुज्झित्थ, नो च तेसं तत्थ चक्खायतनं निरुज्झति. सचक्खुकानं चवन्तानं तेसं तत्थ मनायतनञ्च निरुज्झित्थ चक्खायतनञ्च निरुज्झति.

(क) यस्स यत्थ चक्खायतनं निरुज्झति तस्स तत्थ धम्मायतनं निरुज्झित्थाति?

सुद्धावासे परिनिब्बन्तानं तेसं तत्थ चक्खायतनं निरुज्झति, नो च तेसं तत्थ धम्मायतनं निरुज्झित्थ. इतरेसं सचक्खुकानं चवन्तानं तेसं तत्थ चक्खायतनञ्च निरुज्झति धम्मायतनञ्च निरुज्झित्थ.

(ख) यस्स वा पन यत्थ धम्मायतनं निरुज्झित्थ तस्स तत्थ चक्खायतनं निरुज्झतीति?

सब्बेसं उपपज्जन्तानं अचक्खुकानं चवन्तानं तेसं तत्थ धम्मायतनं निरुज्झित्थ, नो च तेसं तत्थ चक्खायतनं निरुज्झति. सचक्खुकानं चवन्तानं तेसं तत्थ धम्मायतनञ्च निरुज्झित्थ चक्खायतनञ्च निरुज्झति. (चक्खायतनमूलकं)

१५७. (क) यस्स यत्थ घानायतनं निरुज्झति तस्स तत्थ रूपायतनं निरुज्झित्थाति? आमन्ता.

(ख) यस्स वा पन यत्थ रूपायतनं निरुज्झित्थ तस्स तत्थ घानायतनं निरुज्झतीति?

कामावचरं उपपज्जन्तानं अघानकानं कामावचरा चवन्तानं रूपावचरानं तेसं तत्थ रूपायतनं निरुज्झित्थ, नो च तेसं तत्थ घानायतनं निरुज्झति. सघानकानं चवन्तानं तेसं तत्थ रूपायतनञ्च निरुज्झित्थ घानायतनञ्च निरुज्झति.

(क) यस्स यत्थ घानायतनं निरुज्झति तस्स तत्थ मनायतनं निरुज्झित्थाति? आमन्ता.

(ख) यस्स वा पन यत्थ मनायतनं निरुज्झित्थ तस्स तत्थ घानायतनं निरुज्झतीति?

कामावचरं उपपज्जन्तानं अघानकानं कामावचरा चवन्तानं रूपावचरानं अरूपावचरानं तेसं तत्थ मनायतनं निरुज्झित्थ, नो च तेसं तत्थ घानायतनं निरुज्झति. सघानकानं चवन्तानं तेसं तत्थ मनायतनञ्च निरुज्झित्थ घानायतनञ्च निरुज्झति.

(क) यस्स यत्थ घानायतनं निरुज्झति तस्स तत्थ धम्मायतनं निरुज्झित्थाति? आमन्ता.

(ख) यस्स वा पन यत्थ धम्मायतनं निरुज्झित्थ तस्स तत्थ घानायतनं निरुज्झतीति?

सब्बेसं उपपज्जन्तानं अघानकानं चवन्तानं तेसं तत्थ धम्मायतनं निरुज्झित्थ, नो च तेसं तत्थ घानायतनं निरुज्झति. सघानकानं चवन्तानं तेसं तत्थ धम्मायतनञ्च निरुज्झित्थ घानायतनञ्च निरुज्झति. (घानायतनमूलकं)

१५८. (क) यस्स यत्थ रूपायतनं निरुज्झति तस्स तत्थ मनायतनं निरुज्झित्थाति?

सुद्धावासे परिनिब्बन्तानं असञ्ञसत्ता चवन्तानं तेसं तत्थ रूपायतनं निरुज्झति, नो च तेसं तत्थ मनायतनं निरुज्झित्थ. इतरेसं पञ्चवोकारा चवन्तानं तेसं तत्थ रूपायतनञ्च निरुज्झति मनायतनञ्च निरुज्झित्थ.

(ख) यस्स वा पन यत्थ मनायतनं निरुज्झित्थ तस्स तत्थ रूपायतनं निरुज्झतीति?

पञ्चवोकारं उपपज्जन्तानं अरूपानं तेसं तत्थ मनायतनं निरुज्झित्थ, नो च तेसं तत्थ रूपायतनं निरुज्झति. पञ्चवोकारा चवन्तानं तेसं तत्थ मनायतनञ्च निरुज्झित्थ रूपायतनञ्च निरुज्झति.

(क) यस्स यत्थ रूपायतनं निरुज्झति तस्स तत्थ धम्मायतनं निरुज्झित्थाति?

