६. अतीतानागतवारो

२११. (क) यो रूपक्खन्धं परिजानित्थ सो वेदनाक्खन्धं परिजानिस्सतीति? नो.

(ख) यो वा पन वेदनाक्खन्धं परिजानिस्सति सो रूपक्खन्धं परिजानित्थाति? नो.

(क) यो रूपक्खन्धं न परिजानित्थ सो वेदनाक्खन्धं न परिजानिस्सतीति?

ये मग्गं पटिलभिस्सन्ति ते रूपक्खन्धं न परिजानित्थ, नो च वेदनाक्खन्धं न परिजानिस्सन्ति. अग्गमग्गसमङ्गी ये च पुथुज्जना मग्गं न पटिलभिस्सन्ति ते रूपक्खन्धञ्च न परिजानित्थ वेदनाक्खन्धञ्च न परिजानिस्सन्ति.

(ख) यो वा पन वेदनाक्खन्धं न परिजानिस्सति सो रूपक्खन्धं न परिजानित्थाति?

अरहा वेदनाक्खन्धं न परिजानिस्सति, नो च रूपक्खन्धं न परिजानित्थ. अग्गमग्गसमङ्गी ये च पुथुज्जना मग्गं न पटिलभिस्सन्ति ते वेदनाक्खन्धञ्च न परिजानिस्सन्ति रूपक्खन्धञ्च न परिजानित्थ.

परिञ्ञावारो.

खन्धयमकपाळि निट्ठिता.

नमो तस्स भगवतो अरहतो सम्मासम्बुद्धस्स