(५) पच्चुप्पन्नानागतवारो

(क) अनुलोमपुग्गलो

१३३. (क) यस्स रूपक्खन्धो निरुज्झति तस्स वेदनाक्खन्धो निरुज्झिस्सतीति?

पञ्चवोकारे परिनिब्बन्तानं तेसं रूपक्खन्धो निरुज्झति, नो च तेसं वेदनाक्खन्धो निरुज्झिस्सति. इतरेसं पञ्चवोकारा चवन्तानं असञ्ञसत्ता चवन्तानं तेसं रूपक्खन्धो च निरुज्झति वेदनाक्खन्धो च निरुज्झिस्सति.

(ख) यस्स वा पन वेदनाक्खन्धो निरुज्झिस्सति तस्स रूपक्खन्धो निरुज्झतीति?

सब्बेसं उपपज्जन्तानं अरूपा चवन्तानं तेसं वेदनाक्खन्धो निरुज्झिस्सति, नो च तेसं रूपक्खन्धो निरुज्झति. पञ्चवोकारा चवन्तानं असञ्ञसत्ता चवन्तानं तेसं वेदनाक्खन्धो च निरुज्झिस्सति रूपक्खन्धो च निरुज्झति.

१३४. (क) यस्स वेदनाक्खन्धो निरुज्झति तस्स सञ्ञाक्खन्धो निरुज्झिस्सतीति?

परिनिब्बन्तानं तेसं वेदनाक्खन्धो निरुज्झति, नो च तेसं सञ्ञाक्खन्धो निरुज्झिस्सति. इतरेसं चतुवोकारा पञ्चवोकारा चवन्तानं तेसं वेदनाक्खन्धो च निरुज्झति सञ्ञाक्खन्धो च निरुज्झिस्सति.

(ख) यस्स वा पन सञ्ञाक्खन्धो निरुज्झिस्सति तस्स वेदनाक्खन्धो निरुज्झतीति?

सब्बेसं उपपज्जन्तानं असञ्ञसत्ता चवन्तानं तेसं सञ्ञाक्खन्धो निरुज्झिस्सति, नो च तेसं वेदनाक्खन्धो निरुज्झति. चतुवोकारा पञ्चवोकारा चवन्तानं तेसं सञ्ञाक्खन्धो च निरुज्झिस्सति वेदनाक्खन्धो निरुज्झति.

(ख) अनुलोमओकासो

१३५. यत्थ रूपक्खन्धो निरुज्झति…पे….

(ग) अनुलोमपुग्गलोकासा

१३६. (क) यस्स यत्थ रूपक्खन्धो निरुज्झति तस्स तत्थ वेदनाक्खन्धो निरुज्झिस्सतीति?

पञ्चवोकारे परिनिब्बन्तानं असञ्ञसत्ता चवन्तानं तेसं तत्थ रूपक्खन्धो निरुज्झति, नो च तेसं तत्थ वेदनाक्खन्धो निरुज्झिस्सति. इतरेसं पञ्चवोकारा चवन्तानं तेसं तत्थ रूपक्खन्धो च निरुज्झति वेदनाक्खन्धो च निरुज्झिस्सति.

(ख) यस्स वा पन यत्थ वेदनाक्खन्धो निरुज्झिस्सति तस्स तत्थ रूपक्खन्धो निरुज्झतीति?

पञ्चवोकारं उपपज्जन्तानं अरूपानं तेसं तत्थ वेदनाक्खन्धो निरुज्झिस्सति, नो च तेसं तत्थ रूपक्खन्धो निरुज्झति. पञ्चवोकारा चवन्तानं तेसं तत्थ वेदनाक्खन्धो च निरुज्झिस्सति रूपक्खन्धो च निरुज्झति.

१३७. (क) यस्स यत्थ वेदनाक्खन्धो निरुज्झति तस्स तत्थ सञ्ञाक्खन्धो निरुज्झिस्सतीति?

परिनिब्बन्तानं तेसं तत्थ वेदनाक्खन्धो निरुज्झति, नो च तेसं तत्थ सञ्ञाक्खन्धो निरुज्झिस्सति. इतरेसं चतुवोकारा पञ्चवोकारा चवन्तानं तेसं तत्थ वेदनाक्खन्धो च निरुज्झति सञ्ञाक्खन्धो च निरुज्झिस्सति.

(ख) यस्स वा पन यत्थ सञ्ञाक्खन्धो निरुज्झिस्सति तस्स तत्थ वेदनाक्खन्धो निरुज्झतीति?