सुद्धावासे परिनिब्बन्तानं तेसं तत्थ रूपायतनं निरुज्झति, नो च तेसं तत्थ धम्मायतनं निरुज्झित्थ. इतरेसं सरूपकानं चवन्तानं तेसं तत्थ रूपायतनञ्च निरुज्झति धम्मायतनञ्च निरुज्झित्थ.

(ख) यस्स वा पन यत्थ धम्मायतनं निरुज्झित्थ तस्स तत्थ रूपायतनं निरुज्झतीति?

सब्बेसं उपपज्जन्तानं अरूपकानं चवन्तानं तेसं तत्थ धम्मायतनं निरुज्झित्थ, नो च तेसं तत्थ रूपायतनं निरुज्झति. सरूपकानं चवन्तानं तेसं तत्थ धम्मायतनञ्च निरुज्झित्थ रूपायतनञ्च निरुज्झति. (रूपायतनमूलकं)

१५९. (क) यस्स यत्थ मनायतनं निरुज्झति तस्स तत्थ धम्मायतनं निरुज्झित्थाति?

सुद्धावासे परिनिब्बन्तानं तेसं तत्थ मनायतनं निरुज्झति, नो च तेसं तत्थ धम्मायतनं निरुज्झित्थ. इतरेसं सचित्तकानं चवन्तानं तेसं तत्थ मनायतनञ्च निरुज्झति धम्मायतनञ्च निरुज्झित्थ.

(ख) यस्स वा पन यत्थ धम्मायतनं निरुज्झित्थ तस्स तत्थ मनायतनं निरुज्झतीति?

सब्बेसं उपपज्जन्तानं अचित्तकानं चवन्तानं तेसं तत्थ धम्मायतनं निरुज्झित्थ, नो च तेसं तत्थ मनायतनं निरुज्झति. सचित्तकानं चवन्तानं तेसं तत्थ धम्मायतनञ्च निरुज्झित्थ मनायतनञ्च निरुज्झति.

(घ) पच्चनीकपुग्गलो

१६०. (क) यस्स चक्खायतनं न निरुज्झति तस्स सोतायतनं न निरुज्झित्थाति? निरुज्झित्थ.

(ख) यस्स वा पन सोतायतनं न निरुज्झित्थ तस्स चक्खायतनं न निरुज्झतीति? नत्थि.

यस्स चक्खायतनं…पे… घानायतनं…पे… रूपायतनं…पे… मनायतनं न निरुज्झति तस्स धम्मायतनं न निरुज्झित्थाति? निरुज्झित्थ.

यस्स वा पन धम्मायतनं न निरुज्झित्थ तस्स मनायतनं न निरुज्झतीति? नत्थि.

(ङ) पच्चनीकओकासो

१६१. यत्थ चक्खायतनं न निरुज्झति…पे….

(च) पच्चनीकपुग्गलोकासा

१६२. (क) यस्स यत्थ चक्खायतनं न निरुज्झति तस्स तत्थ सोतायतनं न निरुज्झित्थाति?

पञ्चवोकारं उपपज्जन्तानं अचक्खुकानं कामावचरा चवन्तानं तेसं तत्थ चक्खायतनं न निरुज्झति, नो च तेसं तत्थ सोतायतनं न निरुज्झित्थ. सुद्धावासं उपपज्जन्तानं असञ्ञसत्तानं अरूपानं तेसं तत्थ चक्खायतनञ्च न निरुज्झति सोतायतनञ्च न निरुज्झित्थ.

(ख) यस्स वा पन यत्थ सोतायतनं न निरुज्झित्थ तस्स तत्थ चक्खायतनं न निरुज्झतीति?

सुद्धावासे परिनिब्बन्तानं तेसं तत्थ सोतायतनं न निरुज्झित्थ, नो च तेसं तत्थ चक्खायतनं न निरुज्झति. सुद्धावासं उपपज्जन्तानं असञ्ञसत्तानं अरूपानं तेसं तत्थ सोतायतनञ्च न निरुज्झित्थ चक्खायतनञ्च न निरुज्झति.

(क) यस्स यत्थ चक्खायतनं न निरुज्झति तस्स तत्थ घानायतनं न निरुज्झित्थाति?

कामावचरं उपपज्जन्तानं अचक्खुकानं कामावचरा चवन्तानं तेसं तत्थ चक्खायतनं न निरुज्झति, नो च तेसं तत्थ घानायतनं न निरुज्झित्थ. रूपावचरं उपपज्जन्तानं असञ्ञसत्तानं अरूपानं तेसं तत्थ चक्खायतनञ्च न निरुज्झति घानायतनञ्च न निरुज्झित्थ.

