(१) पच्चुप्पन्नवारो

(क) अनुलोमपुग्गलो

१८. (क) यस्स चक्खायतनं उप्पज्जति तस्स सोतायतनं उप्पज्जतीति?

सचक्खुकानं असोतकानं उपपज्जन्तानं तेसं चक्खायतनं उप्पज्जति, नो च तेसं सोतायतनं उप्पज्जति. सचक्खुकानं ससोतकानं उपपज्जन्तानं तेसं चक्खायतनञ्च उप्पज्जति सोतायतनञ्च उप्पज्जति.

(ख) यस्स वा पन सोतायतनं उप्पज्जति तस्स चक्खायतनं उप्पज्जतीति?

ससोतकानं अचक्खुकानं उपपज्जन्तानं तेसं सोतायतनं उप्पज्जति, नो च तेसं चक्खायतनं उप्पज्जति. ससोतकानं सचक्खुकानं उपपज्जन्तानं तेसं सोतायतनञ्च उप्पज्जति चक्खायतनञ्च उप्पज्जति.

(क) यस्स चक्खायतनं उप्पज्जति तस्स घानायतनं उप्पज्जतीति?

सचक्खुकानं अघानकानं उपपज्जन्तानं तेसं चक्खायतनं उप्पज्जति, नो च तेसं घानायतनं उप्पज्जति. सचक्खुकानं सघानकानं उपपज्जन्तानं तेसं चक्खायतनञ्च उप्पज्जति घानायतनञ्च उप्पज्जति.

(ख) यस्स वा पन घानायतनं उप्पज्जति तस्स चक्खायतनं उप्पज्जतीति?

सघानकानं अचक्खुकानं उपपज्जन्तानं तेसं घानायतनं उप्पज्जति, नो च तेसं चक्खायतनं उप्पज्जति. सघानकानं सचक्खुकानं उपपज्जन्तानं तेसं घानायतनञ्च उप्पज्जति चक्खायतनञ्च उप्पज्जति.

(क) यस्स चक्खायतनं उप्पज्जति तस्स रूपायतनं उप्पज्जतीति? आमन्ता.

(ख) यस्स वा पन रूपायतनं उप्पज्जति तस्स चक्खायतनं उप्पज्जतीति?

सरूपकानं अचक्खुकानं उपपज्जन्तानं तेसं रूपायतनं उप्पज्जति, नो च तेसं चक्खायतनं उप्पज्जति. सचक्खुकानं उपपज्जन्तानं तेसं रूपायतनञ्च उप्पज्जति चक्खायतनञ्च उप्पज्जति.

(क) यस्स चक्खायतनं उप्पज्जति तस्स मनायतनं उप्पज्जतीति? आमन्ता.

(ख) यस्स वा पन मनायतनं उप्पज्जति तस्स चक्खायतनं उप्पज्जतीति?

सचित्तकानं अचक्खुकानं उपपज्जन्तानं तेसं मनायतनं उप्पज्जति, नो च तेसं चक्खायतनं उप्पज्जति. सचक्खुकानं उपपज्जन्तानं तेसं मनायतनञ्च उप्पज्जति चक्खायतनञ्च उप्पज्जति.

(क) यस्स चक्खायतनं उप्पज्जति तस्स धम्मायतनं उप्पज्जतीति? आमन्ता.

(ख) यस्स वा पन धम्मायतनं उप्पज्जति तस्स चक्खायतनं उप्पज्जतीति?

अचक्खुकानं उपपज्जन्तानं तेसं धम्मायतनं उप्पज्जति, नो च तेसं चक्खायतनं उप्पज्जति. सचक्खुकानं उपपज्जन्तानं तेसं धम्मायतनञ्च उप्पज्जति चक्खायतनञ्च उप्पज्जति. (चक्खायतनमूलकं)

१९. (क) यस्स घानायतनं उप्पज्जति तस्स रूपायतनं उप्पज्जतीति? आमन्ता.

(ख) यस्स वा पन रूपायतनं उप्पज्जति तस्स घानायतनं उप्पज्जतीति?

सरूपकानं अघानकानं उपपज्जन्तानं तेसं रूपायतनं उप्पज्जति, नो च तेसं घानायतनं उप्पज्जति. सघानकानं उपपज्जन्तानं तेसं रूपायतनञ्च उप्पज्जति घानायतनञ्च उप्पज्जति.