चतुवोकारं पञ्चवोकारं उपपज्जन्तानं तेसं तत्थ सञ्ञाक्खन्धो निरुज्झिस्सति, नो च तेसं तत्थ वेदनाक्खन्धो निरुज्झति. चतुवोकारा पञ्चवोकारा चवन्तानं तेसं तत्थ सञ्ञाक्खन्धो च निरुज्झिस्सति वेदनाक्खन्धो च निरुज्झति.

(घ) पच्चनीकपुग्गलो

१३८. (क) यस्स रूपक्खन्धो न निरुज्झति तस्स वेदनाक्खन्धो न निरुज्झिस्सतीति?

सब्बेसं उपपज्जन्तानं अरूपा चवन्तानं तेसं रूपक्खन्धो न निरुज्झति, नो च तेसं वेदनाक्खन्धो न निरुज्झिस्सति. अरूपे परिनिब्बन्तानं तेसं रूपक्खन्धो च न निरुज्झति वेदनाक्खन्धो च न निरुज्झिस्सति.

(ख) यस्स वा पन वेदनाक्खन्धो न निरुज्झिस्सति तस्स रूपक्खन्धो न निरुज्झतीति?

पञ्चवोकारे परिनिब्बन्तानं तेसं वेदनाक्खन्धो न निरुज्झिस्सति, नो च तेसं रूपक्खन्धो न निरुज्झति. अरूपे परिनिब्बन्तानं तेसं वेदनाक्खन्धो च न निरुज्झिस्सति रूपक्खन्धो च न निरुज्झति.

१३९. (क) यस्स वेदनाक्खन्धो न निरुज्झति तस्स सञ्ञाक्खन्धो न निरुज्झिस्सतीति? निरुज्झिस्सति.

(ख) यस्स वा पन सञ्ञाक्खन्धो न निरुज्झिस्सति तस्स वेदनाक्खन्धो न निरुज्झतीति? निरुज्झति.

(ङ) पच्चनीकओकासो

१४०. यत्थ रूपक्खन्धो न निरुज्झति…पे….

(च) पच्चनीकपुग्गलोकासा

१४१. (क) यस्स यत्थ रूपक्खन्धो न निरुज्झति तस्स तत्थ वेदनाक्खन्धो न निरुज्झिस्सतीति?

पञ्चवोकारं उपपज्जन्तानं अरूपानं तेसं तत्थ रूपक्खन्धो न निरुज्झति, नो च तेसं तत्थ वेदनाक्खन्धो न निरुज्झिस्सति. अरूपे परिनिब्बन्तानं असञ्ञसत्तं उपपज्जन्तानं तेसं तत्थ रूपक्खन्धो च न निरुज्झति वेदनाक्खन्धो च न निरुज्झिस्सति.

(ख) यस्स वा पन यत्थ वेदनाक्खन्धो न निरुज्झिस्सति तस्स तत्थ रूपक्खन्धो न निरुज्झतीति?

पञ्चवोकारे परिनिब्बन्तानं असञ्ञसत्ता चवन्तानं तेसं तत्थ वेदनाक्खन्धो न निरुज्झिस्सति, नो च तेसं तत्थ रूपक्खन्धो न निरुज्झति. अरूपे परिनिब्बन्तानं असञ्ञसत्तं उपपज्जन्तानं तेसं तत्थ वेदनाक्खन्धो च न निरुज्झिस्सति रूपक्खन्धो च न निरुज्झति.

१४२. (क) यस्स यत्थ वेदनाक्खन्धो न निरुज्झति तस्स तत्थ सञ्ञाक्खन्धो न निरुज्झिस्सतीति?

चतुवोकारं पञ्चवोकारं उपपज्जन्तानं तेसं तत्थ वेदनाक्खन्धो न निरुज्झति, नो च तेसं तत्थ सञ्ञाक्खन्धो न निरुज्झिस्सति. असञ्ञसत्तानं तेसं तत्थ वेदनाक्खन्धो च न निरुज्झति सञ्ञाक्खन्धो च न निरुज्झिस्सति.

(ख) यस्स वा पन यत्थ सञ्ञाक्खन्धो न निरुज्झिस्सति तस्स तत्थ वेदनाक्खन्धो न निरुज्झतीति?

परिनिब्बन्तानं तेसं तत्थ सञ्ञाक्खन्धो न निरुज्झिस्सति, नो च तेसं तत्थ वेदनाक्खन्धो न निरुज्झति. असञ्ञसत्तानं तेसं तत्थ सञ्ञाक्खन्धो च न निरुज्झिस्सति वेदनाक्खन्धो च न निरुज्झति.