(ख) यस्स वा पन यत्थ घानायतनं न निरुज्झित्थ तस्स तत्थ चक्खायतनं न निरुज्झतीति?

रूपावचरा चवन्तानं तेसं तत्थ घानायतनं न निरुज्झित्थ, नो च तेसं तत्थ चक्खायतनं न निरुज्झति. रूपावचरं उपपज्जन्तानं असञ्ञसत्तानं अरूपानं तेसं तत्थ घानायतनञ्च न निरुज्झित्थ चक्खायतनञ्च न निरुज्झति.

(क) यस्स यत्थ चक्खायतनं न निरुज्झति तस्स तत्थ रूपायतनं न निरुज्झित्थाति?

पञ्चवोकारं उपपज्जन्तानं अचक्खुकानं कामावचरा चवन्तानं असञ्ञसत्तानं तेसं तत्थ चक्खायतनं न निरुज्झति, नो च तेसं तत्थ रूपायतनं न निरुज्झित्थ. सुद्धावासं उपपज्जन्तानं अरूपानं तेसं तत्थ चक्खायतनञ्च न निरुज्झति रूपायतनञ्च न निरुज्झित्थ.

(ख) यस्स वा पन यत्थ रूपायतनं न निरुज्झित्थ तस्स तत्थ चक्खायतनं न निरुज्झतीति?

सुद्धावासे परिनिब्बन्तानं तेसं तत्थ रूपायतनं न निरुज्झित्थ, नो च तेसं तत्थ चक्खायतनं न निरुज्झति. सुद्धावासं उपपज्जन्तानं अरूपानं तेसं तत्थ रूपायतनञ्च न निरुज्झित्थ चक्खायतनञ्च न निरुज्झति.

(क) यस्स यत्थ चक्खायतनं न निरुज्झति तस्स तत्थ मनायतनं न निरुज्झित्थाति?

पञ्चवोकारं उपपज्जन्तानं अचक्खुकानं कामावचरा चवन्तानं अरूपानं तेसं तत्थ चक्खायतनं न निरुज्झति, नो च तेसं तत्थ मनायतनं न निरुज्झित्थ. सुद्धावासं उपपज्जन्तानं असञ्ञसत्तानं तेसं तत्थ चक्खायतनञ्च न निरुज्झति मनायतनञ्च न निरुज्झित्थ.

(ख) यस्स वा पन यत्थ मनायतनं न निरुज्झित्थ तस्स तत्थ चक्खायतनं न निरुज्झतीति?

सुद्धावासे परिनिब्बन्तानं तेसं तत्थ मनायतनं न निरुज्झित्थ, नो च तेसं तत्थ चक्खायतनं न निरुज्झति. सुद्धावासं उपपज्जन्तानं असञ्ञसत्तानं तेसं तत्थ मनायतनञ्च न निरुज्झित्थ चक्खायतनञ्च न निरुज्झति.

(क) यस्स यत्थ चक्खायतनं न निरुज्झति तस्स तत्थ धम्मायतनं न निरुज्झित्थाति?

सब्बेसं उपपज्जन्तानं अचक्खुकानं चवन्तानं तेसं तत्थ चक्खायतनं न निरुज्झति, नो च तेसं तत्थ धम्मायतनं न निरुज्झित्थ. सुद्धावासं उपपज्जन्तानं तेसं तत्थ चक्खायतनञ्च न निरुज्झति धम्मायतनञ्च न निरुज्झित्थ.

(ख) यस्स वा पन यत्थ धम्मायतनं न निरुज्झित्थ तस्स तत्थ चक्खायतनं न निरुज्झतीति?

सुद्धावासे परिनिब्बन्तानं तेसं तत्थ धम्मायतनं न निरुज्झित्थ, नो च तेसं तत्थ चक्खायतनं न निरुज्झति. सुद्धावासं उपपज्जन्तानं तेसं तत्थ धम्मायतनञ्च न निरुज्झित्थ चक्खायतनञ्च न निरुज्झति. (चक्खायतनमूलकं)

१६३. (क) यस्स यत्थ घानायतनं न निरुज्झति तस्स तत्थ रूपायतनं न निरुज्झित्थाति?

कामावचरं उपपज्जन्तानं अघानकानं कामावचरा चवन्तानं रूपावचरानं तेसं तत्थ घानायतनं न निरुज्झति, नो च तेसं तत्थ रूपायतनं न निरुज्झित्थ. सुद्धावासानं अरूपानं तेसं तत्थ घानायतनञ्च न निरुज्झति रूपायतनञ्च न निरुज्झित्थ.

(ख) यस्स वा पन यत्थ रूपायतनं न निरुज्झित्थ तस्स तत्थ घानायतनं न निरुज्झतीति? आमन्ता.