(क) यस्स घानायतनं उप्पज्जति तस्स मनायतनं उप्पज्जतीति? आमन्ता.

(ख) यस्स वा पन मनायतनं उप्पज्जति तस्स घानायतनं उप्पज्जतीति?

सचित्तकानं अघानकानं उपपज्जन्तानं तेसं मनायतनं उप्पज्जति, नो च तेसं घानायतनं उप्पज्जति. सघानकानं उपपज्जन्तानं तेसं मनायतनञ्च उप्पज्जति घानायतनञ्च उप्पज्जति.

(क) यस्स घानायतनं उप्पज्जति तस्स धम्मायतनं उप्पज्जतीति? आमन्ता.

(ख) यस्स वा पन धम्मायतनं उप्पज्जति तस्स घानायतनं उप्पज्जतीति?

अघानकानं उपपज्जन्तानं तेसं धम्मायतनं उप्पज्जति, नो च तेसं घानायतनं उप्पज्जति. सघानकानं उपपज्जन्तानं तेसं धम्मायतनञ्च उप्पज्जति घानायतनञ्च उप्पज्जति. (घानायतनमूलकं)

२०. (क) यस्स रूपायतनं उप्पज्जति तस्स मनायतनं उप्पज्जतीति?

अचित्तकानं उपपज्जन्तानं तेसं रूपायतनं उप्पज्जति, नो च तेसं मनायतनं उप्पज्जति. सरूपकानं सचित्तकानं उपपज्जन्तानं तेसं रूपायतनञ्च उप्पज्जति मनायतनञ्च उप्पज्जति.

(ख) यस्स वा पन मनायतनं उप्पज्जति तस्स रूपायतनं उप्पज्जतीति?

अरूपकानं उपपज्जन्तानं तेसं मनायतनं उप्पज्जति, नो च तेसं रूपायतनं उप्पज्जति. सचित्तकानं सरूपकानं उपपज्जन्तानं तेसं मनायतनञ्च उप्पज्जति रूपायतनञ्च उप्पज्जति.

(क) यस्स रूपायतनं उप्पज्जति तस्स धम्मायतनं उप्पज्जतीति? आमन्ता.

(ख) यस्स वा पन धम्मायतनं उप्पज्जति तस्स रूपायतनं उप्पज्जतीति?

अरूपकानं उपपज्जन्तानं तेसं धम्मायतनं उप्पज्जति, नो च तेसं रूपायतनं उप्पज्जति. सरूपकानं उपपज्जन्तानं तेसं धम्मायतनञ्च उप्पज्जति रूपायतनञ्च उप्पज्जति. (रूपायतनमूलकं)

२१. (क) यस्स मनायतनं उप्पज्जति तस्स धम्मायतनं उप्पज्जतीति? आमन्ता.

(ख) यस्स वा पन धम्मायतनं उप्पज्जति तस्स मनायतनं उप्पज्जतीति?

अचित्तकानं उपपज्जन्तानं तेसं धम्मायतनं उप्पज्जति, नो च तेसं मनायतनं उप्पज्जति. सचित्तकानं उपपज्जन्तानं तेसं धम्मायतनञ्च उप्पज्जति मनायतनञ्च उप्पज्जति. (मनायतनमूलकं)

(ख) अनुलोमओकासो

२२. (क) यत्थ चक्खायतनं उप्पज्जति तत्थ सोतायतनं उप्पज्जतीति? आमन्ता.

(ख) यत्थ वा पन सोतायतनं उप्पज्जति तत्थ चक्खायतनं उप्पज्जतीति? आमन्ता.

(क) यत्थ चक्खायतनं उप्पज्जति तत्थ घानायतनं उप्पज्जतीति?

रूपावचरे तत्थ चक्खायतनं उप्पज्जति, नो च तत्थ घानायतनं उप्पज्जति. कामावचरे तत्थ चक्खायतनञ्च उप्पज्जति घानायतनञ्च उप्पज्जति.

(ख) यत्थ वा पन घानायतनं उप्पज्जति तत्थ चक्खायतनं उप्पज्जतीति? आमन्ता.

(क) यत्थ चक्खायतनं उप्पज्जति तत्थ रूपायतनं उप्पज्जतीति? आमन्ता.

