(५) पच्चुप्पन्नानागतवारो

(क) अनुलोमपुग्गलो

१८६. (क) यस्स रूपक्खन्धो उप्पज्जति तस्स वेदनाक्खन्धो निरुज्झिस्सतीति? आमन्ता.

(ख) यस्स वा पन वेदनाक्खन्धो निरुज्झिस्सति तस्स रूपक्खन्धो उप्पज्जतीति?

सब्बेसं चवन्तानं अरूपं उपपज्जन्तानं तेसं वेदनाक्खन्धो निरुज्झिस्सति, नो च तेसं रूपक्खन्धो उप्पज्जति. पञ्चवोकारं उपपज्जन्तानं असञ्ञसत्तं उपपज्जन्तानं तेसं वेदनाक्खन्धो च निरुज्झिस्सति रूपक्खन्धो च उप्पज्जति.

१८७. (क) यस्स वेदनाक्खन्धो उप्पज्जति तस्स सञ्ञाक्खन्धो निरुज्झिस्सतीति? आमन्ता.

(ख) यस्स वा पन सञ्ञाक्खन्धो निरुज्झिस्सति तस्स वेदनाक्खन्धो उप्पज्जतीति?

सब्बेसं चवन्तानं असञ्ञसत्तं उपपज्जन्तानं तेसं सञ्ञाक्खन्धो निरुज्झिस्सति, नो च तेसं वेदनाक्खन्धो उप्पज्जति. चतुवोकारं पञ्चवोकारं उपपज्जन्तानं तेसं सञ्ञाक्खन्धो च निरुज्झिस्सति वेदनाक्खन्धो च उप्पज्जति.

(ख) अनुलोमओकासो

१८८. यत्थ रूपक्खन्धो उप्पज्जति…पे….

(ग) अनुलोमपुग्गलोकासा

१८९. (क) यस्स यत्थ रूपक्खन्धो उप्पज्जति तस्स तत्थ वेदनाक्खन्धो निरुज्झिस्सतीति?

असञ्ञसत्तं उपपज्जन्तानं तेसं तत्थ रूपक्खन्धो उप्पज्जति, नो च तेसं तत्थ वेदनाक्खन्धो निरुज्झिस्सति. पञ्चवोकारं उपपज्जन्तानं तेसं तत्थ रूपक्खन्धो च उप्पज्जति वेदनाक्खन्धो च निरुज्झिस्सति.

(ख) यस्स वा पन यत्थ वेदनाक्खन्धो निरुज्झिस्सति तस्स तत्थ रूपक्खन्धो उप्पज्जतीति?

पञ्चवोकारा चवन्तानं अरूपानं तेसं तत्थ वेदनाक्खन्धो निरुज्झिस्सति, नो च तेसं तत्थ रूपक्खन्धो उप्पज्जति. पञ्चवोकारं उपपज्जन्तानं तेसं तत्थ वेदनाक्खन्धो च निरुज्झिस्सति रूपक्खन्धो च उप्पज्जति.

१९०. (क) यस्स यत्थ वेदनाक्खन्धो उप्पज्जति तस्स तत्थ सञ्ञाक्खन्धो निरुज्झिस्सतीति? आमन्ता.

(ख) यस्स वा पन यत्थ सञ्ञाक्खन्धो निरुज्झिस्सति तस्स तत्थ वेदनाक्खन्धो उप्पज्जतीति?

चतुवोकारा पञ्चवोकारा चवन्तानं तेसं तत्थ सञ्ञाक्खन्धो निरुज्झिस्सति, नो च तेसं तत्थ वेदनाक्खन्धो उप्पज्जति. चतुवोकारं पञ्चवोकारं उपपज्जन्तानं तेसं तत्थ सञ्ञाक्खन्धो च निरुज्झिस्सति वेदनाक्खन्धो च उप्पज्जति.

(घ) पच्चनीकपुग्गलो

१९१. (क) यस्स रूपक्खन्धो नुप्पज्जति तस्स वेदनाक्खन्धो न निरुज्झिस्सतीति?

सब्बेसं चवन्तानं अरूपं उपपज्जन्तानं तेसं रूपक्खन्धो नुप्पज्जति, नो च तेसं वेदनाक्खन्धो न निरुज्झिस्सति. परिनिब्बन्तानं तेसं रूपक्खन्धो च नुप्पज्जति वेदनाक्खन्धो च न निरुज्झिस्सति.

(ख) यस्स वा पन वेदनाक्खन्धो न निरुज्झिस्सति तस्स रूपक्खन्धो नुप्पज्जतीति? आमन्ता.

१९२. (क) यस्स वेदनाक्खन्धो नुप्पज्जति तस्स सञ्ञाक्खन्धो न निरुज्झिस्सतीति?

सब्बेसं चवन्तानं असञ्ञसत्तं उपपज्जन्तानं तेसं वेदनाक्खन्धो नुप्पज्जति, नो च तेसं सञ्ञाक्खन्धो न निरुज्झिस्सति. परिनिब्बन्तानं तेसं वेदनाक्खन्धो च नुप्पज्जति सञ्ञाक्खन्धो च न निरुज्झिस्सति.

(ख) यस्स वा पन सञ्ञाक्खन्धो न निरुज्झिस्सति तस्स वेदनाक्खन्धो नुप्पज्जतीति? आमन्ता.

(ङ) पच्चनीकओकासो

१९३. यत्थ रूपक्खन्धो नुप्पज्जति…पे….

(च) पच्चनीकपुग्गलोकासा

१९४. (क) यस्स यत्थ रूपक्खन्धो नुप्पज्जति तस्स तत्थ वेदनाक्खन्धो न निरुज्झिस्सतीति?

पञ्चवोकारा चवन्तानं अरूपानं तेसं तत्थ रूपक्खन्धो नुप्पज्जति, नो च तेसं तत्थ वेदनाक्खन्धो न निरुज्झिस्सति. परिनिब्बन्तानं असञ्ञसत्ता चवन्तानं तेसं तत्थ रूपक्खन्धो च नुप्पज्जति वेदनाक्खन्धो च न निरुज्झिस्सति.

(ख) यस्स वा पन यत्थ वेदनाक्खन्धो न निरुज्झिस्सति तस्स तत्थ रूपक्खन्धो नुप्पज्जतीति?

असञ्ञसत्तं उपपज्जन्तानं तेसं तत्थ वेदनाक्खन्धो न निरुज्झिस्सति, नो च तेसं तत्थ रूपक्खन्धो नुप्पज्जति. परिनिब्बन्तानं असञ्ञसत्ता चवन्तानं तेसं तत्थ वेदनाक्खन्धो च न निरुज्झिस्सति रूपक्खन्धो च नुप्पज्जति.

१९५. (क) यस्स यत्थ वेदनाक्खन्धो नुप्पज्जति तस्स तत्थ सञ्ञाक्खन्धो न निरुज्झिस्सतीति?

चतुवोकारा पञ्चवोकारा चवन्तानं तेसं तत्थ वेदनाक्खन्धो नुप्पज्जति, नो च तेसं तत्थ सञ्ञाक्खन्धो न निरुज्झिस्सति. परिनिब्बन्तानं असञ्ञसत्तानं तेसं तत्थ वेदनाक्खन्धो च नुप्पज्जति सञ्ञाक्खन्धो च न निरुज्झिस्सति.

(ख) यस्स वा पन यत्थ सञ्ञाक्खन्धो न निरुज्झिस्सति तस्स तत्थ वेदनाक्खन्धो नुप्पज्जतीति? आमन्ता.