(१) पच्चुप्पन्नवारो

(क) अनुलोमपुग्गलो

१५३. (क) यस्स रूपक्खन्धो उप्पज्जति तस्स वेदनाक्खन्धो निरुज्झतीति? नो.

(ख) यस्स वा पन वेदनाक्खन्धो निरुज्झति तस्स रूपक्खन्धो उप्पज्जतीति? नो.

१५४. (क) यस्स वेदनाक्खन्धो उप्पज्जति तस्स सञ्ञाक्खन्धो निरुज्झतीति? नो.

(ख) यस्स वा पन सञ्ञाक्खन्धो निरुज्झति तस्स वेदनाक्खन्धो उप्पज्जतीति? नो.

(ख) अनुलोमओकासो

१५५. (क) यत्थ रूपक्खन्धो उप्पज्जति तत्थ वेदनाक्खन्धो निरुज्झतीति?

असञ्ञसत्ते तत्थ रूपक्खन्धो उप्पज्जति, नो च तत्थ वेदनाक्खन्धो निरुज्झति. पञ्चवोकारे तत्थ रूपक्खन्धो च उप्पज्जति वेदनाक्खन्धो च निरुज्झति.

(ख) यत्थ वा पन वेदनाक्खन्धो निरुज्झति तत्थ रूपक्खन्धो उप्पज्जतीति?

अरूपे तत्थ वेदनाक्खन्धो निरुज्झति, नो च तत्थ रूपक्खन्धो उप्पज्जति. पञ्चवोकारे तत्थ वेदनाक्खन्धो च निरुज्झति रूपक्खन्धो च उप्पज्जति.

१५६. (क) यत्थ वेदनाक्खन्धो उप्पज्जति तत्थ सञ्ञाक्खन्धो निरुज्झतीति? आमन्ता.

(ख) यत्थ वा पन सञ्ञाक्खन्धो निरुज्झति तत्थ वेदनाक्खन्धो उप्पज्जतीति? आमन्ता.

(ग) अनुलोमपुग्गलोकासा

१५७. (क) यस्स यत्थ रूपक्खन्धो उप्पज्जति तस्स तत्थ वेदनाक्खन्धो निरुज्झतीति? नो.

(ख) यस्स वा पन यत्थ वेदनाक्खन्धो निरुज्झति तस्स तत्थ रूपक्खन्धो उप्पज्जतीति? नो.

१५८. (क) यस्स यत्थ वेदनाक्खन्धो उप्पज्जति तस्स तत्थ सञ्ञाक्खन्धो निरुज्झतीति? नो.

(ख) यस्स वा पन यत्थ सञ्ञाक्खन्धो निरुज्झति तस्स तत्थ वेदनाक्खन्धो उप्पज्जतीति? नो.

(घ) पच्चनीकपुग्गलो

१५९. (क) यस्स रूपक्खन्धो नुप्पज्जति तस्स वेदनाक्खन्धो न निरुज्झतीति?

चतुवोकारा पञ्चवोकारा चवन्तानं तेसं रूपक्खन्धो नुप्पज्जति, नो च तेसं वेदनाक्खन्धो न निरुज्झति. अरूपं उपपज्जन्तानं असञ्ञसत्ता चवन्तानं तेसं रूपक्खन्धो च नुप्पज्जति वेदनाक्खन्धो च न निरुज्झति.

(ख) यस्स वा पन वेदनाक्खन्धो न निरुज्झति तस्स रूपक्खन्धो नुप्पज्जतीति?

पञ्चवोकारं उपपज्जन्तानं असञ्ञसत्तं उपपज्जन्तानं तेसं वेदनाक्खन्धो न निरुज्झति, नो च तेसं रूपक्खन्धो नुप्पज्जति. अरूपं उपपज्जन्तानं असञ्ञसत्ता चवन्तानं तेसं वेदनाक्खन्धो च न निरुज्झति रूपक्खन्धो च नुप्पज्जति.

१६०. (क) यस्स वेदनाक्खन्धो नुप्पज्जति तस्स सञ्ञाक्खन्धो न निरुज्झतीति?