(ख) यत्थ वा पन रूपायतनं उप्पज्जति तत्थ चक्खायतनं उप्पज्जतीति?

असञ्ञसत्ते तत्थ रूपायतनं उप्पज्जति, नो च तत्थ चक्खायतनं उप्पज्जति. पञ्चवोकारे तत्थ रूपायतनञ्च उप्पज्जति चक्खायतनञ्च उप्पज्जति.

(क) यत्थ चक्खायतनं उप्पज्जति तत्थ मनायतनं उप्पज्जतीति? आमन्ता.

(ख) यत्थ वा पन मनायतनं उप्पज्जति तत्थ चक्खायतनं उप्पज्जतीति?

अरूपे तत्थ मनायतनं उप्पज्जति, नो च तत्थ चक्खायतनं उप्पज्जति. पञ्चवोकारे तत्थ मनायतनञ्च उप्पज्जति चक्खायतनञ्च उप्पज्जति.

(क) यत्थ चक्खायतनं उप्पज्जति तत्थ धम्मायतनं उप्पज्जतीति? आमन्ता.

(ख) यत्थ वा पन धम्मायतनं उप्पज्जति तत्थ चक्खायतनं उप्पज्जतीति?

असञ्ञसत्ते अरूपे तत्थ धम्मायतनं उप्पज्जति, नो च तत्थ चक्खायतनं उप्पज्जति. पञ्चवोकारे तत्थ धम्मायतनञ्च उप्पज्जति चक्खायतनञ्च उप्पज्जति. (चक्खायतनमूलकं)

२३. (क) यत्थ घानायतनं उप्पज्जति तत्थ रूपायतनं उप्पज्जतीति? आमन्ता.

(ख) यत्थ वा पन रूपायतनं उप्पज्जति तत्थ घानायतनं उप्पज्जतीति?

रूपावचरे तत्थ रूपायतनं उप्पज्जति, नो च तत्थ घानायतनं उप्पज्जति. कामावचरे तत्थ रूपायतनञ्च उप्पज्जति घानायतनञ्च उप्पज्जति.

(यत्थ घानायतनं उप्पज्जति तत्थ मनायतनं धम्मायतनञ्च एकसदिसं, नानं नत्थि, उपरि पन वारसङ्खेपो [उपरिवारे सङ्खेपो (स्या.), उपरिवारे सङ्खेपं (सी. क.)] तीति जानितब्बं.)

(क) यत्थ घानायतनं उप्पज्जति तत्थ धम्मायतनं उप्पज्जतीति? आमन्ता.

(ख) यत्थ वा पन धम्मायतनं उप्पज्जति तत्थ घानायतनं उप्पज्जतीति?

रूपावचरे अरूपावचरे तत्थ धम्मायतनं उप्पज्जति, नो च तत्थ घानायतनं उप्पज्जति. कामावचरे तत्थ धम्मायतनञ्च उप्पज्जति घानायतनञ्च उप्पज्जति. (घानायतनमूलकं)

२४. (क) यत्थ रूपायतनं उप्पज्जति तत्थ मनायतनं उप्पज्जतीति?

असञ्ञसत्ते तत्थ रूपायतनं उप्पज्जति, नो च तत्थ मनायतनं उप्पज्जति. पञ्चवोकारे तत्थ रूपायतनञ्च उप्पज्जति मनायतनञ्च उप्पज्जति.

(ख) यत्थ वा पन मनायतनं उप्पज्जति तत्थ रूपायतनं उप्पज्जतीति?

अरूपे तत्थ मनायतनं उप्पज्जति, नो च तत्थ रूपायतनं उप्पज्जति. पञ्चवोकारे तत्थ मनायतनञ्च उप्पज्जति रूपायतनञ्च उप्पज्जति.

(क) यत्थ रूपायतनं उप्पज्जति तत्थ धम्मायतनं उप्पज्जतीति? आमन्ता.

(ख) यत्थ वा पन धम्मायतनं उप्पज्जति तत्थ रूपायतनं उप्पज्जतीति?