(क) यस्स यत्थ घानायतनं न निरुज्झति तस्स तत्थ मनायतनं न निरुज्झित्थाति?

कामावचरं उपपज्जन्तानं अघानकानं कामावचरा चवन्तानं रूपावचरानं अरूपावचरानं तेसं तत्थ घानायतनं न निरुज्झति, नो च तेसं तत्थ मनायतनं न निरुज्झित्थ. सुद्धावासानं असञ्ञसत्तानं तेसं तत्थ घानायतनञ्च न निरुज्झति मनायतनञ्च न निरुज्झित्थ.

(ख) यस्स वा पन यत्थ मनायतनं न निरुज्झित्थ तस्स तत्थ घानायतनं न निरुज्झतीति? आमन्ता.

(क) यस्स यत्थ घानायतनं न निरुज्झति तस्स तत्थ धम्मायतनं न निरुज्झित्थाति?

सब्बेसं उपपज्जन्तानं अघानकानं चवन्तानं तेसं तत्थ घानायतनं न निरुज्झति, नो च तेसं तत्थ धम्मायतनं न निरुज्झित्थ. सुद्धावासानं तेसं तत्थ घानायतनञ्च न निरुज्झति धम्मायतनञ्च न निरुज्झित्थ.

(ख) यस्स वा पन यत्थ धम्मायतनं न निरुज्झित्थ तस्स तत्थ घानायतनं न निरुज्झतीति? आमन्ता. (घानायतनमूलकं)

१६४. (क) यस्स यत्थ रूपायतनं न निरुज्झति तस्स तत्थ मनायतनं न निरुज्झित्थाति?

पञ्चवोकारं उपपज्जन्तानं अरूपानं तेसं तत्थ रूपायतनं न निरुज्झति, नो च तेसं तत्थ मनायतनं न निरुज्झित्थ. सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ रूपायतनञ्च न निरुज्झति मनायतनञ्च न निरुज्झित्थ.

(ख) यस्स वा पन यत्थ मनायतनं न निरुज्झित्थ तस्स तत्थ रूपायतनं न निरुज्झतीति?

सुद्धावासे परिनिब्बन्तानं असञ्ञसत्ता चवन्तानं तेसं तत्थ मनायतनं न निरुज्झित्थ, नो च तेसं तत्थ रूपायतनं न निरुज्झति. सुद्धावासं उपपज्जन्तानं असञ्ञसत्तं उपपज्जन्तानं तेसं तत्थ मनायतनञ्च न निरुज्झित्थ रूपायतनञ्च न निरुज्झति.

(क) यस्स यत्थ रूपायतनं न निरुज्झति तस्स तत्थ धम्मायतनं न निरुज्झित्थाति?

सब्बेसं उपपज्जन्तानं अरूपकानं चवन्तानं तेसं तत्थ रूपायतनं न निरुज्झति, नो च तेसं तत्थ धम्मायतनं न निरुज्झित्थ. सुद्धावासं उपपज्जन्तानं तेसं तत्थ रूपायतनञ्च न निरुज्झति धम्मायतनञ्च न निरुज्झित्थ.

(ख) यस्स वा पन यत्थ धम्मायतनं न निरुज्झित्थ तस्स तत्थ रूपायतनं न निरुज्झतीति?

सुद्धावासे परिनिब्बन्तानं तेसं तत्थ धम्मायतनं न निरुज्झित्थ, नो च तेसं तत्थ रूपायतनं न निरुज्झति. सुद्धावासं उपपज्जन्तानं तेसं तत्थ धम्मायतनञ्च न निरुज्झित्थ रूपायतनञ्च न निरुज्झति.

१६५. (क) यस्स यत्थ मनायतनं न निरुज्झति तस्स तत्थ धम्मायतनं न निरुज्झित्थाति?

सब्बेसं उपपज्जन्तानं अचित्तकानं चवन्तानं तेसं तत्थ मनायतनं न निरुज्झति, नो च तेसं तत्थ धम्मायतनं न निरुज्झित्थ. सुद्धावासं उपपज्जन्तानं तेसं तत्थ मनायतनञ्च न निरुज्झति धम्मायतनञ्च न निरुज्झित्थ.

(ख) यस्स वा पन यत्थ धम्मायतनं न निरुज्झित्थ तस्स तत्थ मनायतनं न निरुज्झतीति?

सुद्धावासे परिनिब्बन्तानं तेसं तत्थ धम्मायतनं न निरुज्झित्थ, नो च तेसं तत्थ मनायतनं न निरुज्झति. सुद्धावासं उपपज्जन्तानं तेसं तत्थ धम्मायतनञ्च न निरुज्झित्थ मनायतनञ्च न निरुज्झति.