४. पच्चुप्पन्नातीतवारो

२०९. (क) यो रूपक्खन्धं परिजानाति सो वेदनाक्खन्धं परिजानित्थाति? नो.

(ख) यो वा पन वेदनाक्खन्धं परिजानित्थ सो रूपक्खन्धं परिजानातीति? नो.

(क) यो रूपक्खन्धं न परिजानाति सो वेदनाक्खन्धं न परिजानित्थाति?

अरहा रूपक्खन्धं न परिजानाति, नो च वेदनाक्खन्धं न परिजानित्थ. अग्गमग्गसमङ्गिञ्च अरहन्तञ्च ठपेत्वा अवसेसा पुग्गला रूपक्खन्धञ्च न परिजानन्ति वेदनाक्खन्धञ्च न परिजानित्थ.

(ख) यो वा पन वेदनाक्खन्धं न परिजानित्थ सो रूपक्खन्धं न परिजानातीति?

अग्गमग्गसमङ्गी वेदनाक्खन्धं न परिजानित्थ, नो च रूपक्खन्धं न परिजानाति. अग्गमग्गसमङ्गिञ्च अरहन्तञ्च ठपेत्वा अवसेसा पुग्गला वेदनाक्खन्धञ्च न परिजानित्थ रूपक्खन्धञ्च न परिजानन्ति.