अरूपे तत्थ धम्मायतनं उप्पज्जति, नो च तत्थ रूपायतनं उप्पज्जति. पञ्चवोकारे असञ्ञसत्ते तत्थ धम्मायतनञ्च उप्पज्जति रूपायतनञ्च उप्पज्जति. (रूपायतनमूलकं)

२५. (क) यत्थ मनायतनं उप्पज्जति तत्थ धम्मायतनं उप्पज्जतीति? आमन्ता.

(ख) यत्थ वा पन धम्मायतनं उप्पज्जति तत्थ मनायतनं उप्पज्जतीति?

असञ्ञसत्ते तत्थ धम्मायतनं उप्पज्जति, नो च तत्थ मनायतनं उप्पज्जति. चतुवोकारे पञ्चवोकारे तत्थ धम्मायतनञ्च उप्पज्जति मनायतनञ्च उप्पज्जति. (मनायतनमूलकं)

(ग) अनुलोमपुग्गलोकासा

२६. (क) यस्स यत्थ चक्खायतनं उप्पज्जति तस्स तत्थ सोतायतनं उप्पज्जतीति?

सचक्खुकानं असोतकानं उपपज्जन्तानं तेसं तत्थ चक्खायतनं उप्पज्जति, नो च तेसं तत्थ सोतायतनं उप्पज्जति. सचक्खुकानं ससोतकानं उपपज्जन्तानं तेसं तत्थ चक्खायतनञ्च उप्पज्जति सोतायतनञ्च उप्पज्जति.

(ख) यस्स वा पन यत्थ सोतायतनं उप्पज्जति तस्स तत्थ चक्खायतनं उप्पज्जतीति?

ससोतकानं अचक्खुकानं उपपज्जन्तानं तेसं तत्थ सोतायतनं उप्पज्जति, नो च तेसं तत्थ चक्खायतनं उप्पज्जति. ससोतकानं सचक्खुकानं उपपज्जन्तानं तेसं तत्थ सोतायतनञ्च उप्पज्जति चक्खायतनञ्च उप्पज्जति (संखित्तं यस्सकसदिसं [यस्सकम्पि सदिसं (सी.), यस्सेकसदिसं (स्या.)] ).

२७. (क) यस्स यत्थ मनायतनं उप्पज्जति तस्स तत्थ धम्मायतनं उप्पज्जतीति? आमन्ता.

(ख) यस्स वा पन यत्थ धम्मायतनं उप्पज्जति तस्स तत्थ मनायतनं उप्पज्जतीति?

अचित्तकानं उपपज्जन्तानं तेसं तत्थ धम्मायतनं उप्पज्जति, नो च तेसं तत्थ मनायतनं उप्पज्जति. सचित्तकानं उपपज्जन्तानं तेसं तत्थ धम्मायतनञ्च उप्पज्जति मनायतनञ्च उप्पज्जति.

(घ) पच्चनीकपुग्गलो

२८. (क) यस्स चक्खायतनं नुप्पज्जति तस्स सोतायतनं नुप्पज्जतीति?

अचक्खुकानं ससोतकानं उपपज्जन्तानं तेसं चक्खायतनं नुप्पज्जति, नो च तेसं सोतायतनं नुप्पज्जति. सब्बेसं चवन्तानं अचक्खुकानं असोतकानं उपपज्जन्तानं तेसं चक्खायतनञ्च नुप्पज्जति सोतायतनञ्च नुप्पज्जति.

(ख) यस्स वा पन सोतायतनं नुप्पज्जति तस्स चक्खायतनं नुप्पज्जतीति?

असोतकानं सचक्खुकानं उपपज्जन्तानं तेसं सोतायतनं नुप्पज्जति, नो च तेसं चक्खायतनं नुप्पज्जति. सब्बेसं चवन्तानं असोतकानं अचक्खुकानं उपपज्जन्तानं तेसं सोतायतनञ्च नुप्पज्जति चक्खायतनञ्च नुप्पज्जति.

(क) यस्स चक्खायतनं नुप्पज्जति तस्स घानायतनं नुप्पज्जतीति?

अचक्खुकानं सघानकानं उपपज्जन्तानं तेसं चक्खायतनं नुप्पज्जति, नो च तेसं घानायतनं नुप्पज्जति. सब्बेसं चवन्तानं अचक्खुकानं अघानकानं उपपज्जन्तानं तेसं चक्खायतनञ्च नुप्पज्जति घानायतनञ्च नुप्पज्जति.

