५. पच्चुप्पन्नानागतवारो

२१०. (क) यो रूपक्खन्धं परिजानाति सो वेदनाक्खन्धं परिजानिस्सतीति? नो.

(ख) यो वा पन वेदनाक्खन्धं परिजानिस्सति सो रूपक्खन्धं परिजानातीति? नो.

(क) यो रूपक्खन्धं न परिजानाति सो वेदनाक्खन्धं न परिजानिस्सतीति?

ये मग्गं पटिलभिस्सन्ति ते रूपक्खन्धं न परिजानन्ति, नो च वेदनाक्खन्धं न परिजानिस्सन्ति. अरहा ये च पुथुज्जना मग्गं न पटिलभिस्सन्ति ते रूपक्खन्धञ्च न परिजानन्ति वेदनाक्खन्धञ्च न परिजानिस्सन्ति.

(ख) यो वा पन वेदनाक्खन्धं न परिजानिस्सति सो रूपक्खन्धं न परिजानातीति?

अग्गमग्गसमङ्गी वेदनाक्खन्धं न परिजानिस्सति, नो च रूपक्खन्धं न परिजानाति. अरहा ये च पुथुज्जना मग्गं न पटिलभिस्सन्ति ते वेदनाक्खन्धञ्च न परिजानिस्सन्ति रूपक्खन्धञ्च न परिजानन्ति.