चतुवोकारा पञ्चवोकारा चवन्तानं तेसं वेदनाक्खन्धो नुप्पज्जति, नो च तेसं सञ्ञाक्खन्धो न निरुज्झति. असञ्ञसत्तानं तेसं वेदनाक्खन्धो च नुप्पज्जति सञ्ञाक्खन्धो च न निरुज्झति.

(ख) यस्स वा पन सञ्ञाक्खन्धो न निरुज्झति तस्स वेदनाक्खन्धो नुप्पज्जतीति?

चतुवोकारं पञ्चवोकारं उपपज्जन्तानं तेसं सञ्ञाक्खन्धो न निरुज्झति, नो च तेसं वेदनाक्खन्धो नुप्पज्जति. असञ्ञसत्तानं तेसं सञ्ञाक्खन्धो च न निरुज्झति वेदनाक्खन्धो च नुप्पज्जति.

(ङ) पच्चनीकओकासो

१६१. (क) यत्थ रूपक्खन्धो नुप्पज्जति तत्थ वेदनाक्खन्धो न निरुज्झतीति? निरुज्झति.

(ख) यत्थ वा पन वेदनाक्खन्धो न निरुज्झति तत्थ रूपक्खन्धो नुप्पज्जतीति? उप्पज्जति.

१६२. (क) यत्थ वेदनाक्खन्धो नुप्पज्जति तत्थ सञ्ञाक्खन्धो न निरुज्झतीति? आमन्ता.

(ख) यत्थ वा पन सञ्ञाक्खन्धो न निरुज्झति तत्थ वेदनाक्खन्धो नुप्पज्जतीति? आमन्ता.

(च) पच्चनीकपुग्गलोकासा

१६३. (क) यस्स यत्थ रूपक्खन्धो नुप्पज्जति तस्स तत्थ वेदनाक्खन्धो न निरुज्झतीति?

चतुवोकारा पञ्चवोकारा चवन्तानं तेसं तत्थ रूपक्खन्धो नुप्पज्जति, नो च तेसं तत्थ वेदनाक्खन्धो न निरुज्झति. अरूपं उपपज्जन्तानं असञ्ञसत्ता चवन्तानं तेसं तत्थ रूपक्खन्धो नुप्पज्जति वेदनाक्खन्धो च न निरुज्झति.

(ख) यस्स वा पन यत्थ वेदनाक्खन्धो न निरुज्झति तस्स तत्थ रूपक्खन्धो नुप्पज्जतीति?

पञ्चवोकारं उपपज्जन्तानं असञ्ञसत्तं उपपज्जन्तानं तेसं तत्थ वेदनाक्खन्धो न निरुज्झति, नो च तेसं तत्थ रूपक्खन्धो नुप्पज्जति. अरूपं उपपज्जन्तानं असञ्ञसत्ता चवन्तानं तेसं तत्थ वेदनाक्खन्धो च न निरुज्झति रूपक्खन्धो च नुप्पज्जति.

१६४. (क) यस्स यत्थ वेदनाक्खन्धो नुप्पज्जति तस्स तत्थ सञ्ञाक्खन्धो न निरुज्झतीति?

चतुवोकारा पञ्चवोकारा चवन्तानं तेसं तत्थ वेदनाक्खन्धो नुप्पज्जति, नो च तेसं तत्थ सञ्ञाक्खन्धो न निरुज्झति. असञ्ञसत्तानं तेसं तत्थ वेदनाक्खन्धो च नुप्पज्जति सञ्ञाक्खन्धो च न निरुज्झति.

(ख) यस्स वा पन यत्थ सञ्ञाक्खन्धो न निरुज्झति तस्स तत्थ वेदनाक्खन्धो नुप्पज्जतीति?

चतुवोकारं पञ्चवोकारं उपपज्जन्तानं तेसं तत्थ सञ्ञाक्खन्धो न निरुज्झति, नो च तेसं तत्थ वेदनाक्खन्धो नुप्पज्जति. असञ्ञसत्तानं तेसं तत्थ सञ्ञाक्खन्धो च न निरुज्झति वेदनाक्खन्धो च नुप्पज्जति.