(ख) यस्स वा पन घानायतनं नुप्पज्जति तस्स चक्खायतनं नुप्पज्जतीति?

अघानकानं सचक्खुकानं उपपज्जन्तानं तेसं घानायतनं नुप्पज्जति, नो च तेसं चक्खायतनं नुप्पज्जति. सब्बेसं चवन्तानं अघानकानं अचक्खुकानं उपपज्जन्तानं तेसं घानायतनञ्च नुप्पज्जति चक्खायतनञ्च नुप्पज्जति.

(क) यस्स चक्खायतनं नुप्पज्जति तस्स रूपायतनं नुप्पज्जतीति?

अचक्खुकानं सरूपकानं उपपज्जन्तानं तेसं चक्खायतनं नुप्पज्जति, नो च तेसं रूपायतनं नुप्पज्जति. सब्बेसं चवन्तानं अरूपकानं उपपज्जन्तानं तेसं चक्खायतनञ्च नुप्पज्जति रूपायतनञ्च नुप्पज्जति.

(ख) यस्स वा पन रूपायतनं नुप्पज्जति तस्स चक्खायतनं नुप्पज्जतीति? आमन्ता.

(क) यस्स चक्खायतनं नुप्पज्जति तस्स मनायतनं नुप्पज्जतीति?

अचक्खुकानं सचित्तकानं उपपज्जन्तानं तेसं चक्खायतनं नुप्पज्जति, नो च तेसं मनायतनं नुप्पज्जति. सब्बेसं चवन्तानं अचित्तकानं उपपज्जन्तानं तेसं चक्खायतनञ्च नुप्पज्जति मनायतनञ्च नुप्पज्जति.

(ख) यस्स वा पन मनायतनं नुप्पज्जति तस्स चक्खायतनं नुप्पज्जतीति? आमन्ता.

(क) यस्स चक्खायतनं नुप्पज्जति तस्स धम्मायतनं नुप्पज्जतीति?

अचक्खुकानं उपपज्जन्तानं तेसं चक्खायतनं नुप्पज्जति, नो च तेसं धम्मायतनं नुप्पज्जति. सब्बेसं चवन्तानं तेसं चक्खायतनञ्च नुप्पज्जति धम्मायतनञ्च नुप्पज्जति.

(ख) यस्स वा पन धम्मायतनं नुप्पज्जति तस्स चक्खायतनं नुप्पज्जतीति? आमन्ता. (चक्खायतनमूलकं)

२९. (क) यस्स घानायतनं नुप्पज्जति तस्स रूपायतनं नुप्पज्जतीति?

अघानकानं सरूपकानं उपपज्जन्तानं तेसं घानायतनं नुप्पज्जति, नो च तेसं रूपायतनं नुप्पज्जति. सब्बेसं चवन्तानं अरूपकानं उपपज्जन्तानं तेसं घानायतनञ्च नुप्पज्जति रूपायतनञ्च नुप्पज्जति.

(ख) यस्स वा पन रूपायतनं नुप्पज्जति तस्स घानायतनं नुप्पज्जतीति? आमन्ता.

(क) यस्स घानायतनं नुप्पज्जति तस्स मनायतनं नुप्पज्जतीति?

अघानकानं सचित्तकानं उपपज्जन्तानं तेसं घानायतनं नुप्पज्जति, नो च तेसं मनायतनं नुप्पज्जति. सब्बेसं चवन्तानं अचित्तकानं उपपज्जन्तानं तेसं घानायतनञ्च नुप्पज्जति मनायतनञ्च नुप्पज्जति.

(ख) यस्स वा पन मनायतनं नुप्पज्जति तस्स घानायतनं नुप्पज्जतीति? आमन्ता.

(क) यस्स घानायतनं नुप्पज्जति तस्स धम्मायतनं नुप्पज्जतीति?

अघानकानं उपपज्जन्तानं तेसं घानायतनं नुप्पज्जति, नो च तेसं धम्मायतनं नुप्पज्जति. सब्बेसं चवन्तानं तेसं घानायतनञ्च नुप्पज्जति धम्मायतनञ्च नुप्पज्जति.

(ख) यस्स वा पन धम्मायतनं नुप्पज्जति तस्स घानायतनं नुप्पज्जतीति? आमन्ता. (घानायतनमूलकं)

३०. (क) यस्स रूपायतनं नुप्पज्जति तस्स मनायतनं नुप्पज्जतीति?

अरूपकानं उपपज्जन्तानं तेसं रूपायतनं नुप्पज्जति, नो च तेसं मनायतनं नुप्पज्जति. सब्बेसं चवन्तानं तेसं रूपायतनञ्च नुप्पज्जति मनायतनञ्च नुप्पज्जति.

(ख) यस्स वा पन मनायतनं नुप्पज्जति तस्स रूपायतनं नुप्पज्जतीति?

अचित्तकानं उपपज्जन्तानं तेसं मनायतनं नुप्पज्जति, नो च तेसं रूपायतनं नुप्पज्जति. सब्बेसं चवन्तानं तेसं मनायतनञ्च नुप्पज्जति रूपायतनञ्च नुप्पज्जति.

(क) यस्स रूपायतनं नुप्पज्जति तस्स धम्मायतनं नुप्पज्जतीति?

अरूपकानं उपपज्जन्तानं तेसं रूपायतनं नुप्पज्जति, नो च तेसं धम्मायतनं नुप्पज्जति. सब्बेसं चवन्तानं तेसं रूपायतनञ्च नुप्पज्जति धम्मायतनञ्च नुप्पज्जति.

(ख) यस्स वा पन धम्मायतनं नुप्पज्जति तस्स रूपायतनं नुप्पज्जतीति? आमन्ता. (रूपायतनमूलकं)

३१. (क) यस्स मनायतनं नुप्पज्जति तस्स धम्मायतनं नुप्पज्जतीति?

अचित्तकानं उपपज्जन्तानं तेसं मनायतनं नुप्पज्जति, नो च तेसं धम्मायतनं नुप्पज्जति. सब्बेसं चवन्तानं तेसं मनायतनञ्च नुप्पज्जति धम्मायतनञ्च नुप्पज्जति.

(ख) यस्स वा पन धम्मायतनं नुप्पज्जति तस्स मनायतनं नुप्पज्जतीति? आमन्ता. (मनायतनमूलकं)

(ङ) पच्चनीकओकासो

३२. (क) यत्थ चक्खायतनं नुप्पज्जति तत्थ सोतायतनं नुप्पज्जतीति? आमन्ता.

(ख) यत्थ वा पन सोतायतनं नुप्पज्जति तत्थ चक्खायतनं नुप्पज्जतीति? आमन्ता.

(क) यत्थ चक्खायतनं नुप्पज्जति तत्थ घानायतनं नुप्पज्जतीति? आमन्ता.

(ख) यत्थ वा पन घानायतनं नुप्पज्जति तत्थ चक्खायतनं नुप्पज्जतीति?

रूपावचरे तत्थ घानायतनं नुप्पज्जति, नो च तत्थ चक्खायतनं नुप्पज्जति. असञ्ञसत्ते अरूपे तत्थ घानायतनञ्च नुप्पज्जति चक्खायतनञ्च नुप्पज्जति.

(क) यत्थ चक्खायतनं नुप्पज्जति तत्थ रूपायतनं नुप्पज्जतीति?

असञ्ञसत्ते तत्थ चक्खायतनं नुप्पज्जति, नो च तत्थ रूपायतनं नुप्पज्जति. अरूपे तत्थ चक्खायतनञ्च नुप्पज्जति रूपायतनञ्च नुप्पज्जति.

(ख) यत्थ वा पन रूपायतनं नुप्पज्जति तत्थ चक्खायतनं नुप्पज्जतीति? आमन्ता.

(क) यत्थ चक्खायतनं नुप्पज्जति तत्थ मनायतनं नुप्पज्जतीति?

अरूपे तत्थ चक्खायतनं नुप्पज्जति, नो च तत्थ मनायतनं नुप्पज्जति. असञ्ञसत्ते तत्थ चक्खायतनञ्च नुप्पज्जति मनायतनञ्च नुप्पज्जति.

(ख) यत्थ वा पन मनायतनं नुप्पज्जति तत्थ चक्खायतनं नुप्पज्जतीति? आमन्ता.

(क) यत्थ चक्खायतनं नुप्पज्जति तत्थ धम्मायतनं नुप्पज्जतीति? उप्पज्जति.

(ख) यत्थ वा पन धम्मायतनं नुप्पज्जति तत्थ चक्खायतनं नुप्पज्जतीति? नत्थि. (चक्खायतनमूलकं)

३३. (क) यत्थ घानायतनं नुप्पज्जति तत्थ रूपायतनं नुप्पज्जतीति?

रूपावचरे तत्थ घानायतनं नुप्पज्जति, नो च तत्थ रूपायतनं नुप्पज्जति. अरूपे तत्थ घानायतनञ्च नुप्पज्जति रूपायतनञ्च नुप्पज्जति.

(ख) यत्थ वा पन रूपायतनं नुप्पज्जति तत्थ घानायतनं नुप्पज्जतीति? आमन्ता.

(क) यत्थ घानायतनं नुप्पज्जति तत्थ मनायतनं नुप्पज्जतीति?

रूपावचरे अरूपावचरे तत्थ घानायतनं नुप्पज्जति, नो च तत्थ मनायतनं नुप्पज्जति. असञ्ञसत्ते तत्थ घानायतनञ्च नुप्पज्जति मनायतनञ्च नुप्पज्जति.

(ख) यत्थ वा पन मनायतनं नुप्पज्जति तत्थ घानायतनं नुप्पज्जतीति? आमन्ता.

(क) यत्थ घानायतनं नुप्पज्जति तत्थ धम्मायतनं नुप्पज्जतीति? उप्पज्जति.

(ख) यत्थ वा पन धम्मायतनं नुप्पज्जति तत्थ घानायतनं नुप्पज्जतीति? नत्थि. (घानायतनमूलकं)

३४. (क) यत्थ रूपायतनं नुप्पज्जति तत्थ मनायतनं नुप्पज्जतीति? उप्पज्जति.

(ख) यत्थ वा पन मनायतनं नुप्पज्जति तत्थ रूपायतनं नुप्पज्जतीति? उप्पज्जति.

(क) यत्थ रूपायतनं नुप्पज्जति तत्थ धम्मायतनं नुप्पज्जतीति? उप्पज्जति.

(ख) यत्थ वा पन धम्मायतनं नुप्पज्जति तत्थ रूपायतनं नुप्पज्जतीति? नत्थि. (रूपायतनमूलकं)

३५. (क) यत्थ मनायतनं नुप्पज्जति तत्थ धम्मायतनं नुप्पज्जतीति? उप्पज्जति.

(ख) यत्थ वा पन धम्मायतनं नुप्पज्जति तत्थ मनायतनं नुप्पज्जतीति? नत्थि. (मनायतनमूलकं)

(च) पच्चनीकपुग्गलोकासा

३६. (क) यस्स यत्थ चक्खायतनं नुप्पज्जति तस्स तत्थ सोतायतनं नुप्पज्जतीति?

अचक्खुकानं ससोतकानं उपपज्जन्तानं तेसं तत्थ चक्खायतनं नुप्पज्जति, नो च तेसं तत्थ सोतायतनं नुप्पज्जति. सब्बेसं चवन्तानं अचक्खुकानं असोतकानं उपपज्जन्तानं तेसं तत्थ चक्खायतनञ्च नुप्पज्जति सोतायतनञ्च नुप्पज्जति.

(ख) यस्स वा पन यत्थ सोतायतनं नुप्पज्जति तस्स तत्थ चक्खायतनं नुप्पज्जतीति?

असोतकानं सचक्खुकानं उपपज्जन्तानं तेसं तत्थ सोतायतनं नुप्पज्जति, नो च तेसं तत्थ चक्खायतनं नुप्पज्जति. सब्बेसं चवन्तानं असोतकानं अचक्खुकानं उपपज्जन्तानं तेसं तत्थ सोतायतनञ्च नुप्पज्जति चक्खायतनञ्च नुप्पज्जति…पे….

३७. (क) यस्स यत्थ मनायतनं नुप्पज्जति तस्स तत्थ धम्मायतनं नुप्पज्जतीति?

अचित्तकानं उपपज्जन्तानं तेसं तत्थ मनायतनं नुप्पज्जति, नो च तेसं तत्थ धम्मायतनं नुप्पज्जति. सब्बेसं चवन्तानं तेसं तत्थ मनायतनञ्च नुप्पज्जति धम्मायतनञ्च नुप्पज्जति.